PANURIRANG JESAYA Bindu 6
Bindu 6
Pangungkapon ni si Jesaya taringot tu hamuliaon ni Jahowa 1-7.
Panjouna di si Jesaya tu tohonan panurirang 8-13.
I. 1Di taon hamamate ni raja Usia, huida Tuhan i hundul di atas habangsa na timbo, jala na marmulia, jala angka rambu ni pangkeanna manggohi bagas joro. #1Raj 22:19; 2Raj 15:1; Joh 12:41 2Jongjong di atasna surusuruan Serapim, angka na marhabong onom be, dua manghungkupi bohinasida, dua manghungkupi patnasida, dua mangkabangkon nasida. 3Jala * marsijouan ma nasida songon on: Na badia, na badia, na badia do Jahowa Zebaot, + gok hamuliaonna liat portibi on. #* Pgk 4:8; + Hab 3:3 4Jadi humuntal ma angka ojahan ni tiang sian soara ni na manjou, jala * gok timus joro i. #* Hes 10:4; Pgk 15:8 5Dung i hudok ma: Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot. #1Mus 16:13, 32:30; 2Mus 33:20; Pangh 13:22 6Dung i habang ma sada sian angka surusuruan Serapim mandapothon ahu, jala di tanganna sada batu arang na gara, na binuatna sian langgatan dohot gansip. #Hes 28:14 7Jadi * dijama ma pamanganku, jala didok: Ida ma, on do na manjama bibir ni pamanganmu, paboa naung niunsat utangmu, jala naung + hinungkupan dosam. #* Jer 1:7; Dan 10:16; + Sak 3:4
II. 8Dung i hubege ma soara ni Tuhan i, na mandok: Ise do suruhononku, jala ise pardalannami? Jadi ningku ma: Dison do ahu, suru ma ahu! 9Jadi didok ibana ma: Laho ma ho, jala dok ma tu bangso on: Sai mananginangi ma hamu, alai unang antusi hamu; sai ida hamu ma, alai unang mananda hamu! #Mat 13:11-15; Joh 12:40; Ul 28:26-27; Rom 11:8 10Patangkang ma roha ni bangso on, jala mingori pinggolnasida, jala pitungi matanasida, asa unang marnida matanasida, manang marbinege pinggolnasida, manang mangantusi rohanasida, jala unang muba manang malum hilalaonna. #5Mus 29:3; Joh 12:40 11Jadi ningku ma: Sadia leleng on ale Tuhan? Jadi ninna ma: Paima tarulang angka huta, soada marisi, jala angka bagas so marisi jolma, jala tarulang tano i gabe halongonan. 12Ai padaoon ni Jahowa ma angka jolma i, gabe langa situtu parsitongaan ni tano i. 13Alai tading dope di bagasan saparsampulu, nang angka i siaphononna do, songon hau tusam, jala songon hariara na martungko di hatatabana; * boni nabadia do tungkona i. #* Jes 4:3
Currently Selected:
PANURIRANG JESAYA Bindu 6: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.