Gʼaˬkʼehˇ 25

Sahˬ paˬ Gehˇsaˬ jawˇ gaˇ bi iˇ laꞈ lehˇ Pawˇluˆ shaˇ-euˬ

1Sahˬ paˬ Beˬtuˇ miˇ kʼahˬ kʼoeˇ kʼahˬ-ahˇ oe keuˆ-euˬ smˬ nah byah laˇ ngeh, Gehˇsaˬliˇ meuˬ-ahˇ neh Yeˬluˇsaˬlehˬ meuˬ-ahˇ le-euˬ meh. 2Kʼoeˇ ngeh, piˇ ma aˬ yuiꞈ deuˬ hawˇ-eu Yuˇdaˆ tsawˇ haˬ aˬ yuiꞈ aˬ tsu deuˬ neh Pawˇluˆ-euˬ gaˇ kawˆ aˬ yawꞈ jawˇ gaˇ daˬ leˇ-euˬ meh. Sahˬ paˬ Beˬtuˇ-ahˇ aˬ yawꞈ maꞈ heu loꞈ-ehˇ shaˇ-euˬ meh. 3Aˬ yawꞈ maꞈ-euˬ myaˆ pyawˬ-ahˇ haw-awˇ, Pawˇluˆ-ahˇ Yeˬluˇsaˬlehˬ meuˬ-ahˇ tiˬ poˆ bi sheuˬ ha laˇ-eu gʼaˇ duˬ shaˇ-euˬ meh. Gaˇ pehˇ-ahˇ loꞈ-awˇ Pawˇluˆ-ahˇ sehꞈ-eu gʼaˇ duˬ aˬ yawꞈ maꞈ lehˬ hmˬ jiˇ taˬ-euˬ meh. 4Beˬtuˇ ehˇ-eu, “Pawˇluˆ-ahˇ Gehˇsaˬliˇ meuˬ-euˬ tawˬ-ahˇ dawˆ taˬ-euˬ ma. Ngaˇ kʼawꞈ, gʼawˬ myahˇ maˬ gʼeh-ehˇ kʼoeˇ gaˇ gʼoꞈ-iˇ ma. 5Tsawˇ haˬ kʼoeˇ gʼaˬ neh mˇ lehˬ taˬ-euˬ jeˬ jaˆ naˇ, naw maꞈ-euˬ aˬ yuiꞈ aˬ tsu deuˬ ngaˬ nehˬ-ehˇ oe-awˇ ja le-awˬ.”

6Sahˬ paˬ Beˬtuˇ aˬ yawꞈ maꞈ nehˬ-ehˇ gʼoeˬ nah tseˇ nah byah ni paˇ jawˇ-awˇ, Gehˇsaˬliˇ meuˬ-ahˇ gʼoꞈ ka-iˇ-euˬ meh. Yawˬ nah yawˬ yaˇ kʼaˬ daˇ-eu nymˇ-ahˇ aˬ yawꞈ nuiˇ-awˇ, Pawˇluˆ-ahˇ kʼoeˇ gaˇ bi sheuˬ uˇ laꞈ-euˬ meh. 7Pawˇluˆ laˇ keuˆ ngeh, Yeˬluˇsaˬlehˬ meuˬ-ahˇ neh oe-euˬ Yuˇdaˆ tsawˇ haˬ deuˬ aˬ yawˬ-euˬ tiˬ jawˬ yawꞈ-awˇ, aˬ yawꞈ lehˬ dui dui-eu gaˇ kawˆ gʼawˬ mya jeˬ ehˇ-eu meh. Ehˇ kʼawꞈ, aˬ yawꞈ maꞈ ehˇ-eu kʼoeˇ saˇ kiˇ maˬ jaˆ-eu uˬ taꞈ, yaw duˬ maˬ baw-a. 8Kʼoeˇ naˇ, Pawˇluˆ ehˇ kʼoꞈ nehˬ-eu, “Yuˇdaˆ tsawˇ jeuˬ-euˬ Zahˇ dawˬ kʼoꞈ dawˬ-ahˇ maˬ ehˇ, Uˬ duˬ tahˬ nymˇ nymˇ ma-ahˇ maˬ ehˇ, Loˇmaˆ miˇ kʼahˬ-ahˇ maˬ ehˇ, ngaˬ neh mˇ bahˬ taˬ-euˬ tiˬ jeˬ-iˬ maˬ jaˆ.”

9Ehˇ kʼawꞈ, Beˬtuˇ-aˬ, Yuˇdaˆ tsawˇ haˬ mehˬ shi tsawˇ myahˇ za mawꞈ-eu miˇ neh, Pawˇluˆ-ahˇ ehˇ nehˬ-eu, “Nawˇ Yeˬluˇsaˬlehˬ meuˬ-ahˇ le-awˇ, ngaˬ-euˬ mehˬ shi gaˇ kawˆ heu hmˬ yaˇ kʼaˬ ja mawꞈ miˇ-a loˇ.”

10Pawˇluˆ ehˇ-eu, “Sahˬpaˬ Gehˇsaˬ-euˬ yaˇ kʼaˬ daˇ-eu nymˇ-ahˇ ngaˇ yawꞈ luꞈ-eu ma. Ngaˬ-ahˇ heu gaˇ yaˇ kʼaˬ ja-eu tsaˬ meh. Nawˇ siˬ luꞈ-eu loꞈ-ehˇ, Yuˇdaˆ tsawˇ haˬ deuˬ kʼoeˇ taˆ ngaˬ neh mˇ lehˬ taˬ-euˬ tiˬ jeˬ-iˬ maˬ jaˆ. 11Zahˇ dawˬ kʼoꞈ dawˬ-ahˇ ngaˇ puiˬ-awˇ shiˇ paˬ-ehˇ gʼeh-eu yaw lehˬ tiˬ jeˬ na mˇ taˬ-euˬ jaˆ naˇ kʼawꞈ, maˬ bi shiˇ ni bi dzeuˇ-iˇ laꞈ lehˇ ngaˇ maˬ ehˇ. Ehˇ kʼawꞈ, aˬ yawꞈ maꞈ ngaˬ-euˬ yaw lehˬ poˆ-eu teu maˬ tsaˬ naˇ, tsawˇ haˬ tiˬ gʼaˬ-iˬ aˬ yawꞈ maꞈ-euˬ aˬ laꞈ laꞈ kʼoeˇ ngaˬ-ahˇ maˬ a nehˬ nya-aˇ. Sahˬ paˬ Gehˇsaˬ neh yaˇ kʼaˬ bi daˇ laꞈ lehˇ ngaˇ shaˇ-eu ma.”

12Kʼoeˇ ngeh, sahˬ paˬ Beˬtuˇ-aˬ, aˬ yawꞈ-ahˇ nui noeˬ nui duˇ biꞈ-eu deuˬ nehˬ-ehˇ bawˬ dzaˬ-awˇ, heu loꞈ-ehˇ ehˇ kʼoꞈ nehˬ-euˬ meh. “Sahˬ paˬ Gehˇsaˬ neh yaˇ kʼaˬ bi daˇ laꞈ lehˇ nawˇ shaˇ-eu miˇ neh, nawˬ-ahˇ sahˬ paˬ Gehˇsaˬ jawˇ gaˇ bi le ma.”

Sahˬ paˬ Aˬgiˇpaˆ hawˇ-eu Beˬlaˬniˇ-euˬ mehˬ shi Pawˇluˆ-ahˇ sheuˬ gʼeh-euˬ

13Aˇ nah ui cuiˆ myahˇ laˇ ngeh, miˇ kʼahˬ kʼoeˇ kʼahˬ-ahˇ uˆ lahˇ le-euˬ sahˬ paˬ Beˬtuˇ-ahˇ dawˬ deh gʼa mawˇ le-awˇ ha-eu gʼaˇ duˬ, sahˬ paˬ Aˬgiˇpaˆ hawˇ-eu Beˬlaˬniˇ aˬ nyaꞈ dzeˇ zaˬ Gehˇsaˬliˇ meuˬ-ahˇ oe-euˬ meh. 14Aˬ nyaꞈ dzeˇ zaˬ kʼoeˇ gaˇ heu myaˆ nah jawˇ keuˆ laꞈ ngeh, saˬ paˬ Beˬtuˇ neh sahˬ paˬ Aˬgiˇpaˆ-ahˇ Pawˇluˆ gaˇ kawˆ heu loꞈ-ehˇ dzawˇ nehˬ-euˬ meh. “Sahˬ paˬ Peˬliˇ neh heu gaˇ tawˬ-ahˇ dawˆ taˬ yaꞈ-euˬ tsawˇ ha tiˬ gʼaˬ jawˇ meh. 15Ngaˇ Yeˬluˇsaˬlehˬ meuˬ-ahˇ le ngeh, Yuˇdaˆ tsawˇ haˬ piˇ ma aˬ yuiꞈ deuˬ hawˇ-eu aˬ yuiꞈ aˬ tsu geuꞈ-eu deuˬ aˬ yawꞈ-euˬ gaˇ kawˆ ngaˬ-ahˇ ja nehˬ laꞈ-awˇ, aˬ yawꞈ-ahˇ yaˇ kʼaˬ daˇ-awˬ lehˇ ngaˬ-ahˇ shaˇ-eu meh. 16Ehˇ kʼawꞈ, aˬ yawꞈ maꞈ-ahˇ ngaˇ heu loꞈ-ehˇ ehˇ nehˬ-euˬ ma. ‘Nga maꞈ Loˇmaˆ tsawˇ haˬ-aˬ, mˇ bahˬ-euˬ tsawˇ haˬ hawˇ-eu aˬ yawꞈ-ahˇ yaˇ kʼaˬ ja mawꞈ-eu tsawˇ haˬ yaw kaˬ bi tahˬ dzoeˇ-awˇ, nyiˬ paw luꞈ yawˬ ha gaˇ kawˆ bi dzawˇ gʼaˬ miˇ tsa maˬ ngeuˇ naˇ, mˇ bahˬ-euˬ tsawˇ haˬ kʼoeˇ gʼaˬ-ahˇ aˬ cawˬ-euˬ aˬ laꞈ laꞈ kʼoeˇ a nehˬ-eu zahˇ sahˇ kʼoꞈ maˬ jaˆ-a’ lehˇ ehˇ nehˬ-euˬ ma. 17Aˬ yawꞈ maꞈ heu gaˇ oe keuˆ ngeh, ngaˇ aˇ yamˬ jiˆ jiˆ-ehˇ maˬ jawˇ ni yawˬ nah yawˬ yaˇ kʼaˬ daˇ-eu nymˇ-ahˇ nuiˇ leˇ-awˇ, tsawˇ haˬ kʼoeˇ gʼaˬ-ahˇ bi sheuˬ laˬ-iˇ-eu gʼaˇ duˬ dawˬ biꞈ-euˬ ma. 18Aˬ yawꞈ-ahˇ yaˇ kʼaˬ ja mawꞈ-eu deuˬ tuˇ laˇ-awˇ ngehˬ-eu meh. Ehˇ kʼawꞈ, ngaˬ neh noeˬ taˬ-euˬ yaw bahˬ jeˬ tiˬ hmˬ-iˬ maˬ ehˇ doˆ laꞈ-a. 19Aˬ yawꞈ maꞈ ehˇ-eu kʼoeˇ-aˬ, aˬ yawꞈ maꞈ-euˬ uˬ duˬ tahˬ-eu zahˇ sahˇ kʼoꞈ gaˇ kawˆ hawˇ-eu, Yeˬsuˇ lehˇ myahˇ-euˬ tsawˇ haˬ tiˬ gʼaˬ gaˇ kawˆ-ahˇ taꞈ leˇ-awˇ aˬ yawꞈ nehˬ-ehˇ maˬ tsaˬ leˇ-ehˇ ja dzaˬ-euˬ gaˇ kawˆ ehˇ-eu tehꞈ meh. 20Gaˇ kawˆ heu deuˬ-ahˇ aˬ joˆ-ehˇ pyehˆ tseˇ haw paˬ nga lehˇ ngaˇ maˬ noeˬ duˬ nya-eu miˇ neh, ‘Yeˬluˇsaˬlehˬ meuˬ-ahˇ le-awˇ yaˇ kʼaˬ ja leˇ ma loˇ’ lehˇ, Pawˇluˆ-ahˇ naˇ haˬ-euˬ ma. 21Ehˇ kʼawꞈ, aˬ yawꞈ-ahˇ yaw muiˬ paˬ-ehˇ loꞈ piˇ nehˬ laꞈ-awˇ, sahˬ paˬ Gehˇsaˬ neh yaˇ kʼaˬ bi daˇ laꞈ lehˇ shaˇ-eu miˇ neh, sahˬ paˬ Gehˇsaˬ jawˇ gaˇ maˬ bi sheuˬ gʼeh dah-euˬ kʼoeˇ keuˆ ni aˬ yawꞈ-ahˇ yaw muiˬ paˬ-ehˇ loꞈ piˇ-eu gʼaˇ duˬ dawˬ biꞈ taˬ-euˬ ma.”

22Aˬgiˇpaˆ ehˇ-eu, “Tsawˇ haˬ heu gʼaˬ dawˬ ngehˬ gaˇ ngaˇ gaˬ mawꞈ nya.”

Beˬtuˆ ehˇ-eu, “Ni shawˬ nah ya gaˬ tehꞈ-a”

23Yawˬ nah yawˬ, Aˬgiˇpaˆ hawˇ-eu Beˬlaˬniˆ aˬ nyaꞈ dzeˇ zaˬ baoˬ kʼahˬ sehˇ tiˬ byah ni oe gaˇ bawˬ-iˬ gʼeh-awˇ ha-awˇ, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu meuˬ laꞈ kʼoeˇ jawˇ-eu myaˆ pyawˬ naˇ mehˇ jaˆ-eu aˬ yuiꞈ aˬ tsu deuˬ nehˬ-ehˇ mehˬ bawˬ gʼeh-eu hawˇ nymˇ laꞈ kʼoeˇ uˇ leˇ-euˬ meh. Kʼoeˇ ngeh, sahˬ paˬ Beˬtuˇ neh dawˬ biꞈ-awˇ Pawˇluˆ-ahˇ bi sheuˬ uˇ laꞈ-euˬ meh. 24Sahˬ paˬ Beˬtuˇ ehˇ-eu, “Sahˬ paˬ Aˬgiˇpaˆ hawˇ-eu heu gaˇ uiˬ laˇ taˬ-euˬ cawˬ deuˬ-oˇ, tsawˇ haˬ heu gʼaˬ-ahˇ haw sheˇ. Heu gaˇ jawˇ-eu Yuˇdaˆ tsawˇ haˬ deuˬ hawˇ-eu Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu Yuˇdaˆ tsawˇ haˬ dawˬ tawˆ luꞈ, tsawˇ haˬ heu gʼaˬ gaˇ kawˆ ngaˬ-ahˇ daˬ laˇ taˬ-euˬ meh. Aˬ yawꞈ-ahˇ yaw dehꞈ bi dehꞈ-eu maˬ geuˇ-a lehˇ aˬ yawꞈ maꞈ guˇ dui dui-eu meh. 25Ehˇ kʼawꞈ, aˬ yawꞈ bi shiˇ-eu gʼaˇ duˬ yaˇ kʼaˬ daˇ nehˬ paˬ-ehˇ, aˬ yawꞈ neh mˇ bahˬ taˬ-euˬ tiˬ jeˬ-iˬ ngaˇ maˬ poˆ doˆ nya-eu uˬ taꞈ, Huiˬ dui dui-eu Sahˬ paˬ Gehˇsaˬ neh yaˇ kʼaˬ bi daˇ nehˬ laꞈ lehˇ aˬ yawꞈ ngaˬ-ahˇ shaˇ-eu miˇ neh, aˬ yawꞈ-ahˇ bi sheuˬ ha leˇ-eu lehˇ ngaˇ noeˬ tsehˆ gʼaˬ-euˬ ma. 26Ehˇ kʼawꞈ, Huiˬ dui dui-eu Sahˬ paˬ jawˇ gaˇ aˬ yawꞈ-euˬ gaˇ kawˆ aˬ joˆ-ehˇ boꞈ nehˬ paˬ nga lehˇ maˬ ya shaˇ noeˬ duˬ-aˬ siˬ. Kʼoeˇ miˇ neh, aˬ yawꞈ-ahˇ pyehˆ tseˇ gʼaˬ ngeh jawˇ, aˬ yawꞈ-euˬ gaˇ kawˆ ngaˇ sahˬ boꞈ boꞈ nehˬ nya paˬ-ehˇ bi duˬ laˇ-eu gʼaˇ duˬ, naw maꞈ-euˬ mehˬ shi, aˬ cawˬ naˆ maˬ tseˇ sahˬ paˬ Aˬgiˇpaˆ-euˬ mehˬ shi, aˬ yawꞈ-ahˇ bi sheuˬ laꞈ taˬ-euˬ jeˬ pyeuꞈ-eu ma. 27Aˬ jeˬ miˇ neh ehˇ naˇ, daˬ taˬ-euˬ gaˇ kawˆ yaw duˬ duˬ-ehˇ maˬ ehˇ mehˬ nehˬ nya ni paꞈ taˬ-euˬ tsawˇ haˬ tiˬ gʼaˬ-ahˇ bi sheuˬ ha-iˇ-eu ehˇ-eu jeˬ-aˬ, maˬ muiˬ-a lehˇ ngaˇ noeˬ miˇ-a.”

Currently Selected:

Gʼaˬkʼehˇ 25: AHK

Highlight

Copy