यूहन्ना 10
10
येशू सोरो ज्य प्रङ्ब
1“तम्दम्ने ङ नमयूने यीय, सू सोम्प्रङ्जे ख्योदे नङ्ने अन्क्योर, तर सूजो नेदे टदेबे नङ्ने क्योरीय, हम्ब खूमान् मेस्ये डाँकू क्यूक्क्य। 2तर ख्योदे क्योरब मी सोम्प्रङ्ब ख्यङ्। 3ख्योने टूनब सीन्त्रीदे ङूजे प्रङ्बजे लागि ख्यो पूक्मीय, मेस्ये स्वान्यूदे ङूजे के ङ्यीन्क्य, होर्दे ङूदे रङ्से स्वान्यूने मीन्दे कोय, होर्दे थमयू फीने कूबीय। 4कन्छ्वाब ङूदे ङूजे रङ्से स्वान्यू क्वाने फीने योन जेङ्क्य, ङू थमयूजे खूम्दे प्रीय, मेस्ये स्वान्यू ङूजे ङ्ये-ङ्ये प्रीय, चेनेयलो स्वान्यूदे ङूजे के स्येय। 5अन्चीन्तेब मी ङ्ये-ङ्ये स्वान्यू प्रस्ये त्वो, तर हम्ब तङ्देबे छ्योङ्बीय। चेनेयलो सर् मीजे के थमयूदे अन्स्ये।” 6येशूदे थमयूने अम्ब उखान यदे, तर ङूदे थमयूने यब पो थमयूदे अङ्को।
7येरेक्यूत्देबे येशूदे थमयूने फेरि यदे, “तम्दम्ने ङ नमयूने यीय, स्वान्यूजे ख्यो ङ ख्यङ्। 8ङ यली खूम् रब मीयू क्वाने खूमान् मेस्ये डाँकूयू ख्यङ्, तर स्वान्यूदे हम्बयूजे पो अन्ङ्यीन्। 9प्रङ्जे ख्यो प्र ङ ख्यङ् कादेये कोइमी अम्ब ख्यो क्यूत्देबे नङ्ने क्योबदेयलो हम्ब बच्दीय, मेस्ये नङ्ने फीने प्र र चीक्क्य, होर्दे खर्कने रेम च प्रेक्क्य।
10“खूमान् ब ख्वने, सेने मेस्ये नाश चेने त्यामे रीय। ङ ब नमयूदे जीया प्रेस्स्य, मेस्ये हम्ब पूरा रुप्ने प्रेस्स्य यदेबे रदे। 11ङ सोरो ज्य प्रङ्ब ख्यङ्। सोरो ज्य प्रङ्बदे रङ्सेजे स्वान्यूजे लागि रङ्से ङ्वने पीन्क्य। 12स्वान् छने त्या येनब मीब रङ्से स्वान्यूजे प्रङ्बप्र दी। च्यूङ्कू रेनब तङ्देबे हम्बदे स्वान्यू क्वाने पोङ्गीदेबे छ्योङ्बीय, होर्दे च्यूङ्कूदे बगलने सेने नेन्डीय होर्दे स्वा-स्वा चीप्पीय। 13हम्ब छ्योङ्बीय, चेनेयलो ङू मेला पीन्देबे काम च्योलब मी ख्यङ्, ङूदे स्वान्जे चैये ख्याल अन्ची।
14 #
मत्ती 11:27; लूका 10:22 “ङ सोरो ज्य सोम्प्रङ्ब ख्यङ्, ङैदे रङ्सेजे स्वान्यू स्ये ख्यङ्, होर्दे ङैजे स्वान्यूदेये ङैने स्ये ख्यङ्। 15केर्बे पदे ङैने स्ये ख्यङ्, ङैदेये पने स्ये ख्यङ्, होर्दे ङ ङैजे स्वान्यूजे लागि ङैजे रङ्से ङ्वये पीन्क्य।
16“ङैजे सूजो स्वान् ख्यङ्, हम्ब अम्ब प्रङ्जे दी। हम्बयूनेये ङैदे रे पर्दे ख्यङ्, मेस्ये हम्बयूदे ङैजे के ङ्यीन्क्य, होर्दे ङैजे स्वान्यू क्वाने बगल त्या क्यूत्देबे थमयूजे प्रङ्ब तीत्या क्यूक्क्य। 17पदे ङैने प्रेम चीत्दे, चेनेयलो ङ रङ्सेजे प्राण फेरि ल्वामेब हिसाबदे पीन्क्य। 18सूदेये ङैजे प्राण कीन अन्खू, तर ङ रङ्सेजे इच्छादे रङ्सेजे प्राण पीन्क्य। रङ्सेजे प्राण पीनब हक ङैने ख्यङ्, होर्दे फेरि कीन ख्वब हकये ङैने ख्यङ्। अम्ब आज्ञा ङैजे पदे ङैने पीन ख्यङ्।”
19अम्ब वचनजे कारणदे यहूदीयूजे अन्द्रने फेरि अन्थून क्यूरी। 20कूम यहूदीयूदे यदे, “अम्ब मीने छेत् लादीक ख्यङ्, मेस्ये अम्ब पर क्यूरे ख्यङ्। नमयू अम्बजे पो चेने ङ्यीन्न?”
21सूजोयूदे यदे, “छेत् लादीकब मीजे पो येर अन्क्यूर्। छेत्दे म्या अन्तङब मीजे म्या तङ ख्व चीम्मे खूइय?”
यहूदीयूदे येशूने विश्वास अन्चेब
22सर्कमस्ने मन्दिर सूम्देब दीन्बर यरूशलेमने ख्य। 23येशू मन्दिर नङ्ने सोलोमनजे दोलेन्ने ट्वान ख्य। 24यहूदीयूदे ङूजे ती-छो फूङ् क्यूत्देबे लोत्दे, “कन्छ्वासेमे नदे ङीने अल्मल् चीन्न? न ख्रीष्ट ख्यङ् यलो ङीने चेलाबे येमी।”
25येशूदे थमयूने जवाफ पीन्दे, “ङैदे नमयूने येक ख्यङ्, तर नमयू विश्वास अन्ची। ङैजे पजे मीन्ने ङैदे चे काम चीत्दे, हम्ब कामदेने ङैजे गवाही पीन्क्य। 26तर नमयू विश्वास अन्ची, चेनेयलो नमयू ङैजे स्वान् बगलजे दी।
27“ङैजे स्वान्यूदे ङैजे के ङ्यीन्क्य, मेस्ये ङैदे हम्बयूने स्येय, होर्दे थमयू ङैजे ङ्ये-ङ्ये रीय। 28थमयूने ङ कलङ्बेये अन्सीबब जीया पीन्क्य, होर्दे थमयू कलङ्बेये नाश अन्क्यूप्प, मेस्ये थमयूने सूदेये ङैजे लादे लेन्के अन्खू। 29ङैजे पदे हम्ब ङैने पीन ख्यङ्: ङू पात्ता नङ्ने केन् ख्यङ्। थमयूने पजे लादे लेन्देबे सूदेये योन्गे अन्खू। 30प प्रे ङ त्या ख्यङ्।”
31यहूदीयूदे ङूने खान्देस्ये यदेबे फेरि लूङ् थादे। 32येशूदे थमयूने यदे, “ङैदे नमयूने ङैजे पदे पीनब सोरो ज्य काम चीम्मीदे, हम्ब कामयू नङ्ने कम्ब कामजे लागि नमयू ङैने लूङ्दे खान्दे मेल्न?”
33 #
लेवी 24:16
यहूदीयूदे ङूने जवाफ पीन्दे, “ङीदे नने सोरो ज्या कामजे लागि लूङ्दे खान्देमे दी, तर नदे परमेश्वरजे न प्वेब कारणदे, चेनेयलो न मी क्यूत्देबेये रङ्सेने परमेश्वर य ख्यङ्।”
34 #
भजनसंग्रह 82:6
येशूदे थमयूने जवाफ पीन्दे, “मोशाजे नियमने येरे लिख्दीये त्व औ स्व, ङैदे यदे, नमयू ‘देवयू ख्यङ्’?” 35कादेये कोइ ट्याने परमेश्वरजे वचन रदे, हम्बयूने ङूदे देवयू यदे, मेस्ये धर्मशास्त्र लूच्च क्यूर अन्खू, 36पदे पवित्र चीत्देबे संसारने कूल्बेब मीदे, ‘ङ परमेश्वरजे च ख्यङ्’ यदेबे यब केर्बे परमेश्वरजे न प्वेब क्यूक्क्य? 37कादेये ङैदे ङैजे पजे काम अन्चे ख्यङ् यलो ङै फ्याने विश्वास अन्चील्लाची। 38तर ङ कादेये पजे काम चीन्नूलीने नमयू ङैने विश्वास अन्चील्लो अम्ब कामयू फ्यानेब विश्वास ची, मेस्ये नमयूदे था प्रे खूइय मेस्ये क्व खूइय, यी प ङैप्रे ख्यङ् मेस्ये ङ पप्रे ख्यङ्।” 39हम्बयूदे फेरि ङूने चूङमेदे, तर ङू थमयूजे लादे प्लीनीदे।
40 #
यूहन्ना 1:28
होर्दे यर्दन होङ्जे तीप्ल्याने मालाङ् यूहन्नादे बप्तिस्मा पीनब नेने ङू गीलीदे, मेस्ये ङू हैयाने टूङ्दे। 41कूम मीयू ङू ट्याने रदे मेस्ये थमयूदे यदे, “यूहन्नादे चै चीन्नयूये अन्ची तर यूहन्नादे अम्ब मीजे बारेने चच य ख्य हम्ब तम्दम्ने टूङ्।” 42होर्दे हैयाने कूम मीदे ङूने विश्वास चीत्दे।
Currently Selected:
यूहन्ना 10: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
