लूका 19
19
स्यर्म लङब जखायस
1येशू यरीहोने क्यूत्देबे प्रेन ख्य। 2हैयाने जखायस मीन् ख्यब मी त्या ख्य। स्यर्म लङबयू नङ्ने ङू मूख्य मी ख्य होर्दे फ्योबो ख्य। 3येशू सू टोङ् यदेबे ङूदे लेत्तीङ् रदे, तर ठून्या क्यूत्देबे मीहुलदे चीत्देबे ङूदे तङ अन्खू। 4ङू येशू लेने खूम्खूम् ग्येरदेबे अञ्जीरजे तङ्बो त्याने टदे। चेनेयलो येशू हम्ब लम् क्यूत्देबे प्र मेल्न ख्य।
5कन्छ्वाब येशू हम्ब नेने फ्योरदे, हन्छ्वाब ङूदे तो लेत्देबे ङूने यदे, “ओ जखायस, छ्योट्टो मो तल्ख, चेनेयलो दीनी ङ नैजे कीम्ने टूङ पर्दे ख्यङ्।” 6ङू छ्योट्टो मो तल्रदे। होर्दे सूगे सूगे येशूने ङूजे कीम्ने स्योल्गीदे।
7कन्छ्वाब मीयूदे अम्ब तङ्दे, थमयू क्वाने येरे यदेबे गन्गन् चेने सुरु चीत्दे, “येशू पापीजे कीम्ने ङ्येव क्यूत्देबे बास टूङने गीली।”
8जखायस मेर्देबे प्रभुने यदे, “प्रभु, ले, ङैदे ङैजे सम्पत्तिजे फाच्या भा दूख्प्रेयूने पीन्क्य, मेस्ये कोइजे अन्-न्याय चीत्देबे सेयू रेक्क ख्यङ्लो ङैदे हम्बजे भा स्यी थेप् थप्दीदेबे ल्वाबीय।”
9होर्दे येशूदे ङूने यदे, “दीनी अम्ब कीम्ने मुक्ति रख्यङ्, चेनेयलो ङूये अब्राहामजे च ख्यङ्। 10#मत्ती 18:11चेनेयलो मीजे च मलेबयूने मलने मेस्ये बच्दीमेने र ख्यङ्।”
मर्जे मन्द्रामूलीजे उखान
मत्ती २५:१४-३०
11थमयूदे अम्ब पो ङ्यीन्नूब येशूदे थमयूने उखान त्या स्य्वे मैदे। ङू यरूशलेमजे ट्याने ख्य, होर्दे मीयूदे परमेश्वरजे राज्य तूरून्तै रमेख्यङ् यदेबे ह्वे चीन्न ख्य। 12येशूदे यदे, “खानदानी मीत्यादे बेस्से चीन्तङ् देश त्याने प्रदेबे रङ्से देशजे लागि मूरुम् क्यूत्देबे ल्वारसे यदेबे विचार चीत्दे। 13ङूदे रङ्से त्वो च्यू कोदेबे थमयूने मर्जे मन्द्रामूली च्यू पीन्देबे यदे, ‘ङ अन्ल्वारदासेमे अम्बदे छोङ्चीत्देबे नफ योन्।’
14“तर ङूजे देशजे मीयूदे ङूने सेम् अम्पर्दे ख्य। मेस्ये थमयूदे ङूजे ङ्ये-ङ्ये दूतयूने येरे यदेबे कूल्बीदे, ङूदे ङी फ्याने मूरुम् क्यूरब ङीने सेम् अम्पर्दी।’
15“होर्दे राज्यजे हक प्रेत्देबे ङू ल्वारमेस्ये ङूदे नोर् पीनब त्वोयू ङू ट्याने क्वब हुकुम पीन्दे, होर्दे छोङ्चीत्देबे थमयूदे कोला नफ चीत्दे यदेबे ल्वेने कोदे।
16होर्दे खूम्जे त्वो रदेबे, ‘प्रभु, नैजे मन्द्रामूलीदे अझ थेप् मन्द्रामूली च्यू केमेदे ख्यङ्।’
17“मूरुम्दे हम्बने यदे, ‘स्याबास ज्य त्वो, न छीत्या सेनेये विश्वास चे ख्वब क्यूत्दे, नदे सहर च्यू फ्याने हुकुम चे प्रेक्क्य।’
18दोस्रो त्वो रदेबे येरे यदे, ‘प्रभु, नदे पीनब मन्द्रामूली ङदे ङैदे सूजो मन्द्रामूली च्यू कमेदीदे रेख्यङ्।’
19“मूरुम्दे हम्बने यदे, ‘नदे सहर ङ फ्याने हुकुम चील्ले प्रेक्क्य।’
20“सूजोब रदेबे येरे यदे, ‘प्रभु ले, नैजे मन्द्रामूली अने ख्यङ्। हम्ब ङैदे रूमालने फूरदेबे हीदे ख्यङ्। 21न तङ्देबे ङ फैगदे, चेनेयलो न सोरो सेम् कोङ मी ख्यङ्। कम्ब अन्हीदे हम्ब कीन्क्य, मेस्ये कम्ब रङ्सेदे अन्सूक् हम्बजेने बली तोल्देबे कूबीय।’
22“ङूदे हम्बने यदे, ‘नैजे ङूर्जे पोदे ङ नैजे न्याय चीक्क्य, ओ दुष्ट त्वो! कम्ब अन्हीते हम्ब कीन, मेस्ये कम्ब रङ्सेदे अन्थरे हम्बजे बली तोलब ङ सेम् कोङब मी ख्यङ् यदेबे नदे स्येने ख्यङ्। 23होर्दे ङैजे मन्द्रामूली बैंकने चेने अङ्-ये स्व? ङ रब व्याज सजने हम्ब प्रेख्यङ्दे।’
24“होने ट्याने मेर्नबयूने ङूदे यदे, ‘ङूजे हम्ब मन्द्रामूली स्यदेबे मन्द्रामूली च्यू ख्यबने क्यङ्पीम्पी।’
25थमयूदे ङूने यदे, ‘प्रभु, ङूप्रे मन्द्रामूली च्यू ख्यने ख्यङ्।’
26 #
मत्ती 13:12; मर्कूस 4:25; लूका 8:18 “ङ नमयूने यीय, सूप्रे ख्यङ् ङूने अझ थेप् पीन्क्य, तर सूप्रे त्वो ङूप्रे ख्यबये लेन्कीय। 27#मत्ती 25:14-30तर ङैदे थमयूफ्याने हुकुम चेब सेम् अम्पर्तेब हम्ब शत्रुयूने अने सीक, मेस्ये थमयूने ङैजे खूम्ने से’।”
येशू यरूशलेमने गीलेब
मत्ती २१:१-११; मर्कूस ११:१-११; यूहन्ना १२:१२-१५
28येशूदे अम्ब पो यमेस्ये ङू यरूशलेमतेले गीलीदे। 29बेथफागे मेस्ये बेथानियाजे त ट्याने जैतून यब गङ्ने फ्योरदेबे स्यूस्स्यायू नङने ङ्हीने येरे यदेबे कूल्पीदे, 30सामूनेजे तने प्र, मेस्ये नङ्ने क्योबीनूब नमयूदे कलङ्बेये सूत्याये अन्टेकब प क्यूरब गधा चीदत्या क्योलोने च्यूनेब तूय, हम्बने फादेबे अने सीक। 31कोइदे ‘चेने फा?’ यदेबे नमयूने लोत्दे यलो, ‘प्रभुने अम्ब चैदे ख्यङ्’ य।”
32हम्ब कूल्बेबयू गीलेदे, मेस्ये येशूदे थमयूने केरे य होरप्रने तूदे। 33थमयूदे प क्यूरब गधा चीद फा मेल्नूब हम्बजे मालिकयूदे थमयूने लोत्दे, “नमयूदे अम्ब प क्यूरब गधा चीद चेने फा?”
34थमयूदे यदे, “प्रभुने अम्बजे हर्जो ख्यङ्।”
35स्यूस्स्यायूदे हम्बने येशू ट्याने रेत्दे, मेस्ये रङ्से कोलायू प क्यूरब गधा चीदजे फ्याने तीक्देबे ङूने टस्ये पीन्दे। 36येशू लम्ने प्रेनूब मीयूदे रङ्से कोलायू लम्ने तीक्मीदे।
37येशू जैतून गङ्जे पीसार्ने फ्योरब स्यूस्स्या हुल, रङ्सेदेने तङब शक्तिशाली कामयू टक्क्कजे लागि सूग्देबे, परमेश्वरजे सार्या चीदे-चीदे बोङ्बे के केन् योन्देबे पारा पूत्दे,
38 #
भजनसंग्रह 118:26
“परमप्रभुजे मीन्ने रब मूरुम् असी प्रेब क्यूस्स्य। स्वर्गने शान्ति क्यूस्स्य मेस्ये पात्ताफ्याजे स्वर्गने महिमा क्यूस्स्य।”
39होर्दे मीहुल अन्द्रने ख्यब फरिसीयूदे येशूने यदे, “गुरु, नैजे स्यूस्स्यायूने फ्राचीपी।”
40तर येशूदे यदे, “ङ नमयूने यीय, थमयू पारा अम्पूत्दे यलो लूङ्यूये पारापूक्य।”
41होर्दे येशू सहर ट्याने फ्योरब ङूदे यरूशलेम तङ्दे मेस्ये हम्बजे लागि ङू ङूदे, 42“शान्ति कम्ब पोदे रेक्क्य यदेबे नदे दीनी स्येलो क्यूर ख्यङ्दे! तर नैजे म्यादे हम्ब पोयू तङ अन्ख्व क्यूरे ख्यङ्! 43चेनेयलो नैफ्याने येर दिन रीय, होर्दे नैजे शत्रुयूदे नैजे ख्यूरीरी फूङ्क्यूत्देबे घेर लैदीय, मेस्ये का-मुलुकदेने नने थून्दीय। 44थमयूदे नने होर्दे न नङ्ने बास चेब नैजे छगूम्-पूर्गूम्ने सने छ्यर् तप्पीय, लूङ्त्या फ्याने सूजो लूङ्ये पङ्गीस्ये त्वो। चेनेयलो नदे रङ्से फ्याने ख्यब परमेश्वरजे कृपा चीत्देबे लेब बील सेअङ्खू।”
येशू मन्दिर नङ्ने
मत्ती २१:१२-१७; मर्कूस ११:१५-१९; यूहन्ना २:१३-१६
45होर्दे येशू मन्दिर नङ्ने गीलीदे मेस्ये छोङ् चीन्नबयूने योम्पीदे, 46#यशैया 56:7; यर्मिया 7:11मेस्ये थमयूने यदे, “धर्मशास्त्रने लिख्दीये ख्यङ्, ‘ङैजे कीम् प्रार्थनाजे कीम् क्यूक्क्य,’ तर नमयूदेब अम्बने डाँकूयूजे अड्ड बन्दे ख्यङ्।”
47 #
लूका 21:37
येशूदे येतार्ने मन्दिरने शिक्षा पीन्न ख्य। तर पूस्र्या केन्यू, पन्डेयू मेस्ये तजे मीकेन्यूदे ङूने से मैख्य। 48थमयूदे येशूने सेब उपाय तीत्याये प्रेअङ्खू, चेनेयलो मीयू क्वादेने ङूजे पो सेम् पर्दे ख्य।
Currently Selected:
लूका 19: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
