Salmow 44
44
Myttin 9
SALM 44.
Deus, auribus.
1A Dhuw, ni re glewas gans agan diwskovarn, agan tasow re venegas dhyn ni : an gweythres a wrussys yn aga dydhyow i, y'n termyn koth.
2Gans dha leuv ty a fesyas an kenedhlow, mes ty a's plansas yn aga le : ty a dhistruis an poblow, mes gul dhedha triga yn aga le.
3Rag ny berghennsons an tir der aga kledha aga honan : ha nyns o aga bregh aga honan a ros budhogoleth dhedha;
4Mes dha leuv dhyghow jy ha'th vregh, ha golow dha fas : rag ty a's kara.
5Ty yw ow Myghtern, A Dhuw : gorhemmynn budhogoleth dhe Yakob.
6Dredhos y herdhyn ni agan eskerens dhe'n dor : dre dha Hanow ni a stank an re a sev er agan pynn.
7Rag ny drestyav y'm gwarak : nyns yw ow kledha a re dhymm an budhogoleth.
8Mes ty a'gan delirv dhiworth agan eskerens : ha gul bismer dhe'n re a'gan kas.
9Yn Duw re wrussyn ni bostya oll an jydh : ha ni a wormel dha Hanow bys vykken.
10Byttegyns ty re'gan skonyas, ha'gan shamya : ha nyns edh jy yn-rag gans agan luyow.
11Ty a wra dhyn mos war-dhelergh dhiworth an eskar : ha'n re a'gan kas a raven dh'aga honan.
12Ty re'gan ros avel deves dhe vos dybrys : ha re'gan skattras yn mysk an kenedhlow.
13Ty a werthas dha bobel a dravyth : ha dhiworth aga fris ny gemmersys prow.
14Ty a wra dhyn bos mewl dh'agan kentrevogyon : skorn ha ges dhe'n re usi yn agan kyrghynn.
15Ty a'gan gwra ensampel yn mysk an kenedhlow : ha gul dhe'n poblow shakya an penn orthyn.
16Oll an jydh yma ow disenor a-dheragov : ha meth ow fas re'm kudhas,
17Orth lev an den a skorn ha kabla : drefenn an eskar ha'n dialor.
18Oll hemma re dheuth warnan, mes ny'th ankevsyn : ha ny wrussyn ni falsuri erbynn dha gevambos.
19Ny dreylyas agan kolonn war-dhelergh : ha ny blegyas agan kammow yn-mes a'th hyns,
20Kyn y'gan brewsys yn tyller owrgeun : ha'gan kudha gans skeus ankow.
21Mar ankevyn ni Hanow agan Duw, hag ystynn agan diwleuv dhe dhuw estren : a ny hwither Duw hemma? rag ev a woer kevrinyow an golonn.
22A'th wovis jy yth on ni ledhys oll an jydh : reknys on ni avel deves dhe'n ladhva.
23Difun, prag y koskydh, A Arloedh : sav, na skon ni bynitha.
24Prag y kudhydh jy dha fas : hag ankevi agan anken ha'gan poenvotter?
25Rag agan enev yw plegys dhe'n doust : agan torr a len orth an dor.
26Sav, ha gweres dhyn ni : ha daspren ni a-barth dha dregeredh.
Currently Selected:
Salmow 44: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
