غُرْتَاکِ 14
14
عٜىٰرَاکِ إِسْرَاءِيلَعٜنْ مَايٛ مَالِيَ
1جَوْمِرَاوٛ وِعِ مُوسَى: 2«يٜشُّ إِسْرَاءِيلَعٜنْ ࢡٜلٛرٛ، ࢡٜشَنغِنَ يٜىٰسٛ ݠِي-حَحِرٛتْ حَکُّندٜ مِغْدٛلْ عٜ مَايٛ؞ شَنغِنٜ تٛنْ بَنغٜ مَايٛ يٜىٰسٛ بَعَلْ-شٜڢٛنْ؞ 3ڢِرْعَوْنَ نُمَنْ: إِسْرَاءِيلَعٜنْ مَجِّ لَاوٛلْ، ࢡٜطٛنْ نغِيلٛ ندٜرْ لٜسْدِ، ࢡٜمبَاوَايْ وُرْتَاغٛ دِغَ لَدّٜ! 4مِسَاتِنَنْ حٛورٜ ڢِرْعَوْنَ حَا عٛتَاسْنَ ࢡٜ؞ مِوَنغِنَنْ تٜدُّنغَلْ عَمْ حَا ڢِرْعَوْنَ عٜ حَا حٛنٛوࢡٜ مَاکٛ ڢُو؞ بَنَ نِي مِصْرَعٜنْ عَنْدَنْ مِنْ وٛنِ جَوْمِرَاوٛ!» إِسْرَاءِيلَعٜنْ مبَطِ نٛنْ؞
5ندٜ ࢡٜعَنْدِنِ لَامِيطٛ مِصْرَ إِسْرَاءِيلَعٜنْ نغُرْتَکٜ لٜسْدِ مِصْرَ، نُمٛوجِ ڢِرْعَوْنَ عٜ نُمٛوجِ سَرَاکِعٜنْ مَاکٛ نغَيْلِ دٛوْ يِمْࢡٜ، ࢡٜمبِعِ: «طُمٜ مبَطّٜنْ طٛ؟ کٛنِ عٜنْ عَشِّ إِسْرَاءِيلَعٜنْ ندِلِّ، ࢡٜعَشَّ حُووَنْغٛ عٜنْ؟» 6ڢِرْعَوْنَ وَطِ ݠُشِّ حَا مٛوتَ مُمْ، عٛدِلِّدِ بٜى حٛنٛوࢡٜ مَاکٛ؞ 7عٛحٛوعِ مٛوتَاجِ ݠُشِّ شُࢡَاطِ تٜىٰمٜطّٜ جٛوٜىٰغٛ عٜ مٛوتَاجِ ݠُشِّ مِصْرَ ڢُو عٜ عُمْرٛوࢡٜ دٛوْ مَاجِ ڢُو؞ 8جَوْمِرَاوٛ سَاتِنِ حٛورٜ ڢِرْعَوْنَ، لَامِيطٛ مِصْرَ، حَا عٛتَاسْنَ إِسْرَاءِيلَعٜنْ؞ کَمْࢡٜ ࢡٜنغُرْتِ لٜسْدِ مِصْرَ بَنَ ࢡٜ رِمْطِنَاࢡٜ تِمِّ؞ 9حٛنٛوࢡٜ مِصْرَ تَاسْنِ ࢡٜ، بٜى ݠُشِّ عٜ مٛوتَاجِ ݠُشِّ ڢِرْعَوْنَ ڢُو عٜ وَعِّيࢡٜ ݠُشِّ عٜ حٛنٛوࢡٜ مَاکٛ؞ ࢡٜنجٛکِّ إِسْرَاءِيلَعٜنْ بَنغٜ ݠِي-حَحِرٛتْ، حَا ࢡٜشَنغِنِنٛ بَنغٜ مَايٛ يٜىٰسٛ بَعَلْ-شٜڢٛنْ؞
10ندٜ ڢِرْعَوْنَ ࢡَدِتِ، إِسْرَاءِيلَعٜنْ نغِعِ مِصْرَعٜنْ طٛنْ تٛکِّ ࢡٜ؞ ࢡٜکُلْتٛرِ مَسِنْ، ࢡٜنغٛوکَنِ جَوْمِرَاوٛ؞ 11ࢡٜمبِعِ مُوسَى: «کَدِ غٜنَالٜ نغَلَا حَا مِصْرَ نَ؟ کٛنِ عَوَدِّ مِنْ حَا مِنْ مَايَ ندٜرْ لَدّٜ؟ کٛنِ عَوُرْتِنِ مِنْ لٜسْدِ مِصْرَ؟ 12مِنْ مبِيࢡٜ مَ يَاکٜ عٜنْ طٛنّٛ حَا مِصْرَ تَوٛنْ: عَشُّ مِنْ کُووَنَ مِصْرَعٜنْ؞ ندِکَّنَ مِنْ حُووَنْغٛ مِصْرَعٜنْ دٛوْ مَايُغٛ ندٜرْ لَدّٜ!» 13مُوسَى وِعِ ࢡٜ: «تَا کُلٜ! ندَرٜ بٛوطُّمْ، عٛنْ نغِعَنْ بَنَ نٛيْ جَوْمِرَاوٛ حِسْنِرْتَ عٛنْ حَنْدٜ؞ نغَمْ مِصْرَعٜنْ ࢡٜ نغِعٛتٛنْ حَنْدٜ، عٛنْ مٜىٰتَتَا يِعُغٛ ࢡٜ حَا عَبَدَ؞ 14جَوْمِرَاوٛ حَࢡَنَنْ عٛنْ، عٛنٛنْ عٛنْ شِرْوٛ!»
اَللَّه تَعِ ندِيَمْ، وَطَنِ إِسْرَاءِيلَعٜنْ لَاوٛلْ جٛورْنغٛلْ
15جَوْمِرَاوٛ وِعِ مُوسَى: «نغَمْ طُمٜ عَطٛنْ وٛوکَنَمِّ؟ وِعْ إِسْرَاءِيلَعٜنْ ࢡٜعُمّٛ ࢡٜندِلَّ؞ 16ࢡَنغْتُ سَوْرُ مَ، ڢٛرْتُ ندُ دٛوْ مَايٛ، عَسٜىٰکَ نغٛ نغَمْ حَا إِسْرَاءِيلَعٜنْ شَالٛ شَکَ مَايٛ دٛوْ جٛورْطُمْ؞ 17مِنْ، مِسَاتِنَنْ کٛعٜ مِصْرَعٜنْ حَا ࢡٜتٛکّٛ عٛنْ ࢡَاوٛ؞ ندٜنْ مِوَنغِنَنْ تٜدُّنغَلْ عَمْ حَا ڢِرْعَوْنَ عٜ حَا حٛنٛوࢡٜ مَاکٛ ڢُو، وَاتٛ حَا مٛوتَاجِ ݠُشِّ مَاکٛ عٜ وَعِّيࢡٜ ݠُشِّ مَاکٛ؞ 18تٛ مِوَنغِنِ تٜدُّنغَلْ عَمْ حَا ڢِرْعَوْنَ عٜ حَا مٛوتَاجِ ݠُشِّ مُمْ عٜ وَعِّيࢡٜ ݠُشِّ مُمْ، مِصْرَعٜنْ عَنْدَنْ مِنْ وٛنِ جَوْمِرَاوٛ؞»
19مَلَاعِکَاجٛ اَللَّه عَرْدِيطٛ إِسْرَاءِيلَعٜنْ يٜحِ دَرِ ࢡَاوٛ سَنغٜىٰرٜ مَࢡّٜ؞ رُولْدٜ نَنْدُندٜ بٜى دَنغْرَنغَلْ بٛو عُمِّ يٜىٰسٛ مَࢡّٜ، دَرِ ࢡَاوٛ مَࢡّٜ؞ 20ندٜ دَرِ حَکُّندٜ سَنغٜىٰرٜ مِصْرَعٜنْ عٜ سَنغٜىٰرٜ إِسْرَاءِيلَ؞ رُولْدٜ ندٜعٜ طٛنْ ࢩِࢡِّ وَکٜىٰرٜ وٛورٜ، وَکٜىٰرٜ وٛطْندٜ بٛو طٛنْ يَيْنَ جٜمَّ؞ جٜمَّارٜ ڢُو مِصْرَعٜنْ عٜ إِسْرَاءِيلَعٜنْ ࢡَدِندِرَايْ؞
21مُوسَى ڢٛرْتِ جُنغٛ مُوطُمْ دٛوْ مَايٛ؞ جَوْمِرَاوٛ لٛرْتِنِ مَايٛ بٜى حٜنْدُ ڢُونَانغٜ سَاتُندُ جٜمَّارٜ ندٜعٜ ڢُو؞ عٛوَرْتِرِ مَايٛ لٜسْدِ نجٛورْندِ، ندِيَمْجِ تَعِ؞ 22إِسْرَاءِيلَعٜنْ عٜىٰرِ شَکَ مَايٛ دٛوْ جٛورْطُمْ؞ ندِيَمْجِ ندَرِ بَنَ مَحٛلْ حَا ࢩَامٛ مَࢡّٜ عٜ نَنٛ مَࢡّٜ#1 کٛرِنْتُعٜنْ 10:1-2؛ عِبْرَنِنغْکٜعٜنْ 11:29؞؞ 23مِصْرَعٜنْ تَاسْنِ ࢡٜ، تٛکِّ ࢡٜ ࢡَاوٛ، ݠُشِّ ڢِرْعَوْنَ عٜ مٛوتَاجِ مَاکٛ عٜ وَعِّيࢡٜ ݠُشِّ مَاکٛ ڢُو نَسْتِ مَايٛ؞ 24حِدّٜکٛ وٜىٰتَ، جَوْمِرَاوٛ جِمِّتِ، لَارِ جَمَعَارٜ مِصْرَعٜنْ ندٜرْ رُولْدٜ نَنْدُندٜ بٜى دَنغْرَنغَلْ يَيْنَنْدٜ بَنَ يِيتٜ؞ عٛجِيࢡِ ندٜ حَکِّيلٛ؞ 25عٛڢَلِ ݠَلّٛوجٜ مٛوتَاجِ مَࢡّٜ حَا طٜ نغِرْلَتَا بٛوطُّمْ؞ مِصْرَعٜنْ مبِعِ: «ندٛغّٜنْ إِسْرَاءِيلَ، نغَمْ جَوْمِرَاوٛ طٛنْ حَࢡَ بٜى مٜىٰطٜنْ نغَمْ إِسْرَاءِيلَعٜنْ!»
26جَوْمِرَاوٛ وِعِ مُوسَى: «ڢٛرْتُ جُنغٛ مَ دٛوْ مَايٛ، حَا ندِيَمْجِ نغَرْتَ دٛوْ مِصْرَعٜنْ عٜ دٛوْ مٛوتَاجِ ݠُشِّ مَࢡّٜ عٜ وَعِّيࢡٜ ݠُشِّ مَࢡّٜ!» 27مُوسَى ڢٛرْتِ جُنغٛ مُوطُمْ دٛوْ مَايٛ، حَا ࢡَدَکٜ وٜىٰتُغٛ، مَايٛ حَوْتِ، وَرْتِ بَنَ نَانٜ؞ مِصْرَعٜنْ ندٛغِّ، ݠٛتِّ بٜى ندِيَمْ، جَوْمِرَاوٛ يٛلِّ ࢡٜ شَکَ مَايٛ؞ 28ندِيَمْجِ نغَرْتِ، مٛطِ مٛوتَاجِ ݠُشِّ عٜ حٛنٛوࢡٜ وَعِّيࢡٜ طِ ڢُو، نَسْتُࢡٜ ندٜرْ مَايٛ ࢡَاوٛ مَࢡّٜ؞ وَلَا کٛو غٛوتٛ ندٜرْ مَارٜ دَطِ؞ 29إِسْرَاءِيلَعٜنْ کَمْ، عٜىٰرِ شَکَ مَايٛ دٛوْ جٛورْطُمْ، ندِيَمْجِ ندَرِ بَنَ مَحٛلْ حَا ࢩَامٛ عٜ نَنٛ مَࢡّٜ؞ 30بَنَ نٛنْ جَوْمِرَاوٛ حِسْنِرِ إِسْرَاءِيلَعٜنْ ࢩَلَادٜ مَنْ دِغَ بَاوْطٜ مِصْرَعٜنْ؞ إِسْرَاءِيلَعٜنْ نغِعِ ࢡَلِّ مِصْرَعٜنْ مَايْࢡٜ دٛوْ ڢٛمٛوندٜ مَايٛ؞ 31إِسْرَاءِيلَعٜنْ نغِعِ کُوغَلْ مَنغَلْ نغَلْ جَوْمِرَاوٛ حُووِ مِصْرَعٜنْ؞ نغَمْ مَاجُمْ ࢡٜکُلِ جَوْمِرَاوٛ، ࢡٜنُطِّنِمٛ عٜ ࢡٜکٛولِ جَغِّيطٛ مَاکٛ مُوسَى؞
Currently Selected:
غُرْتَاکِ 14: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
