یوحنا 6

عیسی بَش مونگ آدامی دُیوریار

مَتّیٰ ۱۴‏:۱۳‏-۲۱؛ مَرقُس ۶‏:۳۰‏-۴۴؛ لوقا ۹‏:۱۰‏-۱۷

1شوندان سُنگ عیسی جلیل دِریاسینینگ بِیلِکی طارافینا گِچدی.‏ بو دِریایا تیبِریه دِریا هِم دییّلیَردی.‏ 2عیسانینگ عالاماتلار اوستو بیلِن مِریضلِری شِفا بِرِندیگینی گُرِن اولی جِماغات اُنونگ ایزینا دوشدی.‏ 3عیسی شَگیرتلِری بیلِن بِییک دِپَه چیقیپ اُتوردی.‏ 4یَهودیلِرینگ پِسَح بایرامی قُلایلاپدی.‏

5عیسی تُوِرِگینه گُزونی آیلادی.‏ اُز یانینا اولی جِماغاتینگ گِلیَنینی گُروپ، فیلیپُسا:‏ ‏«‏بولارا اییِر یالی چُرِگی نیرِدِن ساتین آلاریس؟»‏ دییدی.‏ 6اُل مونی فیلیپُسی ایمتِحان اِتمِک اوچین سُراپدی، آصلیندا اُزونینگ نَمه اِتجِگینی شُندا بیلیَردی.‏ 7فیلیپُس اُنگا:‏ ‏«‏بولارینگ هِر بیرینه بیر دُووم چُرِک ساتین آلماق اوچین ایکی یوز کوموش سِکَّه هِم یِتمِز!‏»‏ دییّپ جُغاپ بِردی.‏ 8شَگیرتلِردِن بیری، شمعون پِطرُسینگ دُغانی آندرِیاس اُنگا:‏ 9‏«‏بو یِرده بیر اُغلاندا بَش آرپا چُرِگی بیلِن ایکی بالیق بار.‏ اِمّا شِیله اولی جِماغاتا بولار نَمِجیک بُلار؟»‏ دییدی.‏ 10عیسی:‏ ‏«‏خالقی اُتوردینگ»‏ دییدی.‏ خالق شُل یِردَکی گُک اُتلوقدا اُتوردی.‏ اُل یِرده بَش مونگه قُلای اِرکِک آدام باردی.‏ 11عیسی چُرِکلِری آلیپ، شوکور اِتدی، سُنگرا اُلاری اُتورانلارا پایلادی.‏ بالیقلاری هِم شِیتدی، نَچه ایسلِسِلِر، اُلارا پایلادی.‏ آداملار دُییانچالار اییدیلِر.‏ 12اُلار دُیانلاریندان سُنگ، عیسی شَگیرتلِرینه:‏ ‏«‏قالان-قاچانلاری ییغناشدیرینگ، هیچ زات ضایالانماسین»‏ دییدی.‏ 13شِیلِلیکده، شَگیرتلِر اییلِن بَش آرپا چُرِکدِن آرتان بُلِکلِری ییغناپ، اُن ایکی سِبِدی دُلدوردیلار.‏

14عیسانینگ بو عالاماتینی گُرِن آداملار:‏ ‏«‏حاقیقاتدان-دا، دونیَه گِلمِلی پیغامبار شودور»‏ دییدیلِر.‏ 15عیسی اُلارینگ اُزونی پادیشاه اِتمِک اوچین زُر بیلِن توتجاق بُلیاندیقلارینی بیلِنسُنگ، یِنه-ده یِکه اُزی داغا گیتدی.‏

عیسی سووونگ یوزوندِن یُرییَر

مَتّیٰ ۱۴‏:۲۲‏-۳۳؛ مَرقُس ۶‏:۴۵‏-۵۲

16آغشامارا اُنونگ شَگیرتلِری دِریانینگ کِنارینا گِلدیلِر.‏ 17قارانگقی دوشسه-ده، عیسی هِنیز اُلارینگ یانینا گِلمَندی.‏ اُنسُنگ شَگیرتلِر قاییقا مینیپ، دِریانینگ آنگیرسینداقی کَفَرناحوما اوغرادیلار.‏ 18گویچلی یِل توروپ، دِریا مُوج آتیپ باشلادی.‏ 19اُلار قاییقلی بَش-آلتی کیلومِتر کورِک اوروپ گیدِنلِریندِن سُنگ، عیسانینگ سووونگ یوزوندِن یُریپ، قاییقا یاقینلاشیپ گِلیَنینی گُروپ قُرقدولار.‏ 20اِمّا عیسی اُلارا:‏ ‏«‏قُرقمانگ، بو – مِن!‏»‏ دییدی.‏ 21اُلار اُنی قاییقا میندیرجِک بُلدولار، یُنه قاییق باسیمجاق کِنارا گِلیپ یِتدی.‏

عیسی – یاشاییش چُرِگی

22اِرتِسی گون دِریانینگ بِیلِکی کِناریندا قالان جِماغات اُل یِرده دوین یِکه بیر قاییقینگ باردیغینی و عیسانینگ اُز شَگیرتلِری بیلِن شُل قاییقا مینمَن، اُلارینگ یِکه اُزلِرینینگ گیدِندیکلِرینی بیلدیلِر.‏ 23شُل واقت تیبِریه‌دِن باشغا قاییقلار گِلدی.‏ قاییقلارینگ ساقلانان یِری عیسی خودایا شوکور اِدِن و خالقینگ چُرِک اییِن یِرینه قُلایدی.‏ 24عیسانینگ-دا، اُنونگ شَگیرتلِرینینگ-ده اُل یِرده یُقدوغینی گُرِن جِماغات قاییقلارا مینیپ، عیسانی گُزلِمَگه کَفَرناحوما طاراف گیتدی.‏ 25اُنی دِریانینگ آنگری طارافیندان تاپیپ:‏ ‏«‏اُستاد، بو یِره هاچان گِلدینگ؟»‏ دییّپ سُرادیلار.‏

26عیسی اُلارا:‏ ‏«‏مِن سیزه دُغروسینی آیدیارین، سیز مِنی عالاماتلار گُرِنینگیز اوچین دَل-ده، چُرِک اییّپ دُیانینگیز اوچین آغتاریارسینگیز.‏ 27ضایالانیان اییمیت اوچین دَل-ده، اِبِدی یاشاییش بِریَن اییمیت اوچین ایخلاص اِدینگ، اُنی سیزه اینسان اُغلی بِرِر.‏ چونکی آتامیز خودایینگ اُزی بو ایشی اُنگا تابشیراندیر»‏ دییّپ جُغاپ بِردی.‏ 28اُندان:‏ ‏«‏بیز خودایینگ ایشلِرینی بِرجای اِتمِک اوچین نَمه اِتمِلی؟»‏ دییّپ سُرادیلار.‏ 29عیسی اُلارا:‏ ‏«‏خودایینگ ایشینی بِرجای اِتمِک ایسلِیَن بُلسانگیز، اُنونگ ایبِرِنینه ایمان گِتِرینگ»‏ دییّپ جُغاپ بِردی.‏ 30اُلار یِنه-ده:‏ ‏«‏گُروپ، سانگا ایمان گِتیرِر یالی، سِن نَهیلی عالامات گُرکِزِرسینگ؟ هانی، نَمه اِدِرسینگ؟ 31بیزینگ آتا-بابالاریمیز بیاباندا مانّا اییدیلِر.‏ مُقادِّس یازغیلاردا بو بارادا:‏ ‏”‏اُلارا اییمِک اوچین آسماندان چُرِک بِردی“‏ دییّپ یازیلان»‏ دییدیلِر.‏#چیقیش ۱۶‏:۴؛ نِحِمیا ۹‏:۱۵؛ زِبور ۷۸‏:۲۴ 32عیسی اُلارا:‏ ‏«‏مِن سیزه دُغروسینی آیدیارین، سیزه آسماندان چُرِک بِرِن موسی دَل.‏ آسماندان سیزه حاقیقی چُرِگی مِنینگ آتام بِریَر.‏ 33چونکی خودایینگ چُرِگی آسماندان اینیپ، دونیَه یاشاییش بِریَندیر»‏ دییدی.‏ 34اُلار اُنگا:‏ ‏«‏اِی آقا، شُل چُرِگی بیزه هِمیشه بِر»‏ دییدیلِر.‏ 35عیسی اُلارا شِیله دییدی:‏ ‏«‏یاشاییش چُرِگی مِندیرین، مِنینگ یانیما گِلِن آصلا آجیقماز، مانگا ایمان گِتیرِن آصلا سوساماز.‏ 36آیدیشیم یالی، سیز مِنی گُردونگیز، اِمّا مانگا ایمان گِتیرمِیَرسینگیز.‏ 37آتامینگ مانگا بِرِن آداملارینینگ باری مِنینگ یانیما گِلِر، مِن اُز یانیما گِلِنلِری آصلا کُومارین.‏ 38چونکی مِن اُز ایسلِگیمی دَل-ده، مِنی ایبِرِنینگ ایسلِگینی بِرجای اِتمِک اوچین آسماندان ایندیم.‏ 39مِنی ایبِرِنینگ ایسلِگی بُلسا، اُنونگ اُزومه بِرِنلِرینینگ هیچ بیرینی ییتیرمَن، اُلاری آخیرات گون قایتادان دیرِلتمِگیمدیر.‏ 40اُغلی گُرِن و اُنگا ایمان گِتیرِن هِر بیر آدامینگ اِبِدی یاشایشا قاووشماغی آتامینگ ایسلِگیدیر.‏ مِن-ده بو آداملاری آخیرات گون قایتادان دیرِلدِرین.‏»‏

41‏«‏آسماندان اینِن چُرِک – مِندیرین»‏ دییِنی اوچین یَهودیلِر اُنگا قارشی چیقیپ زِیرِنیشدیلِر.‏ 42اُلار:‏ ‏«‏بو یوسفینگ اُغلی عیسی دَلمی؟ بیز اُنونگ اِنه-آتاسینی تانییاریس.‏ اُل نَهیلی ‏”‏مِن آسماندان ایندیم“‏ دییَّر؟»‏ دییّشدیلِر.‏ 43عیسی اُلارا شِیله دییدی:‏ ‏«‏اُزآرا زِیرِنیشمَنگیزی بِس اِدینگ.‏ 44اِگِر مِنی ایبِرِن آتانینگ اُزی گِتیرمِسه، هیچ کیم مِنینگ یانیما گِلیپ بیلمِز.‏ یانیما گِلِن آدامی بُلسا، مِن آخیرات گون دیرِلدِرین.‏ 45پیغامبارلارینگ یازغیلاریندا:‏ ‏”‏اُلارینگ هِمّه‌سی خودایدان تَعلیم آلارلار“‏ دییّپ یازیلان.‏#اِشعیا ۵۴‏:۱۳ آتادان اِشیدیپ، اُندان تَعلیم آلان هِر کِس مِنینگ یانیما گِلِر.‏ 46آصلیندا هیچ کیم هیچ واقت آتانی گُرِن دَلدیر.‏ آتانی دینگه خودایدان گِلِن گُرِندیر.‏ 47مِن سیزه دُغروسینی آیدیارین، مانگا ایمان گِتیرِن اِبِدی یاشایشا قاوشاندیر.‏ 48یاشاییش چُرِگی مِندیرین.‏ 49آتا-بابالارینگیز بیاباندا مانّا اییِندیکلِرینه باقمازدان، اُلدولِر.‏ 50اِمّا شُل آسماندان اینِن چُرِکدِن اییَّن آدام، هیچ اُلمِز.‏ 51آسماندان اینِن دیری چُرِک مِندیرین.‏ موندان اییِن آدام اِبِدی یاشار.‏ دونیَه‌نینگ یاشایشی اوچین بِرجِک چُرِگیم مِنینگ اُز بِدِنیمدیر.‏»‏

52اُنسُنگ یَهودیلِر:‏ ‏«‏بو آدام اُز بِدِنینی بیزه اییمَگه نَهیلی بِریپ بیلِر؟»‏ دییشیپ، اُزآرا جِدِلِّشمَگه باشلادیلار.‏ 53عیسی اُلارا:‏ ‏«‏مِن سیزه دُغروسینی آیدیارین، اینسان اُغلونینگ بِدِنینی اییّپ، قانینی ایچمِسِنگیز، سیزده یاشاییش بُلماز.‏ 54مِنینگ بِدِنیمی اییّپ، قانیمی ایچِن اِبِدی یاشایشا قاوشار.‏ آخیرات گون مِن اُنی دیرِلدِرین.‏ 55مِنینگ بِدِنیم – حاقیقی اییمیت، قانیم حاقیقی ایچگیدیر.‏ 56مِنینگ بِدِنیمی اییّپ، قانیمی ایچیَن مِنده یاشار، مِن هِم اُندا.‏ 57مِنی دیری آتا ایبِردی و مِن اُنونگ اوستو بیلِن یاشایارین.‏ اِدیل شونونگ یالی، مِندِن اییمیتلِنیَن-ده مِنینگ اوستوم بیلِن یاشار.‏ 58هاووا، آسماندان اینِن چُرِک بودور.‏ سِراِت، بو آتا-بابالارینگیزینگ اییِن چُرِگی یالی دَلدیر، اُلار چُرِک اییسِلِر-ده، اُلوپ گیتدیلِر.‏ اِمّا بو چُرِگی اییِن آدام اِبِدی یاشار»‏ دییدی.‏

59اُل بو سُزلِری کَفَرناحوم‌داقی کِنیسه‌ده اُورِدیَرکَه آیتدی.‏

کَن آداملار عیسانی تِرک اِدیَرلِر

60شَگیرتلِرینگ کَنسی مونی اِشیدیپ:‏ ‏«‏بو سُزلِر آغیر.‏ مونی کیم قابول اِدیپ بیلِر؟»‏ دییّشدیلِر.‏ 61عیسی شَگیرتلِرینگ مونگا زِیرِنیشیَنینی بیلیپ، اُلارا:‏ ‏«‏بو سیزینگ جانینگیزا باتیارمی؟ 62اُندا سیز اینسان اُغلونینگ اُوال بُلان یِرینه قایتادان آسمانا چیقانینی گُرسِنگیز نَمه دییِرکَنگیز؟ 63یاشاییش بِریَن روحدیر، اینسان گویجونینگ پِیداسی یُقدور.‏ مِنینگ سیزه آیدیان سُزلِریم مُقادِّس روحداندیر و یاشاییش بِریَندیر.‏ 64یُنه سیزینگ آرانگیزدا کَبیر ایمان گِتیرمِیَنلِر بار»‏ دییدی.‏ چونکی عیسی کیمینگ ایمان گِتیرمِیَندیگینی و اُزونه کیمینگ خایینلیق اِتجِکدیگینی اُزال-باشدان بیلیَردی.‏ 65اُل:‏ ‏«‏آتانینگ اُزی گِتیرمِسه، هیچ کیم مِنینگ یانیما گِلیپ بیلمِز دییّپ، مِن سیزه شُنونگ اوچین آیتدیم»‏ دییدی.‏

66شُندان سُنگ شَگیرتلِرینینگ کَنسی اُندان یوز اُووردیلِر و اُنونگ ایزینا دوشمِگی بِس اِتدیلِر.‏ 67شُندا عیسی اُن ایکی شَگیرتلِردِن:‏ ‏«‏سیز هِم مِنی تِرک اِتمِکچیمیسینگیز؟»‏ دییّپ سُرادی.‏ 68شمعون پِطرُس اُنگا:‏ ‏«‏آقام، بیز سِنی تِرک اِدیپ، باشغا کیمه بارایلی؟ اِبِدی یاشاییش سُزلِری دینگه سِنده بار آخیرین.‏ 69بیز سِنینگ خودایینگ مُقادِّسیدیگینگه اینانیاریس و مونی آچیق بیلیَریس»‏ دییّپ جُغاپ بِردی.‏ 70عیسی اُلارا:‏ ‏«‏سیز اُن ایکیلِری اُزوم سایلاپ آلمادیمّی؟ مونگا باقمازدان، آرانگیزدان بیری شِیطاندیر»‏ دییّپ جُغاپ بِردی.‏ 71اُل مونی شمعون اِسخریوطینینگ اُغلی یهودانی گُز اُوونده توتوپ آیتدی.‏ سِبَبی یهودا اُن ایکیلِرینگ بیری بُلسا-دا، سُنگرا عیسی خایینلیق اِتجِکدی.‏

Currently Selected:

یوحنا 6: TUKIR

Highlight

Copy