मूल स्यूस्स्यायूजे कामजे किताब 4
4
पात्ता केन् सभाने पत्रुस मेस्ये यूहन्ना
1पत्रुस प्रे यूहन्ना मीयूप्रे क्यम्न ख्य, पूस्र्यायू, मन्दिरजे कप्तान मेस्ये सदुकीयू थमयूट्याने रदे। 2थमयू प्रो लङ्न ख्य, चेनेयलो येशूने क्यूत्देबे सीबलीने सोम्बो क्यूक्क्य यब पो थमयूदे मीयूने लोम्मीन ख्य मेस्ये तम्दम्ने ख्यङ् यदेबे येन ख्य। 3होर्दे थमयूदे अम्बयूने ङ्येब्दे, मेस्ये नैदेरेसेमेने झ्यालखानने येत्दे, चेनेयलो हम्ब दिनने स-रीप्के ख्य। 4तर वचन ङ्यीन्नयू नङ्ने कूमदे विश्वास चीत्दे, मेस्ये विश्वास चेब मीयू धेन्ने: हजार ङलाप्र क्यूत्दे।
5नैदेरेदे अम्बयूजे नेतायू, धर्म-गुरुयू प्रे पन्डेयू यरूशलेमने फूङ् क्यूर ख्य। 6पात्ता केन् पूस्र्या हन्नास, कैयाफा, यूहन्ना, अलेक्जेन्डर मेस्ये पूस्र्याजे म्हीती टक्कने हैयाने ख्य। 7थमयूदे पत्रुस मेस्ये यूहन्नाने थमयूजे अन्द्रने हीत्देबे लोत्दे, “कम्ब शक्ति या सूजे मीन्ने नमयूदे अम्ब काम चीन्न ख्यङ्?”
8होर्दे पवित्र आत्मादे फ्यादेबे पत्रुसदे थमयूने यदे, “मीयूजे नेता मेस्ये धर्म-गुरुयू, 9दीनी ङीदे खोन्ड्याल्या मीत्याने ज्य काम चेबजे बारेने हम्ब कम्ब तर्तीप्दे तम् चीम्मीदे यदेबे लोत्दे यलो, 10नमयू क्वादेने मेस्ये इस्राएलजे मीयू क्वादेने था क्यूस्स्य, यी नमयूदे क्रूसने खील् ठोक्दीदे खेयेब, मेस्ये परमेश्वरदे सीयेबदे फेरि सोम्बो चीम्मेब, हम्ब नासरतजे येशू ख्रीष्टजे मीन्ने अम्ब मी नमयूजे खूम्नेने तम् क्यूत्देबे मेर्न ख्यङ्।
11 #
भजनसंग्रह 118:22
‘हम्ब लूङ् अम्ब ख्यङ्, हम्ब लूङे थ्याब मीयूदे काम अन्लादी य ख्य, हम्ब चूजो कीम्जे सूर् लूङ् क्यूर ख्यङ्।’
12“सूजो सूदेये मुक्तिपीन अन्खू, चेनेयलो ङीनदे मुक्तिप्रेने स्वर्ग नङ्ने मीयूने सूजो चे मीन्ये अम्पीनी।”
13कन्छ्वाब थमयूदे पत्रुस मेस्ये यूहन्नाजे आँट तङ्दे, मेस्ये थमयू छ्य्वे अन्स्येब मामूली मीयू टूङ् यब था प्रेत्दे, हन्छ्वाब थमयू छक्के पर्दीदे, मेस्ये अम्बयू येशूप्रे-प्रे टूङयू टूङ् यदेबे थमयूदे था प्रेत्दे। 14तर तम् क्यूरेब मी थमयूप्रे मेर्नब तङ्देबे थमयूदे चैये क्यम अन्खू। 15येरेक्यूत्देबे अम्बयूने पात्ता केन् सभादे फीने प्रब आज्ञा पीन्देबे थमयूदे येरे यदेबे त्यादेत्याप्रे मोतो चीत्दे, 16“अम्ब मीयूने जेम्से ङीनदे केर्चे? चेनेयलो तम्दम्ने थमयूदे हार्मन्देब काम त्या चे ख्यङ् यब पो यरूशलेमने टूङब मीयू क्वादेने तङ्क ख्यङ्, मेस्ये ङीनदे अम्ब पो दी य अन्खू। 17तर अम्ब पो मीयूदे अन्तस्य यदेबे ‘फेरि अम्बजे मीन्ने नमयू सूमीप्रेये चैये अन्क्यम्लाची’ यदेबे ङीनदे अम्बयूने बोङ्बे आर्ते पर्दीय।”
18होर्दे अम्बयूने कोदेबे “जेम्सेमेस्ये येशूजे मीन्ने अन्क्यम्लाची, मेस्ये शिक्षाये चै अम्पीन्लाची” यदेबे थमयूदे आज्ञा पीन्दे।
19तर पत्रुस मेस्ये यूहन्नादे थमयूने जवाफ पीन्दे, “परमेश्वरजे पो ङ्यीनयली नमयूजे पो ङ्यीनब परमेश्वरजे खूम्दे ठीक ख्यङ् यी त्वो नमयू रङ्सेदेने ह्वे ची। 20चेनेयलो ङीदे तङब मेस्ये तब पोयू ङी अन्-यलाबे टूङने अन्खू।”
21थमयूदे सजाइ पीनब ङ्यू चैत्याये अम्प्रेत्देबे थमयूने थेप् धम्की तन्देबे क्यापीदे, चेनेयलो कम्ब घटना घट्ते ख्य, हम्बजे लागि मीयू क्वादेने परमेश्वरजे जै-जै चीन्न ख्य। 22चेनेयलो कम्ब मी हार्मन्देब कामदे तम् चीक्क ख्य, ङूजे लो ङ्यील्लङ् वर्ष यली थेप् क्यूरे ख्य।
विश्वास चेब मीयूजे प्रार्थना
23मुक्ति प्रेत्देबे थमयू रङ्से ख्योन्यूजे ट्याने रदे, मेस्ये पूस्र्या केन्यू मेस्ये धर्म-गुरुयूदे यब पोयू क्वाने थमयूने स्योम्मीदे। 24#प्रस्थान 20:11; नहेम्याह 9:6; भजनसंग्रह 146:6कन्छ्वाब थमयूदे अम्ब पो तदे, हन्छ्वाब थमयू क्वाने मील्लीदेबे परमेश्वरतेले रङ्से के योन्देबे यदे, “ओ प्रभु, नदे पृथ्वी, समुद्र मेस्ये अयाने ख्यब साप्ता थोकने बन्दीदे, 25#भजनसंग्रह 2:1,2नदेने रङ्सेजे सेवा चेब ङीजे मेमे दाऊदने पवित्र आत्मादे फ्यामीदेबे ङूजे ङूर्दे क्यम्दे,
‘यहूदी तेब मीयू चेने झोङ् चील्लीदे, मेस्ये मीयूदे सीती-सीतीजे पोयू चेने ह्वे चे?
26परमप्रभुजे विरुद्धने मेस्ये ङूजे ख्रीष्टजे विरुद्धने पृथ्वीजे मूरुम्यू लङ्दे,
मेस्ये हुकुम चील्लेबयू क्वाने त्याफेने फूङ् क्यूत्दे।’
27 #
लूका 23:7-11; मत्ती 27:1,2; मर्कूस 15:1; लूका 23:1; यूहन्ना 18:28,29 चेनेयलो तम्दम्ने नदे अभिषेक चेब नैजे पवित्र सेवा चेब येशूजे विरुद्धने हेरोद मेस्ये पन्तियस पिलातस ङ्हीदेने, यहूदी तेबयू मेस्ये इस्राएलीयूप्रे अम्ब सहरने फूङ् क्यूर ख्यङ्। 28हम्ब चेने कम्ब नैजे लादे मेस्ये नैजे योजना अनुसार मालाङ्ने पक्क चीते ख्य। 29जेम्से ओ प्रभु, थमयूजे घूर्कीने लेम्मी, मेस्ये नैजे त्वोयूने अम्फलाबे नैजे वचन क्यम्से पीनो। 30मेस्ये तम् चीम्मेने नदे रङ्सेजे ला तन्तीब, रङ्सेजे पवित्र सेवा चेब येशूजे मीन्दे च्यूनू मेस्ये हार्मन्देब कामयू क्यूस्स्य।”
31थमयूदे प्रार्थना चे जेङ्क ङ्येदे थमयू फूङ् क्यून्नब नेने पवित्र आत्मादे लीङ्दे, थमयू क्वाने पवित्र आत्मादे फ्यादे, मेस्ये थमयूदे अम्फलाबे परमेश्वरजे वचन क्यम्दे।
विश्वास चेब मीयूजे कोमस सीर-सम्पत्ति
32 #
मूल स्यूस्स्यायूजे कामजे किताब 2:44,45 विश्वास चेब मीहुल क्वाने सेम्-लो त्या क्यूर ख्य, मेस्ये थमयू सूदेये रङ्से सीर-सम्पत्तिजे चै थोकये अम्ब ङैजेन अन्-य ख्य, तर थमयूजे साप्ता थोक कोमस ख्य। 33हम्ब मूल स्यूस्स्यायूदे शक्ति प्रेत्देबे प्रभु येशू सीइदेबे सोम्बो क्यूरबजे गवाही पीन ख्य, मेस्ये थमयू क्वाप्रेने केन् अनुग्रह क्यूर ख्य। 34थमयू सूनेये चैसेजेये हर्जो अम्पर्दे ख्य, चेनेयलो सू-सूप्रे स-क्यू या कीम्नम् ख्य, थमयूदे हम्ब सोङ्देबे प्रेब नोर् रेख्य, 35मेस्ये मूल स्यूस्स्यायूजे खूम्दे हेम्मे ख्य, मेस्ये सू-सूने कम्ब-कम्ब सेजे हर्जो पर्दे, हम्ब त्या त्याने कोम्मे ख्य।
36साइप्रस देशजे लेवी खलकजे योसेफ, मूल स्यूस्स्यायूदे ङूने बारनाबास यदेबे मीन् ये ख्य (अम्बजे अर्थ आँटजे च ख्य), 37ङूदे रङ्से स-क्यू सोङ्दे मेस्ये हम्ब नोर् रेत्देबे मूल स्यूस्स्यायूजे खूम्दे हीम्मीदे।
Currently Selected:
मूल स्यूस्स्यायूजे कामजे किताब 4: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
