Salmow 40
40
SALM 40.
Expectans expectavi.
1My a wortas an Arloedh gans perthyans : hag ev a blegyas dhymm ha klewes ow kri.
2Hag ev a'm drehevis mes a'n pytt divlas, mes a'n pri leysek : ha gorra ow threys war garrek, ha fastya ow hammow.
3Hag ev re worras kan nowydh y'm ganow, kan a wormola dh'agan Duw : lies huni a'n wel, ha perthi own, ha trestya y'n Arloedh.
4Gwynnvys an gour re worras y fydhyans y'n Arloedh : ha na wra vri a'n re woethus na'n re a dreyl dhe falsuri.
5Meur yw niver dha varthusyon a wrussys, A Arloedh ow Duw, ha'th towlow ragon : nyns eus par dhiso jy.
6Mara's menekken vy, ha kewsel anedha : y fiens i moy es dell yllir aga nivera.
7Nyns osta hwansek dhe sakrifis hag offrynn : mes ty re igoras ow diwskovarn.
8Offrynn leskys hag offrynn peghes ny wovynnsys : Ena y leveris vy, ‘Otta, devedhys ov;
9Yn rol an lyver yw skrifys ahanav.’ My re vynnas gul dha volonjedh, A Dhuw : yma dha lagha yn kres ow holonn.
10My re dherivas ewnder y'n kuntelles meur : otta, ny fronnis ow diwweus, dell wodhes, A Arloedh.
11Ny gelis dha ewnder y'm kolonn : my re gewsis a'th wirder ha'th selwyans.
12Ny gelis dha dregeredh ha'th wirder : dhiworth an kuntelles meur.
13Na skon dhymm dha druedh, A Arloedh : prest re'm gwittho vy dha dregeredh ha'th wirder.
14Rag ankenyow diniver re dheuth a-dro dhymm; ow hammweythresow re'm dalghennas ma na allav mires yn-bann : moy aga niver yns i ages blewennow ow fenn, ha'm kolonn a fyll dhymm.
15Dre dha vodh, A Arloedh, salw vy : A Arloedh, deus uskis dhe'm gweres.
16Perthens i meth ha bedhens shyndys war-barth, an re a hwila ow enev dh'y dhiswul : bedhens i treylys war-dhelergh ha konfondys an re a lowenha y'm pystik.
17Bedhens i yn ahwer drefenn aga meth : neb a lever dhymm, Aha, aha.
18Lowenhes kemmys a'th hwila ha bedhens heudhik ynnos jy : ha myns a gar dha selwyans prest leverens, Re bo Duw meurhes.
19Boghosek hag edhommek ov vy : mes an Arloedh a breder ahanav.
20Ty yw ow gwereser ha'm delivrer : A Arloedh, na wra delatya.
Currently Selected:
Salmow 40: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
