Gʼaˬkʼehˇ 19

Pawˇluˆ Eˇpeˇsu meuˬ-ahˇ jawˇ-awˇ Miˬyehˇ gaˇ mˇ-euˬ

1Aˬpawˇluˆ Gawˇliˬtu meuˬ-ahˇ jawˇ luꞈ ngeh, Pawˇluˆ laꞈ taˆ paw kʼahˬ-ahˇ neh oe ka-awˇ, Eˇpeˇsu meuˬ-ahˇ oe keuˆ-euˬ meh. Kʼoeˇ gaˇ, zaˬ lahˇ tiˬ paˆ na deuˬ-ahˇ aˬ yawꞈ tahˬ puˬ-euˬ meh. 2Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ jah-eu tsawˇ haˬ pyeuꞈ laˇ ngeh Muiˬ-eu shawˇ-eu Yaw sahˇ Miˬyehˇ-ahˇ za maˬ loˇ.”

Aˬ yawꞈ maꞈ ehˇ-eu, “Muiˬ-eu shawˇ-eu Yaw sahˇ Miˬyehˇ jawˇ meh lehˇ ehˇ-eu nga maꞈ tiˬ poˆ-iˬ maˬ gaˬ haw-aˬ.”

3Aˬ yawꞈ ehˇ-eu, “Toˆ-ehˇ ngeuˇ naˇ, naw maꞈ iˇ cuꞈ shawˇ-eu aˬ geu jeˬ shawˇ teˬ.”

Aˬ yawꞈ maꞈ ehˇ-eu, “Yoˇhaˬ neh shawˇ nehˬ laꞈ-euˬ jeˬ shawˇ-euˬ ma.”

4Kʼoeˇ ngeh, Pawˇluˆ ehˇ-eu, “Yoˇhaˬ neh iˇ cuꞈ shawˇ-euˬ kʼoeˇ-aˬ, iˬ baˇ noeˬ poˆ-euˬ tsawˇ haˬ deuˬ gʼaˇ duˬ meh. Kʼoeˇ miˇ neh, aˬ yawꞈ-euˬ jeˬ nah oe luꞈ-eu gʼaˬ-ahˇ jah-awˬ lehˇ, Iˇsaˬleˬlaˇ tsawˇ haˬ deuˬ-ahˇ Yoˇhaˬ ehˇ nehˬ-euˬ meh. Aˬ yawꞈ-euˬ jeˬ nah oe-eu gʼaˬ lehˇ ehˇ-eu kʼoeˇ-aˬ, Yeˬsuˇ-ahˇ ehˇ-eu meh.”

5Dawˬ kʼoeˇ dawˬ-ahˇ aˬ yawꞈ maꞈ ya gaˬ ngeh, Sahˬpaˬ Yeˬsuˇ-euˬ tsawˇ myahˇ uˬ moˆ iˇ cuꞈ shawˇ-euˬ meh. 6Aˬ yawꞈ maꞈ-ahˇ Pawˇluˆ aˬ laꞈ baꞈ daˆ nehˬ ngeh, Muiˬ-eu shawˇ-eu Yaw sahˇ Miˬyehˇ aˬ yawꞈ maꞈ kʼoeˇ taˆ zaꞈ le-awˇ, aˬ yawꞈ maꞈ dawˬ gʼawˬ mya jeˬ ngehˬ-eu uˬ taꞈ, Miˬyehˇ gʼaˇ duˬ ngehˬ dah-eu dawˬ kʼawꞈ ngehˬ-euˬ meh. 7Aˬ yawꞈ maꞈ dawˬ tawˆ luꞈ tseˇ nyiꞈ gʼaˬ ehˇ gʼaˬ ni byah-eu meh.

8Pawˇluˆ uˬ duˬ tahˬ nymˇ-ahˇ le-awˇ, ba la smˇ siˬ byah ni kʼaˬ duˬ ni ngehˬ-eu tmˇ-eu laꞈ kʼoeˇ, Miˬyehˇ Miˇ kʼahˬ gaˇ kawˆ aˬ yawꞈ maꞈ siˬ duˬ laˇ ni ja sawˇ mehˬ nehˬ-euˬ meh. 9Ehˇ kʼawꞈ, tiˬ paˆ na deuˬ nui ma gʼahˇ-eu laꞈ kʼoeˇ maˬ jah ni jawˇ-awˇ, aˬ cawˬ-euˬ mehˬ shi Sahˬpaˬ Yeˬsuˇ-euˬ Gaˇma-ahˇ ja bu ja doeˇ-euˬ meh. Kʼoeˇ miˇ neh, Pawˇluˆ jah-eu tsawˇ haˬ deuˬ-ahˇ sheuˬ-awˇ aˬ yawꞈ maꞈ jawˇ gaˇ neh iˇ doˆ-euˬ meh. Kʼoeˇ naˇ, Duˇlaˬnmˇ hawˇ nymˇ laꞈ kʼoeˇ, yawˬ nah na luꞈ Miˬyehˇ dawˬ kawˬ ja sawˇ mehˬ nehˬ-euˬ meh. 10Nyiˬ kʼoꞈ byah ni aˬ yawꞈ kʼoeˇ loꞈ-ehˇ mˇ daˆ leꞈ-euˬ miˇ neh, Aˬshaˆ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ, Yuˇdaˆ tsawˇ haˬ maˬ ehˇ, aˬ cawˬ tsawˇ jeuˬ deuˬ maˬ ehˇ, Sahˬpaˬ Yeˬsuˇ-euˬ dawˬ ya gaˬ-euˬ meh.

Geˬbaˇ-euˬ aˬ li deuˬ nehꞈ teh doˆ-eu lehˇ leh jeh-euˬ

11Pawˇluˆ-ahˇ gʼoe-awˇ, huiˬ dui dui-eu zahˬ leˇ paˬ-ehˇ gʼeh-eu jeˬ Miˬyehˇ mˇ mehˬ-euˬ meh. 12Pawˇluˆ neh zmˬ-euˬ paˇ jeh maˬ ehˇ, joꞈ tsiˬ maˬ ehˇ, naˇ-eu tsawˇ haˬ deuˬ jawˇ gaˇ yuˇ gʼeh nehˬ ngeh naˇ gawˇ taˬ leˇ-awˇ, nehꞈ yaw jawꞈ uˇ-eu deuˬ kʼawꞈ nehꞈ doˆ-iˇ-euˬ meh. 13Doe doe-ehˇ nehꞈ teh doˆ teh doˆ-ehˇ cah-eu Yuˇdaˆ tsawˇ haˬ tiˬ paˆ na deuˬ kʼawꞈ, Sahˬpaˬ Yeˬsuˇ-euˬ tsawˇ myahˇ-ahˇ gʼoe-awˇ teh doˆ-eu meh. “Pawˇluˆ dawˬ mehˬ mehˬ-eu Yeˬsuˇ kʼoeˇ gʼaˬ-euˬ tsawˇ myahˇ uˬ moˆ ngaˇ nawˬ-ahˇ dawˬ biꞈ-eu ma” lehˇ, nehꞈ yaw haiˬ deuˬ-ahˇ aˬ yawꞈ maꞈ ehˇ nehˬ-eu meh. 14Geˬbaˇ lehˇ myahˇ-euˬ Yuˇdaˆ tsawˇ haˬ-euˬ Piˇ ma Yaw huiˬ gʼaˬ-euˬ aˬ li shiꞈ li kʼawꞈ, kʼoeˇ loꞈ-ehˇ mˇ luꞈ-eu meh.

15Nehꞈ yaw haiˬ kʼoeˇ mawˇ aˬ yawꞈ maꞈ-ahˇ ehˇ-eu, “Yeˬsuˇ-ahˇ ngaˇ siˬ nya ma. Pawˇluˆ-ahˇ kʼawꞈ siˬ nya ma. Ehˇ kʼawꞈ, naw maꞈ aˬ gaˇ-euˬ tsawˇ haˬ te.”

16Nehꞈ yaw haiˬ uˇ-eu tsawˇ haˬ kʼoeˇ gʼaˬ aˬ yawꞈ maꞈ-ahˇ biˬ dawꞈ leꞈ-awˇ, dawˬ tawˆ luꞈ-ahˇ dawꞈ gʼaˬ-euˬ meh. Aˬ yawꞈ maꞈ bi diˬ naˇ bi diˬ gawˇ jiˇ-awˇ mehˬ tsoeˬ bi diˬ pyaˬ jiˇ-euˬ miˇ neh, tsawˇ haˬ kʼoeˇ gʼaˬ-euˬ nymˇ-ahˇ neh neˇ myawˆ ni coeˬ doˆ gʼeh-euˬ meh. 17Eˇpeˇsu meuˬ-ahˇ kʼaˇ jawˇ-eu Yuˇdaˆ tsawˇ haˬdeuˬ hawˇ-eu aˬ cawˬ tsawˇ jeuˬ dawˬ tawˆ luꞈ gaˇ kawˆ kʼoeˇ ya gaˬ ngeh, guˆ dui dui-iˇ-awˇ, Sahˬpaˬ Yeˬsuˇ-euˬ tsawˇ myahˇ-ahˇ ciˬ huiˬ ciˬ mahˇ dui dui-euˬ meh. 18Jah-eu tsawˇ haˬ deuˬ kʼawꞈ gʼawˬ mya ni laˇ-awˇ, yawˬ ha neh kʼaˇ mˇ lehˬ dzeuˇ-euˬ jeˬ maˬ zaꞈ taˬ ni aˬ cawˬ mehˬ shi ja doˆ laˇ-euˬ meh. 19Maw loˬ loˬ-eu tsawˇ haˬ deuˬ kʼawꞈ, yawˬ ha-euˬ maw loˬ sahˬ boꞈ deuˬ baꞈ uiˬ jiˇ-awˇ, miˇ kʼahˬ zaˬ dawˬ tawˆ luꞈ mehˬ shi miˬ dzaˬ keuˬ dzeh-euˬ meh. Sahˬ boꞈ kʼoeˇ deuˬ-euˬ aˇ poeˬ sawˇ jiˇ haw ngeh, pyuˇ maˇ byaˆ#19.19 Pyuˇ maˇ byaˆ tiˬ byaˆ-aˬ, tiˬ nah-euˬ gʼaˬ gaˇ poeˬ nehˬ-ehˇ di-eu meh(Maꞈtehˬ 20.2). ngaˬ muiˇ byaˆ poeˬ-eu meh. 20SahˬpaˬMiˬyehˇ-euˬ dawˬ-aˬ, kʼoeˇ loꞈ-ehˇ baoˬ huiˬ-eu laꞈ kʼoeˇ miˇ kʼahˬ doe-iˇ-awˇ gʼaˬ kʼaˆ luꞈ-eu meh.

Eˇpeˇsu meuˬ-ahˇ suˬ saˬ dui dui-euˬ

21Gaˇ kawˆ kʼoeˇ deuˬ pyeuꞈ laˇ gʼaˬ ngeh, Maˬgeˬdawˇniˆ miˇ kʼahˬ hawˇ-eu Aˬgaˬyaˇ miˇ kʼahˬ-ahˇ cah-iˇ-awˇ, Yeˬluˇsaˬlehˬ meuˬ-ahˇ iˇ ma lehˇ Pawˇluˆ noeˬ tsehˆ-euˬ meh. “Kʼoeˇ gaˇ iˇ gʼaˬ naˇ, Loˇmaˆ meuˬ-ahˇ kʼawꞈ ya iˇ haw nga siˬ” lehˇ aˬ yawꞈ ehˇ-eu meh. 22Kʼoeˇ miˇ neh, aˬ yawꞈ-ahˇ caw ba-eu tsawˇ haˬ deuˬ laꞈ kʼoeˇ, Tiˆmoˇseˬ hawˇ-eu Eˇlaˬduˇ aˬ nyaꞈ-ahˇ Maˬgeˬdawˇniˆ miˇ kʼahˬ-ahˇ bi le-awˇ, aˬ yawꞈ gʼaˬ-aˬ, Aˬshaˆ miˇ kʼahˬ-ahˇ tiˬ kʼehˬ paˇ jawˇ tehˬ-euˬ meh.

23Aˇ yamˬ kʼoeˇ yamˬ-ahˇ, Sahˬpaˬ Yeˬsuˇ-euˬ Gaˇma baˬ da neh Eˇpeˇsu meuˬ laꞈ kʼoeˇ suˬ saˬ dui dui-eu jeˬ keuˆ le-euˬ meh. 24Deˬmeˬdeˬliˇ lehˇ myahˇ-euˬ pyuˇ tehˆ-eu tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, pyuˇ yuˇ-awˇ Aˬdeˬmiˇ miˬ yehˇ ma-euˬ uˬ duˬ tahˬ nymˇ mawˇ kawˇ tehˆ ahˬ-eu meh. Gaˇ kʼoeˇ hmˬ baˬ da neh pyuˇ tehˆ dzaˬ-eu tsawˇ haˬ deuˬ pyuˇ za dui dui-eu meh. 25Kʼoeˇ ngeh, aˬ yawꞈ maꞈ dawˬ tawˆ luꞈ hawˇ-eu aˬ yawꞈ maꞈ loꞈ-ehˇ mˇ dzaˬ-eu tsawˇ haˬ dawˬ tawˆ luꞈ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Cawˬ deuˬ-oˇ, gaˇ heu hmˬ ya mˇ luꞈ-eu baˬ da neh aˬ dui pyuˇ shuiˇ za laˇ-eu naw maꞈ siˬ nya luꞈ meh. 26Nymˬ-mˇ, Pawˇluˆ lehˇ kuˇ-eu tsawˇ haˬ kʼoeˇ gʼaˬ aˬ jeˬ ehˇ luꞈ-eu gaˇ kawˆ naw maꞈ ya siˬ ya mawˇ luꞈ meh. Tsawˇ haˬ zaˬ-euˬ aˬ laꞈ neh jahˇ-euˬ miˬ yehˇ-aˬ, miˬ yehˇ maˬ ngeuˇ-a lehˇ ehˇ ehˇ-ehˇ, Eˇpeˇsu meuˬ heu meuˬ laꞈ kʼoeˇ tehꞈ-ehˇ maˬ ngeuˇ-ehˇ, Aˬshaˆ miˇ kʼahˬ kʼahˬ lah ni ehˇ gʼaˬ ni tsawˇ haˬ gʼawˬ mya ni nui ma paˇ laˇ ni aˬ yawꞈ neh laˆ jah jiˇ taˬ-euˬ meh. 27Aˬ dui-euˬ gaˇ heu hmˬ tsawˇ myahˇ cawˆ-iˇ gaˇ ya guˆ-eu uˬ taꞈ, Aˬshaˆ miˇ kʼahˬ hawˇ-eu miˇ tsaˬ zaˬ dawˬ tawˆ luꞈ uˬ duˬ tahˬ-eu miˬ yehˇ pyeuꞈ-eu Aˬdeˬmiˇ miˬ yehˇ ma-euˬ uˬ duˬ tahˬ nymˇ tiˬ jeˬ-iˬ gaˇ dahˇ maˬ tsoeˬ-ehˇ pyeuꞈ-iˇ-awˇ, aˬ yawꞈ-euˬ yaw shehꞈ kʼahˬ sehˇ piˬ-iˇ byoˆ-iˇ gaˇ kʼahˬ lahˇ dui dui paˬ-ehˇ gʼeh-eu meh.”

28Aˬ yawꞈ maꞈ dawˬ kʼoeˇ dawˬ-ahˇ ya gaˬ ngeh nui ma pehˇ dui dui laˇ-awˇ, “Eˇpeˇsu tsawˇ haˬ-euˬ Aˬdeˬmiˇ miˬ yehˇ ma huiˬ dui mahˇ dui dui meh” lehˇ guˇ-eu meh. 29Meuˬ meuˬ lah-ehˇ luiˬ gʼa laˇ-awˇ, Pawˇluˆ nehˬ-ehˇ cah-eu Maˬgeˬdawˇniˆ tsawˇ haˬ Gaˬyuˇ hawˇ-eu Aˬliˬdaˬguˇ aˬ nyaꞈ-ahˇ nyehꞈ-awˇ, Bawˬ-iˬ gʼeh duˬ-ahˇ gʼeu gʼeh-euˬ meh. 30Pawˇluˆ-aˬ, tsawˇ haˬ aˇ maꞈ kʼoeˇ maꞈ-euˬ mehˬ shi le mawꞈ-eu meh. Ehˇ kʼawꞈ, jah-eu tsawˇ haˬ deuˬ aˬ yawꞈ-ahˇ maˬ bi le-a. 31Pawˇluˆ-ahˇ siˬ nya-eu Aˬshaˆ miˇ kʼahˬ-ahˇ uˆ lahˇ-eu sahˬ paˬ sahˬ ma tiˬ paˆ na deuˬ neh, Pawˇluˆ-ahˇ Bawˬ-iˬ gʼeh duˬ-ahˇ maˬ le ni jawˇ-eu gʼaˇ duˬ tsaꞈ ahˇ leꞈ-euˬ meh. 32Kʼoeˇ ngeh, uiˬ laˇ bymˇ laˇ taˬ-euˬ tsawˇ haˬ aˇ maꞈ lawꞈ gʼa dui dui luꞈ-eu meh. Tiˬ gʼaˬ tiˇ gʼaˬ maˬ naˇ haˬ ni, tiˬ gʼaˬ tiˬ jeˬ guˇ-eu meh. Aˬ jeˬ miˇ neh kʼoeˇ loꞈ-ehˇ ya uiˬ laˇ-euˬ gaˇ kawˆ-ahˇ tsawˇ haˬ myaˬ tiˬ paˆ maˬ siˬ nya-a. 33Tsawˇ haˬ tiˬ paˆ na deuˬ-aˬ, Aˬleˬsaˬduˇ lehˇ kuˇ-eu gʼaˬ-ahˇ neh ahˇ-eu nga lehˇ noeˬ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ neh aˬ yawꞈ-ahˇ aˬ cawˬ mehˬ shi dehˬ daˆ nehˬ-euˬ meh. Kʼoeˇ naˇ, ciˬ cuˇ ni jawˇ-eu gʼaˇ duˬ, tsawˇ haˬ aˇ maꞈ-ahˇ Aˬleˬsaˬduˇ laꞈ dzawˇ dzawˇ nehˬ-awˇ, aˬ yawꞈ tiˬ jeˬ-iˬ maˬ lehˬ-eu gaˇ kawˆ ja shaw nehˬ-eu lehˇ gʼeh-eu meh. 34Ehˇ kʼawꞈ, aˬ yawꞈ Yuˇdaˆ tsawˇ haˬ pyeuꞈ-eu nga lehˇ aˬ yawꞈ maꞈ haw siˬ ngeh, “Eˇpeˇsu tsawˇ haˬ-euˬ Aˬdeˬmiˇ miˬ yehˇ ma huiˬ dui mahˇ dui dui meh” lehˇ, yawˬ gʼaˬ na luꞈ tiˬ teˇ tehꞈ-ehˇ naˬ liˬ nyiˬ laꞈ byah ni guˇ-euˬ meh.

35Aˇ saˬ saˬ laˇ ngeh, meuˬ-euˬ jeˇ leˇ loˇ neh tsawˇ haˬ aˇ maꞈ kʼoeˇ maꞈ-ahˇ laˆ coꞈ-euˬ meh. Aˬ yawꞈ heu loꞈ-ehˇ ehˇ nehˬ-euˬ meh. “Eˇpeˇsu meuˬ-ahˇ jawˇ-eu aˬ yuiꞈ aˬ nyiˇ deuˬ-oˇ, Eˇpeˇsu meuˬ-aˬ, huiˬ-eu mahˇ-eu Aˬdeˬmiˇ miˬ yehˇ ma-euˬ uˬ duˬtahˬ nymˇ hawˇ-eu mˬ-ahˇ neh ga le-euˬ muiˬ-eu shawˇ-eu kʼaˬ lo-ahˇ jeˬ hmˬ bo saˆ taˬ-euˬ meuˬ pyeuꞈ-eu gaˇ kawˆ, tsawˇ haˬ yawˬ gʼaˬ na luꞈ siˬ nya meh. 36Gaˇ kawˆ heu maˬ ngeuˇ-a lehˇ tsawˇ haˬ tiˬ gʼaˬ-iˬ maˬ pyehˇ nya-a. Kʼoeˇ miˇ neh, naw maꞈ ciˬ cuˇ ni jawˇ-eu tsaˬ meh. Maˬ shaˇ noeˬ ni luiˬ gʼa-eu maˬ tsaˬ-a. 37Tsawˇ haˬ heu nyiˬ gʼaˬ uˬ duˬ tahˬ nymˇ-ahˇ tahˇ joe joe-euˬ kʼawꞈ maˬ ngeuˇ-ehˇ, aˬ dui maꞈ-euˬ miˬ yehˇ ma-ahˇ yehˬ bawˬ sehˇ lu-ehˇ ehˇ-euˬ kʼawꞈ maˬ ngeuˇ gaˇ, aˬ yawꞈ nyaꞈ-ahˇ naw maꞈ neh heu gaˇ sheuˬ laꞈ taˬ-euˬ meh. 38Deˬmeˬdeˬliˇ hawˇ-eu aˬ yawꞈ nehˬ-ehˇ pyuˇ tehˆ-eu tsawˇ haˬ deuˬ, tsawˇ haˬ tiˬ gʼaˬ na-ahˇ nui kʼahˇ maˬ shiˇ-ehˇ yaˇ kʼaˬ ja mawꞈ naˇ, sahˬ paˬ sahˬ ma deuˬ jawˇ-awˇ, yaˇ kʼaˬ daˇ-eu nymˇ pah-eu aˇ nah kʼawꞈ baw meh. Kʼoeˇ gaˇ daˬ leˇ-awˇ yaˇ kʼaˬ ja nya tehꞈ-a. 39Naw maꞈ kʼoeˇ naˆ maˬ tseˇ jahˇ mawꞈ te lehˇ ngeuˇ naˇ, miˇ kʼahˬ zaˬ deuˬ uiˬ le bymˇ le-awˇ yaˇ kʼaˬ daˇ-eu aˇ nah-ahˇ bi daˇ tsehˆ nya tehꞈ-a. 40Iˬ nah pyeuꞈ laˇ-euˬ gaˇ kawˆ heu baˬ da neh, miˇ kʼahˬ luiˬ gʼa laˇ ni jahˇ-euˬ nga lehˇ aˬ dui-ahˇ do yuˇ laˇ gaˇ kʼahˬ lahˇ paˬ-ehˇ gʼeh meh. Aˬ jeˬ miˇ neh heu loꞈ-ehˇ uiˬ leˇ-awˇ luiˬ gʼa te lehˇ aˬ dui-ahˇ naˇ haˬ laˇ naˇ, aˬ dui yaw duˬ duˬ-ehˇ ehˇ kʼoꞈ nehˬ nya-eu tiˬ jeˬ-iˬ maˬ jaˆ-a.” 41Kʼoeˇ loꞈ-ehˇ ehˇ gʼaˬ ngeh, uiˬ laˇ taˬ-euˬ tsawˇ haˬ deuˬ-ahˇ bi gʼoꞈ-iˇ-euˬ meh.

Currently Selected:

Gʼaˬkʼehˇ 19: AHK

Highlight

Copy