Aˇ dahˬ 44

Kʼmˬ maˬ byoˆ-euˬ

1Yoˇsehˆ-aˬ, aˬ yawꞈ-euˬ nymˇ-ahˇ bi haw bi pyaˆ-euˬ zaˬ kʼaˆ kʼoeˇ gʼaˬ-ahˇ heu loꞈ-ehˇ ehˇ nehˬ-euˬ meh. “Tsawˇ haˬ heu deuˬ-euˬ cehˇ pehˇ zeuˇ laꞈ kʼoeˇ, aˬ yawꞈ maꞈ kʼaˇ tawˬ kʼoꞈ gʼeh coeˇ-eu myaˆ ni cehˇ pehˬ ahˇ nehˬ-awˇ, aˬ yawꞈ maꞈ-euˬ pyuˇ deuˬ kʼawꞈ, cehˇ pehˇ zeuˇ laꞈ kʼoeˇ cehˇ kʼoeˇ taˆ dawˆ ahˇ kʼoꞈ nehˬ-awˬ. 2Ngaˬ-euˬ pyuˇ kʼmˬ maˬ yuˇ-awˇ, aˬ nyiˇ nyiˇ saˬ gʼaˬ-euˬ cehˇ pehˇ zeuˇ laꞈ kʼoeˇ ahˇ-eu cehˇ kʼoeˇ taˆ, aˬ yawꞈ neh cehˇ poeˬ biꞈ laꞈ-euˬ pyuˇ nehˬ-ehˇ tiˬ kawˆ loꞈ-ehˇ dawˆ ahˇ taˬ-awˇ bi jaˆ-awˬ.” Kʼoeˇ ngeh, Yoˇsehˆ neh kʼaˇ ehˇ nehˬ-euˬ loꞈ-ehˇ zaˬ kʼaˆ kʼoeˇ gʼaˬ jahˇ-euˬ meh. 3Kʼoeˇ naˇ, aˬ ha mehˇ nmˇ-ahˇ uˬ shawˬ yaw naꞈ-ehˇ mahˬ tahˬ laˆ deuˬ teh-awˇ bi gʼoꞈ leˇ-euˬ meh. 4Ehˇ kʼawꞈ, aˬ yawꞈ maꞈ meuˬ-ahˇ gʼawˬ mahˇ ni maˬ iˇ kaˬ mi naˆ-ehˇ, aˬ yawꞈ-euˬ nymˇ-ahˇ bi haw bi pyaˆ-euˬ zaˬ kʼaˆ kʼoeˇ gʼaˬ-ahˇ Yoˇsehˆ heu loꞈ-ehˇ ehˇ nehˬ-euˬ meh. “Tsawˇ haˬ kʼoeˇ deuˬ-euˬ mehˬ nah yaw kawˇ-ehˇ caw teh gʼeh-awˇ, aˬ yawꞈ maꞈ-ahˇ teh miˇ naˇ, heu loꞈ-ehˇ ehˇ nehˬ-awˬ. ‘Aˬ cawˬ naw maꞈ-ahˇ yaw muiˬ jeˬ jahˇ nehˬ naˇ, aˬ jeˬ miˇ neh naw maꞈ yaw doeˇ paˇ jahˇ kʼoꞈ te. 5Aˬ jeˬ miˇ neh naw maꞈ ngaˬ-euˬ sahˬ paˬ-euˬ pyuˇ kʼmˬ maˬ kʼoeˬ teˬ. Kʼmˬ maˬ heu kʼmˬ-aˬ, ngaˬ-euˬ sahˬ paˬ dawˇ-eu kʼmˬ maˬ pyeuꞈ-awˇ, ja maw maw ngeh kʼawꞈ, kʼmˬ maˬ heu kʼmˬ tehꞈ-ehˇ aˬ yawꞈ zmˬ-eu meh. Tiˬ pawꞈ-iˬ maˬ mˇ kʼmˬ-eu bahˬ dui dui-eu jeˬ-ahˇ naw maꞈ mˇ-euˬ nga’ lehˇ ehˇ nehˬ-awˬ.”

6Zaˬ kʼaˆ kʼoeˇ gʼaˬ aˬ ha mehˇ nmˇ-ahˇ teh miˇ leˇ ngeh, Yoˇsehˆ neh kʼaˇ bi ehˇ-euˬ loꞈ-ehˇ ehˇ nehˬ-euˬ meh. 7Kʼoeˇ ngeh, aˬ ha mehˇ nmˇ ehˇ-eu, “Aˬ yuiꞈ-oˇ, nawˇ teu loꞈ-ehˇ ehˇ-eu teu aˬ jeˬ ehˇ mawꞈ te. Ngaˬ ha mehˇ nmˇ teu loꞈ-ehˇ gʼeh-eu jeˬ mˇ taˬ-euˬ maˬ jaˆ lehˇ kamˬ tsehˆ peuˬ ma. 8Dzeuˇ laˇ ngeh poˆ ngaˬ ha mehˇ nmˇ-euˬ cehˇ pehˇ zeuˇ laꞈ kʼoeˇ ya mawˇ-euˬ pyuˇ kʼoeˇ deuˬ kʼawꞈ, Kaˬnaˬ miˇ kʼahˬ-ahˇ neh naw maꞈ jawˇ gaˇ keuˆ ni pi kʼoꞈ keuˆ leꞈ-awˇ, naw maꞈ-ahˇ biꞈ kʼoꞈ le-euˬ nawˇ siˬ nya luꞈ meh. Nawˬ-euˬ sahˬpaˬ-euˬ nymˇ laꞈ kʼoeˇ jaˆ-eu pyuˇ maˬ ehˇ, shuiˇ maˬ ehˇ, aˬ jeˬ miˇ neh ngaˬ ha mehˇ nmˇ paˇ kʼoeˬ-eu. 9Ngaˬ ha mehˇ nmˇ laꞈ kʼoeˇ tiˬ gʼaˬ na pyuˇ kʼmˬ maˬ kʼoeˇ kʼmˬ yuˇ taˬ-euˬ ya mawˇ naˇ, shiˇ gaˇ keuˆ ni tsawˇ haˬ kʼoeˇ gʼaˬ-ahˇ jahˇ kʼoꞈ nehˬ nya tehꞈ-a. Kʼoeˇ uˬ taꞈ, ngaˬ ha mehˇ nmˇ dawˬ tawˆ luꞈ nawˬ-euˬ zaˬ kʼaˆ geuꞈ jiˇ le ma.”

10Zaˬ kʼaˆ kʼoeˇ gʼaˬ paˇ ehˇ-eu, “Naw maꞈ neh ehˇ taˬ-euˬ loꞈ-ehˇ bi jaˆ-awˬ. Ehˇ kʼawꞈ kʼmˬ maˬ kʼoeˇ kʼmˬ yuˇ taˬ-euˬ kʼoeˇ gʼaˬ tehꞈ-ehˇ ngaˬ-euˬ zaˬ kʼaˆ geuꞈ yaꞈ-awˇ, naw maꞈ-ahˇ tiˬ jeˬ-iˬ maˬ laˆ tsoeˬ ni bi gʼoꞈ leˇ jiˇ ma” lehˇ ehˇ-eu meh. 11Kʼoeˇ naˇ, aˬ yawꞈ maꞈ yawˬ gʼaˬ na luꞈ mahˬ kʼaˆ daˬ baꞈ ka jiˇ-awˇ, yawˬ ha-euˬ cehˇ pehˇ zeuˇ yawˬ ha puiˇ nehˬ-euˬ meh. 12Yoˇsehˆ-euˬ zaˬ kʼaˆ kʼoeˇ gʼaˬ aˬ ha mehˇ nmˇ-euˬ cehˇ pehˇ zeuˇ deuˬ-ahˇ goˬ haw-euˬ meh. Aˬ yuiꞈ yuiꞈ saˬ gʼaˬ-euˬ cehˇ pehˇ zeuˇ-ahˇ neh aˇ dahˬ beh-awˇ, aˬ nyiˇ nyiˇ saˬ gʼaˬ-euˬ cehˇ pehˇ zeuˇ-ahˇ keuˆ ni yaw muiˬ paˬ-ehˇ haw doe jiˇ ngeh, kʼmˬ maˬ kʼoeˇ kʼmˬ-ahˇ Beˬyaˬmiˬ-euˬ cehˇ pehˇ zeuˇ laꞈ kʼoeˇ goˬ mawˇ-euˬ meh. 13Kʼoeˇ ngeh, aˬ ha mehˇ nmˇ noeˬ shaˬ dui dui-eu laꞈ kʼoeˇ, aˬ yawꞈ maꞈ dm luꞈ-eu mehˬ tsoeˬ cehˬ pyaˬ cehˬ shaˇ jiˇ-euˬ meh. Kʼoeˇ naˇ, mahˬ tahˬ laˆ kʼaˆ daˬ baꞈ daˆ-awˇ, mehˬ nah paw paˇ gʼoꞈ-iˇ-euˬ meh.

14Yuˇdaˆ aˬ ha mehˇ nmˇ Yoˇsehˆ-euˬ nymˇ-ahˇ gʼoꞈ keuˆ-iˇ ngeh, Yoˇsehˆ iˇ kahˇ jawˇ luꞈ-eu meh. Aˬ yawꞈ maꞈ Yoˇsehˆ mehˬ shi pawˬ tsuiꞈ pawˬ dmˬ dmˬ-awˇ awˆ byaˆ-eu laꞈ kʼoeˇ, yaw zeu baw nehˬ-euˬ meh. 15Yoˇsehˆ ehˇ-eu, “Naw maꞈ aˬ jeˬ mˇ yaꞈ teˬ. Ngaˇ loꞈ-ehˇ gʼeh-eu miˇ kʼahˬ-ahˇ uˆ lahˇ-eu tsawˇ haˬ tiˬ gʼaˬ ja maw maw haw-eu laꞈ kʼoeˇ, naw maꞈ neh kʼaˇ mˇ taˬ-euˬ jeˬ-ahˇ haw mawˇ nya tehꞈ-a lehˇ naw maꞈ maˬ siˬ nya te loˇ.”

16Yuˇdaˆ ehˇ-eu, “Sahˬ paˬ-oˇ, nga maꞈ nawˬ-ahˇ aˬ joˆ-ehˇ dawˬ poˆ poˆ nya nmˇ. Nga maꞈ aˬ joˆ-ehˇ paˇ pyehˇ nmˇ. Nga maꞈ-euˬ iˬ baˇ-ahˇ aˬ joˆ-ehˇ jahˇ-awˇ paˇ dehˬ kaˬ nya nmˇ. Nga maꞈ-euˬ iˬ baˇ-ahˇ Miˬyehˇ neh pah mehˬ nehˬ gʼaˬ-euˬ meh. Nymˬ-mˇ poˆ jawˇ-aˬ, pyuˇ kʼmˬ maˬ yuˇ-euˬ kʼoeˇ gʼaˬ tehꞈ-ehˇ maˬ ngeuˇ ni, ngaˬ ha mehˇ nmˇ dawˬ tawˆ luꞈ nawˬ-euˬ zaˬ kʼaˆ geuꞈ jiˇ ma.”

17Yoˇsehˆ ehˇ-eu, “Kʼoeˇ naˆ naˆ-ehˇ maˇ diˇ-aˬ maˬ ngeuˇ-aˇ. Ngaˇ naw maꞈ-ahˇ teu naˆ naˆ-ehˇ jahˇ nehˬ-eu lehˇ maˬ ngeuˇ. Ngaˬ-euˬ pyuˇ kʼmˬ maˬ yuˇ-euˬ kʼoeˇ gʼaˬ tehꞈ-ehˇ ngaˬ-euˬ zaˬ kʼaˆ bi geuꞈ yaꞈ-awˇ, nawˬ ha mehˇ nmˇ dawˬ tawˆ luꞈ nawˬ ha mehˇ nmˇ-euˬ aˬ da jawˇ gaˇ yaw muiˬ paˬ-ehˇ gʼoꞈ keuˆ leˇ jiˇ-awˬ.”

Beˬyaˬmiˬ-ahˇ bi sheuˬ kʼoꞈ gʼeh laꞈ lehˇ Yoˇsehˆ-ahˇ Yuˇdaˆ shaˇ-euˬ

18Yoˇsehˆ-euˬ dawˬ peh Yuˇdaˆ jiˆ peh leˇ-awˇ, heu loꞈ-ehˇ ehˇ nehˬ-euˬ meh. “Sahˬ paˬ-oˇ, ngaˬ-ahˇ gʼawˬ shaˬ gaˬ nehˬ laꞈ-eu laꞈ kʼoeˇ, nawˬ nehˬ-ehˇ bya cehˆ ni dawˬ tiˬ poˆ bi ngehˬ cawˬ nehˬ laꞈ sheˇ. Nawˇ-aˬ, Iˇjiˇtuˆ sahˬpaˬ loꞈ-ehˇ huiˬ-eu tsawˇ haˬ tiˬ gʼaˬ pyeuꞈ-eu meh. Ehˇ kʼawꞈ, ngaˬ-ahˇ nui ma taˬ pehˇ nehˬ laꞈ. 19Sahˬ paˬ-oˇ, dzeuˇ laˇ ngeh, ngaˬ ha mehˇ nmˇ-ahˇ ‘Aˬ da baw ma loˇ. Aˬ nyiˇ jawˇ te siˬ loˇ’ lehˇ, nawˇ tiˬ poˆ naˇ haˬ-euˬ meh. 20Nawˇ kʼoeˇ loꞈ-ehˇ naˇ haˬ ngeh, ‘Ngaˬ ha mehˇ nmˇ-euˬ aˬ da jawˇ ma. Aˬ yawꞈ mawˬ laˇ ngeh hawˇ-eu dehꞈ le-euˬ ngaˬ ha mehˇ nmˇ-euˬ aˬ nyiˇ jiˇ tiˬ gʼaˬ jawˇ ma. Aˬ li kʼoeˇ gʼaˬ-euˬ aˇ doˆ gʼaˬ shiˇ dzeuˇ-awˇ, aˬ yawꞈ nehˬ-ehˇ tiˬ uˇ pyehˆ zaˬ aˬ yawꞈ tiˬ gʼaˬ dehꞈ-eu tehꞈ meh. Kʼoeˇ miˇ neh aˬ da aˬ yawꞈ-ahˇ gaˬ dui dui-eu meh’ lehˇ, ngaˬ ha mehˇ nmˇ nawˬ-ahˇ ehˇ kʼoꞈ nehˬ-euˬ ma. 21Sahˬ paˬ-oˇ, aˬ li kʼoeˇ li-ahˇ nawˇ ya mawˇ ni, nawˇ jawˇ gaˇ tiˬ poˆ sheuˬ laꞈ-awˬ lehˇ, ngaˬ ha mehˇ nmˇ-ahˇ nawˇ ehˇ-eu meh. 22Ngaˬ ha mehˇ nmˇ-euˬ aˬ da aˬ li kʼoeˇ li-ahˇ maˬ byehˇ coeˇ-eu miˇ neh, aˬ da-ahˇ byehˇ yaꞈ-awˇ aˬ yawꞈ-ahˇ bi oe naˇ, aˬ da shiˇ-eu maˬ ngeuˇ naˇ maˬ paˇ dzeˇ meh lehˇ, ngaˬ ha mehˇ nmˇ nawˬ-ahˇ ehˇ-euˬ ma. 23Kʼoeˇ ngeh, ‘Nawˬ ha mehˇ nmˇ-euˬ aˬ nyiˇ nyiˇ saˬ gʼaˬ maˬ sheuˬ leꞈ naˇ, ngaˇ jawˇ gaˇ taˬ paˇ oe’ lehˇ nawˇ ehˇ-eu meh.

24“Ngaˬ ha mehˇ nmˇ aˬ da jawˇ gaˇ gʼoꞈ keuˆ leˇ ngeh, nawˬ neh kʼaˇ ehˇ nehˬ laꞈ-euˬ gaˇ kawˆ deuˬ aˬ yawꞈ-ahˇ dzawˇ nehˬ-euˬ ma. 25Kʼoeˇ naˇ, ‘Tiˬ poˆ paˇ iˇ-awˇ cehˇ paˇ zeuˇ laꞈ-iˇ-awˬ’ lehˇ, ngaˬ ha mehˇ nmˇ-ahˇ aˬ yawꞈ kʼehˇ-eu meh. 26Ngaˬ ha mehˇ nmˇ aˬ yawꞈ-ahˇ heu loꞈ-ehˇ ehˇ nehˬ-euˬ ma. ‘Ngaˬ ha mehˇ nmˇ-euˬ aˬ nyiˇ nyiˇ saˬ gʼaˬ maˬ sheuˬ gʼeh naˇ, miˇ kʼahˬ kʼoeˇ kʼahˬ-ahˇ uˆ lahˇ-awˇ haw luꞈ pyaˆ luꞈ-eu gʼaˬ jawˇ gaˇ maˬ paˇ iˇ mawˇ nya meh. Aˬ nyiˇ nyiˇ saˬ gʼaˬ-ahˇ bi sheuˬ gʼeh laꞈ naˇ iˇ ma’ lehˇ ehˇ nehˬ-euˬ ma. 27Kʼoeˇ ngeh, aˬ yawꞈ heu loꞈ-ehˇ paˇ ehˇ-eu meh. ‘Ngaˬ-euˬ nymˇ dahˬ Laˬkeˬlaˇ o neh zaˬ nyiˬ gʼaˬ tehꞈ-ehˇ jawˇ le-euˬ naw maꞈ maˬ siˬ nya te loˇ. 28Kʼoeˇ nyiˬ gʼaˬ tehꞈ-ehˇ paˇ gʼeh gaˇ, tiˬ gʼaˬ paˇ shiˇ cawˆ-euˬ maˬ ngeuˇ-a loˇ. Aˬ yawꞈ-ahˇ bawˇ tsahˬ jeˬ zaˬ deuˬ neh laˆ sehꞈ-awˇ, cehˬ pyaˬ cehˬ shaˇ jiˇ nehˬ-euˬ miˇ neh, aˬ yawꞈ doˆ-iˇ ngeh tiˬ nah neh aˬ yawꞈ-ahˇ tiˬ jawˇ-iˬ maˬ paˇ ya mawˇ-euˬ maˬ ngeuˇ-a loˇ. 29Heu gʼaˬ-ahˇ kʼawꞈ ngaˬ-euˬ mehˬ shi naw maꞈ paˇ sheuˬ doˆ gʼeh-awˇ, tiˬ jeˬ paˬ paˇ bi ca laˇ-eu laꞈ kʼoeˇ, ngaˇ shaˬ zahˬ naꞈ dzehˬ laˇ ni naw maꞈ paˇ jahˇ-eu lehˇ gʼeh-eu jeˬ maˇ-iˬ, ngaˇ bi shiˇ-eu lehˇ naw maꞈ jahˇ nehˬ laꞈ gaˇ duˇ-eu ngaˇ’ lehˇ ehˇ-eu meh.

30“Kʼoeˇ miˇ neh Sahˬ paˬ-oˇ, ngaˬ ha mehˇ nmˇ-euˬ aˬ da yaw dehꞈ dehꞈ-eu jeˬ-aˬ, aˬ nyiˇ nyiˇ saˬ gʼaˬ-euˬ kʼoeˇ taˆ jaˆ-eu miˇ neh, aˬ nyiˇ nyiˇ saˬ gʼaˬ maˬ ahˇ ni ngaˬ da jawˇ gaˇ ngaˬ ha mehˇ nmˇ aˬ joˆ-ehˇ gʼoꞈ leˇ peuˬ nmˇ. 31Aˬ nyiˇ nyiˇ saˬ gʼaˬ-ahˇ maˬ sheuˬ-ehˇ, aˬ da jawˇ gaˇ ngaˇ gʼoꞈ leˇ naˇ, aˬ yawꞈ-euˬ aˬ li maˬ gʼoꞈ laˇ ngaˬ lehˇ aˬ yawꞈ ya siˬ-eu nehˬ-ehˇ, tiˬ poˆ tehꞈ-ehˇ shiˇ tsehˆ tehꞈ-a. Kʼoeˇ loꞈ-ehˇ pyeuꞈ laˇ naˇ, ngaˬ ha mehˇ nmˇ-aˬ, uˬ duˬ pyuˇ laˇ taˬ-euˬ yawˬ ha aˬ da-ahˇ shiˇ-eu miˇ kʼahˬ-ahˇ dehˬ uˇ nehˬ gaˇ duˇ tehꞈ-a. 32Kʼoeˇ uˬ taꞈ, aˬ nyiˇ nyiˇ saˬ gʼaˬ gʼaˇ duˬ, ngaˬ da-ahˇ ngaˬ-euˬ saꞈ laˇ biꞈ dah yaꞈ-euˬ ma. Aˬ li aˬ nyiˇ nyiˇ saˬ gʼaˬ iˇ kahˇ maˬ sheuˬ kʼoꞈ keuˆ laꞈ naˇ, kʼaˇ keuˆ le-eu jeˬ ngaˬ-euˬ kʼoeˇ taˆ keuˆ le luꞈ-uˇ. Ziˇ jiˇ ngeh keuˆ ni ngaˇ daˬ ma lehˇ, ngaˬ da-ahˇ ngaˇ ehˇ tsehˆ taˬ yaꞈ-euˬ ma. 33Kʼoeˇ miˇ neh sahˬpaˬ-oˇ, aˬ li heu li-euˬ dah zaˇ, ngaˇ nawˬ-euˬ zaˬ kʼaˆ geuꞈ yaꞈ ma. Aˬ yawꞈ-ahˇ aˬ ha mehˇ nmˇ nehˬ-ehˇ bi gʼoꞈ leˇ-awˬ. 34Aˬ li heu li maˬ ahˇ naˇ, ngaˬ da jawˇ gaˇ ngaˇ maˬ gʼoꞈ keuˆ leˇ peuˬ nya. Ngaˬ da shaˬ zahˬ mˇ gaˇ ngaˇ uˇ gawˇ nya.”

Currently Selected:

Aˇ dahˬ 44: AHK

Highlight

Copy