Aˇ dahˬ 21

Iˇtsaˆ dehꞈ le-euˬ

1Sahˬpaˬ Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ loꞈ-ehˇ, Saˬlaˇ-ahˇ guiˬ lahˬ biꞈ-euˬ meh. 2Saˬlaˇ aˬ nyiˇ pi leˇ-awˇ, tsawˇ mawˬ mawˬ laˇ taˬ-euˬ Aˬbyaˬhaˬ gʼaˇ duˬ aˬ li tiˬ li ciˬ-euˬ meh. Aˬ li tiˬ gʼaˬ dehꞈ le tehꞈ-a lehˇ Miˬyehˇ neh ehˇ taˬ-euˬ aˇ yamˬ keuˆ laˇ ngeh, aˬ li kʼoeˇ li dehꞈ le-euˬ meh. 3Aˬ li kʼoeˇ li-ahˇ Aˬbyaˬhaˬ neh Iˇtsaˆ#21.3 ‘Iˇtsaˆ’ lehˇ ehˇ-eu dawˬ tsuiꞈ-aˬ, ‘aˬ yawꞈ uiˇ-euˬ meh’ lehˇ ehˇ mawꞈ-eu meh. lehˇ myahˇ nehˬ-euˬ meh. 4Miˬyehˇ neh dawˬ biꞈ taˬ-eu jaˆ-eu loꞈ-ehˇ, Iˇtsaˆ dehꞈ le-awˇ yehꞈ nah byah laˇ ngeh, Aˬbyaˬhaˬ neh Iˇtsaˆ-ahˇ baˆ kʼoˆ mehˬ dzaˬ yehˬ nehˬ-euˬ meh. 5Iˇtsaˆ dehꞈ le ngeh, Aˬbyaˬhaˬ tiˬ yaˇ kʼoꞈ kʼawˆ laˇ-euˬ meh. 6Saˬlaˇ ehˇ-eu, “Ngaˬ-euˬ kʼoeˇ taˆ, laˬ kʼaˬ cehˇ-eu jeˬ hawˇ-eu uiˇ yoeˇ laˇ paˬ-ehˇ gʼeh-eu jeˬ Miˬyehˇ bi keuˆ le-euˬ meh. Gaˇ kawˆ heu kʼaˇ ya gaˬ-eu tsawˇ haˬ dawˬ tawˆ luꞈ, ngaˬ nehˬ-ehˇ tiˬ kawˆ loꞈ-ehˇ caw uiˇ tehꞈ-a.” 7Kʼoeˇ naˇ, Saˬlaˇ paˇ ehˇ-eu, “Saˬlaˇ zaˬ-ahˇ aˬ coeˇ bi dawˇ bi dawˇ-ehˇ haw huiˬ tehꞈ-a lehˇ, Aˬbyaˬhaˬ-ahˇ aˬ suˇ gʼaˬ ehˇ nmˇ. Ehˇ kʼawꞈ, nymˬ-mˇ Aˬbyaˬhaˬ tsawˇ mawˬ mawˬ laˇ-euˬ kʼawꞈ, aˬ yawꞈ gʼaˇ duˬ ngaˇ aˬ li tiˬ li ciˬ-euˬ maˬ ngeuˇ nga loˇ.” 8Aˬ li kʼoeˇ li ui cuiˆ huiˬ laˇ-awˇ aˬ coeˇ gʼawˬ ngeh nah, Aˬbyaˬhaˬ huiˬ-eu hawˬ byawˇ tiˬ byawˇ lawˇ-euˬ meh.

Haˬgaˬlaˇ hawˇ-eu Iˇshaˬmeˬlaˇ-ahˇ teh dzeh-euˬ

9Tiˬ nah keuˆ laˇ ngeh, Iˇjiˇtuˆ ma pyeuꞈ-eu Haˬgaˬlaˇ-euˬ aˬ li Iˇshaˬmeˬlaˇ hawˇ-eu, Saˬlaˇ-euˬ aˬ li Iˇtsaˆ aˬ nyaꞈ nmˇ, tiˬ kawˆ loꞈ-ehˇ aˬ mui mui niˇ gʼa luꞈ-eu meh. 10Zaˬ kʼoeˇ nyiˬ gʼaˬ aˬ mui mui luꞈ gaˇ Saˬlaˇ ya mawˇ ngeh, “Zaˬ miˬ zaˬ zaˬ kʼaˆ heu gʼaˬ hawˇ-eu aˬ yawꞈ-euˬ aˬ li-ahˇ teh dzeh-awˬ. Ngaˬ li za geuˇ-eu nawˬ-euˬ pyuˇ shuiˇ myawˬ gahˬ deuˬ hawˇ-eu jeˬ biˇ deuˬ, zaˬ miˬ zaˬ heu gʼaˬ-euˬ aˬ li tiˬ pawꞈ-iˬ maˬ bi za mawꞈ nya” lehˇ, Aˬbyaˬhaˬ-ahˇ ehˇ nehˬ-euˬ meh. 11Dawˬ heu dawˬ baˬ da neh Aˬbyaˬhaˬ nui ma tiˬ pawꞈ-iˬ maˬ saˇ-a. Aˬ jeˬ miˇ neh ehˇ naˇ, Iˇshaˬmeˬlaˇ gʼaˬ kʼawꞈ aˬ yawꞈ-euˬ aˬ li pyeuꞈ-eu meh. 12Ehˇ kʼawꞈ, Aˬbyaˬhaˬ-ahˇ Miˬyehˇ ehˇ nehˬ-eu, “Nawˬ li Iˇshaˬmeˬlaˇ hawˇ-eu nawˬ-euˬ zaˬ kʼaˆ Haˬgaˬlaˇ gʼaˇ duˬ taˬ noeˬ shaˬ. Saˬlaˇ kʼaˇ ehˇ-eu loꞈ-ehˇ geuꞈ-awˬ. Aˬ jeˬ miˇ neh ehˇ naˇ, ngaˬ neh nawˬ-ahˇ saˇ jaˇ biꞈ taˬ-euˬ nawˬ-euˬ zaˬ nawˬ-euˬ uˆ deuˬ-aˬ, Iˇtsaˆ o neh jeuˬ le o le tehꞈ-a. 13Nawˬ-euˬ zaˬ kʼaˆ Haˬgaˬlaˇ-euˬ aˬ li-ahˇ kʼawꞈ, ngaˇ guiˬ lahˬ biꞈ nehˬ-awˇ, zaˬ gʼawˬ mya ni bi jawˇ le-eu laꞈ kʼoeˇ, tsawˇ jeuˬ tiˬ jeuˬ bi pyeuꞈ doˆ laˇ ma. Aˬ yawꞈ kʼawꞈ nawˬ li meh.”

14Yawˬ nah yawˬ uˬ shawˬ yaw naꞈ-ehˇ, dzaˬ dzaˬ dawˇ dawˇ maˬ ehˇ, iˇ cuꞈ tiˬ byah ni dahˬ-eu shaˬ kʼoˆ iˇ puˬ maˬ ehˇ, Aˬbyaˬhaˬ laˆ dawˆ-awˇ, Haˬgaˬlaˇ-ahˇ biꞈ-euˬ meh. Kʼoeˇ naˇ, Iˇshaˬmeˬlaˇ-ahˇ Haˬgaˬ laˇ-euˬ naˇ kʼah nyehꞈ euˬ nehˬ-awˇ, gaˇ mahˇ kaˬ gaˇ bi iˇ byoˆ gʼeh-euˬ meh. Haˬgaˬlaˇ iˇ byoˆ gʼeh-awˇ, Beˬlaˇsheˬba bawˇ tsahˬ bawˇ dahˇ laꞈ kʼoeˇ, doe doe-ehˇ cah cah-ehˇ jawˇ-euˬ meh. 15Shaˬ kʼoˆ iˇ puˬ-ahˇ dahˬ-eu iˇ cuꞈ dawˇ jiˇ ngeh, aˬ yawꞈ-euˬ aˬ li-ahˇ baw duˆ uˬ moˆ ciˬ taˬ yaꞈ-euˬ meh. 16Kʼoeˇ naˇ, aˬ yawꞈ aˬ li ciˬ taˬ-euˬ gaˇ neh ngaˬ tseˇ lmˇ dzehˬ ni kaˬ gaˇ aˬ yawꞈ dzuˇ-iˇ-euˬ meh. “Ngaˬ li shiˇ gaˇ maˬ haw peuˬ nya” lehˇ yawˬ haˇ yawˬ ha ehˇ-awˇ, kʼoeˇ gaˇ nuiˇ-awˇ ngoeˇ ngoeˇ-ehˇ jawˇ-euˬ meh.

17Aˬ li kʼoeˇ gʼaˬ ngoeˇ luꞈ-eu teˇ saˇ-ahˇ Miˬyehˇ ya gaˬ-euˬ meh. Kʼoeˇ ngeh, Miˬyehˇ gʼaˬ kʼehˇ tiˬ gʼaˬ, mˬ kʼoeˇ taˆ neh Haˬgaˬlaˇ-ahˇ heu loꞈ-ehˇ dawˬ ngehˬ cawˬ-euˬ meh. “Haˬgaˬlaˇ-oˇ, nawˇ aˬ jeˬ miˇ neh noeˬ shaˬ te. Taˬ guˆ. Aˬ li ngoeˇ-eu teˇ saˇ-ahˇ Miˬyehˇ ya gaˬ gʼaˬ-euˬ meh. 18Tuˇ-awˬ. Aˬ li-ahˇ ciˬ-awˇ muˇ taˬ nehˬ-awˬ. Aˬ li heu li-euˬ zaˬ deuˬ uˆ deuˬ-ahˇ, ngaˇ huiˬ-eu tsawˇ jeuˬ bi pyeuꞈ laˇ ma.” 19Kʼoeˇ naˇ, Haˬgaˬlaˇ-euˬ myaˆ nuiˆ-ahˇ Miˬyehˇ pah nehˬ-awˇ, lah duˬ tiˬ duˬ-ahˇ aˬ yawꞈ ya mawˇ-euˬ meh. Aˬ yawꞈ iˇ-awˇ, shaˬ kʼoˆ iˇ puˬ tiˬ byah ni iˇ cuꞈ kʼawꞈ laˬ-iˇ-awˇ, aˬ li-ahˇ bi dawˇ-euˬ meh. 20Aˬ li kʼoeˇ li huiˬ laˇ luꞈ-eu loꞈ-ehˇ, aˬ yawꞈ nehˬ-ehˇ Miˬyehˇ jawˇ-euˬ meh. Aˬ yawꞈ-aˬ, Paˬlaˬ bawˇ tsahˬ bawˇ dahˬ laꞈ kʼoeˇ jawˇ-awˇ, shaˬ jiˇ beuˆ sehꞈ nya dui dui-eu shaˬ mi aˬ da tiˬ gʼaˬ pyeuꞈ laˇ-euˬ meh. 21Aˬ yawꞈ-euˬ aˬ ma neh aˬ yawꞈ-ahˇ Iˇjiˇtuˆ tsawˇ jeuˬ zaˬ miˬ aˬ buˇ tiˬ gʼaˬ-ahˇ bi sheuˬ dahˬ dzaˬ-euˬ meh.

Aˬbyaˬhaˬ hawˇ-eu Aˬbiˇmaˬlehˆ saˇ jaˇ dzaˬ-euˬ

22Aˇ yamˬ kʼoeˇ yamˬ laꞈ kʼoeˇ, Aˬbiˇmaˬlehˆ hawˇ-eu, aˬ yawꞈ-euˬ guiˇ maꞈ dawˬ tawˆ luꞈ kʼoeˇ taˆ uˆ lahˇ-eu gʼaˬ pyeuꞈ-eu Piˇkawˇlaˆ aˬ nyaꞈ Aˬbyaˬhaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, Miˬyehˇ nawˬ nehˬ-ehˇ jawˇ-eu meh. 23Teu miˇ neh, ngaˬ-ahˇ maˬ ehˇ, ngaˬ-euˬ zaˬ deuˬ-ahˇ maˬ ehˇ, aˬ kaˇ dehꞈ le jawˇ le-eu ngaˬ-euˬ zaˬ ngaˬ-euˬ uˆ deuˬ-ahˇ maˬ ehˇ, nawˇ yehˬ bawˬ-ehˇ maˬ jahˇ lehˇ, Miˬyehˇ-euˬ mehˬ shi ngaˬ nehˬ-ehˇ saˇ jaˇ dzaˬ-awˬ. Ngaˇ nawˬ-ahˇ saˇ jaˇ ziꞈ-eu loꞈ-ehˇ, nawˇ kʼawꞈ, ngaˬ-ahˇ maˬ ehˇ, nawˇ jawˇ luꞈ-eu miˇ kʼahˬ heu kʼahˬ-ahˇ maˬ ehˇ, saˇ jaˇ ziꞈ ma lehˇ nymˬ-mˇ ehˇ tsehˆ-awˬ.” 24Aˬbyaˬhaˬ gʼeh, “Nawˬ neh ehˇ-euˬ dawˬ-ahˇ ngaˇ saˇ jaˇ ziꞈ ma” lehˇ ehˇ tsehˆ-euˬ meh.

25Kʼoeˇ naˇ, Aˬbyaˬhaˬ-euˬ lah duˬ tiˬ duˬ Aˬbiˇmaˬlehˆ-euˬ zaˬ kʼaˆ deuˬ neh ceh geuꞈ-euˬ gaˇ kawˆ, Aˬbiˇmaˬlehˆ-ahˇ Aˬbyaˬhaˬ dzawˇ nehˬ-euˬ meh. 26Kʼoeˇ ngeh, “Aˬ geu gʼaˬ neh kʼoeˇ loꞈ-ehˇ jahˇ-euˬ gaˇ kawˆ ngaˇ maˬ ya siˬ-aˬ siˬ. Gaˇ kawˆ heu nawˇ ngaˬ-ahˇ maˬ ehˇ nehˬ laꞈ-aˬ siˬ. Nymˬ-mˇ hawˇ-eu ngaˇ gaˬ beh beh-eu ma” lehˇ Aˬbiˇmaˬlehˆ ehˇ-eu meh. 27Kʼoeˇ naˇ, yawˇ hawˇ-eu mawˇ neˇ tiˬ deuˬ, Aˬbiˇmaˬlehˆ-ahˇ Aˬbyaˬhaˬ biꞈ-awˇ, aˬ nyaꞈ yaw kaˬ saˇ jaˇ dzaˬ taꞈ-euˬ meh. 28Yawˇ yawˇ kʼaˇ shiꞈ mawˇ-ahˇ, yawˇ yawˇ maꞈ laꞈ kʼoeˇ neh Aˬbyaˬhaˬ teh doˆ laꞈ-awˇ, tiˬ gaˇ teh taˬ-euˬ meh. 29Kʼoeˇ ngeh, “Aˬ jeˬ miˇ neh nawˇ teu loꞈ-ehˇ jahˇ te” lehˇ, aˬ yawꞈ-ahˇ Aˬbiˇmaˬlehˆ naˇ haˬ-euˬ meh. 30“Lah duˬ heu duˬ ngaˬ neh duˬ-euˬ lah duˬ pyeuꞈ-eu gaˇ kawˆ yaw duˬ yaw ciˇ baw laˇ ni, yawˇ heu shiꞈ mawˇ nawˇ geuꞈ-awˬ” lehˇ, Aˬbiˇmaˬlehˆ-ahˇ Aˬbyaˬhaˬ ehˇ nehˬ-euˬ meh. 31Kʼoeˇ miˇ neh, jawˇ duˬ kʼoeˇ tsahˇ-ahˇ Beˬlaˇsheˬba#21.31 ‘Beˬlaˇsheˬba’ lehˇ ehˇ-eu dawˬ tsuiꞈ-aˬ,‘ saˇ jaˇ lah duˬ’ maˬ ngeuˇ naˇ, ‘yawˇ shiꞈ mawˇ-euˬ lah duˬ’ lehˇ ehˇ mawꞈ-eu meh. lehˇ kuˇ-euˬ meh. Aˬ jeˬ miˇ neh ehˇ naˇ, jawˇ duˬ kʼoeˇ tsahˇ-ahˇ aˬ yawꞈ nyaꞈ saˇ jaˇ dzaˬ taꞈ-euˬ meh. 32Beˬlaˇsheˬba lehˇ kuˇ-eu jawˇ duˬ kʼoeˇ tsahˇ-ahˇ aˬ yawꞈ nyaꞈ saˇ jaˇ dzaˬ taꞈ gʼaˬ ngeh jawˇ, Aˬbiˇmaˬlehˆ hawˇ-eu Piˇkawˇlaˆ aˬ nyaꞈ Piˇliˇtiˆ miˇ kʼahˬ-ahˇ gʼoꞈ-iˇ-euˬ meh. 33Kʼoeˇ naˇ, Beˬlaˇsheˬba lehˇ kuˇ-eu jawˇ duˬ kʼoeˇ tsahˇ-ahˇ, Aˬbyaˬhaˬ ciˬ caˬ aˇ behˆ aˇ bawˇ tiˬ bawˇ ka-awˇ, Mˬ maˬ maˬ byaˆ zaˇ ziˇ dehꞈ-eu Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-euˬ meh. 34Piˇliˇtiˆ miˇ kʼahˬ laꞈ kʼoeˇ Aˬbyaˬhaˬ gʼawˬ myahˇ ni jawˇ-euˬ meh.

Currently Selected:

Aˇ dahˬ 21: AHK

Highlight

Copy