Genesis 49
49
CAB. XLIX
1As hug Jacob fys er e vec, as dooyrt eh, Tar-jee cooidjagh, dy voddym soilshaghey diu, shen ny ta kiarit dy heet erriu, ayns ny earishyn ta ry-heet. 2Tar-jee dy cheilley, as clasht-jee shiuish vec Yacob, as eaisht-jee rish Israel nyn ayr.
3Reuben, uss my vac shinney, my hroshid, as toshiaght my niart, goaill y raad ayns ooashley as yn yrjid dy phooar. 4Neu-hickyr myr ushtey, cha nee uss vees yn fer syrjey, er-yn-oyr dy jagh oo seose gys lhiabbee dt’ayrey: er shen ren oo aggair; hie eh seose gys my lhiabbee.
5Ta Simeon as Levi braaraghyn [ayns drogh-yannoo] ta ny greinyn-caggee dy ghewlys ayns ny ynnydyn-vaghee oc. 6O m’annym, ny gow uss ayrn ’sy choyrle follit oc; gys y cheshaght oc, O my ooashley, ny bee uss er dty lhiantyn: son ayns y chorree oc, ren ad dooinney ’ghunverys, as ayns dewlys nyn farg, lhieg ad sheese voallaghyn, 7Dy row mollaght er y farg oc, son ve eulyssagh; as y jymmoose oc, son ve dewil: neem’s ad y scarrey ayns Jacob, as ad y skeayley ayns Israel.
8Yudah, uss eh da ver dty vraaraghyn moylley; bee dty laue ayns mwannal dty noidyn: nee cloan dty ayrey croymmey sheese kiongoyrt rhyt. 9Ta Judah myr quallian y lion; veih’n spooilley, my vac, t’ou er n’gholl seose, chroym eh sheese, heeyn eh eh-hene myr lion; as myr shenn lion; quoi s’loys y ghoostey eh? 10Cha jean y lorg-reill failleil veih Judah, ny fer-toyrt y leigh veih e luight, derrey nee Shiloh cheet: as huggeysyn, vees ny ashoonee er nyn jaglym stiagh. 11Kiangley yn sharragh echey gys y billey-feeyney, as lhiy e assyl gys y reih billey-feeyney; niee eh e choamraghyn ayns feeyn, as e eaddagh ayns fuill ny smeïr-feeyney. 12Bee e hooillyn jiarg lesh feeyn, as ny feeacklyn echey bane lesh bainney.
13Nee Zebulun cummal ec purt ny marrey; as bee eh son purt lhuingey; as bee’n slyst echey roshtyn gys Zidon.
14Ta Issachar ny assyl loor, croymmey eddyr daa errey. 15As honnick eh dy row aash mie; as y thalloo dy row eh aalin; as chroym eh e gheaylin gys yn errey, as haink eh dy ve ny harvaant fo keesh.
16Nee Dan briwnys e phobble, myr fer jeh tribeyn Israel.
17Bee Dan myr ard-nieu er y raad, adder ’sy chassan; ta lhottey boynyn ny gabbyl, myr shen dy jean y markiagh echey tuittym gour e ghrommey. 18Ta mee er farkiaght son dty haualtys, O Hiarn.
19Gad, nee sheshaght-chaggee y varriaght ’gheddyn er, agh yiow eshyn laue yn eaghtyr fy-yerrey.
20Mychione Asher, bee e arran veih meeaylys y thallooin, as nee eh gymmyrkey beaghey reeoil.
21Ta Naphtali myr feeaih feayshlit: ta e ghlare lesh focklyn brynnagh.
22Ta Joseph ny vanglane messoil, eer ny vanglane messoil liorish chibbyr; ta ny banglaneyn echey skeayley harrish y voalley. 23Ta ny sideyryn er heaghney eh dy trome, as er lhiggey er, as er choyrt dwoaie da. 24Agh chum e vhow lesh niart, as va roihaghyn e laueyn er nyn niartaghey, liorish laueyn Yee niartal Yacob: veih shen ta’n vochilley, creg Israel. 25Eer liorish Jee dt’ayrey, nee cooney lhiat, as liorish yn ooilley-niartal, nee uss y vannaghey, lesh bannaghtyn niau heose, bannaghtyn y diunid heese, bannaghtyn ny keeaghyn, as y vreïn. 26Ta Bannaghtyn dt’ayrey erskyn bannaghtyn my henn-ayryn, gys yn ard sodjey magh jeh ny sleityn dy bragh farraghtyn: bee ad er kione Yoseph, as er mullagh y chione echeysyn, v’er ny scarrey veih e vraaraghyn.
27Bee Benjamin myr moddey-oaldey jollyssagh: ayns y voghrey, stroie-ee eh yn chragh t’eh dy hayrtyn; as ec yn oie, rheynnee eh yn spooilley.
28Ad shoh ooilley daa hribe jeig Israel; as shoh eh, ny loayr nyn ayr roo, as vannee eh ad; cordail rish e vannaght er-lheh, vannee eh dagh unnane oc. 29As hug eh currym orroo, as dooyrt eh roo, Ta mish dy ve er my haglym gys my gheiney: jean-jee mee y oanluckey marish m’ayraghyn, ayns y lhiaght t’ayns magher Ephron yn Hittite. 30(Ayns y lhiaght, t’ayns magher Machpelah, ta liorish Mamre, ayns cheer Chanaan, chionnee Abraham, marish magher Ephron yn Hittite, son possession dy ghrunt oanluckee.) 31Ayns shen doanluck ad Abraham, as Sarah e ven; ayns shen doanluck ad Isaac as Rebekah e ven; as ayns shen ren mish Leah y oanluckey. 32Va cairys y vagher, as yn ooig t’ayn, kionnit veih cloan Heth. 33As tra va Jacob erreish currym y choyrt da e vec, hayrn eh seose e chassyn ’sy lhiabbee, as phaart eh, as v’eh oanluckit marish e ghooie.
Currently Selected:
Genesis 49: BIB1819
Highlight
Share
Copy
Want to have your highlights saved across all your devices? Sign up or sign in
First published in 1775, revised and published by the British and Foreign Bible Society in 1819.
