Salmow 33
33
SALM 33.
Exultate, justi.
1Lowenhewgh y'n Arloedh, hwi an re wiryon : gormola yw gwiw dhe'n re ewnhynsek.
2Gormelewgh an Arloedh gans telynn : kenewgh gormola dhodho gans sowtri a dheg kordenn.
3Kenewgh dhodho kan nowydh : tennewgh an kerdyn yn konnyk, gans garmow ughel.
4Rag ewn yw ger an Arloedh : hag oll y wriansow yw gwrys yn lenduri.
5Ev a gar gwiryonedh ha gwirvreus : leun yw an norvys a dhader an Arloedh.
6Dre er an Arloedh an nevow a veu gwrys : hag oll aga lu gans anall y anow.
7Ev a guntellas dowrow an mor war-barth yn graghell : ev a worr an downderyow yn gwithvaow.
8Perthes own a'n Arloedh oll an nor : seves yn euth anodho oll trigoryon an norvys.
9Rag ev a gewsis hag yndella y feu gwrys : ev a worhemmynnis ha pup-tra a sevis yn fast.
10An Arloedh a dhiswra kusul an kenedhlow : ev a dhiswra towlow an poblow.
11Kusul an Arloedh a sev bynitha : prederow y golonn a unn henedh dhe'n nessa.
12Gwynnvys an genedhel hag yw an Arloedh hy Duw : an bobel dewisys ganso dhe vos y ertach y honan.
13An Arloedh a vir war-woeles dhiworth nev, hag a wel oll mebyon den : dhiworth tyller y drigva ev a vir orth oll trigoryon an norvys.
14Ev a form aga holonnow yn kettep penn : ev a aspi oll aga gwriansow.
15Nyns eus myghtern a allo bos selwys gans lu meur : nyns yw breselyas krev delivrys gans galloes meur.
16Euveredh yw trestya yn margh rag selwyans : ha nyns yw denvyth selwys gans y nerth bras.
17Otta, yma lagas an Arloedh war an re a berth own anodho : war an re a drest yn y dregeredh;
18May teliffro aga enev dhiworth ankow : ha'ga gwitha yn few yn termyn nown.
19Agan enev a worta an Arloedh : ev yw agan gweres ha'gan skoes.
20Rag agan kolonn a lowenha ynno : drefenn ni dhe drestya yn y Hanow sans.
21Bedhes dha dregeredh, A Arloedh, warnan : kepar dell worryn agan trest ynnos.
Currently Selected:
Salmow 33: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
