Gʼaˬkʼehˇ 10

Beˬtuˆluˆ hawˇ-eu Gawˬneˬliˇ

1Gehˇsaˬliˇ miˇ kʼahˬ-ahˇ Gawˬ neˬ liˇ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, “Iˬtaˬliˬ guiˇ maꞈ” lehˇ kuˇ-eu Loˆmaˆ guiˇ maꞈ tiˬ maꞈ kʼoeˇ taˆ uˆ lahˇ luꞈ-eu yaw huiˬyaw mahˇ tiˬ gʼaˬ meh. 2Aˬ yawꞈ-aˬ, guiˬ lahˬ saꞈ laˇ paw gʼaˬ kʼaˆ-awˇ, aˬ yawꞈ hawˇ-eu miˬ sawˇ zaˬ dawˬ tawˆ luꞈ, Miˬyehˇ-ahˇ uˬ duˬ tahˬ-eu meh. Shaˬ-eu zahˬ-eu Yuˇdaˆ tsawˇ haˬ deuˬ-ahˇ aˬ yawꞈ caw ba-awˇ, Miˬyehˇ-ahˇ maˬ tsehˆ leˇ ni guiˬ lahˬ shaˇ-eu meh. 3Tiˬ nah-aˬ, uˬ ciꞈ uˬ taw paw naˬ liˬ smˇ laꞈ kʼoeˇ yamˬ-ahˇ, yaw sahˇ laꞈ kʼoeˇ aˬ yawꞈ bya cehˆ ni heu loꞈ-ehˇ ya mawˇ duˬ-euˬ meh. Miˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ jawˇ gaˇ oe-awˇ, “Gawˬneˬliˇ-oˇ” lehˇ kuˇ le-euˬ meh.

4Aˬ yawꞈ guˆ dui dui-iˇ-awˇ, mˬ taˆ gʼaˬ kʼehˇ kʼoeˇ gʼaˬ-ahˇ haw tsoˆ-awˇ, “Sahˬpaˬ-oˇ, aˬ jeˬ ehˇ te” lehˇ ehˇ kʼoꞈ nehˬ-euˬ meh.

Mˬ taˆ gʼaˬ kʼehˇ kʼoeˇ gʼaˬ ehˇ-eu,“Nawˬ neh guiˬ lahˬ shaˇ-euˬ jeˬ-ahˇ maˬ ehˇ, nawˇ aˬ cawˬ-ahˇ caw ba nehˬ-euˬ jeˬ-ahˇ maˬ ehˇ, Miˬyehˇ nui kʼahˇ shiˇ-eu miˇ neh, nawˬ-euˬ shaˇ dawˬ-ahˇ naˇ haˬ nehˬ laꞈ-euˬ meh. 5Nymˬ-mˇ, Yuˇbeˬ meuˬ-ahˇ tsawˇ haˬ pyehˬ gʼeh-awˇ, Beˬtuˆluˆ lehˇ kuˇ-eu Siˇmoˬ-ahˇ bi kuˇ laˬ-iˇ-awˬ. 6Iˬ ma laˆ shaˆ lawˇ dzeˇ jawˇ-eu Siˇmoˬ lehˇ myahˇ-euˬ shaˬ kʼoˆ jahˇ-eu tsawˇ haˬ tiˬ gʼaˬ-euˬ nymˇ-ahˇ aˬ yawꞈ yaꞈ luꞈ meh.” 7Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ gʼoꞈ doˆ-iˇ-euˬ meh. Gawˬneˬliˇ-aˬ, aˬ yawꞈ-euˬ zaˬ kʼaˆ nyiˬ gʼaˬ hawˇ-eu yehˇ tiˬ gʼaˬ-ahˇ kuˇ-euˬ meh. Yehˇ kʼoeˇ gʼaˬ-aˬ, guiˬ lahˬ saꞈ laˇ paw gʼaˬ kʼaˆ-awˇ, aˬ yawꞈ-euˬ kuiˇ laꞈ geuꞈ luꞈ-eu yehˇ tiˬ gʼaˬ meh. 8Kʼaˇ pyeuꞈ laˇ-euˬ gaˇ kawˆ kʼoeˇ aˬ ha smˇ gʼaˬ-ahˇ dzawˇ nehˬ-awˇ, Yuˇbeˬ meuˬ-ahˇ kʼehˇ gʼeh-euˬ meh.

9Yawˬ nah yawˬ aˬ ha smˇ gʼaˬ Yuˇbeˬ meuˬ dawˬ peh iˇ keuˆ ngeh, Beˬtuˆluˆ-aˬ, nah loˆ ceh laˇ-euˬ miˇ neh guiˬ lahˬ shaˇ leˇ-eu lehˇ, nymˇ mˬ#10.9 Aˇ hu miˇ kʼahˬ kʼoeˇ kʼahˬ-ahˇ jaˆ-euˬ nymˇ deuˬ-aˬ, nymˇ mˬ saˇ lehˆ ni jahˇ taˬ-awˇ, tsawˇ haˬ kʼawꞈ jawˇ nya-eu meh. -ahˇ daˆ leˇ-euˬ meh. 10Aˬ yawꞈ hawˬ mehꞈ laˇ-awˇ, tiˬ jeˬ paˬ dzaˬ mawꞈ-eu meh. Aˬ yawꞈ gʼaˇ duˬ dzaˇ laˆ saˆ luꞈ ngeh, yaw sahˇ laꞈ kʼoeˇ heu loꞈ-ehˇ aˬ yawꞈ ya mawˇ-euˬ meh. 11Mˬ pah le-awˇ, aˇ bui bui ma loꞈ-ehˇ gʼeh-eu tiˬ hmˬ laꞈ coeˇ oeˬ coeˬ-ahˇ aˇ caˆ paꞈ-awˇ, miˇ tsaˬ kʼoeˇ taˆ aˬ za za-ehˇ pyehˬ ka leꞈ luꞈ gaˇ mawˇ-euˬ meh. 12Aˇ bui kʼoeˇ-euˬ laꞈ kʼoeˇ, oeˬ kuiˇ tsoꞈ-eu jeˬ zaˬ, joe joe-ehˇ cah-eu jeˬ zaˬ hawˇ-eu, aˇ jiˇ deuˬ tiˬ kuꞈ uˇ-eu meh. 13Teˇ saˇ tiˬ saˇ ehˇ-eu, “Beˬtuˆluˆ-oˇ, tuˇ-awˇ sehꞈ dzaˬ-awˬ.”

14Ehˇ kʼawꞈ, Beˬtuˆluˆ ehˇ kʼoꞈ nehˬ-eu, “Sahˬpaˬ-oˇ, aˬ jeˬ keuˆ le kʼawꞈ ngaˇ maˬ dzaˬ. Zahˇ sahˇ kʼoꞈ-ahˇ taꞈ leˇ-awˇ maˬ shawˇ-a lehˇ ehˇ taˬ-euˬ yaw jawꞈ jeˬ-ahˇ tiˬ jawˇ-iˬ ngaˇ maˬ dzaˬ haw-aˬ.”

15Teˇ saˇ kʼoeˇ saˇ aˬ yawꞈ-ahˇ paˇ ehˇ-eu, “Miˬyehˇ neh yaw shawˇ meh lehˇ kʼaˇ ehˇ-euˬ jeˬ-ahˇ, maˬ shawˇ-a lehˇ nawˇ maˬ noeˬ kʼmˬ-a.” 16Kʼoeˇ loꞈ-ehˇ smˬ poˆ keuˆ ni pyeuꞈ laˇ-awˇ, aˇ bui bui ma-ahˇ duˇ-eu kʼoeˇ hmˬ mˬ-ahˇ gʼeu daˆ kʼoꞈ leꞈ-euˬ meh.

17Yaw sahˇ laꞈ kʼoeˇ ya mawˇ-euˬ gaˇ kawˆ kʼoeˇ-euˬ dawˬ tsuiꞈ-ahˇ Beˬtuˆluˆ zahˬ leˇ-awˆ jawˇ ngeh, Gawˬneˬliˇ neh kʼehˇ gʼeh leꞈ-euˬ tsawˇ haˬ kʼoeˇ smˇ gʼaˬ Siˇmoˬ-euˬ nymˇ-ahˇ naˇ haˬ ka leꞈ-awˇ, nymˇ gʼoˆ kʼehˬ-ahˇ oe keuˆ-awˇ yawꞈ luꞈ-eu meh. 18“Beˬtuˆluˆ lehˇ kuˇ-eu Siˇmoˬ kʼoeˇ gʼaˬ heu gaˇ maˬ yaꞈ-a loˇ” lehˇ, aˬ yawꞈ maꞈ naˇ haˬ-eu meh.

19Yaw sahˇ laꞈ kʼoeˇ ya mawˇ-euˬ gaˇ kawˆ kʼoeˇ-euˬ dawˬ tsuiꞈ-ahˇ Beˬtuˆluˆ shaˇ sawˇ haw luꞈ ngeh, Yaw sahˇ Miˬyehˇ aˬ yawꞈ-ahˇ ehˇ-eu, “Naˇhaˬ sheˇ. Tsawˇ haˬ smˇ gʼaˬ nawˬ-ahˇ poˆ le-euˬ meh. 20Lehˬ hmˬ-awˇ zaꞈ ka-iˇ-awˇ, maˬ nyi naˬ ni aˬ yawꞈ maꞈ nehˬ-ehˇ le-awˬ. Aˬ jeˬ miˇ neh ehˇ naˇ, aˬ yawꞈ maꞈ-ahˇ ngaˬ neh bi oe-euˬ ma.” 21Kʼoeˇ ngeh, Beˬtuˆluˆ zaꞈ ka-iˇ-awˇ, aˬ ha smˇ gʼaˬ-ahˇ ehˇ nehˬ-eu, “Naw maꞈ poˆ luꞈ-eu gʼaˬ ngaˇ ma. Aˬ jeˬ loˬ-eu oe teˬ.”

22Aˬ ha smˇ gʼaˬ ehˇ-eu, “Guiˇ maꞈ-ahˇ uˆ lahˇ-eu yaw huiˬ yaw mahˇ pyeuꞈ-eu Gawˬneˬliˇ neh nga maꞈ-ahˇ kʼehˇ leꞈ-euˬ meh. Aˬ yawꞈ-aˬ, Miˬyehˇ-ahˇ uˬ duˬ tahˬ-eu tsawˇ haˬ yaw muiˬ tiˬ gʼaˬ pyeuꞈ-awˇ, Yuˇdaˆ tsawˇ haˬ dawˬ tawˆ luꞈ aˬ yawꞈ-ahˇ yaw zeu baw-eu meh. Nawˬ-ahˇ aˬ yawꞈ-euˬ nymˇ-ahˇ kuˇ ahˇ-awˇ, nawˬ neh ngehˬ-euˬ tmˇ-euˬ dawˬ-ahˇ naˇ haˬ-eu gʼaˇ duˬ, Miˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ-ahˇ ehˇ le-euˬ meh.” 23Aˬ ha smˇ gʼaˬ-ahˇ Beˬtuˆluˆ kuˇ ahˇ-awˇ, uˬ ciꞈ bi yaꞈ-euˬ meh.

Yawˬ nah yawˬ aˬ yawꞈ lehˬ hmˬ-awˇ, aˬ ha smˇ gʼaˬ nehˬ-ehˇ le-euˬ meh. Yuˇbeˬ meuˬ-ahˇ jawˇ-eu jah-eu tsawˇ haˬ tiˬ paˆ na deuˬ kʼawꞈ, aˬ yawꞈ-euˬ mehˬ nah caw teh gʼeh-euˬ meh. 24Yawˬ nah yawˬ Geˇsaˬliˇ meuˬ-ahˇ le keuˆ-euˬ meh. Gawˬneˬliˇ-aˬ, aˬ yawꞈ-euˬ aˬ yuiꞈ aˬ nyiˇ hawˇ-eu cawˬ deuˬ kuˇ uiˬ taˬ-awˇ, Beˬtuˆluˆ laˇ keuˆ gaˇ dawˬ luꞈ-eu meh. 25Beˬtuˆluˆ iˇ kahˇ laꞈ kʼoeˇ uˇ leˇ-eu lehˇ gʼeh ngeh, aˬ yawꞈ-euˬ aˬ kuiˇ dawˬ peh Gawˬneˬliˇ pawˬ tsuiꞈ pawˬ dmˬ dmˬ-euˬ meh. 26Ehˇ kʼawꞈ, Beˬtuˆluˆ neh aˬ yawꞈ-ahˇ gʼeu tuˇ-awˇ, “Tuˇ-awˬ. Ngaˇ kʼawꞈ tsawˇ haˬ zaˬ tehꞈ ma” lehˇ ehˇnehˬ-euˬ meh. 27Beˬtuˆluˆ Gawˬneˬliˇ-ahˇ dawˬ ngehˬ cawˬ ngehˬ cawˬ-ehˇ iˇ kahˇ-ahˇ uˇ leˇ ngeh, tsawˇ haˬ gʼawˬ mya ni uiˬ leˇ taˬ-euˬ gaˇ ya mawˇ-euˬ meh. 28Tsawˇ haˬ kʼoeˇ deuˬ-ahˇ Beˬtuˆluˆ ehˇ nehˬ-eu, “Yuˇdaˆ tsawˇ haˬ tiˬ gʼaˬ, aˬ cawˬ tsawˇ jeuˬ-ahˇ cawˬ cawˬ-eu maˬ ehˇ, dawˬ deh gʼa taꞈ-eu maˬ ehˇ, maˬ mˇ kʼmˬ-eu gaˇ kawˆ naw maꞈ yaw muiˬ paˬ-ehˇ siˬ duˬ-eu meh. Ehˇ kʼawꞈ, tsawˇ haˬ tiˬ gʼaˬ-ahˇ-iˬ maˬ muiˬ maˬ shawˇ-eu tsawˇ haˬ lehˇ maˬ ya sawˇ-eu gʼaˇ duˬ, Miˬyehˇ ngaˬ-ahˇ mehˬ nehˬ laꞈ gʼaˬ-euˬ meh. 29Kʼoeˇ miˇ neh, ngaˬ-ahˇ bi kuˇ laˬ le ngeh, ngaˇ dawˬ maˬ tmˇ ni laˇ-euˬ ma. Nymˬ-mˇ poˆ jawˇ-aˬ, aˬ jeˬ miˇ neh ngaˬ-ahˇ bi kuˇ laˬ le teˬ lehˇ naˇ haˬ mawꞈ miˇ-a.”

30Gawˬneˬliˇ ehˇ-eu, “Dzeuˇ yaꞈ-euˬ smˬ nah-ahˇ, nymˬ-mˇ loꞈ-ehˇ uˬ ciꞈ uˬ taw naˬ liˬ smˇ laꞈ kʼoeˇ kaˬ-ahˇ, ngaˬ-euˬ nymˇ laꞈ kʼoeˇ ngaˇ guiˬ lahˬ shaˇ luꞈ-eu ma. Ja pyuˬ ni, yaw shehꞈ bya-eu mehˬ tsoeˬ dm luꞈ-eu tsawˇ haˬ tiˬ gʼaˬ ngaˬ-euˬ mehˬ shi yawꞈ le-euˬ meh. 31Aˬ yawꞈ ehˇ-eu, ‘Gawˬneˬliˇ-oˇ, nawˬ-euˬ shaˇ dawˬ-ahˇ Miˬyehˇ gaˬ-awˇ, nawˬ neh shaˬ zaˬ zahˬ zaˬ-ahˇ caw ba-euˬ aˬ yawꞈ siˬ luꞈ mawˇ luꞈ meh. 32Yuˇbeˬ meuˬ-ahˇ tsawˇ haˬ kʼehˇ gʼeh-awˇ, Beˬtuˆluˆ lehˇ kuˇ-eu Siˇmoˬ kʼoeˇ gʼaˬ-ahˇ bi kuˇ laˬ-iˇ-awˬ. Iˬ ma laˆ shaˆ lawˇ dzeˇ jawˇ-eu, shaˬ kʼoˆ jahˇ-eu Siˇmoˬ lehˇ myahˇ-euˬ gʼaˬ-euˬ nymˇ-ahˇ aˬ yawꞈ yaꞈ luꞈ meh’ lehˇ ehˇ-eu meh. 33Kʼoeˇ miˇ neh, tiˬ poˆ tehꞈ-ehˇ nawˬ-ahˇ bi kuˇ laˬ le-euˬ ma. Nawˇ nui ma keuˆ-awˇ laˇ nehˬ laꞈ-euˬ guiˬ lahˬ huiˬ miˇ-a. Nymˬ-mˇ nga maꞈ dawˬ tawˆ luꞈ, heu gaˇ Miˬyehˇ mehˬ shi uiˬ laˇ taˬ-awˇ, Sahˬpaˬ Miˬyehˇ neh nawˬ-ahˇ mehˬ nehˬ tsoˆ nehˬ-awˇ bi ngehˬ-euˬ dawˬ deuˬ-ahˇ naˇ haˬ-eu lehˇ dawˬ luꞈ-eu ma.”

Gawˬneˬliˇ-euˬ nymˇ jiˇ-ahˇ Beˬtuˆluˆ dawˬ ngehˬ ngehˬ-euˬ

34Kʼoeˇ ngeh, Beˬtuˆluˆ dawˬ ngehˬ-eu aˇ dahˬ beh-awˇ heu loꞈ-ehˇ ehˇ-eu meh. “Miˬyehˇ myaˆ pyawˬ huiˬ nyiˇ maˬ tseˇ-eu gaˇ kawˆ nymˬ-mˇ ngaˇ siˬ duˬ-eu ma. 35Aˬ geu jeˬ tsawˇ jeuˬ pyeuꞈ-eu maˬ kaˬ, aˬ yawꞈ-ahˇ guˆ-awˇ yaw tsaˬ yaw dawˇ jeˬ mˇ-eu tsawˇ haˬ-ahˇ aˬ yawꞈ nui ma tsaˬ-eu meh. 36Dawˬ tawˆ kʼoeˇ taˆ sahˬ paˬ pyeuꞈ-eu Yeˬsuˇ Ka li baˬ da neh nui saˇ oꞈ-eu jeˬ za-eu gaˇ kawˆ Laˬ kʼaˬ cehˇ-eu Guiˬ lahˬ dawˬ heu-ahˇ, Iˇsaˬleˬlaˆ tsawˇ haˬ deuˬ jawˇ gaˇ bi mehˬ-iˇ-euˬ naw maꞈ siˬ nya meh. 37Yoˇhaˬ iˇ cuꞈ shawˇ-eu gaˇ kawˆ dawˬ mehˬ mehˬ-euˬ kʼoeˇ dzeuˇ naˇ, Gaˬliˬlehˇ miˇ kʼahˬ-ahˇ neh dahˬ beh-awˇ, Iˇsaˬleˬlaˆ miˇ kʼahˬ doe ni Laˬ kʼaˬ cehˇ-eu Guiˬ lahˬ dawˬ gaˬ byah-iˇ-euˬ naw maꞈ siˬ luꞈ meh. 38Naˬzaˬlehˇ tsawˇ haˬ Yeˬsuˇ gaˇ kawˆ maˬ ehˇ, aˬ yawꞈ-euˬ kʼoeˇ taˆ Miˬyehˇ neh Muiˬ-eu shawˇ-eu Yaw sahˇ Miˬyehˇ hawˇ-eu baoˬ aˬ joˆ-ehˇ shehˆ daˆ nehˬ-euˬ gaˇ kawˆ maˬ ehˇ, naw maꞈ siˬ luꞈ meh. Miˬyehˇ aˬ yawꞈ nehˬ-ehˇ jawˇ-eu miˇ neh, aˬ yawꞈ yawˬ gaˇ na luꞈ iˇ doe-awˇ, yaw muiˬ jeˬ mˇ mˇ-ehˇ, Nehꞈ-euˬ baoˬ uˬ moˆ shaˬ luꞈ-eu tsawˇ haˬ deuˬ-ahˇ naˇ gawˇ laˆ taˬ nehˬ-euˬ meh. 39Iˇsaˬleˬlaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ, aˬ yawꞈ neh kʼaˇ mˇ-euˬ yawˬ jeˬ na luꞈ-ahˇ mawˇ duˬ-euˬ tsawˇ kaˬ-aˬ, nga maꞈ ma. Kʼoeˇ naˇ, aˬ cawˬ neh aˬ yawꞈ-ahˇ zeuˇ liˬ laꞈ yaꞈ kʼoeˇ taˆ taꞈ sehꞈ-euˬ meh. 40Ehˇ kʼawꞈ, smˬ nah byah laˇ ngeh, Miˬyehˇ neh paˇ bi gʼoꞈ dehꞈ laˇ-awˇ, aˬ yawꞈ-euˬ gʼawˇ mawˇ bi mawˇ le-euˬ meh. 41Ehˇ kʼawꞈ, tsawˇ haˬ dawˬ tawˆ luꞈ-ahˇ bi mawˇ le-euˬ maˬ ngeuˇ-a. Gaˇ kawˆ heu saˇ kiˇ bi kamˬ-eu gʼaˇ duˬ yaw duˬ duˬ-ehˇ bi mawˇ duˬ-eu lehˇ, yaw beh neh Miˬyehˇ neh tseˇ doˆ taˬ-euˬ tsawˇ haˬ deuˬ pyeuꞈ-eu nga maꞈ heu myaˆ gʼaˬ-ahˇ bi mawˇ laꞈ-euˬ tehꞈ meh. Aˬ yawꞈ gʼoꞈ dehꞈ laˇ gʼaˬ miˇ tsa, nga maꞈ aˬ yawꞈ nehˬ-ehˇ dzaˬ taꞈ dawˇ taꞈ-euˬ ma. 42Miˇ kʼahˬ zaˬ deuˬ-ahˇ dawˬ mehˬ mehˬ-awˇ, dehꞈ luꞈ-eu deuˬ-ahˇ maˬ ehˇ, shiˇ-euˬ deuˬ-ahˇ maˬ ehˇ, yaˇ kʼaˬ bi daˇ-eu gʼaˇ duˬ Miˬyehˇ neh tseˇ doˆ-euˬ gʼaˬ-aˬ, aˬ yawꞈ meh lehˇ saˇ kiˇ kamˬ-eu gʼaˇ duˬ, nga maꞈ-ahˇ aˬ yawꞈ dawˬ biꞈ laꞈ-euˬ meh. 43Aˬ yawꞈ-ahˇ kʼaˇ jah-eu tsawˇ haˬ dawˬ tawˆ luꞈ, aˬ yawꞈ tsawˇ myahˇ-euˬ baoˬ baˬ da neh iˬ baˇ pyehˬ-eu jeˬ-ahˇ za-eu gaˇ kawˆ, Miˬyehˇ gʼaˇ duˬ ngehˬ dah-eu tsawˇ haˬ dawˬ tawˆ luꞈ saˇ kiˇ kamˬ taˬ-euˬ jaˆ-eu meh.”

Aˬ cawˬ tsawˇ jeuˬ kʼawꞈ Muiˬ-eu shawˇ-eu Yaw sahˇ Miˬyehˇ za-euˬ

44Beˬtuˆluˆ dawˬ ngehˬ luꞈ ngeh, aˬ yawꞈ-euˬ dawˬ-ahˇ kʼaˇ naˇ haˬ luꞈ-eu tsawˇ haˬ dawˬ tawˆ luꞈ kʼoeˇ taˆ, Muiˬ-eu shawˇ-eu Yaw sahˇ Miˬyehˇ zaꞈ le-euˬ meh. 45Yuˇdaˆ tsawˇ haˬ maˬ ngeuˇ-eu deuˬ-ahˇ kʼawꞈ, Miˬyehˇ neh Muiˬ-eu shawˇ-eu Yaw sahˇ Miˬyehˇ shehˆ daˆ nehˬ-euˬ gaˇ, Beˬtuˆluˆ nehˬ-ehˇ Yuˇbeˬ meuˬ-ahˇ neh laˇ-euˬ jah-eu Yuˇdaˆ tsawˇ haˬ deuˬ zahˬ leˇ-euˬ meh. 46Aˬ jeˬ miˇ neh ehˇ naˇ, tsawˇ haˬ kʼoeˇ deuˬ dawˬ gʼawˬ mya jeˬ ngehˬ-awˇ, Miˬyehˇ-ahˇ ciˬ huiˬ ciˬ mahˇ gaˇ aˬ yawꞈ maꞈ ya gaˬ-euˬ meh. Beˬtuˆluˆ ehˇ-eu, 47“Tsawˇ haˬ heu deuˬ kʼawꞈ,aˬ dui maꞈ loꞈ-ehˇ Muiˬ-eu shawˇ-eu Yaw sahˇ Miˬyehˇ za-euˬ meh. Aˬ yawꞈ maꞈ iˇ cuꞈ laꞈ kʼoeˇ iˇ cuꞈ shawˇ gaˇ aˬ suˇ gʼaˬ paˇ laˆ tsoeˬ nya ta.” 48Kʼoeˇ miˇ neh, Yeˬsuˇ Ka li-euˬ tsawˇ myahˇ uˬ moˆ iˇ cuꞈ shawˇ-eu gʼaˇ duˬ, tsawˇ haˬ kʼoeˇ deuˬ-ahˇ aˬ yawꞈ dawˬ biꞈ-euˬ meh. Kʼoeˇ naˇ, aˬ yawꞈ maꞈ nehˬ-ehˇ tiˬ kʼehˬ jawˇ nehˬ laꞈ-eu gʼaˇ duˬ, Beˬtuˆluˆ-ahˇ aˬ yawꞈ maꞈ shaˇ-euˬ meh.

Currently Selected:

Gʼaˬkʼehˇ 10: AHK

Highlight

Copy