Penemu-Dalam Solomon 5
5
Sida ke Jai Ngesal Ati
1Ba hari nya ila, orang ke lurus deka bediri penuh pengarap di mua bala sida ke ngenyak sereta enda pedulika pengawa iya suba. 2Sida deka tekenyit meda iya selamat, lalu gegetar laban tekelalu takut. 3Nya baru sida ngesal ati ke ulah sida, lalu merengut enggau pangan diri. 4“Tu meh orang ke dikeduan kitai suba. Kitai ngumbai iya bejaku ngapa. Beli amat meh kitai suba! Kitai ngumbai iya gila lebuh kitai meda pendiau iya baka nya, lalu lebuh iya mati kitai nadai pedulika iya. 5Diatu iya endang amat siku ari anak Allah Taala. Iya bisi ungkup begulai enggau nembiak Allah Taala. 6Bala kitai ke tesat ari jalai ti betul suba. Kitai enda kala diau dalam penampak pengelurus baka mata panas ti enda kala manchar ba kitai. 7Sekumbang kitai idup, kitai segau-segau bejalai di menua puang endur ti nadai tanda, lalu majak enda nitihka jalai ti diasuh Tuhan tengah kitai. Ulah ti enda beradat nya ngasuh kitai rusak. 8Bala kitai sumbung, kitai bebegah ngumbai diri empu kaya; kati baka diatu, nama penguntung ulih kitai ari nya? 9Semua utai nya udah lenyau diatu; nadai agi dipeda baka kemayang, baka utai ti didinga nuan tang udah nya enda ingat agi.
10“Kapal belayar nengah gelumbang di tasik, nyadi lebuh iya udah ngelebus iya nadai ninggalka bekau. Nuan enda nemu sekalika iya udah nengah nya. 11Burung terebai nengah langit, tang nadai ninggalka tanda iya udah nengah endur nya. Iya laju mansa terebai enggau sayap iya nengah angin, nadai ninggalka bekau iya bisi mansa nya. 12Panah nerusuk angin lebuh ditimbak nuju utai ti diselinting, tang tekala nya angin nutup diri entudi panah nya, lalu nadai siku orang ulih madah senentang ni ti dipansa iya. 13Baka nya meh kitai - kitai ada, udah nya kitai lenyau nadai agi. Kitai nadai ninggalka perangai ti manah; kitai nyau rusak ketegal penyai kitai.
14Dini orang ke jai bisi pengandal? Pengandal sida semina baka debu dipuputka ribut, andalka pupu ai tasik #5.14 pupu ai tasik; sekeda penambah bisi meku ti lesap dalam ribut kudi, andalka asap dipuput dalam angin. Pengandal sida nya enda lama aja, dibanding baka kitai ingatka penatai temuai ke begulai enggau kitai sehari aja lalu pagi siti nyau pulai.
15Tang orang ke lurus deka idup belama iya. Tuhan deka ngupah sida; Iya ke Pemadu Tinggi deka ngelindung sida. 16Iya deka meri sida pendiau raja enggau makuta ti badas amat. Iya deka nyaga sida enggau jari Iya ti bekuasa. 17#Eps 6.11-17. Iya deka mansang beperang lalu tetap ulih ngalahka munsuh Iya, lalu ngena utai ti digaga Iya empu nyadika senyata Iya. 18Pengelurus nyadika dinding dada Iya, adat ti betul nyadika tangkup pala Iya. 19Pengudus nyadika terabai Iya. 20Iya deka ngasuh pengeringat Iya nyadika pedang, lalu kuasa di dunya tu sama enggau Iya merang orang ke beli amat ke deka ngelaban Iya. 21Leka nyitar deka betul-betul mangka utai ti dituju, lalu Tuhan ngaga remang nyadika panah Iya, lalu majak nimbak. 22Ujan batu deka labuh balat amat ninggang bala munsuh Iya. Tasik enggau sungai nyau bah lalu ngerusak sida balat amat. 23Ribut kudi deka muput sida baka rumput ti rangkai. Pengawa ti enda beradat deka mai pengerusak di seluruh dunya. Kereja ti jai ngasuh perintah runtuh.
Currently Selected:
Penemu-Dalam Solomon 5: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia