Gʼaˬkʼehˇ 4

Yuˇdaˆ tsawˇ haˬ aˬ yuiꞈ aˬ tsu deuˬ Beˬtuˆluˆ hawˇ-eu Yoˇhaˬ-ahˇ naˇ haˬ-euˬ

1Beˬtuˆluˆ hawˇ-eu Yoˇhaˬ aˬ nyaꞈ tsawˇ haˬ kʼoeˇ deuˬ-ahˇ dawˬ ngehˬ ngehˬ luꞈ ngeh, piˇ ma deuˬ, Uˬduˬ tahˬ nymˇ nymˇ ma-ahˇ loꞈ piˇ-eu deuˬ kʼoeˇ taˆ uˆ lahˇ-eu yawˬ huiˬ yaw mahˇ deuˬ hawˇ-eu, Saˬduˬgehˇ deuˬ laˇ keuˆ-euˬ meh. 2Aˬ yawꞈ nyaꞈ Yeˬsuˇ shiˇ-awˇ Miˬyehˇ neh paˇ bi gʼoꞈ dehꞈ laˇ-euˬ gaˇ kawˆ mehˬ-awˇ, shiˇ-euˬ tsawˇ haˬ deuˬ-ahˇ paˇ bi gʼoꞈ dehꞈ laˇ nya meh lehˇ ehˇ mawꞈ-eu miˇ neh, aˬ yawꞈ maꞈ nui ma tiˬ pawꞈ-iˬ maˬ tsaˬ-a. 3Kʼoeˇ miˇ neh, aˬ yawꞈ nyaꞈ-ahˇ nyehꞈ-awˇ, kʼoeˇ ngeh nah uˬ ciꞈ ciꞈ le shaw-iˬ-eu miˇ neh. yawˬ nah yawˬ-ahˇ keuˆ ni paꞈ kuˆ-ahˇ dawˆ-euˬ meh. 4Ehˇ kʼawꞈ, dawˬ mehˬ mehˬ gaˇ ya gaˬ-euˬ tsawˇ haˬ gʼawˬ mya ni jah laˇ-awˇ, jah-eu tsawˇ haˬ ngaˬ heˇ gʼaˬ byah laˇ-euˬ meh.

5Yawˬ nah yawˬ-ahˇ, Yuˇdaˆ tsawˇ haˬ aˬ yuiꞈ aˬ tsu deuˬ, tsawˇ mawˬ tsawˇ kʼaˆ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ, Yeˬluˇsaˬlehˬ meu laꞈ kʼoeˇ uiˬ laˇ-euˬ meh. 6Piˇ ma Yaw huiˬ gʼaˬ pyeuꞈ-eu Aˬna hawˇ-eu Gaˬyaˬpaˇ, Yoˇhaˬ, Aˬleˬsaˬduˇ hawˇ-eu, Piˇ ma Yaw huiˬ gʼaˬ-euˬ aˬ yuiꞈ aˬ nyiˇ deuˬ-ahˇ aˬ yawꞈ maꞈ tahˬ dzoeˇ-euˬ meh. 7Gʼaˬ kʼehˇ kʼoeˇ nyiˬ gʼaˬ-ahˇ aˬ yawꞈ maꞈ-euˬ mehˬ shi bi yawꞈ-awˇ, “Aˬ geu jeˬ baoˬ hawˇ-eu aˬ suˇ gʼaˬ-euˬ tsawˇ myahˇ-ahˇ gʼoe-awˇ naw nyaꞈ teu loꞈ-ehˇ mˇ te” lehˇ naˇ haˬ-euˬ meh.

8Kʼoeˇ ngeh, Beˬtuˆluˆ-aˬ, Muiˬ-eu shawˇ-eu Yaw sahˇ Miˬyehˇ aˬ yawꞈ laꞈ kʼoeˇ tiˬ byah ni ahˇ-awˇ, aˬ yawꞈ maꞈ-ahˇ heu loꞈ-ehˇ ehˇ kʼoꞈ nehˬ-euˬ meh. “Miˇ kʼahˬ za-euˬ aˬ yuiꞈ aˬ tsu deuˬ hawˇ-eu tsawˇ mawˬ tsawˇ kʼaˆ deuˬ-oˇ, 9aˬ kuiˇ yaw cawˆ heu gʼaˬ-ahˇ mˇ nehˬ-euˬ muiˬ-eu gaˇ hawˇ-eu, aˬ yawꞈ aˬ joˆ-ehˇ taˬ leˇ-euˬ gaˇ kawˆ nga nyaꞈ-ahˇ naˇ haˬ te lehˇ ngeuˇ naˇ, 10naw maꞈ neh laꞈ yaꞈ kʼoeˇ taˆ taꞈ sehꞈ nehˬ-awˇ, Miˬyehˇ neh bi gʼoꞈ dehꞈ laˇ-euˬ Naˬzaˬlehˇ tsawˇ haˬ Yeˬsuˇ Ka li-euˬ tsawˇ myahˇ baoˬ baˬ da neh , nymˬ-mˇ naw maꞈ mehˬ shi yawꞈ luꞈ-eu tsawˇ haˬ heu gʼaˬ muiˬ laˇ-euˬ meh lehˇ naw maꞈ dawˬ tawˆ luꞈ siˬ duˬ-eu uˬ taꞈ, Iˇsaˬleˬlaˇ tsawˇ haˬ dawˬ tawˆ luꞈ siˬ duˬ-eu tsaˬ meh. 11Jaˇliꞈ laꞈ kʼoeˇ,

‘Naw maꞈ nymˇ tsoˆ gaˇ maˬ geuꞈ-ehˇ,

baꞈ dzeh taˬ-euˬ kʼaˬ lo kʼoeˇ siˬ,

kʼaˬ lo dawˬ tawˆ maˬ tseˇ poeˬ-eu,

laꞈ coeˇ lo ziꞈ#4.11 ʼLaꞈ coeˇ lo ziꞈʼ lehˇ ehˇ-eu dawˬ tsuiꞈ Maꞈtehˬ 21.42-ahˇ haw-awˬ. pyeuꞈ laˇ-euˬ meh.’

lehˇ ehˇ taˬ-euˬ kʼoeˇ-aˬ, Yeˬsuˇ-ahˇ ehˇ mawꞈ-eu meh. 12Aˬ yawꞈ maˬ ngeuˇ naˇ, aˬ dui-ahˇ ka kʼoꞈ nya-eu tiˬ gʼaˬ-iˬ maˬ jawˇ-a. Aˬ jeˬ miˇ neh ehˇ naˇ, mˬ heu siˬ-euˬ uˬ moˆ aˬ yawꞈ-euˬ tsawˇ myahˇ maˬ ngeuˇ naˇ, aˬ dui-ahˇ ka kʼoꞈ nya ni tsawˇ myahˇ yawˬ myahˇ yawˬ biꞈ taˬ-euˬ maˬ jaˆ-a.”

13Beˬtuˆluˆ hawˇ-eu Yoˇhaˬ aˬ nyaꞈ zaˬ siˬ tsawˇ gahˇ maˬ ya dzaw haw-euˬ dahˇ taˆ zaˬ pyeuꞈ kʼawꞈ, kʼoeˇ loꞈ-ehˇ kʼaˬ duˬ ni ngehˬ gaˇ tmˇ gaˇ, Baꞈ dzah#4.13 ‘Baꞈ dzah’ lehˇ ehˇ-eu dawˬ tsuiꞈ, Maꞈtehˬ 14.55-ahˇ haw-awˬ. aˇ muˇ laꞈ kʼoeˇ uˇ-eu aˬ yuiꞈ aˬ tsu deuˬ zahˬ leˇ-euˬ meh. Kʼoeˇ mi neh, aˬ yawꞈ nyaꞈ Yeˬsuˇ nehˬ-ehˇ jawˇ haw-euˬ tsawˇ haˬ pyeuꞈ-eu ngaˇ lehˇ aˬ yawꞈ maꞈ siˬ duˬ-euˬ meh. 14Ehˇ kʼawꞈ, aˬ kuiˇ muiˬ laˇ-euˬ tsawˇ ha kʼoeˇ gʼaˬ aˬ yawꞈ nyaꞈ-euˬ dawˬ peh yawꞈ luꞈ-eu miˇ neh, aˬ yawꞈ maꞈ tiˬ jeˬ-iˬ maˬ ehˇ nya-a. 15Kʼoeˇ ngeh, aˬ yawꞈ nyaꞈ-ahˇ Baꞈ dzah dzah luꞈ-eu nymˇ laꞈ nyiˇ bi doˆ-iˇ-awˇ, aˬ yawꞈ maꞈ tehꞈ-ehˇ bawˬ dzaˬ-euˬ meh. 16Aˬ yawꞈ maꞈ ehˇ-eu, “Tsawˇ haˬ heu nyiˬ gʼaˬ-ahˇ aˬ joˆ-ehˇ jahˇ nehˬ paˬ nga. Tsawˇ haˬ zaˬ maˬ mˇ nya-eu zahˬ leˇ paˬ-ehˇ gʼeh-eu gaˇ heu hmˬ aˬ yawꞈ nyaꞈ neh mˇ-euˬ meh lehˇ Yeˬluˇsaˬlehˬ meuˬ meuˬ lah ni siˬ nya-euˬ miˇ neh, aˬ dui tsawˇ pyehˇ maˬ paˇ pyehˇ nya ngaˇ. 17Ehˇ kʼawꞈ, nui gaˇ jawˇ-eu miˇ kʼahˬ zaˬ deuˬ jawˇ gaˇ maˬ bi gaˬ keuˆ-iˇ-eu gʼaˇ duˬ, Yeˬsuˇ-euˬ tsawˇ myahˇ uˬ moˆ aˬ cawˬ-ahˇ dawˬ tiˬ jawˇ-iˬ taˬ paˇ ngehˬ cawˬ lehˇ, aˬ yawꞈ nyaꞈ-ahˇ yaw kʼaˆ kʼaˆ-ehˇ mehˬ nehˬ kaˇ-euˇ.”

18Kʼoeˇ naˇ, aˬ yawꞈ nyaꞈ-ahˇ laꞈ kʼoeˇ paˇ kuˇ ahˇ-awˇ ehˇ nehˬ-eu, “Aˬ kaˇ naˇ, Yeˬsuˇ-euˬ tsawˇ myahˇ uˬ moˆ dawˬ mehˬ mehˬ-eu maˬ ehˇ, mehˬ-eu tsoˆ-eu maˬ ehˇ, naw nyaꞈ tiˬ jawˇ-iˬ taˬ paˇ mˇ.” 19Ehˇ kʼawꞈ, Beˬtuˆluˆ hawˇ-eu Yoˇhaˬ aˬ nyaꞈ ehˇ-eu, “Naw maꞈ-euˬ ehˇ dawˬ naˇ haˬ-eu hawˇ-eu Miˬyehˇ-euˬ ehˇ dawˬ naˇ haˬ-eu heu nyiˬ jeˬ, Miˬyehˇ mehˬ shi aˬ geu jeˬ tsaˬ dzehˬ ta lehˇ naw maꞈ shaˇnoeˬ haw sheˇ. 20Nga nyaꞈ law nmˇ-aˬ, nga nyaꞈ neh kʼaˇ ya gaˬ kʼaˇ ya mawˇ-euˬ gaˇ kawˆ heu maˬ ja-ehˇ maˬ jawˇ coeˇ nya.” 21Kʼoeˇ ngeh, Baꞈ dzah-ahˇ uiˬ laˇ-euˬ aˬ yuiꞈ aˬ tsu deuˬ aˬ yawꞈ nyaꞈ-ahˇ yaw kʼaˆ kʼaˆ-ehˇ mehˬ-eu laꞈ kʼoeˇ, guˆ tsiˬ nyehꞈ-awˇ pyehˬ nehˬ-euˬ meh. Tsawˇ haˬ kʼoeˇ gʼaˬ aˬ kuiˇ yaw cawˆ muiˬ laˇ-euˬ gaˇ tsawˇ haˬ dawˬ tawˆ luꞈ Miˬyehˇ-ahˇ ja ceuˬ luꞈ-eu miˇ neh, aˬ yuiꞈ aˬ tsu kʼoeˇ deuˬ aˬ yawꞈ nyaꞈ-ahˇ maˬ kʼehˬ maˬ kʼaˆ nehˬ peuˬ-a. 22Zahˬ leˇ paˬ-ehˇ gʼeh-eu jeˬ laꞈ kʼoeˇ naˇ gawˇ taˬ leˇ-euˬ tsawˇ haˬ kʼoeˇ gʼaˬ-aˬ, aˇ kʼoꞈ oeˬ tseˇ dzehˬ-iˇ-euˬ meh.

Jah-eu tsawˇ haˬ deuˬ nui ma kʼaˬ laˇ ni guiˬ lahˬ shaˇ-euˬ

23Beˬtuˆluˆ hawˇ-eu Yoˇhaˬ-ahˇ pyehˬ kʼoꞈ nehˬ ngeh, aˬ yawꞈ nyaꞈ-euˬ aˇ muˇ jawˇ gaˇ gʼoꞈ-iˇ-awˇ, Piˇ ma Yaw huiˬ gʼaˬ hawˇ-eu tsawˇ mawˬ tsawˇ kʼaˆ deuˬ neh aˬ yawꞈ nyaꞈ-ahˇ ehˇ-euˬ dawˬ deuˬ dzawˇ nehˬ-euˬ meh. 24Aˬ yawꞈ nyaꞈ dzawˇ mehˬ gaˇ jah-eu tsawˇ haˬ deuˬ ya gaˬ ngeh, tiˬ kawˆ loꞈ-ehˇ Miˬyehˇ-ahˇ heu loꞈ-ehˇ guiˬ lahˬ shaˇ-euˬ meh. “Mˬ hawˇ-eu miˇ-ahˇ maˬ ehˇ, iˬ ma laˆ shaˆ hawˇ-eu kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ maˬ ehˇ, beh-euˬ yaw sahˇ pyeuꞈ-eu Dawˬ tawˆ kʼoeˇ taˆ uˆ lahˇ-eu SahˬpaˬMiˬyehˇ-oˇ, 25muiˬ-eu shawˇ-eu Yaw sahˇ Miˬyehˇ-ahˇ gʼoe-eu laꞈ kʼoeˇ, nawˬ-euˬ zaˬ kʼaˆ pyeuꞈ-eu nga maꞈ-euˬ aˬ poeˬ Daˬbiˇ heu loꞈ-ehˇ ngehˬ nya tmˇ nya ni nawˇ jahˇ-euˬ meh.

‘Aˬ jeˬ miˇ neh lawˇ ciꞈ zaˬ deuˬ,

teu naˆ naˆ-ehˇ nui ma pehˇ ta.

Aˬ jeˬ miˇ neh miˇ kʼahˬ zaˬ deuˬ,

gaˇ dahˇ maˬ tsoeˬ-eu jeˬ toˆ ta.

26Miˇ kʼahˬ sahˬ paˬ deuˬ lehˬ hmˬ-awˇ,

miˇ kʼahˬ sahˬ ma deuˬ ymˬ leˇ-awˇ,

Sahˬpaˬ Miˬyehˇ-ahˇ guiˇ mˇ-awˇ,

aˬ yawꞈ neh tsiˇ lehꞈ-euˬ gʼaˬ-ahˇ,

guiˇ deuˆ-eu lehˇ laˆ dah luꞈ meh.’

lehˇ, Daˬbiˇ neh ehˇ taˬ-euˬ meh. 27Nawˬ neh Ka li bi geuꞈ-euˬ nawˬ-euˬ muiˬ-eu shawˇ-eu Zaˬ kʼaˆ pyeuꞈ-eu Yeˬsuˇ-ahˇ muiˇ-eu gʼaˇ duˬ, Heˬloˆ hawˇ-eu Boˬtiˇ Piˇlaˆ aˬ nyaꞈ, lawˇ ciꞈ zaˬ deuˬ hawˇ-eu Iˇsaˬleˬlaˇ tsawˇ haˬ deuˬ nehˬ-ehˇ meuˬ heu meuˬ laꞈ kʼoeˇ aˬ diˇ aˬ maˇ mehˬ bawˬ mˇ-euˬ meh. 28Nawˬ-euˬ baoˬ hawˇ-eu nawˬ-euˬ nui kʼahˇ-ahˇ gʼoe-awˇ bi pyeuꞈ laˇ-eu gʼaˇ duˬ aˇ hu ba neh nawˬ neh noeˬ tsehˆ taˬ-euˬ yawˬ jeˬ na luꞈ keuˆ le ni mˇ-eu lehˇ aˬ yawꞈ maꞈ uiˬ leˇ-euˬ meh. 29Sahˬpaˬ Miˬyehˇ-oˇ, aˬ yawꞈ maꞈ nga maꞈ-ahˇ laˆ cawˆ-eu lehˇ gʼeh luꞈ gaˇ haw mawˇ-awˇ, nawˬ-euˬ zaˬ kʼaˆ pyeuꞈ-eu nga maꞈ nawˬ-euˬ dawˬ kʼaˬ duˬ ni mehˬ nehˬ nya ni caw ba nehˬ laꞈ. 30Nawˬ-euˬ aˬ laꞈ cawˬ ja-eu laꞈ kʼoeˇ, naˇ-eu gawˇ-eu tsawˇ haˬ deuˬ-ahˇ bi taˬ leˇ-awˇ, nawˬ-euˬ muiˬ-eu shawˇ-eu Zaˬkʼaˆ pyeuꞈ-eu Yeˬsuˇ-euˬ tsawˇ myahˇ-ahˇ gʼoe-awˇ zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ mehˬ laꞈ.”

31Aˬ yawꞈ maꞈ guiˬ lahˬ shaˇ gʼaˬ ngeh, aˬ yawꞈ maꞈ uiˬ leˇ-awˇ jawˇ-eu jawˇ duˬ kʼoeˇ tsahˇ luˆ laˇ nyeh laˇ-awˇ, aˬ yawꞈ maꞈ dawˬ tawˆ luꞈ Muiˬ-eu shawˇ-eu Yaw sahˇ Miˬyehˇ byah laˇ-awˇ, nui ma kʼaˬ duˬ ni Miˬyehˇ dawˬ kawˬ mehˬ-euˬ meh.

Jah-eu tsawˇ haˬ deuˬ myawˬ gahˬ tiˬ kawˆ loꞈ-ehˇ zmˬ-euˬ

32Jah-eu tsawˇ haˬ-euˬ aˇ muˇ kʼoeˇ muˇ-aˬ, nui ma tiˬ siˬ tehꞈ-ehˇ taˬ-awˇ, nui noeˬ tiˬ gaˇ taꞈ-eu meh. Yawˬ ha kʼaˇ jaˆ-eu myawˬ gahˬ-aˬ, yawˬ ha-euˬ tehꞈ ma lehˇ tiˬ gʼaˬ-iˬ maˬ ehˇ ni, kʼaˇ jaˆ-eu yawˬ jeˬ na luꞈ tiˬ kawˆ loꞈ-ehˇ geuꞈ-euˬ meh. 33Gʼaˬ kʼehˇ deuˬ baoˬ tiˬ byah ni ahˇ-eu laꞈ kʼoeˇ, Sahˬpaˬ Yeˬsuˇ gʼoꞈ dehꞈ laˇ-euˬ gaˇ kawˆ saˇ kiˇ kamˬ-awˇ, muiˬ dui dui-eu guiˬ lahˬ deuˬ, aˬ yawꞈ maꞈ dawˬ tawˆ luꞈ kʼoeˇ taˆ Miˬyehˇ shehˬ nehˬ lawˇ nehˬ-euˬ meh. 34Aˬ yawꞈ maꞈ aˇ muˇ laꞈ kʼoeˇ shaˬ-eu zahˬ-eu tsawˇ haˬ maˬ jawˇ-a. Aˬ jeˬ miˇ neh ehˇ naˇ, deh ma hawˇ-eu nymˇ kʼaˇ jaˆ-eu tsawˇ haˬ deuˬ ahˬ-awˇ, za-euˬ pyuˇ hehˇ uiˬ laꞈ-euˬ meh. 35Pyuˇ kʼoeˇ deuˬ gʼaˬ kʼehˇ deuˬ-ahˇ a nehˬ-awˇ, yawˬ gʼaˬ na luꞈ-ahˇ kʼaˇ loˬ-eu loꞈ-ehˇ biˇ nehˬ-euˬ meh.

36Guˇbaˬluˇ iˇ jaw lahˇ miˇ kʼahˬ-ahˇ dehꞈ le-euˬ Leˬbiˇ tsawˇ jeuˬ Yoˇsehˆ lehˇ myahˇ-euˬ tiˬ gʼaˬ jawˇ-eu meh. Gʼaˬ kʼehˇ deuˬ neh aˬ yawꞈ-ahˇ Baˬnaˬbaˇ lehˇ myahˇ paˇ nehˬ-euˬ meh. Baˬnaˬbaˇ lehˇ ehˇ-eu dawˬ tsuiꞈ-aˬ, “Gʼaˬ biꞈ-eu gʼaˬ” lehˇ ehˇ mawꞈ-eu meh. 37Aˬ yawꞈ deh ma tiˬ kawˬ ahˬ-awˇ, za-euˬ pyuˇ gʼaˬ kʼehˇ deuˬ-ahˇ a nehˬ laˇ-euˬ meh.

Currently Selected:

Gʼaˬkʼehˇ 4: AHK

Highlight

Copy