Sirach (Ecclesiasticus) 5
5
CAB. V.
1Ny soie dty chree er dty chooid, as ny abbyr, Ta dy liooar aym son earish my vea.
2Ny eiyr er dty aigney hene, as er dty niart, dy immeeaght lurg raaidyn dty chree hene:
3As cha jir oo, Quoi nee mish y lhiettal ayns my yannoo? son nee’n Chiarn, son shickyrys, kerraghey y ghoaill er dty voyrn.
4Cha jir oo, Ta mee er n’yannoo peccah, as cha vel skielley erbee er daghyrt dou? son ta’n Chiarn foddey-surransagh, cha jean eh er aght erbee raad y lhiggey dhyt.
5Ayns treishteil dy vod oo lhiasaghey y yannoo, ny bee gyn aggle, dy vishaghey dty pheccaghyn:
6As cha jir oo, S’mooar ta e vyghin, bee eh er ny veeinaghey son earroo my pheccaghyn: son veihsyn ta cheet chammah myghin as kerraghey, as ta e yymmoose tannaghtyn er peccee.
7Ny lhig shaghey dy hyndaa gys y Chiarn, as ny cur jeh veih laa gys laa: son doaltattym hig magh jymmoose y Chiarn, as ayns dty hauchys bee oo er dty stroie, as nee oo cherraghtyn ayns laa yn chooilleeney.
8Ny jean soiaghey dty chree er cooid cosnit dy aggairagh, son s’beg vees nyn mondeish ayns laa dty heaghyn.
9Ny fasnee lesh dy chooilley gheay, as ny gow er dy chooilley raad: son myr shen ta’n peccagh jannoo, ta jeh chengey lhiam chengey lhiat.
10Freill shickyr ayns dty hushtey, as lhig da dty ghoan ve gyn caghlaa.
11Bee arryltagh dy chlashtyn, as lhig da dty vea ve firrinagh, as cur ansoor meeley.
12My ta toiggal ayd, freggyr dty naboo, mannagh vel, cur dty laue er dty veeal.
13Ta chammah ooashley as nearey ayns taggloo, as ta chengey dooinney e hoyrt-mow.
14Ny bee er dty enmys tutler, as ny lhie ayns farkiaght lesh dty hengey; son ta nearey eajee er y vaarliagh, as drogh gheyrey er y chengey foalsey.
15Ny bee mee-hushtagh ayns nhee erbee, lhig da’n chooish ve mooar ny beg.
Currently Selected:
Sirach (Ecclesiasticus) 5: YNAP
Highlight
Share
Copy
Want to have your highlights saved across all your devices? Sign up or sign in
© Society for Promoting Christian Knowledge (SPCK) under licence to the British and Foreign Bible Society (BFBS) 2017