Gʼaˬkʼehˇ 7
7
Saˬteˬpaˬ Baꞈdzah-ahˇ dawˬ ngehˬ-euˬ
1Piˇ ma yaw huiˬ gʼaˬ Saˬteˬpaˬ-ahˇ naˇ haˬ-eu, “Aˬ yawꞈ maꞈ ehˇ-eu ngeuˇ meh loˇ.”
2Saˬteˬpaˬ ehˇ-eu, “Aˬ yuiꞈ aˬ nyiˇ aˬ da aˬ ma deuˬ-oˇ, ngaˇ ehˇ gaˇ naˇ haˬ sheˇ. Aˬ dui-euˬ aˬ da yaw dzahˇ Aˬbyaˬhaˬ Haˬlaˬ meuˬ-ahˇ maˬ jawˇ-iˇ mi naˆ-ehˇ, Maˬsoˬpaˬtaˬmiˇ miˇ kʼahˬ laꞈ kʼoeˇ yaw shehꞈ kʼahˬ sehˇ huiˬ-eu Miˬyehˇ aˬ yawꞈ-euˬ mehˬ shi doˆ le-awˇ, 3‘Nawˬ-euˬ aˬ yuiꞈ aˬ nyiˇ deuˬ hawˇ-eu nawˬ-euˬ miˇ kʼahˬ-ahˇ byehˇ dzeh yaꞈ-awˇ, ngaˬ neh mehˬ-euˬ miˇ kʼahˬ-ahˇ jawˇ-iˇ-awˬ’ lehˇ ehˇ le-euˬ meh. 4Kʼoeˇ miˇ neh, aˬ yawꞈ-euˬ miˇ kʼahˬ-ahˇ aˬ yawꞈ byehˇ dzeh yaꞈ-awˇ, Haˬlaˬ meuˬ-ahˇ jawˇ-iˇ-euˬ meh. Aˬbyaˬhaˬ-euˬ aˬ da shiˇ dzeuˇ ngeh jawˇ, iˬ nah naw maꞈ jawˇ luꞈ-eu miˇ kʼahˬ heu kʼahˬ laꞈ kʼoeˇ, Miˬyehˇ neh aˬ yawꞈ-ahˇ paˇ bi jawˇ laˇ-euˬ meh. 5Kʼoeˇ ngeh, Miˬyehˇ aˬ yawꞈ-ahˇ miˇ tsaˬ laꞈ zaˬ tiˬ daˬ hui ni kʼawꞈ maˬ biꞈ-aˬ. Ehˇ kʼawꞈ, miˇ kʼahˬ kʼoeˇ kʼahˬ aˬ yawꞈ-ahˇ biꞈ-awˇ, aˬ yawꞈ-euˬ miˇ kʼahˬ hawˇ-eu aˬ yawꞈ-euˬ zaˬ deuˬ uˆ deuˬ-euˬ miˇ kʼahˬ bi pyeuꞈ laˇ ma lehˇ, Miˬyehˇ neh saˇ jaˇ dzaˬ-euˬ meh. Miˬyehˇ kʼoeˇ loꞈ-ehˇ saˇ jaˇ dzaˬ ngeh, Aˬbyaˬhaˬ zaˬ tiˬ gʼaˬ-iˬ maˬ jawˇ le-aˬ siˬ. 6Miˬyehˇ neh aˬ yawꞈ-ahˇ heu loꞈ-ehˇ ehˇ nehˬ-euˬ meh. ‘Nawˬ-euˬ zaˬ nawˬ-euˬ uˆ deuˬ-aˬ, aˬ cawˬ tsawˇ jeuˬ-euˬ miˇ kʼahˬ-ahˇ ya jawˇ-iˇ-awˇ, aˬ cawˬ-euˬ zaˬ kʼaˆ ya geuꞈ-awˇ, aˬ cawˬ kʼehˬ nehˬ kʼaˆ nehˬ gaˇ oeˬ yaˇ kʼoꞈ byah ni ya daˬ tehꞈ-a. 7Ehˇ kʼawꞈ, aˬ yawꞈ maꞈ-ahˇ zaˬ kʼaˆ bi geuꞈ-euˬ tsawˇ jeuˬ koeˇ jeuˬ-ahˇ ngaˇ yaˇ kʼaˬ daˇ-awˇ, aˬ yawꞈ maꞈ-ahˇ miˇ kʼahˬ kʼoeˇ kʼahˬ laꞈ kʼoeˇ neh bi doˆ laˇ ma. Kʼoeˇ ngeh, jawˇ duˬ heu tsahˇ-ahˇ aˬ yawꞈ maꞈ ngaˬ-ahˇ uˬ duˬ tahˬ tehꞈ-a.’ 8Kʼoeˇ naˇ, Miˬyehˇ neh Aˬbyaˬhaˬ-ahˇ baˆ kʼoˆ mehˬ dzaˬ yehˬ-eu zahˇ bi jahˇ-eu laꞈ kʼoeˇ, dawˬ ma saˇ jaˇ dzaˬ-euˬ meh. Kʼoeˇ miˇ neh, Iˇtsaˆ dehꞈ le-awˇ tiˬ jaw byah laˇ ngeh, Aˬbyaˬhaˬ neh aˬ yawꞈ-euˬ aˬ li Iˇtsaˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Kʼoeˇ loꞈ-ehˇ duˇ ni, Iˇtsaˆ gʼeh, aˬ yawꞈ-euˬ aˬ li Yaˬkoˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Yaˬkoˆ gʼeh, aˬ yawꞈ-euˬ aˬ li tseˇ nyiꞈ li-ahˇ baˆ kʼoˆ mehˬ dzaˬ yehˬ nehˬ-euˬ meh. Aˬ li kʼoeˇ tseˇ nyiꞈ liˬ-aˬ, aˬ dui tsawˇ jeuˬ-euˬ tsawˇ myahˇ doˆ-eu aˬ poeˬ deuˬ pyeuꞈ-eu meh.
9“Yaˬkoˆ-euˬ aˬ li deuˬ-aˬ, aˬ yawꞈ ha mehˇ nmˇ-euˬ aˬ nyiˇ Yoˇsehˆ-ahˇ myaˆ naˆ-eu miˇ neh, aˬ cawˬ-ahˇ ahˬ nehˬ-awˇ, aˬ cawˬ neh Iˇjiˇtuˆ miˆ kʼahˬ-ahˇ zaˬ kʼaˆ bi geuꞈ-iˇ-eu gʼaˇ duˬ ahˬ dzaˬ-euˬ meh. Ehˇ kʼawꞈ, Yoˇsehˆ-ahˇ Miˬyehˇ maˬ byehˇ dzeh-ehˇ, 10shaˬ-eu zahˬ-eu jeˬ laꞈ kʼoeˇ sheuˬ dzeuˇ nehˬ-euˬ meh. Iˇjiˇtuˆ sahˬ paˬ mehˬ shi Yoˇsehˆ ya le ngeh, Miˬyehˇ aˬ yawꞈ-ahˇ myaˆ pyawˬ pyuˇ-eu jeˬ hawˇ-eu zaˬ siˬ tsawˇ gahˇ biꞈ neh-euˬ meh. Sahˬ paˬ kʼoeˇ gʼaˬ neh Yoˇsehˆ-ahˇ aˬ yawꞈ-euˬ miˇ kʼahˬ kʼoeˇ taˆ hawˇ-eu sahˬ paˬ-euˬ hawˇ nymˇ kʼoeˇ taˆ bi uˆ lahˇ-euˬ meh. 11Kʼoeˇ naˇ, Iˇjiˇtuˆ miˇ kʼahˬ kʼahˬ lah ni hawˇ-eu Kaˬnaˬ miˇ kʼahˬ laꞈ kʼoeˇ mehꞈ-eu shuꞈ-eu jeˬ keuˆ le-awˇ, shaˬ dui dui laˇ taˬ-euˬ meh. A dui-euˬ aˬ poeˬ deuˬ kʼawꞈ, dzaˬ-eu jeˬ maˬ jaˆ-ehˇ shaˬ laˇ taˬ-euˬ meh. 12Kʼoeˇ ngeh, Iˇjiˇtuˆ miˇ kʼahˬ-ahˇ cehˇ jaˆ-eu gaˇ kawˆ Yaˬkoˆ ya gaˬ ngeh. aˬ yawꞈ-euˬ aˬ li pyeuꞈ-eu aˬ dui-euˬ aˬ poeˬ deuˬ-ahˇ pyehˬ gʼeh-awˇ, yaw beh tiˬ doˆ bi iˇ haw-euˬ meh. 13Nyiˬ doˆ tiˬ doˆ paˇ bi iˇ ngeh, aˬ yawꞈ Yoˇ sehˆ pyeuꞈ-eu gaˇ kawˆ, aˬ yawꞈ-euˬ mehˇ nmˇ deuˬ-ahˇ Yoˇsehˆ bi siˬ-awˇ, Yoˇsehˆ-euˬ aˬ yuiꞈ aˬ nyiˇ gaˇ kawˆ Iˇjiˇtuˆ sahˬ paˬ ya siˬ-euˬ meh. 14Kʼoeˇ naˇ, pehˬ zaˬ ma zaˬ dawˬ tawˆ luꞈ sheuˬ-awˇ Iˇjiˇtuˆ miˇ kʼahˬ-ahˇ oe-eu gʼaˇ duˬ, aˬ yawꞈ-euˬ aˬ da Yaˬkoˆ-ahˇ Yoˇsehˆ tsaꞈ ahˇ gʼeh-euˬ meh. Pehˬ zaˬ ma zaˬ dawˬ tawˆ luꞈ shiꞈ tseˇ ngaˬ gʼaˬ byah-eu meh. 15Iˇjiˇtuˆ miˇ kʼahˬ-ahˇ Yaˬkoˆ jawˇ-iˇ-awˇ, aˬ yawꞈ hawˇ-eu aˬ yawꞈ-euˬ aˬ li dawˬ tawˆ luꞈ, kʼoeˇ gaˇ ziˇ dehꞈ jiˇ-euˬ meh. 16Aˬ yawꞈ maꞈ-euˬ gʼawˇ mawˇ-ahˇ Sheˬkmˬ meuˬ-ahˇ baꞈ kʼoꞈ gʼeh-awˇ, Haˬmawˬ aˇ jeuˬ-ahˇ Aˬbyaˬhaˬ neh pyuˇ biꞈ-awˇ zeuˇ tsehˆ yaꞈ-euˬ lmˬ bymˇ-ahˇ baꞈ pahˬ-euˬ meh.
17“Miˬyehˇ neh Aˬbyaˬhaˬ-ahˇ saˇ jaˇ dzaˬ taˬ-euˬ loꞈ-ehˇ bi byah laˇ-eu aˇ yamˬ tsaˬ laˇ ngeh, Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu aˬ dui-euˬ tsawˇ jeuˬ myaˬ dui dui laˇ taˬ-euˬ meh. 18Aˇ saˬ saˬ laˇ ngeh, Yoˇsehˆ gaˇ kawˆ maˬ siˬ nya-eu sahˬ paˬ tiˬ gʼaˬ daˆ laˇ-awˇ, Iˇjiˇtuˆ miˆ kʼahˬ-ahˇ uˆ lahˇ-euˬ meh. 19Aˬ yawꞈ-aˬ, aˬ dui-euˬ aˬ poeˬ aˬ bawˇ kʼoeˇ deuˬ-ahˇ tsawˇ gahˇ gahˇ-euˬ uˬ taꞈ, gʼawˬ shaˬ tiˬ pawꞈ-iˬ maˬ gaˬ-aˬ. Zaˬ nahˬ deuˬ bi shiˇ jiˇ-eu gʼaˇ duˬ, iˇ kahˇ laꞈ kʼoeˇ maˬ bi jawˇ ni, laꞈ nyiˇ bi ciˬ dzeh-euˬ meh. 20Kʼoeˇ ngeh yamˬ-ahˇ Moˇsehˬ dehꞈ le-euˬ meh. Aˬ yawꞈ-aˬ, muiˬ dui dui-eu aˬ li tiˬ li pyeuꞈ-eu meh. Ba la smˇ siˬ byah ni aˬ yawꞈ-ahˇ iˇ kahˇ laꞈ kʼoeˇ bo saˆ-awˇ cu-euˬ meh. 21Aˬ yawꞈ-ahˇ laꞈ nyiˇ ciˬ dzeh ha-iˇ ngeh, sahˬ paˬ zaˬ miˬ neh ciˬ cu-awˇ, aˬ yawꞈ-euꞈ aˬ li loꞈ-ehˇ cu huiˬ geuꞈ-euˬ meh. 22Iˇjiˇtuˆ tsawˇ jeuˬ-euˬ zaˬ siˬ tsawˇ gahˇ dawˬ tawˆ luꞈ aˬ yawꞈ ya dzaw-awˇ, ngehˬ-eu tmˇ-eu paw dzeˇ maˬ ehˇ, mˇ-eu shaˇ-eu paw dzeˇ maˬ ehˇ, nya dui dui-eu tsawˇ haˬ tiꞈ gʼaˬ pyeuꞈ laˇ-euˬ meh.
23“Moˇseˬ oeˬ tseˇ kʼoꞈ kʼawˆ laˇ ngeh, aˬ yawꞈ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ aˬ cawˬ aˬ joˆ-ehˇ jahˇ nehˬ gaˇ cah haw-iˇ-eu lehˇ noeˬ doˆ leˇ-euˬ meh. 24Iˇsaˬleˬlaˆ tsawˇ haˬ tiˬ gʼaˬ-ahˇ Iˇjiˇtuˆ tsawˇ haˬ neh kʼehˬ nehˬ-euˬ gaˇ mawˇ ngeh, aˬ yawꞈ caw ba nehˬ-iˇ-awˇ, Iˇjiˇtuˆ tsawˇ haˬ kʼoeˇ gʼaˬ-ahˇ laꞈ poˆ poˆ-awˇ sehꞈ-euˬ meh. 25Miˬyehˇ aˬ yawꞈ-ahˇ zmˬ-eu laꞈ kʼoeˇ, aˬ yawꞈ-euˬ tsawˇ jeuˬ-ahˇ ka kʼoꞈ-eu lehˇ gʼeh-eu gaˇ kawˆ aˬ yawꞈ-euˬ tsawˇ haˬ deuˬ noeˬ siˬ tehꞈ-a lehˇ aˬ yawꞈ noeˬ-euˬ meh. Ehˇ kʼawꞈ, aˬ yawꞈ maꞈ maˬ noeˬ siˬ-a. 26Yawˬ nah yawˬ Iˇsaˬleˬlaˆ tsawˇ haˬ nyiˬ gʼaˬ yaw kaˬ ceh luꞈ gaˇ aˬ yawꞈ mawˇ-awˇ, aˇ kaˬ piˇ nehˬ-eu laꞈ kʼoeˇ, ‘Naˇ haˬ sheˇ. Iˇsaˬleˬlaˆ tsawˇ haˬ cawˬ cawˬ aˬ jeˬ miˇ neh teu loꞈ-ehˇ ceh dzaˬ te’ lehˇ ehˇ nehˬ-euˬ meh. 27Ehˇ kʼawꞈ, lehˬ dzehˬ-eu gʼaˬ Moˇseˬ-ahˇ dehˬ dzeh-awˇ ehˇ-eu, ‘Nga maꞈ-ahˇ uˆ lahˇ-awˇ yaˇ kʼaˬ bi daˇ-eu lehˇ nawˬ-ahˇ aˬ suˇ gʼaˬ neh kʼehˇ taˬ ta. 28Miˇ nah Iˇjiˇtuˆ tsawˇ haˬ kʼoeˇ gʼaˬ-ahˇ nawˇ sehꞈ-euˬ loꞈ-ehˇ, ngaˬ-ahˇ paˇ sehꞈ-eu gʼeh te loˇ.’ 29Dawˬ kʼoeˇ dawˬ-ahˇ Moˇseˬ ya gaˬ ngeh, Iˇjiˇtuˆ miˆ kʼahˬ-ahˇ neh cehˆ-awˇ, Miˇdiˬyaˬ miˇ kʼahˬ-ahˇ cehˆ jawˇ-iˇ-euˬ meh. Aˬ yawꞈ kʼoeˇ gaˇ jawˇ ngeh, aˬ li nyiˬ li jawˇ le-euˬ meh.
30Oeˬ tseˇ kʼoꞈ dzeuˇ-iˇ geh, Siˇnaˆ gawˬ jawˬ dawˬ peh baw duˆ tiˬ duˆ-ahˇ doꞈ luꞈ-eu miˬ dzaˬ miˬ lmˇ laꞈ kʼoeˇ, mˬ taˆ gʼaˬ kʼehˇ tiˬ gʼaˬ Moˇseˬ-euˬ mehˬ shi doˆ le-euˬ meh. 31Kʼoeˇ gaˇ ya mawˇ ngeh, aˬ yawꞈ zahˬ leˇ-awˇ, baw duˆ dawˬ peh le peh-awˇ haw duˬ leˇ-euˬ meh. Kʼoeˇ ngeh, SahˬpaˬMiˬyehˇ-euˬ teˇ saˇ aˬ yawꞈ ya gaˬ-euˬ meh. 32‘Ngaˇ-aˬ, naw maꞈ-euˬ aˬ poeˬ aˬ bawˇ pyeuꞈ-eu Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ ma’ lehˇ ehˇ-eu meh. Kʼoeˇ ngeh, Moˇseˬ guˆ dui dui-eu miˇ neh yaw dzuˬ dzuˬ-awˇ, maˬ haw cawˬ peuˬ-a. 33Sahˬpaˬ Miˬyehˇ ehˇ-eu, ‘Nawˬ-euˬ sehˬ nawˆ lehˆ-awˬ. Nawˇ yawꞈ luꞈ-eu jawˇ duˬ teu tsahˇ muiˬ-eu shawˇ-eu pehˇ tsahˇ meh. 34Ngaˬ-euˬ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ kʼehˬ-eu kʼaˆ-eu jeˬ-ahˇ yaw kʼaˆ-ehˇ ya daˬ luꞈ gaˇ ngaˇ mawˇ-euˬ ma. Aˬ yawꞈ maꞈ shaˬ zahˬ naꞈ dui dui-eu laꞈ kʼoeˇ mahˇ luꞈ-eu teˇ saˇ-ahˇ ngaˇ gaˬ-awˇ, aˬ yawꞈ maꞈ-ahˇ bi buˬ bi law-iˇ-eu lehˇ ngaˇ zaꞈ ka le-euˬ ma. Laˇ-awˬ. Ngaˇ nawˬ-ahˇ Iˇjiˇtuˆ miˇ kʼahˬ-ahˇ kʼehˇ gʼeh-eu ma.’
35“‘Nga maꞈ kʼoeˇ taˆ uˆ lahˇ-awˇ yaˇ kʼaˬ bi daˇ-eu lehˇ, aˬ suˇ gʼaˬ nawˬ-ahˇ kʼehˇ taˬ ta’ lehˇ, aˬ yawꞈ maꞈ neh ehˇ nehˬ-awˇ byehˇ dzeh nehˬ-euˬ Moˇseˬ kʼoeˇ gʼaˬ-aˬ, aˬ yawꞈ-euˬ mehˬ shi baw duˆ laꞈ kʼoeˇ ya mawˇ-euˬ mˬ taˆ gʼaˬ kʼehˇ neh bi caw ba-eu laꞈ kʼoeˇ, aˬ yawꞈ maꞈ-ahˇ bi uˆ lahˇ-awˇ bi ka kʼoꞈ-eu gʼaˇ duˬ Miˬyehˇ neh kʼehˇ leꞈ-euˬ Moˇseˬ pyeuꞈ-eu meh. 36Iˇjiˇtuˆ miˇ kʼahˬ laꞈ kʼoeˇ maˬ ehˇ, Iˬ ma laˆ shaˆ Yaw neˇ gʼahˇ ceh maˬ ehˇ, bawˇ tsahˬ bawˇ dahˇ laꞈ kʼoeˇ oeˬ tseˇ kʼoꞈ oeˬ tseˇ myaˇ cah luꞈ ngeh maˬ ehˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ mˇ mehˬ-eu laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh-euˬ meh. 37‘Ngaˬ-ahˇ kʼehˇ gʼeh leꞈ-euˬ loꞈ-ehˇ, Miˬyehˇ gʼaˇ duˬ ngehˬ dah-eu tiˬ gʼaˬ naw maꞈ jawˇ gaˇ Miˬyehˇ paˇ kʼehˇ gʼeh leꞈ tehꞈ-a. Aˬ yawꞈ-aˬ, naw maꞈ-euˬ aˇ jeuˬ aˇ ca pyeuꞈ tehꞈ-a’ lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-euˬ gʼaˬ-aˬ, Moˇseˬ meh. 38Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ kʼaˇ shuiꞈ deh yaˇ-ahˇ uiˬ leˇ-awˇ jawˇ ngeh, aˬ yawꞈ maꞈ nehˬ-ehˇ jawˇ-euˬ kʼoeˇ gʼaˬ Moˇseˬ meh. Aˬ dui-euˬ aˬ poeˬ aˬ bawˇ deuˬ nehˬ-ehˇ jawˇ-euˬ kʼoeˇ gʼaˬ aˬ yawꞈ meh. Siˇnaˆ Gawˬ jawˬ-ahˇ mˬ taˆ gʼaˬ kʼehˇ dawˬ ngehˬ cawˬ le ngeh jawˇ-euˬ gʼaˬ kʼawꞈ, aˬ yawꞈ meh. Aˬ dui-ahˇ biꞈ-eu gʼaˇ duˬ Miˬyehˇ dawˬ kawˬ za-euˬ gʼaˬ kʼawꞈ, aˬ yawꞈ meh.
39“Ehˇ kʼawꞈ, aˬ dui-euˬ aˬ poeˬ aˬ bawˇ deuˬ aˬ yawꞈ-euˬ ehˇ dawˬ maˬ naˇ haˬ ni, aˬ yawꞈ-ahˇ dehˬ dzeh-awˇ, Iˇjiˇtuˆ miˇ kʼahˬ-ahˇ gʼoꞈ-iˇ mawꞈ-eu nui ma ahˇ-eu meh. 40Kʼoeˇ miˇ neh, ‘Nga maꞈ-ahˇ mehˬ hu paw bi sheuˬ gʼeh-eu gʼaˇ duˬ, Miˬyehˇ tiˬ deuˬ tehˆ nehˬ laꞈ-awˬ. Nga maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ Moˇseˬ kʼoeˇ gʼaˬ aˬ jeˬ gʼeh-euˬ maˬ siˬ miˇ-a’ lehˇ, Aˬloˬ-ahˇ aˬ yawꞈ maꞈ ehˇ nehˬ-euˬ meh. 41Kʼoeˇ ngeh, mawˇ neˇ mawˇ gaw mawˇ kawˇ tiˬ kawˇ aˬ yawꞈ maꞈ tehˆ-awˇ, lawˇ-eu shehˇ-eu jeˬ mˇ-awˇ, aˬ yawꞈ maꞈ neh tehˆ-euˬ mawˇ kawˇ kʼoeˇ-ahˇ taˬ huiˬ-eu bawˬ-iˬ gʼeh-euˬ meh. 42Kʼoeˇ miˇ neh, Miˬyehˇ neh aˬ yawꞈ maꞈ-ahˇ byehˇ dzeh nehˬ-awˇ, mˬ kʼoeˇ taˆ jaˆ-eu nahˇ ma, ba la, aˬ guiˇ deuˬ-ahˇ uˬ duˬ tahˬ-eu tsawˇ haˬ deuˬ bi pyeuꞈ laˇ-euˬ meh. Miˬyehˇ gʼaˇ duˬ ngehˬ dah-eu deuˬ-euˬ sahˬ boꞈ laꞈ kʼoeˇ, heu loꞈ-ehˇ boꞈ taˬ-euˬ meh.
‘Iˇsaˬleˬlaˆ tsawˇ haˬ deuˬ-oˇ,
bawˇ tsahˬ bawˇ dahˇ kʼaˇ shuiꞈ deh-ahˇ,
oeˬ tseˇ kʼoꞈ oeˬ tseˇ myaˇ byah ni,
naw maꞈ jeˬ zaˬ sehꞈ-awˇ lawˇ-euˬ,
ngaˬ-ahˇ lawˇ-euˬ maˬ ngeuˇ-a de.
43Mawˇleh miˬ yehˇ sehˬ gʼawˆ hawˇ-eu,
aˬ guiˇ miˬ yehˇ Leˬpaˬ mawˇ kawˇ,
naw maꞈ baꞈ baꞈ-ehˇ cah-euˬ meh.
Tahˬ pahˬ aˬ ma kʼoeˇ deuˬ tehˆ-awˇ,
naw maꞈ uˬ duˬ tahˬ-euˬ miˇ neh,
Baˬbuˇloˬ miˇ kʼahˬ nya baˬ-ahˇ,
naw maꞈ-ahˇ bi paꞈ byoˆ gʼeh ma.’
44“Aˬ dui-euˬ aˬ poeˬ aˬ bawˇ deuˬ, bawˇ tsahˬ bawˇ dahˇ-ahˇ Dawˬ ma saˇ jaˇ Sehˬ gʼawˆ jaˆ-euˬ meh. Miˬyehˇ neh Moˇseˬ-ahˇ ehˇ nehˬ-awˇ bi tsoˆ-euˬ loꞈ-ehˇ, Moˇseˬ neh ya mawˇ-euˬ hmˬ-ahˇ duˇ leˇ ni tsoˆ-euˬ meh. 45Aˬ dui maꞈ-euˬ aˬ poeˬ aˬ bawˇ kʼoeˇ deuˬ, aˬ yawꞈ maꞈ-euˬ aˬ da deuˬ-euˬ laꞈ-ahˇ neh sehˬ gʼawˆ kʼoeˇ hmˬ za-awˇ, aˬ yawꞈ maꞈ mehˬ hu paw le gʼeh leꞈ-eu nehˬ-ehˇ Miˬyehˇ neh bi teh doˆ-euˬ tsawˇ jeuˬ deuˬ-euˬ miˇ kʼahˬ yuˇ geuꞈ-eu lehˇ Yawˇshuˆ nehˬ-ehˇ aˬ yawꞈ maꞈ le ngeh jawˇ, sehˬ gʼawˆ kʼoeˇ gʼawˆ baꞈ gʼeh-euˬ meh. Kʼoeˇ naˇ, sehˬ gʼawˆ kʼoeˇ Daˬbiˇ-euˬ ziˇ-ahˇ keuˆ ni kʼoeˇ gaˇ jaˆ-euˬ meh. 46Daˬbiˇ-aˬ, Miˬyehˇ nui ma tsaˬ-eu tsawˇ haˬ tiˬ gʼaˬ pyeuꞈ-awˇ, Yaˬkoˆ-euˬ Miˬyehˇ#7.46 Jaˇliꞈ tiˬ paˆ na deuˬ laꞈ kʼoeˇ, ‘Yaˬkoˆ-euˬ Miˬyehˇ’ lehˇ ehˇ gaˇ, ‘Iˇsaˬleˬlaˆ tsawˇ haˬ deuˬ’ lehˇ ehˇ taˬ-euˬ meh. bi jawˇ-eu gʼaˇ duˬ aˬ yawꞈ jawˇ duˬ tiˬ tsahˇ tsoˆ-eu aˬ kawˬ-aˬ biꞈ laꞈ lehˇ, Miˬyehˇ-ahˇ shaˇ-euˬ meh. 47Ehˇ kʼawꞈ, Miˬyehˇ gʼaˇ duˬ nymˇ tsoˆ-euˬ gʼaˬ-aˬ, Sawˇlaˬmoˬ meh.
48“Ehˇ kʼawꞈ, Dawˬ tawˆ kʼoeˇ taˆ Huiˬ-eu Sahˬpaˬ Miˬyehˇ-aˬ, tsawˇ haˬ zaˬ-euˬ aˬ laꞈ neh tsoˆ-euˬ nymˇ-ahˇ jawˇ-eu maˬ ngeuˇ-a lehˇ, Miˬyehˇ gʼaˇ duˬ ngeh dah-eu tsawˇ haˬ neh ehˇ taˬ-euˬ heu loꞈ-ehˇ jaˆ-eu meh.
49‘Mˬ maˬ ngaˬ-euˬ dzoeˬ dzaˬ nuiˇ mahˬ,
miˇ maˬ ngaˬ-euˬ kuiˇ nawˬ kʼawˬ boˆ,
Naw maꞈ ngaˇ paˇ bi jawˇ-eu lehˇ,
nymˇ aˬ joˆ-ehˇ tsoˆ-eu gʼeh te.
Ngaˇ jawˇ naˬ mˇ nya-eu jawˇ duˬ,
nui gaˇ aˬ geu tsahˇ paˇ jaˆ ta.
50Mˬ ga miˇ nawˬ dawˬ tawˆ luꞈ-ahˇ,
ngaˬ neh beh-euˬ maˬ ngeuˇ ta loˇ.’
51Naw maꞈ nui ma aˇ naˆ naˆ-ehˇ gʼahˇ te. Naˬ bawˇ aˇ naˆ naˆ-ehˇ tuˇ te. Miˬyehˇ-ahˇ maˬ siˬ nya-eu tsawˇ haˬ deuˬ loꞈ-ehˇ aˇ naˆ naˆ-ehˇ dzawˬ te. Naw maꞈ-aˬ, naw maꞈ-euˬ aˬ poeˬ aˬ bawˇ deuˬ-ahˇ duˇ-awˇ, Muiˬ-eu shawˇ-eu Yaw sahˇ Miˬyehˇ-euˬ dawˬ-ahˇ tiˬ jawˇ-iˬ maˬ naˇ haˬ geuꞈ-a. 52Naw maꞈ-euˬ aˬ poeˬ aˬ bawˇ deuˬ neh maˬ bi kʼehˬ maˬ bi kʼaˆ haw-euˬ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ-iˬ maˬ jawˇ-a. Miˬyehˇ-euˬ tsaˬ-eu dawˇ-eu Zaˬkʼaˆ oe tehꞈ-a lehˇ aˇ hu ngehˬ dah-euˬ deuˬ-ahˇ aˬ yawꞈ maꞈ sehꞈ-euˬ meh. Nymˬ-mˇ poˆ jawˇ-aˬ, naw maꞈ yaw tsaˬ yaw dawˇ kʼoeˇ gʼaˬ-ahˇ aˬ cawˬ-euˬ aˬ laꞈ laꞈ kʼoeˇ a nehˬ-awˇ sehꞈ-euˬ meh. 53Mˬ taˆ gʼaˬ kʼehˇ neh biꞈ le-euˬ Miˬyehˇ-euˬ zahˇ dawˬ kʼoꞈ dawˬ-ahˇ za-euˬ tsawˇ haˬ deuˬ-aˬ, naw maꞈ meh. Ehˇ kʼawꞈ, zahˇ dawˬ kʼoꞈ dawˬ kʼoeˇ-ahˇ naw maꞈ maˬ naˇ haˬ geuꞈ-a.”
Saˬteˬpaˬ-ahˇ kʼaˬ lo biˬ sehꞈ-euˬ
54Saˬteˬpaˬ kʼoeˇ loꞈ-ehˇ ehˇ gaˇ ya gaˬ ngeh, Bahꞈdzah#7.54 ‘Baꞈ dzah’ lehˇ ehˇ-eu dawˬ tsuiꞈ, Maꞈtehˬ 26.59-ahˇ haw-awˬ. laꞈ kʼoeˇ uˇ-eu tsawˇ haˬ deuˬ aˬ yawꞈ-ahˇ nui ma pehˇ dui dui laˇ-awˇ, seuˬ teuꞈ-eu meh. 55Ehˇ kʼawꞈ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ-aˬ, mˬ-ahˇ gʼawˇ leuˇ haw ngeh, Miˬyehˇ-euˬ yaw shehꞈ kʼahˬ sehˇ-ahˇ maˬ ehˇ, Miˬyehˇ-euˬ aˇ maˇ paw Yeˬsuˇ yawꞈ luꞈ gaˇ maˬ ehˇ, ya mawˇ-euˬ meh. 56“Haw sheˇ. Mˬ pah taˬ-awˇ, Tsawˇhaˬ-euˬ Zaˬmaˇ kʼoeˇ gʼaˬ Miˬyehˇ-euˬ aˇ maˇ paw yawꞈ luꞈ-eu mawˇ laˇ ngaˇ” lehˇ aˬ yawꞈ ehˇ-eu meh.
57Kʼoeˇ ngeh, tsawˇ haˬ kʼoeˇ deuˬ guˇ kʼaˆ leꞈ-awˇ, naˬ bawˇ dehˬ tsoeˬ-awˇ Saˬteˬpaˬ jawˇ gaˇ coeˬ gʼeh-euˬ meh. 58Kʼoeˇ naˇ, aˬ yawꞈ-ahˇ meuˬ laꞈ nyiˇ biˬ doˆ-awˇ, kʼaˬ lo neh biˬ-euˬ meh. Saˇ kiˇ geuꞈ-awˇ haw le-euˬ tsawˇ haˬ deuˬ-aˬ, aˬ yawꞈ maꞈ-euˬ pehˇ kʼahˬ lehˆ taˬ yaꞈ-awˇ, Sawˇluˆ lehˇ kuˇ-eu zaˬ guˬ tiˬ gʼaˬ neh bi haw yaꞈ-euˬ meh. 59Aˬ yawꞈ maꞈ Saˬteˬpaˬ-ahˇ kʼaˬ lo biˬ dui dui luꞈ ngeh, “Sahˬpaˬ Yeˬsuˇ-oˇ, ngaˬ-euˬ saꞈ laˇ-ahˇ ha geuꞈ nehˬ laꞈ-awˬ” lehˇ, Saˬteˬpaˬ guiˬ lahˬ shaˇ-euˬ meh. 60Aˬ yawꞈ pawˬ tsuiꞈ pawˬ dmˬ ga dmˬ-awˇ, “Sahˬpaˬ-oˇ, aˬ yawꞈ maꞈ neh mˇ-euˬ yaw lehˬ heu, aˬ yawꞈ maꞈ-ahˇ iˬ baˇ taˬ taˬ nehˬ.” lehˇ ehˇ-eu meh. Aˬ yawꞈ kʼoeˇ loꞈ-ehˇ ehˇ gʼaˬ-awˇ shiˇ tsehˆ-euˬ meh.
Currently Selected:
Gʼaˬkʼehˇ 7: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
