यूहन्ना 18
18
येशू ङ्येप्कब
मत्ती २६:४७-५६; मर्कूस १४:४३-५०; लूका २२:४७-५३
1अम्ब पो यजेनङ्येदे येशू रङ्से स्यूस्स्यायूप्रे किद्रोन खोल्सजे तीप्ल्याने गीलीदे। हैयाने बगैँचा त्या ख्य। येशू रङ्से स्यूस्स्यायूप्रे हैयाने गीलीदे। 2येशू ङ्येबने साक्तीमेब यहूदादेये हम्ब ने स्ये ख्य, चेनेयलो येशू रङ्से स्यूस्स्यायूप्रे हैयाने खूम्मेस्येने प्रलीम् चीन्न ख्य। 3होर्दे बत्ती, मीदङ् नैन्देबे, लास्यायू टेल्देबे सिपाईयू हुल त्या मेस्ये पूस्र्या केन्यूप्रे फरिसीयूदे कूल्बेब सीन्त्रीयू स्योल्देबे यहूदा हैयाने रदे।
4होर्दे रङ्से फ्याने च क्यूट्टमे ख्य हम्ब साप्ता पो स्येदेबे येशू खूम्तेले रदे, मेस्ये थमयूने यदे, “नमयू सूने मेल?”
5थमयूदे ङूने यदे, “नासरतजे येशूने।”
येशूदे थमयूने यदे, “हम्ब ङ ख्यङ्।” मेस्ये ङूने चूङ्स्ये पीनब यहूदाये थमयूप्रे मेर्न ख्य। 6कन्छ्वाब येशूदे थमयूने, “हम्ब ङ न” यदे, हन्छ्वाब थमयू क्वाने ङ्यलम् सर्दीइ, होर्दे च्येने री-फोली।
7फेरि ङूदे थमयूने लोत्दे, “नमयू सूने मल?”
थमयूदे यदे, “नासरतजे येशूने।”
8येशूदे जवाफ पीन्दे, “ङैदे नमयूने येकदे, ङ ङू ख्यङ्। कादेये नमयूदे ङैने मल्न ख्यङ् यलो अम्ब बाँकी मीयूनेब प्रस्ये पीन्।”
9“नदे ङैने पीनब मीयू नङ्ने तीत्यात्यानेये ङैदे अम्मल्बी” यदेबे ङूदे यब वचन पूरा क्यूस्स्य यदेबे अम्ब क्यूत्दे।
10सिमोन पत्रुसदे रङ्सेजे तरवार स्य्वे प्योदेबे पूस्र्या केन्जे त्वोने केर् पूबीब हम्बजे स्येत्देयोर्जे ङ्यलम् न थै-प्रेपीदे। हम्ब त्वोजे मीन् माल्खस ख्य।
11 #
मत्ती 26:39; मर्कूस 14:36; लूका 22:42 येशूदे पत्रुसने यदे, “तरवार सीम्ने चङ्। पदे ङैजे लागि तयार चीतेब सकस्जे पीलदे ङ अन्थूङया?”
येशू हन्नास ट्याने कूतेब
12होर्दे ङ्येदे सिपाईयूजे हुल, थमयूजे कप्तान मेस्ये यहूदीयूजे सिपाईयूदे येशूने चूङ्देबे ख्यादे। 13थमयूदे पात्ता खूम् ङूने हन्नास ट्याने कूदीदे, ङू हम्ब बर्षजे पात्ता नङ्ने केन् पूस्र्या कैयाफाजे कीन् ख्य। 14#यूहन्ना 11:49,50‘मीयूजे लागि मीत्यात्या सीबब ज्य ख्यङ्’ यदेबे यहूदीयूने मोतो पीनब अम्ब कैयाफा ख्य।
पत्रुसदे पात्ता खूम् अन्स्ये यब
मत्ती २६:६९-७०; मर्कूस १४:६६-६८; लूका २२:५५-५७
15सिमोन पत्रुस मेस्ये येशूजे सूजो स्यूस्स्या त्या येशूजे ङ्ये-ङ्ये गीलीदे। हम्ब सूजो स्यूस्स्यादे पात्ता केन् पूस्र्या स्ये ख्य, मेस्ये येशूप्रे पात्ता केन् पूस्र्याजे य्वेसेमेने गीलीदे।
16तर पत्रुस ख्यो लजे फीने मेर्न ख्य। पात्ता केन् पूस्र्याने स्येब स्यूस्स्यादे फीने योङ्देबे ख्यो लने टूङब मदी पीचने यदेबे नङ्ने पत्रुस रेत्दे।
17होर्दे ख्योने टूङब हम्ब मदी पीचदे पत्रुसने यदे, “नैये अम्ब मीजे स्यूस्स्यायू नङ्जे मीत्या ते?”
ङूदे यदे, “ङ दी।”
18हैयाने टूङ्ब त्वोयू मेस्ये सीन्त्रीयू ख्यूर् मेर्देबे मी तूप्न ख्य, चेनेयलो खङ ख्य। होर्दे पत्रुस थमयूप्रे मेर्देबे मी तूप्दे।
पात्ता केन् पूस्र्यादे येशूने ल्वेब
मत्ती २६:५९-६६; मर्कूस १४:५५-६४; लूका २२:६६-७१
19होर्दे ङ्येदे पात्ता केन् पूस्र्यादे येशूने ङूजे शिक्षा मेस्ये स्यूस्स्यायूजे बारेने लोत्दे।
20येशूदे ङूने जवाफ पीन्दे, “ङैदे संसारजे खोत्तादेने तलाबे येक ख्यङ्। यहूदीयू क्वाने रूप् क्यूरब यहूदीयूजे सभा-कीम्ने मेस्ये मन्दिरने ङैदे येतार्ने शिक्षा पीन ख्यङ्। ङैदे नङ्सू चैत्याये अन्-य ख्यङ्। 21ङैने चेने ल्वे? ङैदे यब पो ङ्यीनब मीयूने ल्वे। ङैदे यब पोयू थमयूने था ख्यङ्।”
22येशूदे अम्ब पो येनूब ट्याने मेर्नब सीन्त्रीयू नङ्जे त्यादे येशूजे डम्बने ठरीदे मेस्ये यदे, “पात्ता केन् पूस्र्याने न येर ङूर् ल्वाया?”
23येशूदे हम्बने यदे, “कादेये ङैदे पो नोङ्ग ख्यङ् यलो हम्बजे गवाही ङैने पीन्, तर कादेये ङैदे चैपोये अन्नोङ्गलो चेने ङैने ठरे?” 24होर्दे पात्ता केन् पूस्र्या कैयाफा ट्याने हन्नासदे येशू केरे ख्याये ख्य होरेने कूल्बीदे।
पत्रुसदे फेरि येशूने अन्स्ये यब
मत्ती २६:७१-७५; मर्कूस १४:६९-७२; लूका २२:५८-६२
25सिमोन पत्रुस मेर्देबे मी तूप्न ख्य। होने मी तूप्नब मीयूदे ङूने यदे, “येशूजे स्यूस्स्यायू नङ्जे नैये ङूजे स्यूस्स्या ते?”
पत्रुसदे यदे, “ङ दी।”
26होने पत्रुसदे ङ्येलम न प्रेबेब मीजे रङ्से मीये ख्य, ङूब पात्ता केन् पूस्र्याजे त्वोयू नङ्जेने त्या ख्य, हम्बदे लोत्दे, “ङैदे न बगैँचाने ङूप्रे तङब ते या?” 27होर्दे फेरि पत्रुसदे दी यदे, मेस्ये हन्छ्वाबने कप ठ्वादे।
पिलातसजे खूम्ने येशू
मत्ती २७:१-२,११-१४; मर्कूस १५:१-५; लूका २३:१-५
28होर्दे नप्मून्देने थमयूदे कैयाफाजे कीम्दे रोमी हाकिम केन्जे दरबारतेले येशूने कूदीदे। अशुद्ध क्यूत्देबे निस्तार दीन्बरने भात्यार् च अम्प्रे क्यूप्पीयी च यदेबे फदे मेस्ये हाकिम केन्जे दरबार नङ्ने अन्क्योइ। 29होरेक्यूत्देबे थमयू ट्याने पिलातस फीने योङ्रदेबे यदे, “अम्ब मीजे विरुद्धने नमयू चै दोष लैदेमे?”
30थमयूदे ङूने यदे, “कादेये अम्ब मी अपराधी तेयलो ङीदे नै ट्याने रेने अन्डे ख्यङ्दे।”
31पिलातसदे थमयूने यदे, “अम्ब मीने नमयूदे कूब, मेस्ये नमयू रङ्सेजे नियम अनुसार ङूजे न्याय ची।”
यहूदीयूदे यदे, “ङीदे मीने प्राण दण्ड पीनब हक त्वो।” 32#यूहन्ना 3:14; 12:32कम्ब तर्तीप्दे ङू सीब पर्दे यदेबे यप्त्या चेने ङूदे यब वचन पूरा क्यूरने येरे क्यूत्दे।
33पिलातस फेरि दरबार नङ्ने क्योयीदे मेस्ये ङूदे येशूने कोदेबे यदे, “न यहूदीयूजे मूरूम् औ।”
34येशूदे जवाफ पीन्दे, “ङैजे बारेने न रङ्सेदेने ल्वे, यी नने सूजो मीदे स्य्वे?”
35पिलातसदे जवाफ पीन्दे, “नदे ङ यहूदी मन औ? नैजे रङ्से मीयूदे मेस्ये पूस्र्या केन्यूदे नने ङैजे लाने सूम्दीपीदे। नदे च चीक्क?”
36येशूदे जवाफ पीन्दे, “ङैजे राज्य अम्ब संसारजे राज्यप्र दी। ङैजे राज्य अम्ब संसारजे राज्ययूप्र यलो ङैजे ङ्ये-ङ्ये प्रब मीयूदे ङ यहूदीयूजे लाने पर्दीप्रने यदेबे जीङ्र ख्यङ्दे। तर ङैजे राज्य होर दी।”
37पिलातसदे ङूने लोत्दे, “न यहूदीयूजे मूरूमयलो रङ्सेने जूक्ती?”
येशूदे जवाफ पीन्दे, “ङ मूरुम् ख्यङ् यदेबे नदेने येन ख्यङ्, अम्बजे लागि ङ जन्मीदे ख्यङ् मेस्ये सत्यजे गवाही तनने ङ अम्ब संसारने र ख्यङ्। सत्य सेम् पर्देब मीयू क्वादेने ङैजे पोने ङ्यीन्क्य।”
38पिलातसदे ङूने लोत्दे, “सत्य यब च?” येरे यदेबे पिलातस फीने यहूदीयू ट्याने योङ्गीदे, मेस्ये थमयूने यदे, “ङैदे ङूजे दोष चैत्याये अम्प्रे। 39ङैदे निस्तार दीनबरने नमयूजे लागि मी त्या क्याबे पर्देब नमयूजे छ्यप् ख्यङ्। नमयू च सेम् पर्तीय, यहूदीयूजे मूरुम्ने क्यापीदा?”
40तर थमयूदे फेरि येरे यदेबे पारा पूत्दे, “अम्बने दी, तर बारब्बाने क्यापी।” बारब्बा ब डाँकू ख्य।
Currently Selected:
यूहन्ना 18: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
