मूल स्यूस्स्यायूजे कामजे किताब 2
2
पेन्तिकोसने पवित्र आत्मा रब
1 #
लेवी 23:15-21; व्यवस्था 16:9-11 होर्दे पेन्तिकोसजे दिन रदे, थमयू क्वाने नैत्याने फूङ् क्यूर ख्य। 2होर्दे स्वर्गदे थाने अम्प्रेल्लाबे त्याफेने बेस्से केन् उन्दू चील्लीदे, मेस्ये हम्बजे आवाज थमयू टूनब कीम्जे का-मुलुकने फ्योरदे। 3मेस्ये मीजे फूलीप्र थमयू ट्याने तल्रदेबे हम्ब स्वा-स्वा थर्देबे थमयू त्या-त्या फ्याने रदेबे टूङ्दे। 4होर्दे थमयू क्वाने पवित्र आत्मादे फ्यादे, मेस्ये पवित्र आत्मादे येमेब आवाज अनुसार थमयूदे सूजो केयूने क्यम मेदे।
5स्वर्ग नङ्ने ख्यब जम्म देशजे ईश्वरने पूस्तेब यहूदीयू हम्ब बीलने यरूशलेमने टूङ ख्य। 6होर्दे हम्ब आवाज तदेबे मीहुल फूङ् क्यूत्दे। थमयू छाक्के पर्दीकदे, चेनेयलो क्वादेने रङ्से रङ्सेजे केने थमयू क्यम्नब तदे। 7थमयू क्वाने बेस्से हार्मन्दीकदेबे यदे, “अम्ब क्यमब मीयू क्वाने गालीलयू ते स्व? 8केर्बे थमयू क्वादेने ङीनजे रङ्से केने क्यमब ङीनदे तैको? 9ङीनयू अयाने पार्थीयू, मादीयू, एलामीयू, मेस्ये मेसोपोटामियाजे, यहूदियाजे, कापाडोकियाजे, पोन्टस मेस्ये एशियाने टूङब मीयू ख्यङ्। 10होर्दे फ्रिगिया, पामफिलिया, मिश्र मेस्ये कुरेनीने पर्देब लिबियाजे थेप्प्र नैयू मेस्ये रोमदे रब यहूदी मेस्ये यहूदीजे विचार सेम्पर्देब थर ङ्हीने ख्यङ्, 11क्रेटजे मीयू मेस्ये अरबजे मीयूये ख्य, होर्दे ङीन रङ्से रङ्से केने परमेश्वरजे सोरो फत्या केन् कामयूजे बयान थमयूदे बेस्से क्यम्नब तैन ख्यङ्।” 12थमयू क्वाने हार्मन्दीकदे मेस्ये अल्मल् क्यूत्देबे त्यादे त्याने येरे य-मेदे, “अम्बजे अर्थ च ख्यङ्?” यदेबे लोत्दे,
13तर सूजोयूदे अम्ब पोने रीग्देबे यदे, “थमयू ची सर् थूङ्देबे स्योग ख्यङ्।”
मी हुलने पत्रुसजे अर्ती
14तर पत्रुसदे एघार जना स्यूस्स्याप्रे मेर्देबे मी हुलने के केन् योन्देबे यदे, “ङैजे पो ङ्यीन्, यहूदियाजे मीयू, मेस्ये यरूशलेमजे मीयू क्वादेने ङ्यीन्, नमयूदे अम्ब पो था क्यूस्स्य। 15चेनेयलो नमयूदे मनप्र थमयू मातीन दी, चेनेयलो चूजो नप्जे गूत्या तब ख्यङ्। 16तर अगमवक्ता योएलदे यब पो अम्बने ख्यङ्,
17 #
योएल 2:28-32
‘आखिरी दिनयूने येर क्यूक्क्य यदेबे परमेश्वरदे यख्यङ्, ङ टक्क मीयू फ्याने ङैजे आत्मा फम्मीय, मेस्ये नमयूजे च चीमीयूदे अगमवाणी क्यम्क्य,
नमयूजे स्योर्बयूदे दर्शन तङ्क्य, मस्ये नमयूजे कम्बयूदे मङ् मङ्क्य।
18अँ, ङैजे त्वो-त्वोमयू फ्याने हम्ब दिनने ङैजे आत्मा फम्मीय, मेस्ये थमयूदे अगमवाणी क्यम्क्य।
19तो मूने हार्मन्देब काम मेस्ये
मो पृथ्वीने च्यूनूयू, या का, मी, मेस्ये म्यूयूङ्जे मूस्ल तन्क्य।
20परमेश्वरजे पात्ता केन् दिन मेस्ये महिमाजे दिन रयली खूम् मीया प्ल्या अन्ख्व मून्दूङ् क्यूक्क्य, लीनी का-प्र मल्लम् क्यूक्क्य।
21तर हम्ब दिनने सूदे परमेश्वरजे मीन् गोम्क्य, ङूने जूक्तीमीय।
22“इस्राएलजे मीयू, अम्ब पो ङ्यीन्, नासरतजे येशू येर मी ख्य, ङूने परमेश्वरदे कूम शक्तिजे कामयू, हार्मन्देब कामयू मेस्ये च्यूनूयू नमयूजे खूम्ने प्रमाण तम्मीदे। नमयूदे थाने ख्यङ्, यी परमेश्वरदे नमयूजे अन्द्रने येर कामयू ङूदेने चे ख्यङ्। 23#मत्ती 27:35; मर्कूस 15:24; लूका 23:33; यूहन्ना 19:18परमेश्वरदे तोक्तीयेबे ठीक योजना मेस्ये ज्ञान अनुसार चूङ्गब अम्ब येशूने दुष्ट मीयूजे लाने सूम्दीपीदेबे क्रूसने पील्देबे सेत्दे। 24#मत्ती 28:5,6; मर्कूस 16:6; लूका 24:5तर परमेश्वरदे येशूने सोम्बो चीत्दे। चेनेयलो मृत्यूजे हक नङ्ने ङू टूङब सम्भव त्व ख्य। 25#भजनसंग्रह 16:8-11चेनेयलो दाऊददे येशूजे बारेने य ख्यङ्,
‘ङैदे प्रभुने येतार्ने ङैजे खूम्ने तङ्दे, चेनेयलो ङ ढल्-पल् अन्क्यूस्स्य यदेबे ङू ङैजे स्येत्देयोर् ख्यङ्।
26होरेक्यूत्देबे ङैजे सेम् आनन्द ख्यङ्, मेस्ये ङैजे लीदे नैजे जै जै चे ख्यङ्। अम्ब बाहेक ङैजे ङ्वदेये आशा चीत्देबे बच्दीय।
27चेनेयलो नदे ङैजे प्राण स-नङ्नेये अम्पोङ्गी, मेस्ये नदे नैजे पवित्र मीजे ङ्व रम्से अम्पीन्।
28नदे ङैने जीया चब लम्यू तम्मे ख्यङ्, न ङै प्रे ख्यङ्ब सूग्देबे ङ आनन्द क्यूत्दे।”
29“अत-च्योन्यू, ङीनजे मेमे दाऊदजे बारेने ङ नमयूने पक्क क्यूत्देबे य खूइय। ङू सीइ मेस्ये खङ्सने पोप्देबे तूर्स थ्यादे, होर्दे हम्ब तूर्स दीनी सेमेने ख्यङ्। 30#भजनसंग्रह 132:11; 2 शमूएल 7:12,13हम्ब कारणदे अगमवक्ता त्या क्यूत्देबे, ङूजे छगूम्-पूर्गूम्ने ङूजे सिंहासानने परमेश्वरदे टूङ्स्ये पीन्क्य यब कबुल चेब दाऊदने था ख्य। 31खूम्देमेस्येने अम्ब तङ्देबे ङूदे ख्रीष्ट सीबदेबे सोम्बो क्यूरबजे बारेने य ख्य, ङू स नङ्नेये अम्पोङ्गी, ङूजे ङ्व रम्सेये अम्पीन्। 32अम्ब येशूने परमेश्वरदे सोम्बो चीत्दे। अम्ब पोजे ङी क्वाने गवाही ख्यङ्। 33अम्ब कारणदे परमेश्वरजे स्येत्देयोर्दे येशू केन् चीत्देबे टूङ्स्ये पीन्दे, मेस्ये रङ्सेजे कबुल अनुसार ङूने पवित्र आत्मा पीन्दे। हम्ब पवित्र आत्मा प्रभु येशूदे चूजो ङीन फ्याने फम्मे ख्यङ्, अम्ब नमयूदे चूजो ङ्यीन्न ख्यङ् मेस्ये तङ्न ख्यङ्। 34#भजनसंग्रह 110:1चेनेयलो दाऊद स्वर्गने अन्टेयी, तर ङू रङ्सेदेने य ख्यङ्,
‘परमप्रभुदे ङैजे प्रभुने यदे, न ङैजे स्येत्देयोर् टूङ्,
35कन्छ्वासेमे ङ नैजे शत्रुयूने नैजे तोप् त्याङ्नङ्ने अन्ही।
36“होरेक्यूत्देबे इस्राएलजे मीयू टक्कदेने अम्ब पक्क स्येस्य, येशू, ङूने नमयूदे क्रूसने खील् ठोक्दीदेबे पील्दे, परमेश्वरदे ङूने प्रभु मेस्ये ख्रीष्ट बन्दीदे।”
37अम्ब पो तदेबे थमयूजे सेम् बेस्से बोन्दे, होर्दे पत्रुस मेस्ये सूजो मूल स्यूस्स्यायूने थमयूदे यदे, च्योन्यू, ङीदे च चे?”
38पत्रुसदे थमयूने यदे, “पश्चात्ताप ची, मेस्ये नमयूजे पाप-क्षमाजे लागि येशू ख्रीष्टजे मीन्ने नमयू क्वादेने बप्तिस्मा कीन्, मेस्ये नमयूदे पवित्र आत्माजे बर प्रेक्क्य। 39चेनेयलो कबुल नमयूजे लागि, नमयूजे छगूम्-पूर्गूम्जे लागिये ख्यङ्, क्वानेने प्रभु ङीनजे परमेश्वरदे कोय।”
40सूजो कूम पोयूदे ङूदे थमयूने गवाही पीन्दे, मेस्ये येरे यदेबे अर्ती पीन्दे, “अम्ब दुष्ट पुस्ताप्रे नमयू रङ्सेने बच्दी।” 41होर्दे सू-सूदे ङूजे पो मन्दीदे थमयूदे बप्तिस्मा कीन्दे, मेस्ये हम्ब दिनने थेप्प्र: हजार सोम् मीयू थमयूप्रे थप्दीरदे।
विश्वासीयूजे सङ्गति
42थमयू मूल स्यूस्स्यायूजे शिक्षा, सङ्गति चेब मेस्ये प्रे-क्यङ् क्योत्देबे चब भात्यार्जे प्रार्थनाने येतारने लादीन ख्य। 43मूल स्यूस्स्यायूदे कूम हार्मन्देब काम मेस्ये चूनूयू चीत्दे, मेस्ये क्वाजे सेम्ने फैगदे, 44#मूल स्यूस्स्यायूजे कामजे किताब 4:32-35विश्वास चेब मीयू जती क्वाने येतार्ने फूङ् क्यूर ख्य, मेस्ये थमयूजे साप्ता थोक गोसारी क्यूर ख्य। 45थमयूजे रङ्सेजे सीर-सम्पत्ति मेस्ये मलसामान सोङ्देबे सू-सूने च-च सेजे हर्जो पर्ते ख्य, क्वानेने हम्ब कोम्मे ख्य। 46थमयू दीन्जेने मन्दिरने फूङ् क्यूर ख्य, मेस्ये मील्लीदेबे कीम्-कीम्ने प्रदेबे थमयू सूग्लाबे शुद्ध सेम्दे भत्यार् च ख्य, 47मेस्ये परमेश्वरजे सार्या चेख्य, मेस्ये सूजो मीयूदेये थमयूने सेम्पर्देख्य। उद्धार प्रेबयूने प्रभुदे येतार्ने थमयूजे मीयू थेप्थेप् थप्दीमे ख्य।
Currently Selected:
मूल स्यूस्स्यायूजे कामजे किताब 2: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
