Salmow 42
42
SALM 42.
Quemadmodum.
1Kepar dell yeun an karow war-lergh goverow dowr : yn kettella y yeun ow enev war dha lergh, A Dhuw.
2Yma dhe'm enev syghes war-lergh Duw, an Duw bew : p'eur tov vy hag omdhiskwedhes a-dherag Duw?
3Ow dagrow re beu ow bara dydh ha nos : hag i ow leverel dhymm oll an jydh, Ple'ma dha Dhuw?
4My a berth kov a hemma, ow skoellya ow enev a-bervedh ynnov : fatell gerdhyn vy gans an routh orth aga hembronk dhe ji Duw;
5Gans lev a lowena ha grasyans : yn mysk routh ow synsi goel.
6Prag yth osta jy mar dhigolonnek, ow enev : ha prag yth hanesydh a-berth ynnov?
7Trest yn Duw : rag my a'n gormel prest rag selwyans y fas.
8Ow Duw, digolonnek yw ow enev a-bervedh ynnov : rakhemma my a berth kov ahanas a dir Yordan ha'n Hermonow, a venydh Misar.
9Downder a elow dhe dhownder orth tros dha dhowrlammow : oll dha vordardh ha'th tonnow res eth dresov.
10Mes an Arloedh a worhemmynn y dregeredh dydhweyth : ha nosweyth y gan a vydh genev, pysadow dhe Dhuw ow bewnans.
11My a lever dhe Dhuw ow harrek, Prag re'm ankevsys : prag yth av vy ow kyni, ha'n eskar orth ow gwaska?
12Ha'm eskern ow pos brewys, ow eskerens a'm skorn : ow leverel dhymm oll an jydh, Ple'ma dha Dhuw?
13Prag yth osta jy mar dhigolonnek, ow enev : ha prag yth hanesydh a-berth ynnov?
14Trest yn Duw : rag my a'n gormel prest, selwyans ow fas, ha'm Duw.
Currently Selected:
Salmow 42: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
