ማርቆሴ 9

1ሓሣ ዬሱሴ ዔያቶም ሂዚ ጌዔኔ፦ «ጎኔ ታ ዒንሢም ጋዓኔ፤ ሓሢ ሃይካ ዓኣ ዓሶ ባኣካ'' ፆኦሲ ካኣቱማ ዎልቄና ዬዓኣና ዛጋንዳያ ሄላ''ንዳኣና ፔቴ'' ፔቴ'' ሓይቂንዱዋ ዓሲ ዓኣኔ።»

ዬሱሴኮ ዓውካሮ ላኣሚንቶ

(ማቲ. 17፥1-13፤ ሉቃ. 9፥28-36)

2ላሆ'' ዓቢኮ ጊንፃፓ ዬሱሴ ጴፂሮሴንታ ያይቆኦቤንታ ዮሓኒሴንታ ሌሊ ፔኤና ዎላ'' ዔኪ ፑኡፒ ዹካ ኬስካዛ ዔያቶኮ ቤርታ ዒዛኮ ዓውካራ ላኣሚ''ንቲ ጴዼኔ። #2ጴፂ. 1፥17-18። 3ዓፒላ'' ዒዛኮ ኮሺ'' ቦኦሬኔ፤ ዓጪዳ ዖኦኒያ ማስኪ ጌኤሺ'' ቦኦሪሳያይዳፓ ዑሣ ዓኣዼ ቦኦሬኔ። 4ዬማና ዔኤሊያሴና ሙሴና ጴዺ ዬሱሴና ዎላ'' ጌስታንቴ ዔያታ ዴንቄኔ። 5ጴፂሮሴ ዬሱሴ ኮራ፦ «ዔርዛሢዮ! ሓይካ ኑ ናንጋቴ ኮሺኬ፤ ዬያሮ ፔቴ'' ኔኤም፥ ፔቴ'' ሙሴም፥ ፔቴ'' ዔኤሊያሴም ማዓያ ሓይሦ ዉዲ ኑኡኒ ማዦም» ጌዔኔ። 6ዔያታ ሓይሣሢ ኮሺ'' ዲቃቲ ዓኣሢሮ ጴፂሮሴ ፔኤሮ ዓይጎ ጋዓቴያ ዔሪባኣሴ።

7ሻኣሬ ዔያቶ ሙኪ ባይዜኔ፤ ባይዜ ሻኣሮይዳፓ፦ «ሓይ ታኣኮ ታኣኒ ናሽካ ናዓሢኬ፤ ዒዚ ጋዓሢ ዋይዙዋቴ» ጋዓ ዑኡሲ ዋይዚንቴኔ። #ማቲ. 3፥17፤ ማር. 1፥11፤ ሉቃ. 3፥22። 8ቤዞማና ሺሪ ዔያታ ዛጋዖ ዬሱሴፓ ዓታዛ ሜሌ'' ዖናኣ ዴንቂባኣሴ።

9ዹካ''ፓ ዔያታ ኬዳ''ኣና ዬሱሴ፦ «ዒንሢ ዛጌ ባኮ ዓሲኮ ናዓሢ ሓይቂ ሓይባ''ፓ ዔቃንዳያ ሄላ''ንዳኣና ዖኦማኣ ኬኤዚፖቴ» ጌዔኔ።

10ዬያ ዒ ጌዔ ባኮ ዔያታ ዋይዚ ዔኬኔ፤ ጋዓንቴ፦ «ሃይቢፓ ዔቂሢ ጌይሢ ዎዚ ጌይሢዳይ?» ጌዒ ዎላ'' ጌስቴኔ። 11«ሙሴ ዔርዜ ዎጎ ዔርዛ ዓሳ ዔኤሊያሴ ቤርታ ሙካኒ ኮይሳኔ ዓይጎሮ ጋዓይ?» ጌዒ ዔያታ ዬሱሴ ኮራ ዖኦጬኔ። #ሚል. 4፥5፤ ማቲ. 11፥14።

12ዒዚ ዔያቶም፦ «ጎኔኬ፤ ዔኤሊያሴ ቤርታዺ ሙካኒና ጉቤ ባኮ ጊኢጊሻኒ ኮይሳኔ፤ ማዔቶዋ ዓሲ ናይ ሜቶ ዔካንዳሢና ቦሂንታንዳሢያ ፃኣፒንቲ ባኣዓዳ? 13ታኣኒ ዒንሢም ኬኤዛኔ፦ ዔኤሊያሴ ቤርታዺ ሙኬኔ፤ ቤርታዺ ዒዛ ዛሎ'' ፃኣፒንቴሢጉዴያ ዓሳ ኮዓ ባኮ ቢያ ዒዛይዳ ማዼኔ» ጌዔኔ።

ፑርታ ዓያና ዓርቄ ናይስኬያ ዬሱሴ ዓውሴሢ

(ማቲ. 17፥14-21፤ ሉቃ. 9፥37-43)

14ዬሱሴንታ ዒዛና ዎላ'' ዹኮ'' ኬስኬ፥ ዒዛ ጊንፆ ሓንታ ሓይሦንሢንታ ሓንጎ ዓቴ'' ጊንፆ ሓንታዞንሢ ኮይላ'' ሙካንቴ ሚርጌ ዴሬ ዔያቶ ኮራ ቡኪ፤ ሓሣ ሙሴ ዔርዜ ዎጎ ዔርዛ ዓሳኣ ዔያቶና ዎላ'' ማርማኔ። 15ዒኢካ ዓኣ ዴራ'' ዬሱሴ ዛጌ ዎዶ''ና ሚርጌ ዲቃቲ ሄርሻዖ ዒዛ ባንሢ ጳሽኪ፦ «ኮሺዳ?» ጌዔኔ። 16ዬሱሴ ዒዛኮ ጊንፆ ሓንታ ናኣቶ'' ኮራ፦ «ዔያቶና ዎላ'' ዒንሢ ማርማሢ ዓይጎዛላዳይ?» ጌዒ ዖኦጬኔ።

17ዴሮ'' ባኣካ''ፓ ፔቴ'' ዓሲ ሂዚ ጌዔኔ፦ «ዔርዛሢዮ! ጌስቲሱዋ ፑርታ ዓያና ዓርቄ ናይ ታ ኔ ኮራ ዔኪ ሙኬኔ። 18ዔቄ ዎዶ''ና ሳዓ ዒዛ ጳዺሳኔ፤ ዻንጎና ዱባሲ ዓቺ ዻይሲሳኔ፤ ዑፆዋ ዒዛኮ ሜልዚ ሌሲ''ጉዲ ማሃኔ፤ ዬያ ፑርቶ ዓያኖ ዒዛይዳፓ ኬሳ''ንዳጉዲ ኔኤኮ ጊንፆ ሓንታ ናኣቶ'' ታ ዖኦጬያታንቴ ዔያታ ኬሳ''ኒ ዳንዳዒባኣሴ።»

19ዬሱሴ ዔያቶም ሂዚ ጌዔኔ፦ «ዒንሢ ጉሙርቁዋ ዓሳ ዓይዴ ሄላ''ንዳኣና ታ ዒንሢና ዎላ'' ናንጋንዳይ? ዓይዴ ሄላ''ንዳኣና ታኣኒ ጊባንዳይ? ሂንዳ ናዖ ታ ባንሢ ዔኪ ሙኩዋቴ።» 20ዔያታ ናዓሢ ዬሱሴ ባንሢ ዔኪ ሙኬኔ፤ ፑርቶ ዓያና'' ዬሱሴ ዴዴንቃዖ ናዖ ሳዓ ጳዺሳዛ ናዓሢያ ሳዓ ኮላዺ ዻንጎና ዱባ ዬይሴኔ። 21ዬሱሴ ናዖኮ ዓዶ ኮራ፦ «ዓይዳፓ ዓርቂ ሃይ ናዓሢ ሃያይዳይ?» ጌዒ ዖኦጬኔ።

ናዖኮ ዓዴ ማሓዖ፦ «ዓኣላ'' ዓኣንቴ ዓርቃዖኬ፤ 22ፑርቶ ዓያና'' ዒዛ ዎዻኒያ ሚርጌ ዎዴና ታሚዳ፥ ዋኣሢዳ ኬኤራሢሮ ኔኤም ዳንዳዒንታቴ ሃዳራ ኑና ሚጪንቲ ማኣዴ''» ጌዔኔ።

23ዬሱሴ፦ «ኔኤም ዳንዳዒንታቶ ኔኤኒ ዎይቲ ጋዓይ? ጉሙርቃሢም ቢያ ባኣዚ'' ዳዳንዳዒንታኔ!» ጌዔኔ።

24ቤዞና ናዖኮ ዓዴ፦ «ጉሙርቂፆ ታ ጉሙርቃኔ፤ ጋዓንቴ ጉሙርቂሢ ፓጪሢፓ ታና ማኣዴ''» ጌዒ ዒላቴኔ።

25ዓሳ ዲርጊ ዬዓሢ ዬሱሴ ዛጋዖ ፑርቶ ዓያናሢም፦ «ሓይ ኔኤኒ ናዖኮ ዋዮና ዻንጎና ባይቄያ ማሄ ዓያናሢዮ ናዓሢዳፓ ኔኤኒ ኬስካንዳጉዲ፥ ላሚ ጊንሣ ኔኤኒ ዒዛይዳ ጌሉዋጉዲ ታ ኔና ዓይሣኔ!» ጌዒ ጎሬኔ።

26ፑርቶ ዓያናሢ ዼኤፒ ዑኡሲና ዒላታዖ ናዓሢያ ሚርጌና ባርዲሴሢኮ ጊንፃ ኬስካዛ ናዓሢ ሓይቄ ሌሲ''ጉዲ ማሌሢሮ ሚርጌ ዓሳ ሓይቄኔ ጌዔኔ። 27ጋዓንቴ ዬሱሴ ናዓሢኮ ኩጮ ዓርቂ ዔቂሴኔ፥ ናዓሢያ ዔቄኔ።

28ዬካፓ ዬሱሴ ማኣሪ ጌሌሢኮ ጊንፃ ዒዛኮ ጊንፆ ሓንታ ናኣታ'' ዒዛ ዱማሲ፦ «ዓይጎሮ ኑኡኒ ፑርቶ ዓያኖ ኬሳ''ኒ ዳንዳዒባኣይ?» ጌዒ ዖኦጬኔ።

29ዬሱሴ ኬኤዛዖ፦ «ሓያ ጉዴሢ ሺኢጲሢና ሃሣ ሙኡዚ'' ሓሺ'' ሺኢቂሢና ማዒባኣታቶ ሜሌ'' ዓይጎና ኬስኩዋሴ» ጌዔኔ።

ዬሱሴ ዒዛ ሄላ''ንዳ ሜታሢና ሓይቦ''ና ዛሎ'' ሃሣ ኬኤዜሢ

(ማቲ. 17፥22-23፤ ሉቃ. 9፥43-45)

30ዬሱሴና ዒዛኮ ጊንፆ ሓንታ ናኣቶ''ና ዬኖ ቤዞ ሓሺ'' ጌሊላ ዓጮና ቲቂ ዴንዴኔ፤ ዬሱሴ ዒዚ ዓኣ ቤዞ ዖኦኒያ ዔራንዳጉዲ ኮዒባኣሴ። 31ዓይጎሮ ጌዔቶ ዒማ''ና ዒዚ ፔኤኮ ጊንፆ ሓንታ ናኣቶ''፦ «ዓሲኮ ናዓሢ ዓሲ ኩሽካ ዓኣሢ ዒንጊንታንዳኔ፤ ዔያታኣ ዒዛ ዎዻንዳኔ፤ ሓይቄሢኮ ጊንፃ ሓይባ''ፓ ሓይሣሳ ኬሎ''ና ዔቃንዳኔ» ጌዒ ዔርዚሢዳ ዓኣሢሮኬ።

32ዒዛኮ ጊንፆ ሓንታዞንሢም ዬይ ዒ ጌዔ ባካ ዔርቲባኣሴ፤ ማዔቶዋ ማሂ ዒዛ ዖኦጫኒ ዔያታ ዒጊጬኔ።

ቢያፓ ባሼ ዖናዳይ?

(ማቲ. 18፥1-5፤ ሉቃ. 9፥46-48)

33ዬሱሴና ዒዛኮ ጊንፆ ሓንታዞንሢና ቂፒርናሆሜ ዓጮ'' ሙኪ ማኣሪ ጌሌስካፓ ዬሱሴ ዒዛኮ ጊንፆ ሓንታዞንሢ ኮራ፦ «ዒንሢ ዎንዴ ጎይፆይዳ ዓኣዖ ዎላ'' ማርማሢ ዓይጌንዴዳይ?» ጌዒ ዖኦጬኔ።

34ዔያታ ጋዓንቴ ዚቲዮ ጌዔኔ። ዓይጎሮ ጌዔቶ ዔያታ ጎይፃ፦ «ኑ ጊዳ''ፓ ቢያ ባሼሢ ዖናዳይ?» ጌዒ ማርሜሢሮኬ። #ሉቃ. 22፥24። 35ዬሱሴ ዴዔሢኮ ጊንፃ ታጶ ላምዖንሢ ዔኤላ''ዖ፦ «ቢያፓ ቤርታ ማዓኒ ኮዓይ ዖናታቶዋ ቢያፓ ጋፒንሢና ሓሣ ቢያም ማዻያ ማዓንዳያ ኮይሳኔ» ጌዔኔ። #ማቲ. 20፥26-27፤ 23፥11፤ ማር. 10፥43-44፤ ሉቃ. 22፥26። 36ዬካፓ ፔቴ'' ዻካ'' ናይ ዔያቶ ቤርታ ዔቂሲ ናዖ ኮንቂጋፓ ሂዚ ጌዔኔ፦ 37«ሓያጉዴ ናኣቶ''ይዳፓ ፔቴ''ታዖ ታ ሱ'ንፆና ቦንቺ ዔካሢ ታና ዔካኔ፤ ታና ዔካሢ ታና ሌሊቱዋንቴ ታና ዳኬሢያ ዔካኔ።» #ማቲ. 10፥40፤ ሉቃ. 10፥16፤ ዮሓ. 13፥20።

ዬሱሴኮ «ኑና ዒፁዋኣሢ ኑኡና ዎላ''ኬ» ጌዒፆ

(ሉቃ. 9፥49-50)

38ዮሓኒሴ ዬሱሴም፦ «ዔርዛሢዮ! ፔቴ'' ዓሲ ኔ ሱ'ንፆና ፑርታ ዓያና ኬሳ''ንቴ ኑ ዛጋዖ ዒዚ ኑኡና ዎላ''ቱዋኣሢሮ ዒዛ ኑኡኒ ላኣጌኔ» ጌዒ ኬኤዜኔ።

39ዬሱሴ ማሓዖ፦ «ታ ሱ'ንፆና ዓኪ ዲቃሣ ባኣዚ'' ማዺ ማዺ ቤዞና ታ ዑፃ ፑርታ ጌስታንዳይ ባኣሢሮ ሓሹ''ዋቴ ላኣጊፖቴ፤ 40ዓይጎሮ ጌዔቶ ‹ኑና ዒፁዋኣሢ ቢያ ኑኡና ዎላ''ኬ› » ጌዔኔ። #ማቲ. 12፥30፤ ሉቃ. 11፥23። 41ጎኔ ታ ዒንሢም ጋዓኔ፤ ዒንሢ ታኣሮ ማዔሢሮ ፔቴ'' ሙርሳና ዋኣሢ ዒንሢ ዑሻ ዓሢም ዋኣፆ ዑሼሢ ዛሎ''ሮ ዒንጊንታንዳ ባኣዚ'' ባይቃዓኬ። #ማቲ. 10፥42።

ጎሜኮ ካራ ማዓ ባኣዚ''

(ማቲ. 18፥6-9፤ ሉቃ. 17፥1-2)

42ዬሱሴ ኬኤዛዖ፦ «ታና ጉሙርቃ፥ ሓንሢ ዻኮ''ንሢፓ ፔቴ''ማ ዻቢሳያ ዖና ማዔቶዋ ፑኡፒ ዎንሢ ሆላ'' ቱኪ'' ባዞ''ይዳ ኬኤሪንቴቶ ቃራኬ፤ 43ዬያሮ ኩጫ ኔና ዻቢሳቴ ቲቂ ኔኤፓ ኬኤሬ፤ ላምዖ ኩቺ ዓኣንቴ ጋኣናኣሜይዳ፥ ታሞ ባይቁዋኣሢዳ ኬኤሪንቲፃፓ ኩቺ ዱጴያ ማዒ ናንጎ ማኣሪ ጌሊፃ ቃራኬ። #ማቲ. 5፥30። [ 44ጋኣናኣሜ ጌይንታ ቤዛ ዒኢካ ዓኣ ዛኣላ'' ሓይቁዋያ፥ ታማኣ ባይቁዋ ቤሲኬ።]#9፥44 ፔቴ'' ፔቴ'' ሚናኣ ማፃኣፓ ፓይ. 44 ጊዳ'' ቃሳ''ኔ፤ ዬና ቃኣሌ''ላ ፓይ. 48 ጊዳ'' ዓኣዞ ማላያኬ። 45ቶካ'' ኔና ዻቢሳቴ ኔኤፓ ቲቂ ኬኤሬ፤ ላምዖ ቶኪ ቢያ ዓኣንቴ ጋኣናኣሜ ጌሊፃፓ ፔቴ'' ቶኪና ማዒ ናንጎ ማኣሪ ጌሊፃ ቃራኬ። [ 46ጋኣናኣሜ ጌይንታ ቤዛ ዒኢካ ዓኣ ዛኣላ'' ሓይቁዋያ፥ ታማኣ ባይቁዋ ቤሲኬ።]#9፥46 ፔቴ'' ፔቴ'' ሚናኣ ማፃኣፓ ፓይ 46 ጊዳ'' ቃሳ''ኔ፤ ዬና ቃኣሌ''ላ ፓይ. 48 ጊዳ'' ዓኣዞ ማላኔ። 47ዓኣፓ ኔና ዻቢሳቴ ኔኤፓ ኬሲ'' ኬኤሬ፤ ላምዖ ዓኣፒ ዓኣንቴ ጋኣናኣሜ ጌሊፃፓ ፔቴ'' ዓኣፒና ናንጎ ማኣሪ ጌሊፃ ቃራኬ። #ማቲ. 5፥29። 48ጋኣናኣሜ ጌይንታ ቤዛ ዒኢካ ዓኣ ዛኣላ'' ሓይቁዋያ፥ ታማኣ ባይቁዋ ቤሲኬ። #ዒሲ. 66፥24።

49«ፆኦሲም ዒንጎ ባኣዚ'' ሶኦጌ ዋሂ ጌኤሾ''ሢጉዲ ዓሲ ቢያ ታሚዳ ጌሊ ጌኤሽኪ ኬስካንዳኔ፤

50«ሶኦጌ ኮሺኬ፤ ጋዓንቴ ሶኦጌኮ ጌኤሻ''ኒ ዎልቄ ባኣያ ማዔቶ ዓይጎና ዒንሢ ጌኤሻ''ንዳይ? #ማቲ. 5፥13፤ ሉቃ. 14፥34-35።

«ዒንሢኮዋ ሶኦጌጉዲ ጌኤሻ'' ዎልቄ ዓኣያ ማዖንጎ፤ ሴካና ሓንጋና ዎላ'' ጊኢጊ ኮሺ ናንጉዋቴ።»

Currently Selected:

ማርቆሴ 9: MNT

Highlight

Copy