Salmow 31
31
SALM 31.
In te, Domine, speravi.
1Ynnos jy, A Arloedh, y hwilav skovva : na as vy nevra dhe berthi meth; gwra ow delivra y'th ewnder.
2Pleg dha skovarn dhymm; gwra ow delivra yn uskis : bydh dhymm karrek grev, ha kastell dhe'm selwel.
3Rag ty yw ow harrek grev ha'm kastell : a-barth dha Hanow, bydh ow hembrenkyas ha kevarwoedh vy.
4Tenn vy mes a'n roes a gudhsons dhymm : rag ty yw ow skovva.
5Y'th leuv jy y kemmynnav vy ow spyrys : ty re'm dasprenas, A Arloedh, Duw a wiryonedh.
6My re gasas an re a wra vri a euveredh gwag : mes my a drest y'n Arloedh.
7My a vydh heudhik ha lowenhe y'th tregeredh : rag ty re welas ow foenvos, hag aswonn ankenyow ow enev.
8Ny'm gessys vy yn dorn an eskar : ty re worras ow threys yn tyller ledan.
9Bydh grassyes orthiv, A Arloedh, rag yth ov vy yn ankres : ow lagas a fyll drefenn poenvos; ha'm enev ha'm torr ynwedh.
10Rag ow bewnans yw difygys gans keudh, ha'm blydhynyow gans kynvann : ow nerth a fyll drefenn ow drogober, ha'm eskern a wedher.
11Skorn ov vy yn mysk ow eskerens oll, ha kyns oll yn mysk ow hentrevogyon, hag own dhe'n re aswonnys genev : an re a'm welas mes a ji a gildennas dhiworthiv.
12Ankevys ov vy kepar ha den marow gyllys mes a gov : yth ov vy avel lester trogh.
13Rag my re glewas kabel lies huni : yth esa euth a bub tu, hag i owth omgusulya war-barth er ow fynn; i a dewlys towl dhe gemmeres ow bewnans.
14Mes my a drestyas ynnos jy, A Arloedh : my a leveris, Ty yw ow Duw.
15Yma ow thermynyow y'th leuv jy : gwra ow delivra dhiworth leuv ow eskerens ha dhiworth ow helghysi.
16Gwra dhe'th fas golowi war dha was : salw vy a-barth dha dregeredh.
17Na as vy dhe berthi meth, A Arloedh, rag my re elwis warnas : perthes an debeles meth, ha bedhens i tawesek y'n bedh.
18Bedhes avlavar an gweusyow gowek : neb a lever erbynn an re wiryon yn howtyn, gans goeth ha despit.
19Ass yw meur dha dhader, a dharbarydh rag an re a'th own : a wrussys rag an re a hwila skovva ynnos jy a-dherag mebyon den!
20Yn goskes dha fas ty a's kudh rag towlow den : ty a's kudh yn skovva, pell dhiworth strif tavosow.
21Benniges re bo an Arloedh : rag ev re dhiskwedhas tregeredh marthys dhymm yn sita grev.
22Rag my a leveris y'm toeth, ‘Treghys ov vy a-dherag dha dhewlagas’ : mes ty a glewas lev ow govynnadow pan griis vy warnas.
23Kerewgh an Arloedh, oll y syns ev : rag an Arloedh a with an re len, mes ev a dal yn hel dhe'n re a omdheg yn hwoethus.
24Bedhewgh krev ha bedhes agas kolonn konfortys : oll hwi a drest y'n Arloedh.
Currently Selected:
Salmow 31: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
