PANURIRANG JESAYA Bindu 35
Bindu 35
Bagabaga hamumulak ni angka na malua sian Sion 1-10.
1Marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur. #Jes 32:15 2Marbunga situtu ma i jala marolopolop, masa ma tutu parolopolopon dohot pariaiaon. Hamuliaon ni Libanon dibasabasahon tusi rap dohot hinauli ni Karmel dohot Saron. Idaonnasida ma hamuliaon ni Jahowa, hatongamon ni Debatanta. 3Pargogoi hamu ma tangan angka na dauk jala pahot hamu angka pat na telluktelluk. #Heb 12:12 4Dok hamu ma tu angka parroha na tahuton: Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ho do ibana tongon paluahon hamu. #Ps 94:1; Jes 40:9 5Buhaanna ma disi mata ni halak na mapitung jala marbinege bahenonna pinggol ni angka na nengel. #Jes 29:18, 42:7; Mat 11:5 6Marhajingjang ma disi halak na pangpang songon ursa, jala mariaia dila ni halak na ngungu, ai marbuhalbuhal ma angka aek di halongonan jala sunge di adaran. #Mat 15:30; Joh 7:38 7Jala tano hasang situtu gabe tao, jala tano bangkalbangkal gabe parmualan aek. Di inganan pangulonan ni naga na sai laon tubu arung dohot tolong. #Jes 41:18 8Adong huhut disi * dalan balobung dohot dalan na bolon, na targoar: Dalan na badia. Ndang jadi mamolus sian i halak na ramun, jala nasida nampunasa; manang ise + na mandalani dalan i, gari angka na oto ndang tagamon lilu. #* Jes 62:10; + Jes 30:21 9Ndang adong disi singa jala na so tupa boluson ni binatang panoro, manang jumpang disi; jolma angka na pinalua mardalan disi. 10Jadi mulak ma sogot halak angka na pinalua ni Jahowa, jala mariaia ro tu Sion; jala halalas ni roha salelenglelengna di atas ulunasida, dapotan hilas dohot las ni roha nasida, alai maporus ma anggo arsak dohot hoihoi. #Ps 126:6; Jes 51:11; Pgk 21:1-7
Currently Selected:
PANURIRANG JESAYA Bindu 35: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.