मूल स्यूस्स्यायूजे कामजे किताब 1
1
येशू स्वर्ग गीलेब
1 #
लूका 1:1-4
छेब थियोफिलस, येशूदे काम चेने सुरुचेमेस्ये ङू स्वर्ग अङ्गीलीदासेमे क्यूरब साप्ता पोजे बारेने ङैजे खूम्जे किताबने ङैदे लिख्देये ख्यङ्। 2रङ्सेदेने सेलब मूल स्यूस्स्यायूने येशूदे पवित्र आत्माप्रे क्यूत्देबे आज्ञा पीन्दे मेस्ये ङू स्वर्गने कूदेब दिनसेमेजे टक्क पो हम्ब किताबने लिख्दीये ख्यङ्। 3छरङ् भोक्तीदेबे क्रूसने सीयेमेस्ये येशू ङ्यील्लङ् दिनसेमे घरी-घरी थमयूदे तङ्दे किसिम किसिमजे पक्क प्रमाणयूदे रङ्से सोम्बो ख्यङ् यदेबे तन्दे। थमयूदे ङूने तङ्दे, मेस्ये ङूदे थमयूने परमेश्वरजे राज्यजे बारेने स्योत्दे। 4#लूका 24:49त्याफे येशू थमयूप्रे चसे चेनूब ङूदे थमयूने यदे, “ङैदे नमयूने पीनब पजे कबुल रेन्देबे टूङ्, हम्ब अम्प्रेत्दासेमे यरूशलेमदे कनेये अम्प्रलाची अम्बजे बारेने ङैदे नमयूने स्योक्क चेन ख्यङ्।” 5#मत्ती 3:11; मर्कूस 1:8; लूका 3:16; यूहन्ना 1:33चेनेयलो यूहन्नादे क्यूदे बप्तिस्मा पीन्दे, जेम्सेजे तेदिनने नमयूजे बप्तिस्मा पवित्र आत्मादे क्यूक्क्य।
6येरेक्यूत्देबे कन्छ्वाब मूल स्यूस्स्यायू फूङ् क्यूत्दे, हन्छ्वाब थमयूदे ङूने लोत्दे, “ओ प्रभु, नदे अम्ब बीलने ङीजे इस्राएल देशने मुक्ति चीम्मेइर?”
7येशूदे थमयूने यदे, “पदे रङ्सेजे हकदे तोक्तीयेब बील या सेमे स्येब काम नमयूजे दी। 8#मत्ती 28:19; मर्कूस 16:15; लूका 24:47,48तर पवित्र आत्मा नमयूने रमेस्ये नमयूदे शक्ति प्रेक्क्य, मेस्ये नमयू यरूशलेमने, पूरा यहूदियाने, सामरियाने मेस्ये पृथ्वीजे पात्ता नजे कून-कूनसेमे ङैजे गवाही पीनब क्यूक्क्य।”
9 #
मर्कूस 16:19; लूका 24:50,51 ङूदे अम्ब पो यजेनङ्येदे, थमयूदे लेलेने येशू त्वो लङ्गीदी, मेस्ये मूक्पने ङू थमयूजे खूम्देने मैली। 10कन्छ्वाब थमयूदे ङू मूने तो गीलेब लेजे-ले चीन्न ख्य, हन्छ्वाब अचानक कोला कर ह्वेब मी ङ्ही थमयूजे ट्याने मेर्रदे। 11थमयूदे यदे, “गालीलजे मीयू, नमयू चेने मेर्देबे मूतेले लेन्न? अम्ब येशू, ङू नमयूजे ट्यादे स्वर्गने कूते ख्यङ्, चूजो केर्बे नमयूदे ङूने स्वर्गने गीलेब तङ्दे, होरप्रने ङू फेरि रीय।”
मतियासने सेलब
12होर्दे थमयू जैतून गङ्दे यरूशलेमने ल्वारदे। यरूशलेमदेमेस्ये अम्ब गङ् धन्ने: १,७६० गज ताला चीन्तङ् पर्देख्य। 13#मत्ती 10:2-4; मर्कूस 3:16-19; लूका 6:14-16यरूशलेम फ्योइदेबे थमयू रङ्से टूङब कीम्जे फ्याब ताल्ल्याने टदेबे कोठाने फूङ् क्यूत्दे, हैयाने टूङब मीयू, पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ मेस्ये मत्ती, देशने माया चेब टोलीजे सिमोन मेस्ये याकूबजे च यहूदा ख्य। 14कोइ मदीयू मेस्ये येशूजे म मरियम होर्दे ङूजे च्योन्यू प्रे थमयू क्वाने फूङ् क्यूत्देबे येतार्ने प्रार्थना चीन्न ख्य।
15हम्ब दिनने च्योन्यूजे अन्द्रने पत्रुस मेर्दे (अम्ब मीयू चील्ब धेन्ने: छ-बीस ला प्र ख्य), मेस्ये यदे, 16“च्योन्यू, धर्मशास्त्रजे वचन पूरा क्यूर पर्देख्य, हम्ब पो येशूने चूङब मीयूजे अगुवा यहूदाजे बारेने दाऊदजे ङूरदे मालाङ्ने पवित्र आत्मादे क्यम ख्य। 17ङीन प्रने प्रभुजे बाह्र जान स्यूस्स्यायू नङ्ने ङूये त्या ख्य, मेस्ये ङीनप्रने प्रभुजे काम चेने सेल ख्य।”
18 #
मत्ती 27:3-8
हम्ब मीदे पाप चीत्देबे कमेदेब नोर्दे रङ् त्या कीन्दे, मेस्ये ट पीसार् क्यूत्देबे तेलीदेबे ङूजे लो परी मेस्ये ङूजे लो ग्योम क्वाने फीने योङ्रदे। 19अम्ब पो यरूशलेमने टूङब मीयू क्वादेने था प्रेत्दे। थमयूदे हम्ब रङ्जे मीन् थमयूजे रङ्सेजे केने आखेल्दामा हीत्दे या काजे रङ्।
20 #
भजनसंग्रह 69:25; भजनसंग्रह 109:8 पत्रुसदे यदे, “चेनेयलो भजनजे किताबने येर्बे लिख्दीये ख्यङ्,
‘ङू टूङब कीम् थैन्देन् क्यूप्पस्य, मेस्ये हैयाने टूङब सूत्याये अन्क्यूस्स्य, मेस्ये ङूजे काम मेस्ये पद सूजो मीदे लेन्कीस्य।’
21 #
मत्ती 3:16; मर्कूस 1:9; लूका 3:21; मर्कूस 16:19; लूका 24:51 येरेक्यूत्देबे ङीनप्रे टूङब मीयू नङ्ने येर मी त्या सेल पर्दे ख्यङ्, हम्ब मी प्रभु येशू ङीनजे अन्द्रने टूङ्देबे फीने प्रब नङ्ने रब येतार्ने ङीनप्रे ख्य, 22या, येर मी यूहन्नाजे बप्तिस्मादेमेस्ये ङू ङीन ख्यनेदे तो कूतेब दिनसेमेने ङीनप्रे ख्य। हम्ब मी ङीन प्रे-प्रे ङूजे फेरि सोम्बो क्यूरेबजे गवाही क्यूर पर्दीय।
23थमयूदे मी ङ्हीजे मीन् यदे, बारसाबास यब योसेफ, ङूजे खास मीन् युस्तस ख्य, मेस्ये मतियासजे मीन्। 24थमयूदे येर्बे प्रार्थना चीत्दे, “मीयू क्वाजे सेम्जे पो था प्रेब प्रभु, अम्ब ङ्ही नङ्ने नदे कम्बने सेल ख्यङ् हम्ब ङीने तम्मी, 25मेस्ये हम्बदे अम्ब सेवा मेस्ये मूल स्यूस्स्यायूजेप्र कामने प्र-खूस्स्य, अम्ब सेवा अन्चील्ला गीलीदेबे यहूदा रङ्सेजे नेने सीइ।” 26होर्दे थमयूदे थम ङ्हीजे अन्द्रने चिट्ठा थाब मतियासजे मीन्ने पर्दीदे, मेस्ये एघार मूल स्यूस्स्यायूप्रे ङूजे मीनये चील्दे।
Currently Selected:
मूल स्यूस्स्यायूजे कामजे किताब 1: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
