मूल स्यूस्स्यायूजे कामजे किताब 8
8
मण्डलीने सतनम् मेस्ये थेप् क्यूरेब
1मीयूदे स्तिफनसने सेप्प शाऊलये मन्जुर क्यूर ख्य, हम्ब दिनने यरूशलेमने ख्यब मण्डलीजे विरुद्धने बेस्से केन् सतनम् सुरु क्यूत्दे, मूल स्यूस्स्यायू बाहेक थमयू क्वाने यहूदिया मेस्ये सामरियाजे नेतेले स्वा-स्वा क्यूरी। 2परमेश्वरजे डर येनब मीयूदे स्तिफनसने कूदीदेबे पोप्दे, मेस्ये ङूजे लागि बेस्से केन् रप् चीत्दे। 3#मूल स्यूस्स्यायूजे कामजे किताब 22:4,5; 26:9-11तर शाऊलदे कीम्-कीम्ने क्योदेबे मण्डली नाश चेने सुरु चीत्दे। ङूदे पती-मदीयूने कीम् नङ्दे फीने स्येन्देबे रेत्दे मेस्ये थमयूने झ्यालखानने स्य्वोप्सेपीन्दे।
फिलिप सामरियाने
4होर्दे हम्ब स्वा-स्वा थरेबदे का-मुलुकने गीलीदेबे वचन प्रचार चीत्दे। 5फिलिपदे सामरियाजे सहर त्याने गीलीदेबे थमयूने ख्रीष्टजे प्रचार चीत्दे। 6फिलिपदे यब वचन तदेबे होर्दे ङूदे चेब च्यूनूयू तङ्देबे, मी हुलदे ङूजे पो ध्यान् पीन्देबे ङ्यीन्दे। 7चेनेयलो अशुद्ध आत्मायू लादीकब कूम मीट्यादे के योन्देबे पारा पूदेपूदे हम्ब योङ्बीन ख्य, मेस्ये पक्षाघातजे कूम नवयू मेस्ये खोन्ड्याल्यायूये तम् चीम्मीदे। 8येर्बेने हम्ब सहरने सोरो आनन्द क्यूत्दे।
जादू तनब सिमोन
9सिमोन मीन् ख्यब मी त्या होने ख्य। ङूदे खूम्मेस्येने हम्ब सहरने जादू तन्देबे सामरियाजे मीयूने हार्मन्दीलाबे चीक्क ख्य, “मेस्ये ङू रङ्सेदेने रङ्से मी केन् ख्यङ् यदेबे मन ख्य। 10हम्ब मीने केन्देमेस्ये-चीदसेमेजे क्वादेने येरे यदेबे मन्दीदे, “अम्ब मी परमेश्वरजे हम्ब शक्ति ख्यङ्, हम्बने पात्ता केन् शक्ति यीय।” 11थमयूदे ङूने मन्दे ख्य, चेनेयलो मालङ्मेस्येने ङूदे रङ्सेजे जादूयू तन्देबे मीयूने छक्के पर्दीला चेख्य। 12तर कन्छ्वाब थमयूदे परमेश्वरजे राज्य मेस्ये येशू ख्रीष्टजे मीन्ने सूगब खबर स्य्वेब फिलिपजे पोने विश्वास चीत्दे। हन्छ्वाब पती मेस्ये मदीयूदे बप्तिस्मा कीन्दे। 13सिमोनदेये विश्वास चीत्देबे बप्तिस्मा कीन्दे। ङू फिलिपप्रे लादे ख्य, मेस्ये च्यूनूयू मेस्ये हार्मन्देब केन्-केन् काम चेब तङ्देबे ङू सोरो हार्मन्दीकदे।
14सामरियाजे मीयूदे परमेश्वरजे वचन ग्रहण चे ख्यङ् यब पो तदेबे यरूशलेमने ख्यब मूल स्यूस्स्यायूदे पत्रुस मेस्ये यूहन्नाने थमयू ट्याने कूल्बीदे। 15थम ङ्हीने हैयाने फ्योरमेस्ये थमयूदे पवित्र आत्मा प्रेस्स्य यदेबे थमयूजे लागि प्रार्थना चीत्दे। 16चेनेयलो हन्छ्वा बीलसेमे थमयूजे सू फ्यानेये पवित्र आत्मा अन्र ख्य। प्रभु येशूजे मीन्नेत्यामे थमयूजे बप्तिस्मा क्यूरे ख्य। 17पत्रुस मेस्ये यूहन्नादे रङ्से ला प्रभुने विश्वास चेब हम्ब मीयू फ्याने पूत्दे, मेस्ये थमयूदे पवित्र आत्मा प्रेत्दे।
18जेम्से मूल स्यूस्स्यायूदे ला पूमीब पवित्र आत्मा प्रेटूङ् यब था प्रेत्देबे सिमोनदे येरे यदेबे थमयूने नोर् पीनने रेत्दे, 19“ङैनेये अम्ब शक्ति स्ये, मेस्ये ङैदे सू-सूफ्याने ला पूक्क्य हम्बदे पवित्र आत्मा प्रेक्क्य।”
20तर पत्रुसदे यदे, “नैजे नोर् नैप्रेने नाश क्यूस्स्य, चेनेयलो नदे परमेश्वरजे बर नोर्दे कीन खूइय यब विचार चीत्दे। 21अम्बने नैजे चेये भाये त्वो, चैये कोमसये त्वो चेनेयलो परमेश्वरजे खूम्ने नैजे सेम् ज्य त्व टोङ्। 22जेम्से नैजे रङ्सेजे येर दुष्ट विचारजे लागि पश्चात्ताप ची मेस्ये प्रभुने प्रार्थना ची, मेस्ये नैजे सेम्जे येर विचारने कादेये क्षमा पीनये खूय। 23चेनेयलो ङैदे तङ्दे, नैजे सेम् टेप्र ख क्यूरे ख्यङ्, होर्दे दुष्टजे बन्धन्ने ख्यङ्।”
24होर्दे सिमोनदे यदे, “नमयूदेने ङैजे लागि प्रभुप्रे प्रार्थना चीम्मी, मेस्ये नमयूदे यब चै पोये ङैफ्याने अन्लादीस्य।”
25होर्दे थमयूदे गवाही पीन ङ्येदे मेस्ये प्रभुजे वचन स्य्वे जेन ङ्येदे सामरीयूजे कूम तयूने सूगब खबर प्रचार चीदे-चीदे थमयू यरूशलेम ल्वायीदे।
इथियोपियाजे पात्ता मी केन
26होर्दे ङ्येदे प्रभुजे दूत त्यादे फिलिपने यदे, “यरूशलेमदे गाजातेले प्रब दक्षिणतेलेजे लम्ने प्र। हैयाने मी अम्प्रब चनमन लम् ख्यङ्।” 27होर्दे फिलिप लङ्दे गीलीब इथियोपियाजे नपुंसक मी त्या तूदे, ङू इथियोपिया देशजे मूरूम् मदी कन्दाकीजे मी केन् मेस्ये सीर-सम्पत्तिजे हीसाब-किताब क्वाने लेब मी ख्य। ङू यरूशलेमजे मन्दिरने परमेश्वर पूस्तेने गीले ख्य। 28ङू ल्वारीन ख्य, मेस्ये रङ्से रथने टूङ्देबे यशैया अगमवक्ताजे किताब छ्योन्न ख्य। 29हन्छ्वाब पवित्र आत्मादे फिलिपने यदे, “प्रदेबे ङूजे रथने ट।”
30फिलिप ङू ट्याने ग्येयीदे, मेस्ये ङूदे यशैया अगमवक्ताजे किताब छ्योन्नब तङ्देबे ङूदे लोत्दे, “नदे छ्योन्नब किताबजे पो कोक्वा स्व?”
31होर्दे ङूदे यदे, “सूदेये अन्स्योल्लो ङैदे केर्बे क्व स्व?” होर्दे ङूदे फिलिपने ङूप्रे रथने टूङ्ने बिन्ती चीत्दे। 32#यशैया 53:7,8ङूदे छ्योन्नब धर्मशास्त्रजे खण्ड अम्ब ख्य,
“केर्बे स्वान् तूपने स्योल्गीय, या ल्वाजे प पी ख्वाब मीजे खूम्ने पारा अम्पूल्लाबे टूङ्क्य, होरप्रने ङूदे रङ्से ङूर् अम्पूक्।
33ङूने येर फत्या हेप्दीदे ङूदे न्याय अम्प्रे। ङूजे छगूम्-पूर्गूम्जे बयान सूदे चे? चेनेयलो ङूजे जीया पृथ्वीदे हर्दीबीदे।”
34होर्दे अम्ब नपुंसकदे फिलिपने यदे, “दया चीत्देबे अम्ब पो ङैने स्योम्मी, अगमवक्तादे अम्ब सूजे बारेने य ख्य, ङूजे रङ्सेजे बारेने यी सूजोजे बारेने?” 35होर्दे फिलिपदे रङ्से ङूर् पूक्देबे धर्मशास्त्रजे अम्ब खण्डदे ङूने येशूजे सूगब खबर स्योत्दे।
36होर्दे थमयू लम्ने प्रेनूब छीत्या क्यू ख्य नैत्याने फ्योरदे। हम्ब नपुंसकदे यदे, “ले, अने क्यू टूङ्, ङैने बप्तिस्मा पीनने चेदे रोक्ते खूइय?” 37[फिलिपदे यदे, “कादेये नैजे पूरा सेम्देने विश्वास चे ख्यङ्लो नदे बप्तिस्मा कीन खूइय।” ङूदे जवाफ पीन्दे “येशू ख्रीष्ट परमेश्वरजे च ख्यङ् यदेबे ङ विश्वास चीक्क्य।”]#८:३७ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्। 38ङूदे रथ रोक्ती यब आज्ञा पीन्दे, होर्दे फिलिप मेस्ये हम्ब नपुंसक ङ्हीने क्यू ख्यनेने तल्दे, मेस्ये ङूदे ङूने बप्तिस्मा पीन्दे। 39तर कन्छ्वाब थमयू क्यू नङ्दे फीने योङ्रदे, हन्छ्वाब प्रभुजे आत्मादे फिलिपने चूङ्दे कूदीदे, मेस्ये हम्ब नपुंसकदे फिलिप फेरि अन्तङ्, होर्दे ङू सूगे-सूगे रङ्से लम्ने गीलीदे। 40तर फिलिप अश्दोदने तङ्रदे, मेस्ये कैसरिया अम्फ्योइदासेमे सहरयूने सूगब-खबर स्योदे-स्योदे गीलीदे।
Currently Selected:
मूल स्यूस्स्यायूजे कामजे किताब 8: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
