लूका 18
18
प्ल्यङ् सीयेब मदी
1नमयू येतार्ने प्रार्थना चीन्नू मेस्ये सेम् अन्सीलाची यदेब येशूदे थमयूने उखान त्या स्योत्दे: 2“सहर त्याने परमेश्वरने अम्फब मेस्ये मीजे ख्याल् अन्चेब न्याय चेब मीत्या ख्य। 3हम्ब सहरने प्ल्यङ् सीयेब मदी त्या ख्य। हम्ब ङूट्याने रलीम् चीन्न ख्य, मेस्ये य ख्य, ‘ङैजे विरोधीजे खूम्ने ङैजे न्याय चीम्मी।’
4“ङूदे तम्त्यासेमेब अन्ङ्यीन्, तर ङ्येदे ङूदे रङ्से सेम्ने यदे, ‘ङ परमेश्वरप्रे अम्फ। मीजे ख्यालये अन्ची। 5तर अम्ब प्ल्यङ् सीयेब मदीदे ङैने हैरान चेबदे ङ ङूजे न्याय चीम्मीय, नत्र हम्ब रजे-र चीत्देबे ङैने वाक्कै चीक्क्य’।”
6प्रभुदे यदे, “ङ्यीन्, हम्ब धर्मत्वब न्याय चेबमीदे च यीय। 7च परमेश्वरदे ङूने नो-मून् बिन्ती चीन्नब रङ्सेदे सेलब मीयूजे न्याय अन्चीम्मे स्व? च ङूदे थमयूजे लागि गलाबे चीक्क्या स्व? 8ङ नमयूने यीय, ‘येशूदे छ्योटोने थमयूजे न्याय चीम्मीय। होरेने यली मीजे च रब ङूदे पृथ्वीने विश्वास तूया स्व?”
फरिसी मेस्ये स्यर्म लङबजे उखान
9रङ्से फ्याने भर् चेबयू मेस्ये रङ्सेने धर्मी ख्यङ् मन्देब सूजोयूने अन्ज्य मेनबयू कोइ-कोइने येशूदे अम्ब उखान स्योत्दे: 10“मन्दिरने मी ङ्ही प्रार्थना चेने गीलीदे-त्या फरिसी मेस्ये सूजोब स्यर्म लङब। 11फरिसीदे मेर्देबे सेम्ने येर्बे प्रार्थना चीत्दे, ‘ओ परमेश्वर, ङ नने धन्यवाद पीन्क्य, ङ सूजो मीयू प्र ठग, अन्न्याय, वेश्य चेब, या अम्ब स्यर्म लङबप्रये दी।’ 12ङ सात्याजे ङ्हीफे बर्त टूङ्क्य। ङैदे प्रेब साप्ता थोकजे भा च्यूजे भा त्या ङ पीन्क्य।’
13“तर स्यर्म लङबब चीन्तङ्दे मेर्देबे स्वर्गतेले म्याये अन्लेल्लाबे येरे यदेबे रङ्से गू तप्दे, ओ परमेश्वर, ङ पापी फ्याने दया चीम्मी!’
14 #
मत्ती 23:12; लूका 14:11 “ङ नमयूने यीय, अम्ब मी हम्ब त्याब यली धर्मी ठर्दीदेबे रङ्से कीम्तेले गीली। चेनेयलो सू रङ्सेदेने केन् त्वोक्क्य, हम्ब चीद क्यूर पर्दीय, तर सू रङ्सेने चीद चीक्क्य, हम्ब केन्चीम्मीय।”
येशू मेस्ये चीद पीचयू
मत्ती १९:१३-१५; मर्कूस १०:१३-१६
15येशूदे छूम्मीस्य यदेबे मीयूदे चीद पीचयू ङू ट्याने रेत्दे। तर स्यूस्स्यायूदे अम्ब तङ्देबे थमयूने फ्राजीदे। 16येशूदे थमयू ङू ट्याने कोदेबे यदे, “चीद पीचयूने ङै ट्याने रसे पीन्, थमयूने अङ्कालाची। चेनेयलो परमेश्वरजे राज्य येरयूजेने ख्यङ्। 17तम्दम्ने ङ नमयूने यीय, सूदे चीद पीचत्यादेप्र परमेश्वरजे राज्यने रङ्सेजे यदेबे अम्मन्दी, हम्ब कम्ब हालातदेये नङ्ने क्योब अम्प्रे।”
हुकुम चील्लेब फ्योबो मी
मत्ती १९:१६-२९; मर्कूस १०:१७-३०
18हुकुम चील्लेब मी त्यादे येशूने येरे यदेबे लोत्दे, “ओ ज्य गुरु, कलङ्बेये अन्सीबब जीया प्रेने ङैदे च चे पर्दीय?”
19येशूदे ङूने यदे, “न ङैने चेने सोरो ज्य य? परमेश्वर बाहेक सूये सोरो ज्य त्वो। 20#प्रस्थान 20:14; व्यवस्था 5:18; प्रस्थान 20:13; व्यवस्था 5:17; प्रस्थान 20:15; व्यवस्था 5:19; प्रस्थान 20:16; व्यवस्था 5:20; प्रस्थान 20:12; व्यवस्था 5:16नदे आज्ञायूब स्ये ख्यङ्: ‘वेश्य काम अन्चील्लाची, हत्या अन्चील्लाची, अङ्खूलाची, लूच्च साक्षी अम्पीन्लाची, रङ्से प मने गेसेन् ची’।”
21ङूदे यदे, “अम्ब आज्ञा क्वाने ङैदे चीदमेस्येने मन्दीन ख्यङ्।”
22अम्ब तमेस्ये येशूदे ङूने यदे, “नने अझ पोत्याजे हर्जो ख्यङ्। नैप्रे ख्यब साप्ता थोकने सोङ्देबे दूख्प्रेयूने कोप्पी नने स्वर्गने धन क्यूक्क्य, मेस्ये ङैजे ङ्ये-ङ्ये ख।” 23तर अम्ब पो तदेबे हम्ब हुकुम चील्लेब मी सोरो नाराज क्यूत्दे, चेनेयलो ङू बेस्से फ्योबो ख्य।
24होर्दे येशूदे थमयूने लेत्देबे यदे, “फ्योबो मीयू परमेश्वरजे राज्य नङ्ने क्योबने सोरो मूस्कील् ख्यङ्, 25चेनेयलो फ्योबो मीने परमेश्वरजे राज्यने क्योब यली ऊँटने कप्जे म्यादे क्योबब सूस्योलो क्यूक्क्य।”
26होर्दे पो तब मीयूदे यदे, “होरेयलो सूजे उद्धार क्यूर खूइय स्व?”
27येशूदे यदे, “मीदे चे अन्ख्वब काम, परमेश्वरदे चे खूइय।”
28होर्दे पत्रुसदे यदे, “ले, रङ्से कीम्-नम् पोङ्देबे ङी नैजे ङ्येदे प्रेन ख्यङ्।”
29होर्दे येशूदे थमयूने यदे, “तम्दम्ने ङ नमयूने यीय, सूदे कीम् या मज, या अत-च्योन् या प-म या च-चीमीने परमेश्वरजे राज्यजे लागि पोङ्यीय, 30चूजोने अम्ब यली थेप् प्रेक्क्य, होर्दे ङ्येजे जूग्ने कलङ्बेये अन्सीबब जीया प्रेक्क्य।”
रङ्से सीबबजे बारेने येशूदे चेब भविष्यवाणी
मत्ती २०:१७-१९; मर्कूस १०:३२-३४
31येशूदे बाह्र स्यूस्स्यायूने अलाके कोदेबे यदे, “ले, ङीन यरूशलेमतेले प्रेनख्यङ्, मेस्ये मीजे चजे बारेने अगमवक्तायूदे लिख्दीयेब पो त्या-त्या पूरा क्यूक्क्य। 32चेनेयलो येशू सूजो जातयूजे लाने सूम्दीपीय, मेस्ये थमयूदे ङूजे खिसी चीक्क्य, मेस्ये ङूने अन्ज्य व्यवहार चीत्देबे ङूने छ्योम थर्क्य। 33थमयूदे ङूने कोर्रादे ठरीय मेस्ये सेक्क्य, होर्दे सोम्म्यानीदे ङू फेरि सोम्बो क्यूत्देबे लङ्क्य।”
34तर स्यूस्स्यायूदे अम्ब यब पोयू चेत्याये अङ्को। थमयूजे लागि अम्ब पो नङ्सू हीत्दे, होर्दे अम्ब यब पो थमयूजे बुद्धिदे ह्वे चेअन्खू।
म्या अन्तङब स्य्वाब मीदे म्या तङ प्रेब
मत्ती २०:२९-३४; मर्कूस १०:४६-५२
35येशू यरीहो ट्याने फ्योरदे। हैयाने म्या अन्तङब मीत्या लम्जे नने टूङ्देबे स्य्वान ख्य। 36मीहुल त्या लम्जे नदे प्रेनब तदेबे ‘अम्ब च?’ यदेबे ङूदे लोत्दे। 37मीयूदे ङूने यदे, “नासरतजे येशू अन्-यादे प्रेनख्यङ्।”
38होर्दे हम्ब येरे यदेबे बोङ्बे पारा पूत्दे, “ओ येशू, दाऊदजे च, ङै फ्याने दया चीम्मी!” 39खूम्खूम् प्रेनबयूदे ङूने पारा अम्पूल्लाची यदेबे फ्राचीदे, तर हम्ब झन् सोरो पारा पूत्दे, “ओ दाऊदजे च, ङै फ्याने दया चीम्मी!”
40येशू मेर्दे, मेस्ये हम्ब मीने ङै ट्याने सीक यदेबे आज्ञा पीन्दे। ङू ट्याने रेमेस्ये ङूदे म्या अन्तङब मीने लोत्दे, 41“न च चीम्मीस्य मन?
ङूदे यदे, “प्रभु, ङैदे तङ खूस्य।
42होर्दे येशूदे ङूने यदे, “न तङ ख्व क्यूस्स्य। नैजे विश्वासदे नने तम् चीक्क ख्यङ्।” 43होर्दे खात्याने ङू तङ ख्व क्यूत्दे, मेस्ये परमेश्वरजे सार्या चीदे-चीदे ङू येशूजे ङ्ये-ङये गीलीदे। अम्ब तङ्देबे मीयूदे परमेश्वरजे सार्या चीत्दे।
Currently Selected:
लूका 18: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
