Salmow 49
49
SALM 49.
Audite haec, omnes.
1Klewewgh hemma, oll an poblow : rewgh skovarn, oll an re usi trigys y'n norvys.
2Tus isel hag ughel : an den golusek ha'n den boghosek war-barth.
3Ow ganow a gews a furneth : ha prederow ow holonn a re dhis konvedhes.
4My a bleg ow skovarn dhe barabolenn : my a styr ow lavar tewl war an sowtri.
5Prag y porthav own yn drog dydhyow : pan omsett kammweyth ow eskerens a-dro dhymm?
6I a drest yn aga fythow : hag a vost yn braster aga rychys.
7Mes devri ny yll nagonan anedha prena y vroder : na ri daspren dhe Dhuw ragdho;
8Re gostek via daspren y enev : ha ny allses pe henna bynitha,
9Rag may fewa bynitha : ha ma na wella an pytt.
10Rag ev a wel tus skiansek dhe verwel, ha'n den anfur ha'n talsogh keffrys a dhe goll : ha gasa aga fythow dhe dus erell.
11Aga bedh yw aga chi bynitha : ha'ga annedhow a unn henedh dhe'n nessa; i a elow aga thiryow herwydh aga henwyn aga honan.
12Mes ny bes den yn enor : haval yw orth an bestes a verow.
13Hemm yw fordh an re dalsogh : ha plegadow dh'aga henedh yw aga lavarow.
14Avel deves ymons i gorrys yn ifarn, ankow a's bugel, ha'n re ewnhynsek a wra maystri warnedha y'n myttin : aga furv a beder yn ifarn, pell dhiworth aga chiow ughel.
15Mes Duw a dhaspren ow enev dhiworth dalghenn ifarn : rag ev a'm degemmer.
16Na borth own pan vo gour gwrys rych : pan vo splannder y ji moghhes.
17Rag ny gemmer ganso travyth pan varwo : ny dhiyskynn y splannder war y lergh.
18Rag ev a vennik y enev hag ev yn few : ha tus a'th wormel pan sewenydh.
19Ev a dhe henedh y dasow : ny welons golow bynitha.
20Mes den yn y veuredh ny gonvedh : haval yw orth an bestes a verow.
Currently Selected:
Salmow 49: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
