1 Gawˇliˬtu 1

1Yeˬsuˇ Ka li-euˬ gʼaˬ kʼehˇ geuꞈ-eu gʼaˇ duˬ Miˬyehˇ nui ma tsaˬ-awˇ kuˇ taˬ-euˬ gʼaˬ pyeuꞈ-eu ngaˇ Pawˇluˆ hawˇ-eu, aˬ duiˬ-euˬ aˬ nyiˇ pyeuꞈ-eu Suˇdeˬ nga nyaꞈ,

2Miˬyehˇ-euˬ muiˬ-eu shawˇ-eu tsawˇ haˬ bi geuꞈ-eu gʼaˇ duˬ bi kuˇ doˆ-awˇ, aˬ dui-euˬ Sahˬpaˬ Yeˬsuˇ ka li-ahˇ uˬ duˬ kʼaˇ tahˬ-eu yawˬ gaˇ na luꞈ jawˇ-eu tsawˇ haˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, aˬ dui-euˬ Sahˬpaˬ hawˇ-eu aˬ yawꞈ maꞈ-euˬ Sahˬpaˬ pyeuꞈ-eu Yeˬsuˇ Ka li laꞈ kʼoeˇ Miˬyehˇ-euˬ tsawˇ haˬ pyeuꞈ laˇ-euˬ Gawˇliˬtu meuˬ-ahˇ jawˇ-eu Ka li zaˬ aˇ muˇ jawˇ gaˇ sahˬ boꞈ boꞈ ahˇ laꞈ-eu ma.

3Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka liˬ-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ naw maꞈ kʼoeˇtaˆ keuˆ le luꞈ-uˇ.

Yeˬsuˇ Ka li baˬ da neh za-euˬ guiˬ lahˬ

4Yeˬsuˇ Ka li-ahˇ gʼoe-awˇ Miˬyehˇ neh naw maꞈ-ahˇ biꞈ nehˬ-euˬ guiˬ lahˬ yaw dzahˇ baˬ da neh, ngaˬ-euˬ Miˬyehˇ-euˬ guiˬ lahˬ-ahˇ ngaˇ aˬ myah luꞈ ja ceuˬ-eu ma. 5Aˬ jeˬ miˇ neh ehˇ naˇ, Ka li laꞈ kʼoeˇ naw maꞈ guiˬ lahˬ tiˬ byah tiˬ loꞈ za-euˬ meh. Dawˬ ngehˬ-eu bym-eu paw maˬ ehˇ, zaˬ siˬ tsawˇ gahˇ paw maˬ ehˇ, naw maꞈ guiˬ lahˬ za-euˬ meh. 6Yeˬsuˇ Ka li gaˇ kawˆ saˇ kiˇ kamˬ-eu guiˬ lahˬ dawˬ naw maꞈ laꞈ kʼoeˇ ziꞈ dah ni jaˆ-eu meh. 7Kʼoeˇ miˇ neh, Sahˬpaˬ Yeˬsuˇ Ka li gʼoꞈ le gaˇ naw maꞈ loꞈ luꞈ-eu laꞈ kʼoeˇ, guiˬ lahˬ tiˬ hmˬ-iˬ maˬ bi ga ka-iˇ ni naw maꞈ ciˬ kʼmˇ taˬ-euˬ meh. 8Aˬ dui-euˬ Sahˬpaˬ Yeˬsuˇ Ka li gʼoꞈ le ngeh Nah naw maꞈ-ahˇ iˬ baˇ taˬ kʼaˇ maˬ bi za-eu gʼaˇ duˬ, aˇ saˬ saˬ ngeh keuˆ ni aˬ yawꞈ naw maꞈ-ahˇ jah-eu laꞈ kʼoeˇ bi ziꞈ laꞈ tehꞈ-a. 9Aˬ dui-euˬ Sahˬpaˬ pyeuꞈ-eu aˬ yawꞈ-euˬ Zaˬmaˇ Yeˬsuˇ Ka li-ahˇ taꞈ leˇ nya ni naw maꞈ-ahˇ kuˇ doˆ-euˬ Miˬyehˇ-aˬ, saˇ jaˇ ziꞈ-eu Miˬyehˇ pyeuꞈ-eu meh.

Ka li zaˬ aˇ muˇ paˆ-iˇ-eu

10Aˬ yuiꞈ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li-euˬ tsawˇ myahˇ uˬ moˆ naw maꞈ-ahˇ ngaˇ heu loꞈ-ehˇ shaˇ mawꞈ-eu ma. Naw maꞈ aˇ muˇ maˬ ya muˇ paˆ-eu gʼaˇ duˬ, ngehˬ-eu tmˇ-eu laꞈ kʼoeˇ tsaˬ leˇ dzoeˇ leˇ-eu jeˬ bi ahˇ-awˬ. Nui ma tiˬ siˬ tehꞈ-ehˇ taˬ-awˇ, nui noeˬ tiˬ gaˇ taꞈ-awˬ. 11Aˬ yuiꞈ aˬ nyiˇ Ka li zaˬ deuˬ-oˇ, naw maꞈ yaw kaˬ iˬ dehˬ iˬ ceh jaˆ luꞈ meh lehˇ, Kaˬlawˇiˆ aˇ muˇ ngaˬ-ahˇ bya cehˆ ni ehˇ nehˬ laꞈ-euˬ meh. 12Ngaˇ ehˇ mawꞈ-euˬ-aˬ, naw maꞈ yaw kaˬ “Ngaˇ-aˬ, Pawˇluˆ-ahˇ taꞈ-eu ma.” “Ngaˇ-aˬ, Aˬpawˇluˆ-ahˇ taꞈ-eu ma.” “Ngaˇ-aˬ, Beˬtuˆluˆ-ahˇ taꞈ-eu ma.” “Ngaˇ-aˬ, Ka li-ahˇ taꞈ-eu ma” lehˇ, tiˬ gʼaˬ tiˬ jeˬ ehˇ-eu meh. 13Ka li-ahˇ gʼawˬ mya muˇ muˇ paˆ-euˬ ta loˇ. Naw maꞈ gʼaˇ duˬ laꞈ yaꞈ kʼoeˇ taˆ kamˇ shiˇ-euˬ gʼaˬ Pawˇluˆ-a loˇ. Pawˇluˆ-euˬ tsawˇ myahˇ uˬ moˆ naw maꞈ iˇ cuꞈ shawˇ teˬ loˇ.

14Naw maꞈ laꞈ kʼoeˇ, Gaˬliˇpuˆ hawˇ-eu Gaˬyuˇ aˬ nyaꞈ-ahˇ tehꞈ-ehˇ ngaˇ iˇ cuꞈ ya shawˇ nehˬ-euˬ baˬ da neh Miˬyehˇ-euˬ guiˬ lahˬ-ahˇ ja ceuˬ-eu ma. 15Maˬ ngeuˇ law nmˇ-aˬ, naw maꞈ ngaˬ-euˬ zaˬ lahˇ geuꞈ-eu gʼaˇ duˬ iˇ cuꞈ shawˇ-euˬ ma lehˇ ehˇ-eu baw ngaˇ. 16(Saˬteˬpaˬ-euˬ nymˇ kʼahˬ zaˬ deuˬ-ahˇ kʼawꞈ ngaˬ neh iˇ cuꞈ shawˇ nehˬ-euˬ law hawˇ nga. Kʼoeˇ taꞈ naˇ, nui gʼaˬ tiˬ gʼaˬ-ahˇ-iˬ ngaˇ iˇ cuꞈ shawˇ nehˬ-euˬ ma lehˇ maˬ noeˬ nya.) 17Aˬ jeˬ miˇ neh ehˇ naˇ, iˇ cuꞈ bi shawˇ nehˬ-iˇ-eu gʼaˇ duˬ Ka li ngaˬ-ahˇ kʼehˇ gʼeh leꞈ-euˬ maˬ ngeuˇ-a. Laˬ kʼaˬ cehˇ-eu Guiˬ lahˬ dawˬ mehˬ-eu gʼaˇ duˬ kʼehˇ gʼeh leꞈ-eu meh. Kʼoeˇ uˬ taꞈ, tsawˇ haˬ zaˬ-euˬ zaˬ siˬ tsawˇ gahˇ-euˬ dawˬ-ahˇ gʼoe-awˇ ya mehˬ-eu maˬ ngeuˇ-a. Kʼoeˇloꞈ-ehˇ mehˬ naˇ, Ka li neh laꞈ yaꞈ kʼoeˇ taˆ kamˇ shiˇ-euˬ baoˬ byawˬ-iˇ jiˇ tehꞈ-a.

Ka li-aˬ Miˬyehˇ-euˬ baoˬ hawˇ-eu zaˬ siˬ tsawˇ gahˇ meh

18Aˬ jeˬ miˇ neh ehˇ naˇ, Ka li laꞈ yaꞈ kʼoeˇ taˆ kamˇ shiˇ-euˬ kʼoeˇ-aˬ, byoˆ-iˇ-euˬ tsawˇ haˬ deuˬ gʼaˇ duˬ tiˬ jeˬ-iˬ gaˇ dahˇ maˬ tsoeˬ-a. Ehˇ kʼawꞈ kʼoeˇ-aˬ, aˬ dui ka kʼoꞈ-eu jeˬ za-euˬ deuˬ gʼaˇ duˬ Miˬyehˇ-euˬ baoˬ meh. 19Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh.

“Tsawˇ gahˇ ahˇ-eu deuˬ-euˬ tsawˇ gahˇ,

ngaˇ laˆ cawˆ jiˇ nehˬ-awˇ,

tseˇ paˆ nya-eu deuˬ-euˬ nui gahˇ,

ngaˇ laˆ tsoeˬ jiˇ nehˬ ma.”

20Kʼoeˇ miˇ neh, zaˬ siˬ tsawˇ gahˇ ahˇ-eu tsawˇ haˬ aˬ gaˇ jawˇ ta lehˇ ehˇ haw sheˇ. Zahˇ dawˬ kʼoꞈ dawˬ mehˬ-eu saˬ laˬ deuˬ aˬ gaˇ jawˇ ta lehˇ ehˇ haw sheˇ. Heu ziˇ-ahˇ ja ceh ceh-eu paw nya dui dui-eu tsawˇ haˬ deuˬ aˬ gaˇ jawˇ ta lehˇ ehˇ haw sheˇ. Miˇ tsaˬ heu kʼoeˇ taˆ jaˆ-eu zaˬ siˬ tsawˇ gahˇ deuˬ yawꞈ ngehꞈ meh lehˇ Miˬyehˇ neh bi siˬ bi mawˇ laꞈ gʼaˬ-euˬ maˬ ngeuˇ-a loˇ.

21Aˬ jeˬ miˇ neh ehˇ naˇ, tsawˇ haˬ zaˬ deuˬ yawˬ ha-euˬ zaˬ siˬ tsawˇ gahˇ-ahˇ gʼoe-awˇ Miˬyehˇ-ahˇ maˬ bi siˬ maˬ bi mawˇ nya ni, Miˬyehˇ neh aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ jahˇ taˬ-euˬ meh. Ehˇ kʼawꞈ, aˬ dzawˬ-euˬ dawˬ lehˇ aˬ cawˬ kuˇ-eu nymˬ-mˇ aˬ dui maꞈ dawˬ mehˬ mehˬ luꞈ-eu gaˇ kawˆ heu-ahˇ gʼoe-awˇ, jah-eu tsawˇ haˬ deuˬ-ahˇ ka kʼoꞈ nehˬ-eu gʼaˇ duˬ Miˬyehˇ noeˬ tsehˆ-euˬ meh. 22Yuˇdaˆ tsawˇ ha deuˬ-aˬ, yawˬ ha jah-eu gʼaˇ duˬ zahˬ leˇ paˬ-ehˇ gʼeh-eu jeˬ-ahˇ mawˇ mawꞈ-awˇ, Heˬlaˬsaˇ tsawˇ haˬ deuˬ-aˬ, za siˬ tsawˇ gahˇ-ahˇ poˆ-eu meh. 23Aˬ dui maꞈ-aˬ, laꞈ yaꞈ kʼoeˇ taˆ kamˇ shiˇ-euˬ Ka li gaˇ kawˆ mehˬ-eu ma. Aˬ dui mehˬ-eu dawˬ heu-ahˇ Yuˇdaˆ tsawˇ haˬ deuˬ gʼoˆ coeˬ -eu meh. Aˬ cawˬ tsawˇ jeuˬ deuˬ-aˬ, gaˇ dahˇ maˬ tsoeˬ-eu dawˬ lehˇ sawˇ-eu meh. 24Ehˇ kʼawꞈ, Miˬyehˇ neh kuˇ doˆ-euˬ tsawˇ haˬ deuˬ pyeuꞈ-eu Yuˇdaˆ tsawˇ haˬ deuˬ gʼaˇ duˬ hawˇ-eu, Yuˇdaˆ tsawˇ haˬ maˬ ngeuˇ-eu deuˬ gʼaˇ duˬ, dawˬ heu-aˬ, Miˬyehˇ-euˬ baoˬ hawˇ-eu zaˬ siˬ tsawˇ gahˇ pyeuꞈ-eu Ka li meh. 25Aˬ jeˬ miˇ neh ehˇ naˇ, Miˬyehˇ dawˇ ga ga-eu jeˬ-aˬ, tsawˇ haˬ zaˬ-euˬ zaˬ siˬ tsawˇ gahˇ naˆ maˬ tseˇ gahˇ dzehˬ-awˇ, Miˬyehˇ gʼaˬ baˬ-eu jeˬ-aˬ, tsawˇ haˬ zaˬ gʼaˬ kʼaˆ-eu naˆ maˬ tseˇ deuˇ dzehˬ-eu meh.

26Aˬ yuiꞈ aˬ nyiˇ Ka li zaˬ deuˬ-oˇ, Miˬyehˇ naw maꞈ-ahˇ kuˇ ngeh naw maꞈ aˬ geu tiˆ-ahˇ dehꞈ-euˬ gaˇ taˬ ngehˇ. Shiˬ shaˬ jiˇ paw dzeˇ neh shaˇ sawˇ leꞈ naˇ, naw maꞈ laꞈ kʼoeˇ zaˬ siˬ tsawˇ gahˇ ahˇ-eu gʼawˬ mya gʼaˬ maˬ jawˇ-a. Baoˬ jaˆ-eu gʼawˬ mya gʼaˬ maˬ ahˇ-ehˇ, yaw huiˬ yaw mahˇ-euˬ aˇ jeuˬ laꞈ kʼoeˇ dehꞈ le-euˬ gʼawˬ mya gʼaˬ maˬ keuˬ-a. 27Zaˬ siˬ tsawˇ gahˇ ahˇ-eu deuˬ daˬ bi ga-eu gʼaˇ duˬ, miˇ tsaˬ zaˬ neh gaˇ dahˇ maˬ tsoeˬ-a lehˇ sawˇ taˬ-euˬ deuˬ-ahˇ Miˬyehˇ neh diˇ daˬ-ehˇ tseˇ doˆ-awˇ, baoˬ jaˆ-eu tsawˇ haˬ deuˬ daˬ bi ga-eu gʼaˇ duˬ, miˇ tsaˬ zaˬ neh gʼaˬ baˬ dui dui meh lehˇ sawˇ taˬ-euˬ deuˬ-ahˇ Miˬyehˇ neh diˇ daˬ-ehˇ tseˇ doˆ-euˬ meh. 28Miˇ tsaˬ zaˬ deuˬ neh gaˇ dahˇ tsoeˬ meh lehˇ noeˬ-euˬ jeˬ-ahˇ gaˇ dahˇ maˬ tsoeˬ-ehˇ bi pyeuꞈ-iˇ-eu gʼaˇ duˬ, miˇ tsaˬ zaˬ neh gaˇ dahˇ maˬ tsoeˬ-a lehˇ taˬ nyiˇ dui dui-euˬ jeˬ-ahˇ aˬ yawꞈ tseˇ doˆ-euˬ meh. 29Tsawˇ haˬ tiˬ gʼaˬ-iˬ Miˬyehˇ mehˬ shi kʼahˬ sehˇ maˬ bi jehˆ nya-eu gʼaˇ duˬ, Kʼoeˇ loꞈ-ehˇ jahˇ-euˬ meh. 30Ehˇ kʼawꞈ, naw maꞈ-ahˇ-aˬ, Yeˬsuˇ Ka li-ahˇ bi tsoꞈ taꞈ-eu gʼaˇ duˬ Miˬyehˇ mˇ-awˇ, Ka li-aˬ aˬ dui-euˬ zaˬ siˬ tsawˇ gahˇ pyeuꞈ ni Miˬyehˇ jahˇ-euˬ meh. Ka li baˬ da neh Miˬyehˇ-ahˇ aˬ dui tsaˬ leˇ tsahˇ leˇ-awˇ, Miˬyehˇ-euˬ muiˬ-eu shawˇ-eu tsawˇ haˬ pyeuꞈ laˇ-awˇ, iˬ baˇ-ahˇ buˬ-iˇ law-iˇ gʼaˬ-euˬ ma. 31Kʼoeˇ miˇ neh, Jaˇliꞈ laꞈ kʼoeˇ ehˇ taˬ-euˬ loꞈ-ehˇ, “Kʼahˬ sehˇ kʼaˇ jehˆ-eu tsawˇ haˬ deuˬ Sahˬpaˬ Miˬyehˇ neh mˇ-euˬ gaˇ-ahˇ tehꞈ-ehˇ jehˆ luꞈ-uˇ.”

Currently Selected:

1 Gawˇliˬtu 1: AHK

Highlight

Copy