HeˬByehˇ 12

Aˬ dui-euˬ Aˬda pyeuꞈ-eu Miˬyehˇ

1Jah-eu jeˬ gaˇ kawˆ saˇ kiˇ kamˬ-euˬ tsawˇ haˬ kʼoeˇ deuˬ, aˬ dui-euˬ tiˬ jawˬ tiˬ byah ni jawˇ luꞈ ma. Kʼoeˇ miˇ neh, gaˇ ma-ahˇ kʼaˇ jaˆ tsoeˬ-eu yawˬ jeˬ na luꞈ-ahˇ aˬ dui teuˆ lehˆ-awˇ, aˬ dui-ahˇ deuˇ geuˆ ni lahˇ cuꞈ taꞈ-euˬ iˬ baˇ-ahˇ behˇ lehˆ-awˇ, aˬ dui mehˬ shi laˆ saˆ taˬ-euˬ cehˆ ceh ceh-eu gaˇ ma-ahˇ nui ma ziꞈ dah ni cehˆ gʼeh kaˇ-euˇ. 2Aˬ dui-euˬ myaˆ nuiˆ Yeˬsuˇ-ahˇ haw tsoˆ taˬ kaˇ-euˇ. Aˬ dui Miˬyehˇ-ahˇ aˇ dahˬ beh ngeh neh aˇ saˬ saˬ ngeh keuˆ ni jah-euˬ-aˬ, aˬ yawꞈ baˬ da neh ma. Laꞈ yaꞈ baˬ da neh aˬ yawꞈ nui ma maˬ cawˆ-a. Aˬ yawꞈ-euˬ mehˬ shi jaˆ luꞈ-eu laˬ kʼaˬ cehˇ-eu jeˬ baˬ da neh, laꞈ yaꞈ kʼoeˇ taˆ ya shiˇ-eu daˬ ga dui dui-eu jeˬ-ahˇ aˬ yawꞈ kʼahˬ maˬ lahˇ-a. Nymˬ-mˇ aˬ yawꞈ Miˬyehˇ-euˬ dzoeˬ dzaˬ nuiˇ mahˬ-euˬ aˇ maˇ paw nuiˇ luꞈ-eu meh.

3Aˬ yawꞈ aˇ naˆ ni ya daˬ dzeuˇ yaꞈ-euˬ gaˇ shaˇ noeˬ haw sheˇ. Aˬ yawꞈ-ahˇ muiˇ-eu iˬ baˇ zaˬ deuˬ-euˬ laꞈ-ahˇ aˬ yawꞈ aˇ naˆ ni ya daˬ-euˬ nga. Kʼoeˇ miˇ neh, naw maꞈ nui ma baˬ-awˇ Miˬyehˇ-ahˇ jah-eu jeˬ-ahˇ taˬ byehˇ dzeh. 4Aˬ jeˬ miˇ neh ehˇ naˇ, naw maꞈ iˬ baˇ-ahˇ deuˆ ceh ceh-eu kʼoeˇ-aˬ, shiˇ-eu aˇ tiˆ-ahˇ maˬ keuˆ-a siˬ. 5Miˬyehˇ naw maꞈ-ahˇ aˬ yawꞈ-euˬ zaˬ deuˬ loꞈ-ehˇ sawˇ-awˇ gʼaˬ biꞈ-euˬ dawˬ-ahˇ naw maꞈ ngehˇ-euˬ te loˇ.

“Ngaˬli nawˇ dehꞈ lehˬ-euˬ miˇ neh,

Sahˬpaˬ Miˬyehˇ mehˬ ngeh tsoˆ ngeh,

yaw muiˬ paˬ-ehˇ naˇ haˬ geuꞈ-awˬ.

Aˬ yawꞈ nawˬ-ahˇ zuiˆ-awˇ mehˬ ngeh,

nui ma taˬ baˬ, nui ma taˬcawˆ.

6Aˬ jeˬ miˇ neh ehˇnaˇ,

Sahˬpaˬ Miˬyehˇ gaˬ-eu gʼaˬ-ahˇ,

aˬ yawꞈ mehˬ paˇ tsoˆ paˇ nehˬ-awˇ,

Yawꞈ-euˬ zaˬ lehˇ sawˇ-euˬ gʼaˬ-ahˇ,

aˬ yawꞈ diˬ paˇ dzaw paˇ-eu meh.”

7Naw maꞈ ya daˬ luꞈ-eu jeˬ-ahˇ aˬ da neh diˬ paˇ dzaw paˇ nehˬ laꞈ-euˬ jeˬ loꞈ-ehˇ sawˇ-eu laꞈ kʼoeˇ, oˇ-awˇ daˬ-awˬ. Naw maꞈ ya daˬ-eu kʼoeˇ-aˬ, Miˬyehˇ naw maꞈ-ahˇ aˬ yawꞈ-euˬ zaˬ loꞈ-ehˇ sawˇ-eu saˇ kiˇ pyeuꞈ-eu meh. 8Aˬ yawꞈ-euˬ zaˬ deuˬ-ahˇ diˬ-eu loꞈ-ehˇ naw maꞈ-ahˇ maˬ diˬ naˇ, naw maꞈ-aˬ, aˬ yawꞈ-euˬ zaˬ maˇ maˇ ni maˬ ngeuˇ-a. Gʼoˆ baˬ laꞈ nyiˇ-euˬ zaˬ-ahˇ duˇ-eu meh. 9Aˬ dui-euˬ zaˬ baw aˬ da deuˬ kʼawꞈ, aˬ dui-ahˇ diˬ laˇ-eu meh. Ehˇ kʼawꞈ, yawˬ ha-euˬ aˬ da-ahˇ aˬ dui yaw zeu baw-eu ma. Toˆ-ehˇ ngeuˇ naˇ, mˬ kʼoeˇ taˆ jawˇ-eu aˬ dui-euˬ Aˬ da pyeuꞈ-eu Miˬyehˇ-ahˇ aˬ dui aˇ naˆ ni yaw zeu baw-awˇ dehꞈ paˬ nga. 10Aˬ dui-euˬ zaˬ baw aˬ da deuˬ-aˬ aˬ yawꞈ maꞈ neh tsaˬ meh lehˇ noeˬ-euˬ loꞈ-ehˇ aˬ dui-ahˇ tiˬ kʼehˇ laˇ kʼehˬ mehˬ paˇ zuiˆ paˇ-eu meh. Ehˇ kʼawꞈ, Miˬyehˇ aˬ dui-ahˇ mehˬ-eu zuiˆ-eu kʼoeˇ-aˬ, aˬ dui gʼaˇ duˬ muiˬ ni mˇ-eu jeˬ pyeuꞈ-eu meh. Aˬ yawꞈ loꞈ-ehˇ bi muiˬ bi shawˇ laˇ-eu gʼaˇ duˬ mˇ-eu meh. 11Aˬ dui-ahˇ kʼehˬ nehˬ kʼaˆ nehˬ laꞈ gaˇ ya daˬ ngeh, aˬ dui-ahˇ bi noeˬ shaˬ laꞈ gaˇ duˇ-awˇ, laˬ kʼaˬ maˬ cehˇ nya-a. Ehˇ kʼawꞈ, kʼoeˇ loꞈ-ehˇ bi kʼehˬ bi kʼaˆ-euˬ tsawˇ haˬ-aˬ, aˇ nah yaw tsaˬ yaw dawˇ dawˇ-ehˇ dehꞈ-awˇ nui saˇ oꞈ-eu guiˬ lahˬ za-eu meh.

Miˬyehˇ-ahˇ maˬ ya byehˇ dzeh-eu gʼaˇ duˬ yahˇ-awˬ

12Kʼoeˇ miˇ neh, laꞈ guˬ shiˇ laˇ-euˬ naw maꞈ-euˬ aˬ laꞈ paˇ cawˬ diˇ-awˇ, gʼaˬ juˬ laˇ-euˬ naw maꞈ-euˬ pawˬ tsuiꞈ gʼaˬ paˇ bi ahˇ kʼoꞈ laˇ-awˬ. 13Kuiˇ shiˇ shiˇ-eu tsawˇ haˬ yoeˬ tsuiꞈ maˬ bi jiˆ paˇ-iˇ-eu uˬ taꞈ, bi taˬ leˇ nya-eu gʼaˇ duˬ yaw tsaˬ yaw dawˇ gaˇ ma-ahˇ cah-awˬ.

14Tsawˇ haˬ yawˬ gʼaˬ na luꞈ nehˬ-ehˇ tsaˬ leˇ tsahˇ leˇ-eu laꞈ kʼoeˇ yaw muiˬ yaw shawˇ shawˇ-ehˇ dehꞈ-awˬ. Kʼoeˇ loꞈ-ehˇ maˬ dehꞈ naˇ, tsawˇ haˬ tiˬ gʼaˬ-iˬ Sahˬpaˬ Miˬyehˇ-ahˇ maˬ mawˇ nya-a. 15Miˬyehˇ-euˬ guiˬ lahˬ-ahˇ maˬ ya byehˇ dzeh ni yahˇ-awˬ. Kʼaˬ dui dui-eu baw duˆ mehˇ laˇ-awˇ aˬ yawꞈ-euˬ doꞈ kʼoeˇ neh aˬ cawˬ-ahˇ laˆ bahˬ laˆ muˆ-eu loꞈ-ehˇ, tsawˇ haˬ tiˬ gʼaˬ-iˬ taˬ bi pyeuꞈ. 16Aˬ li aˬ yuiꞈ-ahˇ oꞈ-eu aˇ yaˬ-ahˇ hawˬ tiˬ byawˇ neh paˇ dzeh-euˬ Iˇsawˇ loꞈ-ehˇ, tsawˇ haˬ tiˬ gʼaˬ-iˬ kʼaˬ miˬ sheu-awˇ Miˬyehˇ-ahˇ yaw zeu maˬ baw-eu tsawˇ haˬ maˬ ya bi pyeuꞈ ni yahˇ-awˬ. 17Aˇ nah hawˇ-eu aˬ da neh dawˬ ngehˬ gʼeh nehˬ-euˬ guiˬ lahˬ-ahˇ Iˇsawˇ geuꞈ mawꞈ-eu gaˇ kawˆ naw maꞈ siˬ nya meh. Ehˇ kʼawꞈ, aˬ yawꞈ-ahˇ byehˇ dzeh nehˬ gaˇ ya daˬ-euˬ meh. Aˬ jeˬ miˇ neh ehˇ naˇ, aˬ yawꞈ myaˆ biˇ doˆ doˆ-ehˇ aˇ naˆ ni leh jeh-euˬ kʼawꞈ, aˬ yawꞈ neh mˇ dzeuˇ-euˬ jeˬ-ahˇ maˬ paˇ laˆ paˇ nya meh.

18Naw maꞈ-aˬ, Iˇsaˬleˬlaˇ tsawˇ haˬ kʼoeˇ deuˬ loꞈ-ehˇ toeˬ haw sawˆ haw nya-eu Siˇnaˆ gawˬ jawˬ-ahˇ laˇ-euˬ maˬ ngeuˇ-a. Aˬ yawꞈ maꞈ-aˬ, miˬ dzaˬ doꞈ luꞈ-eu Siˇnaˆ gawˬ jawˬ-ahˇ, zahˇ dui dui gaˇ maˬ ehˇ, jaˬ lehˇ lehˇ ma baw gaˇ maˬ ehˇ, 19daˇ heh teˇ saˇ-ahˇ maˬ ehˇ, dawˬ ngehˬ-eu teˇ saˇ-ahˇ maˬ ehˇ, ya gaˬ ya mawˇ-euˬ meh. 20Aˬ jeˬ miˇ neh ehˇ naˇ, “Gawˬ jawˬ heu jawˬ-ahˇ kʼaˇ tahˬ ciˆ-euˬ jeˬ zaˬ tiˬ mawˇ-ahˇ keuˆ ni, kʼaˬ lo neh biˬ sehꞈ gaˇ ya daˬ meh” lehˇ ehˇ taˬ-euˬ dawˬ kʼoeˇ dawˬ-ahˇ aˬ yawꞈ maꞈ maˬ pi coeˇ-a. 21Aˬ yawꞈ maꞈ myaˆ ya mawˇ-euˬ kʼoeˇ-aˬ, guˆ dui dui laˇ paˬ-ehˇ gʼeh-eu miˇ neh, “Ngaˇ guˆ dui dui-awˇ, yaw dzuˬ dzuˬ dui dui nya” lehˇ Moˇseˬ ehˇ-eu meh.

22Ehˇ kʼawꞈ, naw maꞈ-aˬ, Ziˇoˬ gawˬ jawˬ hawˇ-eu dehꞈ luꞈ-eu Miˬyehˇ-euˬ meuˬ-ahˇ laˇ-euˬ meh. Kʼoeˇ-aˬ, mˬ taˆ gʼaˬ kʼehˇ aˇ muiˇ aˇ seh jawˇ-eu mˬ taˆ-euˬ Yeˬluˇsaˬlehˬ meuˬ meh. 23Mˬ kʼoeˇ taˆ tsawˇ myahˇ bi boꞈ ahˇ taˬ-euˬ deuˬ pyeuꞈ-eu, dehꞈ beh beh le-euˬ Miˬyehˇ-euˬ zaˬ deuˬ laˬ kʼaˬ tiˬ cehˇ uiˬ leˇ taˬ-euˬ gaˇ naw maꞈ laˇ-euˬ jeˬ pyeuꞈ-eu meh. Tsawˇ haˬ zaˬ dawˬ tawˆ luꞈ-ahˇ yaˇ kʼaˬ daˇ-eu gʼaˬ pyeuꞈ-awˇ, tsawˇ muiˬ deuˬ-euˬ saꞈ laˇ-ahˇ bi muiˬ bi byah laˇ-eu gʼaˬ pyeuꞈ-eu Miˬyehˇ jawˇ gaˇ naw maꞈ laˇ-euˬ jeˬ pyeuꞈ-eu meh. 24Dawˬ ma saˇ jaˇ yaw shuiꞈ lehˬ hmˬ laˆ saˆ-euˬ gʼaˬ pyeuꞈ-eu Yeˬsuˇ jawˇ gaˇ maˬ ehˇ, Aˬbeˬlaˆ-euˬ shiˬ naˆ maˬ tseˇ baoˬ huiˬ dzehˬ-eu saˇ jaˇ dawˬ kawˬ pyeuꞈ-eu byaˆ shehˬ-euˬ shiˬ jaˆ gaˇ maˬ ehˇ, naw maꞈ laˇ-euˬ jeˬ pyeuꞈ-eu meh.

25Naw maꞈ-ahˇ ngehˬ cawˬ luꞈ-eu gʼaˬ-euˬ dawˬ-ahˇ maˬ naˇ haˬ-ehˇ maˬ ya gʼeh ni yahˇ-awˬ. Miˇ tsaˬ heu kʼoeˇ taˆ Miˬyehˇ-euˬ dawˬ bi ngehˬ le-euˬ gʼaˬ-ahˇ maˬ naˇ haˬ geuꞈ-euˬ tsawˇ haˬ deuˬ kʼawꞈ maˬ dzeuˇ-iˇ nya-euˬ-aˬ, mˬ taˆ neh dawˬ ngehˬ leꞈ-euˬ gʼaˬ-euˬ dawˬ-ahˇ aˬ dui maˬ naˇ haˬ geuꞈ naˇ, aˬ joˆ-ehˇ paˇ dzeuˇ-iˇ nya nmˇ. 26Yaw beh poˆ ngehˬ-euˬ aˬ yawꞈ-euˬ dawˬ kʼoeˇ, miˇ tsaˬ heu-ahˇ gʼeu nyeh-euˬ meh. Kʼoeˇ naˆ maˬ tseˇ, nymˬ-mˇ poˆ jawˇ-aˬ, “Miˇ tsaˬ-ahˇ tehꞈ-ehˇ maˬ ngeuˇ ni, mˬ-ahˇ kʼawꞈ ngaˇ paˇ gʼeu nyeh ma” lehˇ, aˬ yawꞈ saˇ jaˬ dzaˬ taˬ-euˬ jaˆ-eu meh. 27“Tiˬ poˆ paˇ gʼeu nyeh ma” lehˇ ehˇ-eu dawˬ kʼoeˇ dawˬ-aˬ, maˬ nyeh laˇ nya-eu jeˬ bi ziꞈ-awˇ, kʼaˇ beh taˬ-euˬ jeˬ bi nyeh laˇ-awˇ bi byoˆ-iˇ jiˇ ma lehˇ bya cehˆ ni ehˇ mawꞈ-eu meh.

28Kʼoeˇ baˬ da neh, maˬ nyeh laˇ nya-eu miˇ kʼahˬ aˬ dui za taˬ-euˬ miˇ neh Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Miˬyehˇ-ahˇ guiˬ lahˬ huiˬ-awˇ guˆ guˆ-ehˇ yaw zeu baw-eu laꞈ kʼoeˇ, aˬ yawꞈ nui ma tsaˬ-eu loꞈ-ehˇ uˬ duˬ tahˬ kaˇ-euˇ. 29Aˬ jeˬ miˇ neh ehˇ naˇ, aˬ dui-euˬ Miˬyehˇ-aˬ, maˇ maˇ ni laˆ luˬ laˆ seˇ-eu miˬ dzaˬ pyeuꞈ-eu meh.

Currently Selected:

HeˬByehˇ 12: AHK

Highlight

Copy