यूहन्ना 13
13
येशूदे रङ्से स्यूस्स्यायूजे तोप् ठूमेब
1निस्तार दीन्बरजे खूम् अम्ब संसार पोङ्गीदेबे प ट्याने प्रब बील फ्योर्दे यब पो येशूदे था प्रेत्दे, होर्दे ङूने विश्वास चेब संसारने ख्यब रङ्सेजे क्वानेने प्रेम चीत्देबे रङ्से सीब बीलसेमेने ङूदे थमयूने प्रेम चीत्दे।
2होर्दे नूस्यूङ्जे कङ् च बीलने शैतानदे सिमोनजे च यहूदा इस्करियोतने येशू ङ्येप्से पीनब सेम् खूम्ने पूमीक ख्य। 3पदे साप्ता थोकने येशूजे लाने पीन्क ख्यङ्, मेस्ये ङू परमेश्वरदे कूल्बीदे र ख्यङ्, होर्दे परमेश्वरतेलेने प्रेन ख्यङ् यब पो येशूदे स्ये ख्य। 4होर्दे चसे चेनब नेदे येशू लङ्दे मेस्ये ङूदे ह्वेब फीजे रेङ कोला प्यङ्देबे येत्दे मेस्ये तौल्यात्या रङ्सेजे ढप्ने ख्यादे। 5होर्देङ्येदे ङूदे टप्पने क्यू फैन्दे, मेस्ये स्यूस्स्यायूजे तोप् ठूकीदे, होर्दे रङ्सेदे ख्यायेब तौल्यादे थमयूजे तोप् फील्मीलीम् चीत्दे।
6कन्छ्वाब ङू सिमोन पत्रुस ट्याने फ्योरदे, हम्बदे येशूने यदे, “प्रभु, नदे ङैजे तोप् ठ्वमेया?”
7येशूदे ङूने यदे, “ङ च चीन्न ख्यङ् चूजो नदे अन्स्ये, तर ङ्येदे कोय।”
8पत्रुसदे ङूने यदे, “नदे ङैजे तोप् कलङ्बेये ठ्व अन्क्यूर्।” येशूदे ङूने जवाफ पीन्दे, “ङैदे अन्ठूमीलो नैजे ङैप्रे चै भाये क्यूस्से त्वो।”
9सिमोन पत्रुसदे ङूने यदे, “ओ प्रभु, ङैजे तोप् त्या दी, तर ङैजे लाप्रे ट-सजने ठूमी।”
10येशूदे ङूने यदे, “ठूकब मीने तोप्त्या ठूमेमेस्ये सूजो चैये ठूमे अम्पर्दी, हम्ब ङ्व क्वाने शुद्ध क्यूक्क ख्यङ्। होर्दे नमयू शुद्ध क्यूक्क ख्यङ्, तर क्वाने ब दी।” 11चेनेयलो ङूने धोका पीनबने ङूदे स्ये ख्य। येरेक्यूत्देबे ङूदे य ख्यङ्, “नमयू क्वाने शुद्ध त्वो।”
12 #
लूका 22:27
थमयूजे तोप् ठूमे ङ्येदे रङ्सेदे ह्वेब फीजे रेङ कोला होत्देबे ङू फेरि टूङ्दे। होर्दे ङूदे थमयूने यदे, “ङैदे नमयूने च चीम्मीदे नमयूदे कोदा? 13नमयू ङैने गुरुज्यू मेस्ये प्रभु य ख्यङ्, हम्ब नमयूदे तम्दम्ने यदे, चेनेयलो ङ हम्बने ख्यङ्। 14कादेये ङ नमयूजे प्रभुप्रे गुरु क्यूत्देबेये नमयूजे तोप् ठूमे ख्यङ् यलो नमयूदेये त्यादे त्याजे तोप् ठ्व पर्दीय, 15चेनेयलो ङैदे नमयूने नमूनात्या पीन ख्यङ्, मेस्ये ङैदे नमयूने च चीम्मीदे नमयूदेये होरप्रने ची। 16#मत्ती 10:24; लूका 6:40; यूहन्ना 15:20तम्दम्ने ङ नमयूने यीय, त्वो रङ्सेजे मालिक यली केन् अन्क्यूर्, होर्दे खबर कूबब मी खबर चङ्बेब मी यली केन् अन्क्यूर्। 17कादेये नमयूदे अम्ब पो स्येदेबे हम्ब चीत्देयलो नमयूदे असी प्रेक्क्य।
येशूदे रङ्से ङ्येप्रब पो क्यूर खूम्ने स्य्वेब
मत्ती २६:२०-२५; मर्कूस १४:१७-२१; लूका २२:२१-२३
18 #
भजनसंग्रह 41:9
“ङैदे येनब पो नमयू क्वानेने य दी, ङैदे सूने सेल ख्य ङूने ङैदे स्ये ख्यङ्। तर धर्मशास्त्र पूरा क्यूस्स्य यदेबे अम्ब क्यूत्दे, यी ङैप्रेने क्यङ् चबदे ङैफ्यानेने रङ्सेजे त्वाक्के लङ्दे।”
19“अम्ब क्यूरयली खूम् चूजोने ङ नमयूने यीय, चेनेयलो कन्छ्वाब हम्ब क्यूट्टीय, नमयूदे ङ ङू टूङ् यदेबे विश्वास चे खूस्य। 20#मत्ती 10:40; मर्कूस 9:37; लूका 9:48; 10:16तम्दम्ने ङ नमयूने यीय, ‘सूने ङैदे कूल्बीय, ङूने ग्रहण चीत्देयलो हम्बदे ङैने ग्रहण चेब क्यूक्क्य, होर्दे ङैने ग्रहण चेबदे ङैने कूल्बेबने ग्रहण चेब क्यूक्क्य।”
21अम्ब पो येक जेनमेस्ये येशूजे सेम् ठोदे मेस्ये चेलाबे येमीदे, “तम्दम्ने ङ नमयूने यीय, नमयू नङ्जे त्यादे ङैने ङ्येप्से पीन्क्य।”
22ङूदे सूजे बारेने पो चे यी यदेबे स्यूस्स्यायू आ थोम्दे मेस्ये त्यादे त्याने तीले-छोले चीत्दे। 23स्यूस्स्यायू नङ्ने येशूदे सोरो छेब स्यूस्स्या त्याब येशूजे गूने केन्देबे टून ख्य। 24होर्दे सिमोन पत्रुसदे ङूने लतप् चीत्देबे लोत्दे, “ङूदे यब अम्ब पो सूने यमे स्व?”
25होरेने येशूजे गूने केन्देबे टूनबदे येशूने लोत्दे, “प्रभु हम्ब सू ख्यङ्?”
26येशूदे जवाफ पीन्दे, “सूने ङ क्यङ्जे नत्या प्रदेबे पीलने नूक्देबे पीन्क्य, हम्बने ङू ख्यङ्।” होर्दे क्यङ्जे नत्या प्रदेबे नूक्दे, मेस्ये हम्ब सिमोनजे च यहूदा इस्करियोतने पीन्दे। 27क्यङ्जे नत्या चैक ङ्येदे शैतान ङू नङ्ने क्योइ।
होर्दे येशूदे ङूने यदे, “नदे च चेमे ख्यङ्, हम्ब च्योर्लाबे ची।” 28तर येशूदे ङूने चेने येर यदे यब पो चसे चने टूनबयू सूदेये अङ्को। 29यहूदाप्रे नोर्जे थैली ख्य, होरेक्यूत्देबे येशूदे ङूने दीन्बरने चैतेब सेयू कीन्स्य, या ङूदे दूख्प्रेबयूने चत्या पीन्स्य य यीच यदेबे कोइ कोइदे यर मन्दे। 30होर्दे क्यङ्जे नत्या च-जेङ्क ङ्येदे यहूदा इस्करोयोत च्योर्लाबे फीने योङ्गी हन्छ्वाब मून् क्यूरे ख्य।
पत्रुसदे दी यदेबे यीय यब पो येशूदे खूम्ने यब
मत्ती २६:३१-३५; मर्कूस १४:२७-३१; लूका २२:३१-३४
31कन्छ्वाब ङू फीने योङ्गी हन्छ्वाब येशूदे यदे, “जेम्से मीजे चजे महिमा क्यूक्क ख्यङ्, मेस्ये ङू फ्याने परमेश्वरजे महिमा क्यूक्क ख्यङ्। 32कादेये परमेश्वरजे महिमा ङू फ्याने क्यूक्क ख्यङ् यलो परमेश्वर रङ्सेदेये ङूने महिमा चीम्मीय, होर्दे ङूने च्योर्लाबे महिमा पीन्क्य।
33 #
यूहन्ना 7:34
“पीच चीदयू खात्यात्या ङ नमयूप्रे क्यूक्क्य। नमयूदे ङैने मेल्क्य, मेस्ये ङैदे यहूदीयूने केरे येये ख्य, जेम्से ङ नमयूनेये यीय, ‘ङ केने प्रेन ख्यङ्, होने नमयू र खूस्ये त्वो।’
34 #
यूहन्ना 15:12,17; १ यूहन्ना 3:23; २ यूहन्ना 1:5 “ङ नमयूने आज्ञा सर् त्या पीन्क्य: नमयू त्यादे त्याने प्रेम ची। नमयूप्रे ङैदे कर प्रेम चीत्दे, होरप्रने नमयूदेये त्यादे त्याने प्रेम ची। 35कादेये नमयूदे त्यादे त्याने प्रेम चील्लो, हम्ब कामदेने नमयू ङैजे स्यूस्स्यायू टूङ् यदेबे क्वादेने था प्रेक्क्य।”
36सिमोन पत्रुसदे यदे, “ओ प्रभु, न केने प्रमे स्व?”
येशूदे जवाफ पीन्दे, “ङ केने प्रेन ख्यङ् न चूजो ङैजे ङ्ये-ङ्ये र अन्खू।” तर ङ्येदे ब न ङै ङ्ये-ङ्ये र खूइय।
37पत्रुसदे ङूने यदे, “प्रभु, चूजो ङ चेने नै ङ्ये-ङ्ये र अङ्ख्व? नैजे लागि ङ रङ्सेजे प्राण पीन्क्य।”
38येशूदे जवाफ पीन्दे, “नदे रङ्सेजे प्राण ङैजे लागि पीन्क्य य औ? तम्दम्ने ङ नने यीय, नदे ङैने सोम्फेसेमे अन्स्ये अन्-यदासेमे कप ठ्वास्ये त्वो।”
Currently Selected:
यूहन्ना 13: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
