ሉቃሴ 7

ፄኤቶ ፖኦሊሶ ዓይሣስኬያኮ ጉሙርቂሢ

(ማቲ. 8፥5-13)

1ዬሱሴ ዬያ ቢያ ዴሮ''ም ኬኤዚ ጋፒሴስካፓ ቂፒርናሆሜ ካታሞ ዓኣዼኔ። 2ዒኢካ ፔቴ'' ሮሜ ዓጪ ዓሲ ማዔያ፥ ፄኤታ ፖኦሊሴ ዓይሣስኬይ ዓኣኔ። ዒዚ ሚርጌ ናሽካ፥ ዒዛም ዓይሢንቲ ማዻስኬይ ኮሺ'' ሃርጊንቲ ሃይቃኒ ዑኬኔ። 3ፄኤቶ ፖኦሊሶ ዓይሣሢ ዬሱሴ ዛሎ'' ዋይዜ ዎዶ''ና ዓይሁዶ ዓሶኮ ጪሞ ኮራ፦ «ሃዳራቴ፥ ዬሱሴ ሙኪ ታኣኮ ማዻሢ ፖዒሳንዳጉዲ ዒዛ ታኣም ሺኢቁዋቴ» ጌዒ ዔያቶ ዳኬኔ። 4ዔያታ ዬሱሴ ባንሢ ዓኣዻዖ፦ «ዬያ ዒዛም ኔ ማዻኒ ኮይሳ ዓሲኬ፤ 5ዒዚ ኑኡኮ ዴሮ'' ናሽካያኬ፤ ዬያሮ ኑኡኮ ቡኪንቶ ቤሲያ ዒ ኑም ማዤኔ» ጌይ ዶዲሺ ዒዛ ሺኢቄኔ።

6ዬያሮ ዬሱሴ ዬንሢ ዓሶንሢና ዎላ'' ዓኣዺ፥ ፄኤቶ ፖኦሊሶ ዓይሣሢኮ ማኣሮ ሄላ''ኒ ዑካዛ ላሚ ሃሣ ፄኤቶ ፖኦሊሶ ዓይሣሢ ዒዛኮ ላጌስኬንሢ ዬሱሴ ኮራ፦ «ጎዳሢዮ! ታኣኒ፡ ኔ ታ ማኣሪ ጌላንዳ ዓሲቱዋኣሢሮ ታ ኮይላ'' ሙኪ ላቢ''ፖ። 7ታኣኒያ ኔ ኮይላ'' ሙካኒ ዳንዳዓ ዓሲቱዋሴ፤ ዬያሮ ኔኤኒ ዬካ ዓኣዖ ዻንጋና ሌሊ ዓይሤቴ ታኣኮ ማዻሢ ፖፖዓንዳኔ። 8ታኣኒ ታ ቶኦኪና ዎይሣ ዓሶም ዓይሢንታያታዖ ታኣኮ ዴማ'' ታ ዓይሣ ፖኦሊሴ ዓኣኔ። ዬያሮ ዔያቶይዳፓ ፔቴ''ሢ ‹ዴንዴ› ታ ጋዓዛ ዴዴንዳኔ፤ ባጋሢ ሃሣ ‹ሃኒ ሙኬ› ታ ጋዓዛ ሙሙካኔ፤ ታኣም ማዻሢማኣ ‹ሃያ ማዼ› ታ ጋዓዛ ማማዻኔ» ሂዚ ጌዒ ኬኤዙዋቴ ጌይ ዳኬኔ።

9ዬሱሴ ዬያ ዋይዛዖ ዲቃቲ ሄርሺ ዒዛ ጊንፆ ሙካ ዴሮ'' ባንሢ ሺሪ፦ «ዒስራዔኤሌይዳታዖ ሃያጉዴ ጉሙርቂሢ ፔቴ''ታዖ ታ ዴንቂባኣሴ፤ ታ ዒንሢም ጋዓኔ» ጌዔኔ።

10ዒዛ ኮይላ'' ዳኪንቴ ዓሶንሢ ፄኤቶ ፖኦሊሶ ዓይሣሢ ማኣሮ ባንሢ ማዔ ዎዶ''ና ዒዛኮ ማዻሢ ፖዒ ዓኣንቴ ዔያታ ዴንቄኔ።

ዬሱሴ ፔቴ'' ዓኒ ሃይቄ ላኣሌሎኮ ሓይቄ ናዖ ዻቂሼሢ

11ዬማፓ ኔጉዋዖ ዬሱሴ ናይኔ ጌይንታ ፔቴ'' ካታማስኬኖ ዒዛኮ ጊንፆ ሃንታዞንሢና ሜሌ'' ሃሣ ሚርጌ ዴሬና ዎላ'' ዓኣዼኔ፤ 12ዬሱሴ ካታሜሎ ጌላ ካሮ'' ዑካዛ ዓሳ ሌሲ'' ኬዲ ካታማ''ፓ ኬስካኔ። ዬይ ሓይቄ ናዓሢ ዒንዶኮ ፔቴ''ኬ። ዒንዴላኣ ዓኒ ሓይቄያ ዜኤሪንዶኬ፤ ሓሣ ዬኖ ካታሜሎይዳፓ ሚርጌ ዓሲ ዒዞና ዎላ'' ዓኣኔ። 13ጎዳሢ ዒዞ ዛጋዖ ዒዞ ሚጪንቲ፦ «ዔናኣሬ፥ ዬኤኪፖ» ጌዔኔ። 14ዬካፓ ዬሱሴ ቤርቲም ዴንዳዖ ኪንቺሎ ኩቻ ሄላ''ዛ ኬዴ ዓሳ ዔቄኔ፤ ዬሱሴ ዒማ''ና፦ «ሃይ ኔ ዼጌሢ ዔቄ ታ ኔና ጋዓኔ!» ጌዔኔ። 15ሓይቄሢያ ዬማና ዔቂ ዴዒ ጌስቲሢ ዓርቄኔ፤ ዬካፓ ዬሱሴ ዒንዴሎም፦ «ሓይሾ ኔኤኮ ናዓሢ» ጌዒ ዒንጌኔ፤

16ዬያሮ ቢያሢ ዒጊቹሞ ዓርቄም፦ «ኑ ባኣካ'' ፑኡፒ ፆኦሲ ማሊሢ ኬኤዛያ ዔቄኔ፤ ፆኦሲያ ፔ ዴሮ'' ዻቂሻኒ ሙኬኔ» ጌዒ ጌዒ ፆኦሲ ጋላቴኔ።

17ዬሱሴኮ ሱ'ንፃ ዪሁዳ ዓጫ'' ሃሣ ኮይሎ ዓጮ'' ቢያይዳ ዋይዚንቴኔ።

ማስካ ዮሓኒሴ ዳኬ ኪኢቶ'' ዓሶንሢ

(ማቲ. 11፥2-19)

18ዮሓኒሴኮ ጊንፆ ሃንታዞንሢ ዬሱሴ ማዼ ባኮ ቢያ ዮሓኒሴም ኬኤዜኔ፤ ዒዚያ ዒዛኮ ጊንፆ ሓንታዞንሢዳፓ ላምዖንሢ ዔኤሊ''፦ 19« ‹ሙካንዳኔ› ጌይንቴ ሜሲሔ ኔናሞ ሜሌ'' ኑ ካፖንዶይ? ጌዒ ዒዛ ዖኦጩዋቴ» ጌይ ዬሱሴ ባንሢ ዳኬኔ።

20ዔያታ ዬሱሴ ኮራ ዓኣዻዖ፦ « ‹ሙካንዳኔ› ጌይንቴ ሜሲሔ ኔናሞ ሜሌ'' ኑ ካፖንዶይ? ጌይ ዒዛ ዖኦጩዋቴ ጌዒ ማስካ ዮሓኒሴ ኔ ኮራ ኑና ዳኬኔ» ጌዔኔ።

21ዬሱሴ ዬማና ዓሶ ዱማ ዱማ ዶርዖና ፑርታ ሓርጌናይዳፓ ፓሤኔ፤ ፑርቶ ዓያኖዋ ኬሴ''ኔ፤ ሃሣ ሚርጌ ዓኣፖ ባይቄ ዓሶኮዋ ዓኣፖ ቡሌ''ኔ። 22ዬሱሴ ሙኬ ኪኢቶ'' ዓሶንሢም፦ «ማዒ ዴንዲጋፓ ዮሓኒሴም ዒንሢ ዛጌ ባኮና ዋይዜ ባኮዋ ሂዚ ጌይ ኬኤዙዋቴ፦ ዓኣፖ ባይቄ ዓሳ ዛጋኔ፤ ዎቦ ዓሳ ፒኪ ሃንታኔ፤ ዑፃ ኬስካ ዶርዓሢና ዓኣ ዓሳ ዻቃኔ፤ ዋዮ ባይቄ ዓሳ ዋይዛኔ፤ ሃሣ ሃይቄ ዓሳ ዔቃኔ፤ ማንቆ ዓሶማኣ ኮዦ ሃይሳ ኬኤዚንታኔ። #ዒሲ. 35፥5-6፤ 61፥1። 23‹ጎኔሞ ሉኡዚዳይ?› ጌዒ ታ ዛሎ''ና ዹቂንቱዋኣሢ ዓንጂንቴያኬ» ጌዔኔ።

24ዮሓኒሴ ኮራፓ ሙኬ ኪኢቶ'' ዓሶንሢ ማዒ ዴንዴሢኮ ጊንፃፓ ዬሱሴ ዮሓኒሴ ዛሎ'' ዴሮ''ም ሂዚ ጌዒ ኬኤዚሢ ዓርቄኔ፦ «ዒንሢ ሃካ ዓሲ ናንጉዋ ዳውሎ'' ዓይጎ ዛጋኒ ሙኬይ? ዢባራ ዓጊሣ ዱሮ'' ፒሎ'' ዛጋኒዳ? 25ሃሣ ዒንሢ ዓይጎ ዛጋኒ ኬስኬይ? ጉኡፂሲ ሱኪ ዹይሶና ዓፒሎ ማኣዔ ዓሲ ዛጋኒዳ? ዬያጉዴ ዓፒሎ ማኣዒ፥ ፔና ኮሺ'' ናንጋ ዓሳ ካኣቶ'' ማኣራ ዓኣኔ! 26ሂዴቶ ዓይጎ ዒንሢ ዛጋኒ ኬስኬይ? ፆኦሲ ማሊሢ ኬኤዛ ዓሲ ዛጋኒዳ? ሂዮ ጎኔኬ፥ ፔቶ'' ዬያ ፆኦሲ ማሊፆ ኬኤዛሢዳፓ ባሼሢ ዛጋኒኬ። 27ዒዚያ ‹ቤርታ ቤርታ ዴንዲ ጎይፆ ኔኤም ጊኢጊሻ ታኣኮ ኪኢቶ'' ናዓሢ ታ ዳካንዳኔ› ጌይንቲ ዒዛ ዛሎ'' ፃኣፒንቴሢኬ። #ሚል. 3፥1። 28ሳዖይዳ ሾይንቴ ዓሶይዳፓ ቢያ ዮሓኒሴፓ ባሻይ ዖኦኒያ ባኣሴ፤ ፆኦሲ ካኣቱሞ ጋራ ዓኣ ዓሶ ባኣካ'' ዓሲኬ ጌይንቱዋኣሢ ጋዓንቴ ዒዛፓ ባሼኬ» ጌዔኔ።

29ዬያ ዔያታ ዋይዜ ዎዶ''ና ዴራ'' ቢያ፤ ኮርሞ ዓሶፓ ሚኢሾ ቡኩሳ ዓሳኣ ዓቱዋዖ ዮሓኒሴ ኮራ ቤርታ ዋኣፆ ማስቴሢሮ ፆኦሲ ማዻ'' ፒዜ ማዔሢ ዔሬኔ። #ማቲ. 21፥32፤ ሉቃ. 3፥12። 30ፔርሴ ዓሶና ሙሴ ዔርዜ ዎጎ ዔርዛ ዓሳ ጋዓንቴ፦ «ዮሓኒሴ ኮራ ኑ ማስታዓ» ጌዒ ፆኦሲ ማሊፆ ዒፄኔ።

31ሄሊ''ሳዖ ዬሱሴ፦ «ዓካሪ ሃያ ዎዶ'' ዓሶ ዓይጎና ታ ማላታንዳይ? ዓይጎ ዔያታ ማላይ? ጌዔቶ፦ 32ዓሳ ቡካ ጶኦካ'' ዴዒ ዓማላ'' ናኣቶ'' ማላኔ፤ ዔያታ ዎሊ ዔኤሊ'' ዔኤሊ'' ‹ዎዛ ዓይኑሞ ኑ ዒንሢ ዋይዚሴኔ፤ ዒንሢ ጋዓንቴ ኮርጊባኣሴ፤ ቃዮ ኑ ቃዬኔ፥ ዒንሢ ጋዓንቴ ዬኤኪባኣሴ› ጋዓዞንሢኬ። 33ዬያጉዲ ማስካ ዮሓኒሴ ሙዖ ሃሾ ዳምቦ ካፓዛ ሃሣ ማሣ ዎይኖ ዑዦዋ ዑሽኩዋዖ ሙካዛ ‹ፑርታ ዓያና ዒዛይዳ ዓኣኔ› ዒንሢ ጌዔኔ። 34ዓሲኮ ናዓሢ ሙዒ ሙዒ ሃሣ ዑሽኪ ዑሽኪ ሙካዛ ‹ሃይ ሃሣ ሙኡዚ''ና ማሣ ዑሺና ናሽካያ፥ ኮርሞ ዓሶፓ ሚኢሾ ቡኩሳዞንሢና ጎሞ ዓሶናኮ ላጌኬ› ዒንሢ ጌዔኔ። 35ጋዓንቴ ፆኦሲ ዔራቶኮ ፒዙማ ፆኦሲም ዓይሢንታ ዓሶ ዛሎ''ና ፔጋዺ ዔርታኔ» ጌዔኔ።

ዬሱሴኮ ቶኮ'' ሳውቃ ቲዦና ቲሽኬ ላኣሊስኬኖ

36ፔቴ'' ፔርሴ ዓሲስኬይ ዬሱሴ ሙኡዚ'' ሙዓንዳጉዲ ዔኤላ''ዛ ዬሱሴ ዬያ ዓሢ ማኣሪ ጌሊ ሙዓኒ ዴዔኔ። 37ዬኖ ካታሜሎይዳ ፔቴ'' ጎሜና ዓኣ፥ ላኣሊስኬና ዓኣኔ፤ ዬሱሴ ፔርሴ ዓሢ፥ ሲሞኦኔ ማኣሮይዳ ሙዖም ዔኤሊ''ንቴሢ ዒዛ ዋይዛዖ ሳውቃ ቲሺ ሹቺ ቢልቃፄና ኩንሢ ዔኪ ሙኪ፥ 38ዬሱሴኮ ጊንፆ ዛሎ''ና#7፥38 ጊንፆ ዛሎ''ና፦ ጋዓዛ ዬኖ ዎዶ''ና ዓይሁዶ ዓሳ ፔቴ'' ፔቴ''ና ሙዖ ዴዒ ሙዓ ጎይፆ ዬሱሴ ዔንዴይዳ ኬሬ ጌሢ፥ ዛላዺ ዓኣንቴኬ። ቶኮ'' ዓጫ ዔቂ፥ ዬኤኪ ዬኤኪ ዒዛኮ ቶኮ''ዋ ፔ ዓቢፆና ማስኪ ፔኤኮ ቶኦኮ'' ጋሞና ዑጫኔ፤ ሃሣ ቶኮ'' ዒዛኮ ሄርቂያ ሄርቂ ሳውቃ ቲዦናኣ ቲሽካኔ። #ማቲ. 26፥7፤ ማር. 14፥3፤ ዮሓ. 12፥3። 39ሙዖ ዒዚ ሙዖም ዔኤሌ'' ፔርሴ ዓሢ ዬያ ዛጌ ዎዶ''ና፦ «ሃይ ዓሢ ፆኦሲ ማሊሢ ኬኤዛ ዓሲ ማዔቴ፥ ሃና ዒዛኮ ዑፆ ፒፃ'' ላኣሌላ ዖና ማዔቶ ሃሣ ዎዚጉዴ ጎሜና ዓኣያ ማዔቴያ ዔሬያናንዳኔ» ጌይ ፔ ዒኖና ማሌኔ።

40ዬሱሴያ ፔርሴ ዓሢ ኮይላ''፦ «ሲሞኦኔ! ፔቴ'' ታ ኔኤም ኬኤዛ ባኣዚ'' ዓኣኔ» ጌዔኔ።

ዒዚ፦ «ዔርዛሢዮ! ሂንዳ ታኣም ኬኤዜ» ጌዔኔ።

41ዬሱሴያ ሂዚ ጌዒ ሃይሶ ኬኤዚሢ ዓርቄኔ፦ «ፔቴ'' ዓሲዳፓ ሚኢሼ ታልዔ ላምዖ ዓሲ ዓኣኔ፤ ፔቴ''ሢ ዶንጎ ፄኤታ ኬሊ'' ማዾ ማዼም ዒንጊንታ ቢራ፤ ባጋሢ ሃሣ ዶንጊታሚ'' ኬሊ'' ማዾ ማዼም ዒንጊንታንዳ ቢራ ታልዒ ዔኬኔ። 42ላምዖንሢ ዔያታ ታልዒ ዔኬ ሚኢሾ ጪጎ ባሺንቴም ታልዔሢ ዔያቶኮ ጋሎ'' ማሂሱዋዖ ሃሼ''ኔ፤ ዓካሪ ጋሎ'' ዓሶ ላምዖንሢዳፓ ዎይ ባሼ ታልዔ ዓሢ ናሽካንዳያ ማላይ?» ጌዔኔ።

43ሲሞኦኔያ፦ «ሚርጌ ጋላ'' ዓቴ'' ዓሢ ባሼ ዒዛ ናሽካንዳያ ማላኔ» ጌይ ማሄኔ።

ዬሱሴ፦ «ኔ ጌዔሢ ጎኔኬ» ጌዔኔ።

44ዬካፓ ዬሱሴ ላኣሌሎ ባንሢ ሺራዖ፦ «ሃኖ' ላኣሌሎ ኔ ዛጋ? ታ ኔ ማኣሪ ጌላዛ ኔኤኒ ታ ቶኮም ዋኣሢታዖ ዒንጊባኣሴ፤ ዒዛ ጋዓንቴ ቶኮ ታኣኮ ፔኤኮ ዓቢፆና ማስኪ ፔ ቶኦኮ'' ጋሞና ዑጬኔ። 45ታ ኔ ኮይላ'' ጌላኣና ኔ ታና ሄርቂባኣሴ፤ ዒዛ ጋዓንቴ ታ ኔ ማኣሪ ጌሌሢዳፓ ዓርቃዖ ታኣኮ ቶኮ ሄርቂፆ ሃሺ''ባኣሴ፤ 46ኔኤኒ ታኣኮ ቶኦኮ'' ዛይቶ ቲዦናታዖ ቲሽኪባኣሴ፤ ዒዛ ጋዓንቴ ታኣኮ ቶኮ ሳውቃ ቲዦና ቲሽኬኔ፤#7፥46 ዬይ ማዻ'' ዓይሁዶ ዓሳ ሾኦቺ ቦንቻዖ ማዻ ማዾኬ። 47ሚርጌ ጎማ ዒዞኮ ዓቶም ጌይንቴሢሮኬ ሚርጌና ዒዛ ናሽኬሢ፤ ታ ኔኤም ጋዓኔ። ጎማ ዻካ'' ዓቶም ጌይንቴሢ ጋዓንቴ ናሽካሢያ ዻካ''ኬ» ጌዔኔ።

48ዬካፓ ዬሱሴ ላኣሌሎ ኮራ፦ «ኔኤኮ ጎማ ዓቶም ጌይንቴኔ» ጌዔኔ።

49ዒዛና ዎላ'' ሙዓ ዓሳ፦ «ጎሜ ዓቶም ጋዓሢ ሃይ ዎዚ ዓሲዳይ!» ጌዒ ጌዒ ፔ ዒኖና ማሊሢ ዓርቄኔ።

50ዬሱሴ ጋዓንቴ ላኣሌሎ ኮራ፦ «ኔኤኮ ጉሙርቂፃ ኔና ዻቂሼኔ፤ ኮሺ ዓኣዼ!» ጌዔኔ።

Currently Selected:

ሉቃሴ 7: MNT

Highlight

Copy