Aˇ dahˬ 11
11
Miˇ tsaˬ kʼoeˇ taˆ dawˬ gʼawˬ mya jeˬ baw laˇ-euˬ
1Aˇ dahˬ beh ngeh, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ, dawˬ tiˬ jeˬ tehꞈ-ehˇ ngehˬ-euˬ meh. 2Aˬ yawꞈ maꞈ jawˇ duˬ maˬ ziꞈ leˇ dah-ehˇ, nahˇ ma doˆ kʼehˬ paw doe doe-ehˇ pawˇ pawˇ-ehˇ jawˇ luꞈ ngeh, Baˬbuˇloˬ miˇ kʼahˬ laꞈ kʼoeˇ deh saˇ tiˬ tsahˇ iˇ zaˬ-awˇ, kʼoeˇ gaˇ jawˇ duˬ dah-euˬ meh. 3Kʼoeˇ ngeh jawˇ, “Oe uiˬ-awˬ. Aˬ dui maꞈ tsaˬ byaˆ tehˆ-awˇ puiˆ kaˇ-euˇ” lehˇ, aˬ yawꞈ maꞈ tiˬ gʼaˬ tiˇ gʼaˬ cawˬ-euˬ meh. Kʼoeˇ naˇ, aˬ yawꞈ maꞈ tsaˬ byaˆ jaˆ laˇ-awˇ, tsaˬ byaˆ gawˬ ngeh tiˬ siˬ tiˇ siˬ bi tsehꞈ ziꞈ leˇ nya-eu aˇ dziˬ tiˬ jeˬ kʼawꞈ jaˆ laˇ-euˬ meh. 4“Aˬ dui maꞈ maˬ ya gʼawˬ maˬ ya gʼehˇ-iˇ-eu gʼaˇ duˬ maˬ ehˇ, tsawˇ myahˇ doˆ-awˇ kʼahˬ sehˇ jaˆ-eu tsawˇ haˬ deuˬ pyeuꞈ laˇ-eu gʼaˇ duˬ maˬ ehˇ, meuˬ tiˬ meuˬ teˬ-awˇ, mˬ-ahˇ tuˆ-eu nymˇ nymˇ ma tiˬ nymˇ gawˬ kaˇ-euˇ” lehˇ, aˬ yawꞈ maꞈ ehˇ-eu meh.
5Kʼoeˇ naˇ, Sahˬpaˬ Miˬyehˇ zaꞈ ka le-awˇ, tsawˇ haˬ kʼoeˇ deuˬ neh gawˬ taˬ-euˬ meuˬ kʼoeˇ meuˬ hawˇ-eu nymˇ nymˇ ma kʼoeˇ nymˇ-ahˇ haw le-euˬ meh. 6Sahˬpaˬ Miˬyehˇ ehˇ-eu, “Haw sheˇ. Tsawˇ haˬ heu deuˬ tsawˇ jeuˬ tiˬ jeuˬ tehꞈ-ehˇ pyeuꞈ-awˇ, dawˬ tiˬ jeˬ tehꞈ-ehˇ ngehˬ-eu miˇ neh, heu loꞈ-ehˇ mˇ doˆ nya-eu nga. Heu-aˬ, aˇ dahˬ beh-eu tehꞈ nga siˬ. Gʼawˬ myahˇ maˬ gʼeh-ehˇ aˬ yawꞈ maꞈ kʼaˇ mˇ mawꞈ-eu jeˬ mˇ nya-eu aˇ tiˆ keuˆ laˇ-eu nga. 7Aˬ yawꞈ maꞈ tiˬ gʼaˬ neh ngehˬ-euˬ dawˬ tiˬ gʼaˬ maˬ gʼoˆ siˬ nya-ehˇ bi pyeuꞈ-iˇ-eu gʼaˇ duˬ, aˬ dui zaꞈ ka-iˇ-awˇ, aˬ yawꞈ maꞈ-euˬ dawˬ-ahˇ laˆ bahˬ laˆ baˆ nehˬ kaˇ-euˇ.” 8Kʼoeˇ naˇ, Sahˬpaˬ Miˬyehˇ neh tsawˇ haˬ kʼoeˇ deuˬ-ahˇ miˇ kʼahˬ doe ni bi jawˇ byaˆ jiˇ-euˬ miˇ neh, aˬ yawꞈ maꞈ meuˬ kʼoeˇ meuˬ maˬ paˇ teˬ ni byehˇ byoˆ-euˬ meh. 9Meuˬ kʼoeˇ meuˬ-ahˇ Baˬbuˇloˬ#11.9 ‘Baˬbuˇloˬ’ lehˇ ehˇ-eu dawˬ tsuiꞈ-aˬ, ‘bahˬ leˇ lahˇ leˇ-euˬ’ lehˇ ehˇ mawꞈ-eu meh. lehˇ kuˇ-euˬ meh. Aˬ jeˬ miˇ neh ehˇ naˇ, meuˬ kʼoeˇ meuˬ laꞈ kʼoeˇ tsawˇ haˬ zaˬ deuˬ dawˬ maˬ ngehˬ cawˬ taꞈ nya ni, aˬ yawꞈ maꞈ-euˬ dawˬ-ahˇ Sahˬpaˬ Miˬyehˇ laˆ bahˬ laˆ baˆ nehˬ-awˇ, aˬ yawꞈ maꞈ-ahˇ miˇ kʼahˬ doe ni bi jawˇ byaˆ jiˇ-euˬ meh.
Sheˬmaˆ-euˬ zaˬ deuˬ uˆ deuˬ
(1 Laˬsaˬbaˬ 1.24-27)
10Heu deuˬ-aˬ, Sheˬmaˆ-euˬ zaˬ deuˬ uˆ deuˬ meh. Miˇ tsaˬ-ahˇ iˇ cuꞈ dahˬ pymˬ gʼaˬ-awˇ nyiˬ kʼoꞈ keuˆ laˇ ngeh, Sheˬmaˆ tiˬ yaˇ kʼoꞈ kʼawˆ laˇ-euˬ meh. Kʼoeˇ ngeh kʼoꞈ, aˬ yawꞈ Aˬpaˬshaˇ lehˇ myahˇ-euˬ aˬ li tiˬ li jawˇ le-euˬ meh. 11kʼoeˇ sawˇ miˇ tsa aˬ yawꞈ ngaˬ yaˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
12Aˬpaˬshaˇ smˬ tseˇ ngaˬ kʼoꞈ kʼawˆ ngeh, Sheˬlahˬ lehˇ myahˇ-euˬ aˬ li tiˬ li jawˇ le-euˬ meh. 13kʼoeˇ sawˇ miˇ tsa aˬ yawꞈ oeˬ yaˇ smˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
14Sheˬlahˬ smˬ tseˇ kʼoꞈ kʼawˆ ngeh, Eˬbaˬ lehˇ myahˇ-euˬ aˬ li tiˬ li jawˇ le-euˬ meh. 15Kʼoeˇ sawˇ miˇ tsa aˬ yawꞈ oeˬ yaˇ smˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
16Eˬbaˬ smˬ tseˇ oeˬ kʼoꞈ kʼawˆ ngeh, Pehˇlehˆ lehˇ myahˇ-euˬ aˬ li tiˬ li jawˇ le-euˬ meh. 17Kʼoeˇ sawˇ miˇ tsa aˬ yawꞈ oeˬ yaˇ smˬ tseˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
18Pehˇlehˆ smˬ tseˇ kʼoꞈ kʼawˆ ngeh, Yeˬuˇ lehˇ myahˇ-euˬ aˬ li tiˬ li jawˇ le-euˬ meh. 19Kʼoeˇ sawˇ miˇ tsa aˬ yawꞈ nyiˬ yaˇ gʼoeˬ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
20Yeˬuˇ smˬ tseˇ nyiꞈ kʼoꞈ kʼawˆ ngeh, Seˬlawˇ lehˇ myahˇ-euˬ aˬ li tiˬ li jawˇ le-euˬ meh. 21Kʼoeˇ sawˇ miˇ tsa aˬ yawꞈ nyiˬ yaˇ shiꞈ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
22Seˬlawˇ smˬ tseˇ kʼoꞈ kʼawˆ ngeh, Naˬkawˬ lehˇ myahˇ-euˬ aˬ li tiˬ li jawˇ le-euˬ meh. 23Kʼoeˇ sawˇ miˇ tsa aˬ yawꞈ nyiˬ yaˇ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
24Naˬkawˬ nyiˬ tseˇ gʼoeˬ kʼoꞈ kʼawˆ ngeh, Teˬlah lehˇ myahˇ-euˬ aˬ li tiˬ li jawˇ le-euˬ meh. 25Kʼoeˇ sawˇ miˇ tsa aˬ yawꞈ tiˬ yaˇ tseˇ gʼoeˬ kʼoꞈ paˇ dehꞈ-awˇ, zaˬ gʼawˬ mya ni paˇ jawˇ lahˬ le-euˬ meh.
26Teˬlah shiꞈ tseˇ kʼoꞈ dzehˬ-iˇ ngeh, Aˬbyaˬ, Naˬkawˬ, Haˬlaˬ aˬ ha smˬ mehˇ nmˇ-euˬ aˬ da pyeuꞈ laˇ-euˬ meh.
Teˬlah-euˬ zaˬ deuˬ uˆ deuˬ
27Heu deuˬ-aˬ, Aˬbyaˬ, Naˬkawˬ, Haˬlaˬ aˬ ha mehˇ nmˇ-euˬ aˬ da pyeuꞈ-eu Teˬlah-euˬ zaˬ deuˬ uˆ deuˬ meh. Haˬlaˬ-aˬ, Lawˇtaˬ-euˬ aˬ da meh. 28Haˬlaˬ-aˬ, aˬ yawꞈ-euˬ aˬ da maˬ shiˇ mi naˆ-ehˇ, aˬ yawꞈ dehꞈ le-euˬ jawˇ duˬ pyeuꞈ-eu, Baˬbuˇloˬ miˇ kʼahˬ laꞈ kʼoeˇ jaˆ-eu Uˇlaˆ meuˬ-ahˇ shiˇ-euˬ meh. 29Aˬbyaˬ-aˬ, Saˬlehˇ-ahˇ sheuˬ dahˬ dzaˬ-awˇ, Naˬkawˬ gʼaˬ Haˬlaˬ-euˬ aˬ buˇ Miˇlaˬkah-ahˇ sheuˬ dahˬ dzaˬ-euˬ meh. Haˬlaˬ-aˬ, Iˇsaˬkah-euˬ aˬ da kʼawꞈ pyeuꞈ-eu meh. 30Saˬlehˇ-aˬ, maˬ baw aˬ ma meh.
31Teˬlah-aˬ, aˬ yawꞈ-euˬ aˬ li Aˬbyaˬ, Haˬlaˬ-euˬ aˬ li aˬ yawꞈ-euˬ oeˬ paˬ Lawˇtaˬ, Aˬbyaˬ-euˬ miˬ zaˬ pyeuꞈ-eu aˬ yawꞈ-euˬ kuiˬ ma Saˬlehˇ aˬ ha maꞈ-ahˇ sheuˬ-awˇ, Baˬbuˇloˬ miˇ kʼahˬ Uˇlaˆ meuˬ-ahˇ neh doˆ le-awˇ, Kaˬnaˬ miˇ kʼahˬ-ahˇ jawˇ-iˇ-euˬ meh. Haˬlaˬ meuˬ-ahˇ keuˆ ni aˬ yawꞈ maꞈ iˇ gʼeh-awˇ, kʼoeˇ gaˇ jawˇ duˬ dah-euˬ meh. 32Teˬlah nyiˬ yaˇ ngaˬ kʼoꞈ kʼawˆ ngeh, meuˬ kʼoeˇ meuˬ laꞈ kʼoeˇ ziˇ jiˇ-euˬ meh.
Currently Selected:
Aˇ dahˬ 11: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.