यूहन्ना 12
12
बेथानियाने येशू
मत्ती २६:६-१३; मर्कूस १४:३-९
1निस्तार-दीन्बर यली र्वायाखूम् येशू बेथानियाने रदे। सीये ङ्येदेये येशूदे सोम्बो चीम्मेब लाजरस हम्ब नेने टूङ ख्य। 2नूस्यूङ्दे ङू चब कङ्-ङू थमयूदे हैयाने य्व-छ्व चीत्दे। मार्थादे चसे ह्वोदेबे पीन काम चे ख्य, होर्दे येशूप्रे चसे चने टूनबयू नङ्ने लाजरसये त्या ख्य। 3#लूका 7:37,38होर्दे मरियमदे सोरो कूम लू पर्देबे जटामसीजे बस्न रब अत्तर आधा लिटरलाप्र रेत्देबे येशूजे तोप्ने छेल्मीदे, मेस्ये ङूजे तोप् रङ्सेजे ट फूदे फील्मीदे, होर्दे हम्ब अत्तरजे बस्नदे कीम् फ्यादे।
4तर येशूजे स्यूस्स्यायू नङ्जे त्यादे या ङूने धोका पीनब यहूदा इस्करियोतदे यदे, 5“अम्ब बस्न रब अत्तर सै सोम् चाँदीजे मन्द्रामूलीने सोङ्देबे हम्ब मन्द्रामूली दूख्प्रेयूने पीन्लो अन्क्यूरया?” 6तर ङूदे दूख्प्रेयूजे ख्याल् चीत्देबे अम्ब पो य ते ख्य, चेनेयलो ङू खूमान् ख्य, मेस्ये नोर्जे थैली ङूदे ये ख्य, हैयादे ङूदे खूलीम् चे ख्य।
7येशूदे यदे, “अम्बने चै अन्-यलाची, ङ सीबदे बोपब दिनजे लागि अम्बदे येरेने तयार चे ख्यङ्। 8#व्यवस्था 15:11दूख्प्रेयू ब येतार्ने नमयूप्रेने ख्यङ्, तर ङ नमयूप्रे येतार्ने क्यूस्से त्वो।”
9यहूदीयूजे हुल केन् त्यादे येशू हैयाने ख्यङ् यब था प्रेत्देबे येशूने त्यामे दी, तर ङूदे सीइदेबे फेरि सोम्बो चीम्मेब लाजरसनेये लेने थमयू हैयाने र ख्य। 10होरेक्यूत्देबे पूस्र्या केन्यूदे लाजरसनेये सेब मोतो चीत्दे। 11चेनेयलो लाजरस सीइदेबे फेरि सोम्बो क्यूरबदे यहूदीयू नङ्जे कूम स्यादेबे गीलीब यहूदीयूदे येशू फ्याने विश्वास चेमे ख्य।
यरूशलेमने येशू गीलेब
मत्ती २१:१-११; मर्कूस ११:१-११; लूका १९:२८-४०
12नैदेरेदे दीन्बर मन्देने रब मी हुल केन्दे येशू यरूशलेमने रेन ख्यङ् यब तदे,
13 #
भजनसंग्रह 118:25,26 मेस्ये मीयूदे खजूर तोङ्बोजे हाँगायू टेल्देबे येशूने स्वागत चेने पारा पूत्देबे योङ्रदे, “होसन्ना! परमप्रभुजे मीन्ने रब इस्राएलजे मूरुम्ने असी पीन्स्य!”
14होर्दे प क्यूरब गधाजे केन् पीचत्या तूदेबे येशू हम्ब फ्याने टदे, धर्मशास्त्रने येरे लिख्दीये ख्यङ्,
15 #
जकरिया 9:9
“सियोनजे चीमी, अम्फलाची।
ले, नैजे मूरुम् प क्यूरब गधाजे केन् पीचत्या फ्याने टदेबे रेन ख्यङ्।”
16ङूजे स्यूस्स्यायूदे अम्ब पोयू हन्छ्वाब अङ्को। तर येशू स्वर्गजे महिमाने गीले ङ्येदे अम्ब पोयू येशूजे बारेने लिख्दीये टूङ् मेस्ये अम्ब काम थमयूदे ङूजे लागि चे टूङ् यदेबे स्यूस्स्यायूदे ह्वेरदे।
17ङूदे सीयेब लाजरसने खङ्सदे कोदेबे सोम्बो चीप्प ङूप्रे ख्यब मीयू हुलदे येशूजे गवाही पीन्नूदे। 18ङूदे अम्ब हार्मन्देब काम चे ख्य यब तदेबेये मी हुल ङूने त्वने गीले ख्य। 19हन्छ्वाब फरिसीयू त्यादे त्याने यदे, “ले, ङीनयूदे चैये चे अङ्खू। ले-ले, संसारजे मीयू क्वाने ङूजे ङ्ये-ङ्ये प्र क्यूरी!”
येशूदे रङ्से सीबब पो खूम्ने यब
20दीन्बर क्यूप्प परमेश्वर पूस्तेने प्रबयू नङ्ने कोइ कोइ ब ग्रीकयूये ख्य। 21थमयू गालीलजे बेथसेदा यब नेने टूङब फिलिप ट्याने रदे मेस्ये येरे यदेबे बिन्ती चीत्दे, “अँ, ङी येशूने तूतीङ् र ख्यङ्।” 22फिलिप गीलीदेबे आन्द्रियासने यदे, मेस्ये आन्द्रियास मेस्ये फिलिप गीलीदेबे येशूने यदे।
23येशूदे थमयूने यदे, “मीजे चजे महिमा क्यूरब बील फ्योर ख्यङ्। 24तम्दम्ने, ङ नमयूने यीय, ह्वजे ल सने पर्तीदे अन्सीबदा हम्ब तीत्यात्या क्यूक्क्य। तर हम्ब सीबदेयलो हम्बदे कूम फल पीन्क्य। 25#मत्ती 10:39; 16:25; मर्कूस 8:35; लूका 9:24; 17:33रङ्सेजे प्राणने माया चेब मीदे हम्ब मल्गीय, तर अम्ब संसारने टूङ्दा रङ्से प्राणने ह्यल चेब मीदे कलङ्बेये अन्सीबब जीयाप्रेने रङ्से प्राण जूक्तीदे येक्क्य। 26सूमीदे ङैजे सेवा चीक्क्य हम्ब ङै ङ्ये ङ्ये रस्य, मेस्ये ङ केने क्यूक्क्य, ङैजे सेवा चेबये होनेने क्यूक्क्य। सूदे ङैजे सेवा चीक्क्य पदे ङूने गेसेन् चीक्क्य।
27“जेम्से ङैजे सेम् सोरो ठ्व ख्यङ्, मेस्ये ङैने था त्वो ङ च य स्व? ‘ओ प, ङै फ्याने रमेल्नब अम्ब सकस् हर्दीमी यदेबे य औ?’ दी तर अम्ब सकस् प्लेनेके ङ अनेसेमे फ्योर ख्यङ्। 28ओ प, नैजे मीन्जे महिमा क्यूस्स्ये पीन्।” होर्दे स्वर्गदे येर केत्या तैरदे, “ङैदे हम्ब महिमा चे ख्यङ्, मेस्ये फेरि चीक्क्य।” 29हैयाने मेर्नब मी हुलदे अम्ब तदेबे यदे, “अम्ब मू गर्जेदे ख्यङ् सूजोयूदे यदे, “स्वर्गदूत ङूप्रे क्यम ख्यङ्!”
30येशूदे जवाफ पीन्दे, “अम्ब केदे ङैने य दी, तर नमयूने य ख्यङ्। 31जेम्से अम्ब संसारजे न्याय क्यूक्क्य। अम्ब संसारजे हुकुम चील्लेब फीने छाबीय। 32होर्दे कन्छ्वाब पृथ्वीदे ङ त्वो लङ्क्य, ङ मीयू क्वानेने ङैतेले थेन्टीय।” 33ङू कर तर्तीप्दे सीबीय, हम्ब पोजे यप्त्या चेने ङूदे येरे येक ख्य।
34 #
भजनसंग्रह 110:4; यशैया 9:7; इजकिएल 37:25; दानिएल 7:14 मी हुलदे ङूने लोत्दे, “ख्रीष्ट कलङ्नेयली टूनीय यदेबे मोशादे लिख्देब नियमने छ्योप्प ङीदे त ख्यङ्। नदे केर्बे य खूइय, मीजे च तो लङने पर्तीय? अम्ब मीजे च यब सू ख्यङ्?”
35येशूदे थमयूने यदे, “अझ तम्त्यासेमे ओथ्याङ् नमयूप्रे ख्यङ्। ओथ्याङ् नमयूप्रे ख्यङ्दा र-प्र ची, कादेये मून्दूङ्दे नमयूने अङ् उप्कस्य। कोइ मून्दूङ्ने र-प्र चील्लो, हम्बदे रङ्से केने प्रेन ख्यङ् यदेबे था अम्प्रे। 36कन्छ्वासेमे ओथ्याङ् नमयूप्रे ख्यङ् हम्ब ओथ्याङ्ने विश्वास ची, मेस्ये नमयू ओथ्याङ्जे छगूम्-पूर्गूम् क्यूर खूस्य।” अम्ब पो येक जेन ङ्येदे, येशू हैयादे गीली, मेस्ये थमयूदे अन्तङ्स्य यदेबे छ्यूप्दे।
37ङूदे थमयूजे खूम्ने अन्छ्वा कूम हार्मन्देब कामयू चीम्मे ख्य, होरेक्यूल्लीने थमयूदे ङू फ्याने विश्वास अन्ची। 38#यशैया 53:1यशैया अगमवक्ताजे वचन पूरा क्यूरने पर्दे ख्य।
“हे परमप्रभु, ङीदे यब पोने सूदे विश्वास चीत्दे? होर्दे परमप्रभुदे चेब शक्तिजे काम सूने तम्मीदे?”
39येरेक्यूत्देबे थमयूदे विश्वास चे अन्खू, चेनेयलो यशैयादे फेरि येरे येये ख्यङ्,
40 #
यशैया 6:10
“ङूदे थमयूजे म्या अन्तङ चीप्पे ख्यङ्, मेस्ये थमयूजे सेम् सोरो कोङ चीप्पे ख्यङ्,
येरे थमयूजे म्यादे अन्तङ्स्य, होर्दे सेम्दे अङ्कोस्य, नत्र थमयू ङै ट्याने ल्वारीय मेस्ये थमयूने तम् चीम्मे पर्तीय।”
41यशैयादे अम्ब पो यदे, चेनेयलो यशैयादे ङूजे महिमा तङ्दे, मेस्ये ङूजे बारेने यदे।
42येरेक्यूल्लीने हुकुम चील्लेब यहूदी मीयू नङ्ने कूमदे ङू फ्याने विश्वास चीत्दे,’ तर सभा-कीम्दे योम्बीय मन्देबे थमयू फरिसीयूप्रे फदे होरेक्यूत्देबे थमयूदे चेब विश्वास सूनेये अन्स्य्वे। 43चेनेयलो परमेश्वरजे सार्या चेयली मीयूदे चेब सार्या थमयूदे कूम सेम् पर्दे ख्य।
44येशूदे के केन् योन्देबे यदे, “ङैने विश्वास चेब मीदे ङैने दी, तर ङैने कूल्बेब फ्याने विश्वास चेब क्यूक्क्य। 45सूदे ङैने तङ्क्य, हम्ब मीदे ङैने कूल्बेबने तङ्क्य। 46ङै फ्याने विश्वास चेब मीयू मून्दूङ्ने अन्क्यूस्स्य यदेबे ङ संसारने ओथ्याङ् पीनब क्यूत्देबे र ख्यङ्,
47“कोइदे ङैजे पो ङ्यीन्देबेये हम्ब पो अन्चलो, ङ हम्बजे न्याय अन्ची। चेनेयलो ङ संसारजे न्याय चेने र दी, तर संसारजे मीयूने जूक्तेमेने र ख्यङ्। 48सूदे ङैने विश्वास अन्ची मेस्ये ङैजे पो ग्रहण अन्ची होरयूने न्याय चेब त्या ख्यङ्। ङैदे चै पो यदे हम्ब पोदेने संसार नाश क्यूरब दिनने होरयूजे न्याय चीक्क्य। 49चेनेयलो ङैदे रङ्सेजे तर्फदे अन्क्यम्, तर ङैदे च य पर्दे मेस्ये ङैदे च क्यम पर्दे यदेबे ङैने कूल्बेब प रङ्सेदेने ङैने आज्ञा पीन ख्यङ्। 50ङैदे स्ये ख्यङ् ङूजे आज्ञादे कलङ्बेये अन्सीबब जीया पीन्क्य, येरेक्यूत्देबे पदे ङैने च यसेपीन्क्य हम्ब अनुसारने ङ यीय।”
Currently Selected:
यूहन्ना 12: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
