ሉቃሴ 2

ዬሱሴኮ ሾይንቶ

(ማቲ. 1፥18-25)

1ዬኖ ዎዶ''ና ሮሜ ዓጮ''ይዳ ዓኣ ዴሮ'' ቢያ ፓይዳኒ፥ ሱ'ንፃ ዴሮ''ኮ ፃኣፒንታንዳጉዲ ሮሜ ካኣቲ ዓውጊስፆሴ ዓይሤኔ። 2ቤርታዺ ዴሮ'' ፓይዳኒ ሱ'ንፆ ፃኣፖና ዎዶ''ና ቄርኔዎሴ ጎዖሢ ሶኦሪያ ዓጮ'' ዎይሣያኬ። 3ዬያሮ ፔቴ'' ፔቴ'' ዓሳ ሱንፆ ፃኣፒሳኒ ፔኤኮ ዓጮ'' ካታሞ ካታሞ ዴንዳኔ።

4ዮሴፔ ጌሊላይዳ ዓኣ ናዚሬቴ ካታማ''ፓ ዔቂ ዪሁዳ ዓጮ''ይዳ ዓኣ ዳውቴ ካታሞ ጌይንታ ቤኤቴሌሄሜ ዴንዴኔ፤ ዓይጎሮ ጌዔቶ ዒዛኮ ዜርፃ ዳውቴ ፃጳፓ ማዔሢሮኬ። 5ዒዚ ፃኣፒንታኒ ዓኣዼሢያ ጎጳዺ ዓኣ፥ ዒዛኮ ዖኦጮዞ፥ ማይራሞና ዎላ''ኬ። 6ዔያታ ላምዖንሢ ቤኤቴሌሄሜ ካታሞይዳ ዓኣንቴ ማይራሞኮ ሾይፆ ኬላ'' ሄሌ''ም፥ 7ዒኢካ ዒዞኮ ኮይሮ ናዓሢ ሾዓዖ ናይ ዓርቆ ቱርጫና ካንቄኔ፤ ሾኦጫ ዎርቃ ቤዛ ቤሲ ዔያታ ዴንቂባኣሢሮ ባይ ሞስካ፥ ባኣታ ሙዖ ሙዓ ጎንጋላ'' ናዓሢ ላይሤኔ።

ቆልሞ ሄንቃ ናኣቶ''ና ኪኢታንቾንሢና

8ዬኖ ዓጮ''ይዳ ካታሞኮ ዙላ፥ ቦኦሎ''ይዳ ቆልሞ ሄንቂ ሞኦሢዳ ዎርቃ ናይ ዓኣኔ። 9ዒማ''ና ዔያቶም ፆኦሲ ኪኢታንቻሢ ጴዼም፥ ፆኦሲኮ ቦንቾ ፖዓ ዔያቶ ዑፃ ፖዔሢሮ ሚርጌና ዔያታ ዒጊጪ ዲቃቴኔ፤ 10ኪኢታንቻሢ ጋዓንቴ፦ «ሃይ ዒንሢ ዎይታይ? ዒጊጪፖቴ፤ ዴሬም ቢያ ዼኤፒ ዎዛ ማዓ ኮሺ ሃይሴ ታ ዒንሢም ኬኤዛንዳኔ፤ 11ዋይዙዋቴ! ሓኖ'' ዳውቴ ካታሞይዳ ዼኤሻ ዒንሢም ሾይንቴኔ፤ ዒዚያ ጎዳ ኪሪስቶሴኬ። 12ዬያኮ ማላታ ያዺ ማዓንዳኔ፦ ናይ ዓርቆ ቱርጫና ካንቂንቴ ናይ፥ ባይ ባርታይዳ ባኣታ ሙዖ ሙዓ ጎንጋላ'' ላሂ ዓኣንቴ ዒንሢ ዴንቃንዳኔ» ጌዔኔ።

13ዬማና ዔያታ ዔሩዋንቴ ሚርጌ ጫሪንቺ ኪኢታንቻ ኪኢታንቻሢና ዎላ'' ጴዻዖ ፆኦሲ ጋላቲሢና፦

14«ጫሪንጮይዳ ፆኦሲም ቦንቾ ማዖም፤

ሳዖይዳኣ ዒዚ ናሽካ ዓሶም ቢያ ኮሹሞ ማዖም» ጌዔኔ።

15ኪኢታንቾንሢ ዔያቶይዳፓ ዱማዺ ሌካ ጫሪንጮ ዴንዴ ዎዶ''ና ቆልሞ ሄንቃ ናኣታ'' ዎሊ ኮይላ''፦ «ዓካሪ ቤኤቴሌሄሜ ኑ ዴንዲ፥ ሃሢ ማዔ ባኮና ጎዳ ኑም ፔጋሲ ዻዌ ባኮ ኑ ዛጎም» ጌዔኔ።

16ዔያታ ዒማ''ና ዑኬና ዴንዳዖ ማይራሞና ዮሴፔና ዴንቄኔ፤ ሃሣ ናዖዋ ባኣቶ ባርታ ባኣታ ሙዖ ሙዓ ጎንጋላ'' ላሂ ዓኣንቴ ዴንቄኔ። 17ናዓሢ ዔያታ ዛጌሢኮ ጊንፃ ኪኢታንቻሢ ዒዛ ዛሎ'' ዔያቶም ኬኤዜሢ ዔያታ ማይራሞና ዮሴፔናም ኬኤዜኔ። 18ቆልሞ ናኣታ'' ኬኤዜ ባኮ ዋይዜ ዓሳ ቢያ ዲቃቲ ሄርሼኔ። 19ማይራማ ጋዓንቴ ዬያ ቢያ ባኮ ፔ ዒና'' ዓርቂ ማላኔ። 20ቆልሞ ናኣታ'' ቢያ ባካ ኪኢታንቻሢ ዔያቶም ኬኤዜሢጉዲ ማዔም ዔያታ ዛጌሢና ዋይዜሢናሮ ፆኦሲ ቦንቺ ቦንቺ ሃሣ ጋላቲ ጋላቲ ዔያታ ሙኬ ቤዞ ማዒ ዴንዴኔ።

21ናዓ ሾይንቴስካፓ ሳሊ'' ኬሊ''ኮ ጊንፃ ናዖኮ ዓቲንቶ ቤርቶ ቲቂፆ ዎጎ ኬሎ''ና ሱ'ንፃ ዒዛኮ «ዬሱሴ» ጌይንቴኔ። ዬይያ፦ ሓጊ ዒንዳ ዒዛ ጎጳዹዋንቴ ቤርታ ኪኢታንቻሢ ዒዛም ጌሤ ሱ'ንፆኬ። #ሌዊ. ዓኬ 12፥3፤ ሉቃ. 1፥31።

ዬሱሴ ጌኤዦ ማኣሪ ዔኪ ዓኣዾናሢ

22ሙሴ ዔርዜ ዎጎ ጎይፆና ዑፆ ጌኤሺፆ ዎጋ'' ጋፓ ኬላ'' ሄሌ''ሢሮ ናዓሢ ጎዳም ዔያታ ሺኢሻኒ ዔኪ ዬሩሳላሜ ዴንዴኔ። #ሌዊ. ዓኬ 12፥6-8። 23ዬያ ዔያታ ዓይጎሮ ማዼይ ጌዔቶ ጎዳኮ ዎጎይዳ፦ «ዓቲንቄ ማዔ ቶይዲ ናይ ቢያ ጎዳም ዒንጊንቲ ዱማዼያ ማዖንጎ» ጌይንቲ ፃኣፒንቴሢሮኬ። #ኬሲ. ማፃ 13፥2፤ 12። 24ዬያጉዲ ሃሣ ጎዳኮ ዎጎይዳ፦ «ላምዖ ኪሬ፤ ማዒባኣቴ ላምዖ ዶኦሌ'' ናይ ሚቺ ዒንጎ ካኣዦም ዒንጋንዳያ ኮይሳኔ» ጋዓሢሮኬ።

25ዒማ''ና ዬሩሳላሜይዳ ሲሞኦኔ ጎዖ ፔቴ'' ዓሲስኬያ ዓኣኔ፤ ዒዚያ ፂሎ'' ሃሣ ፆኦሲ ዒጊጫ ዓሲኬ፤ ዒስራዔኤሌኮዋ ሃጊ ማዓንዳ ዻቂንቶ ዎዞ ካፓያ ሃሣ ዓያና ጌኤሺያ ዒዛና ዓኣያኬ። 26ዒዚ ጎዳፓ ማዔ፥ ሜሲሔ ዛጉዋዖ ሃይቂንዱዋኣሢ ዓያና ጌኤሺ ዒዛም ቤርታ ዔርዜያኬ። 27ዬኖ ኬሎ'' ዓያና ጌኤሺ ዒዛ ዔቂሴም ጌኤዦ ማኣሪ ዒ ዓኣዼኔ፤ ዒማ''ና ዮሴፔና ማይራሞና ካኣዦ ዎጎ ኩንሣኒ ናዓሢ ዔኪ ጌኤዦ ማኣሪ ጌሌኔ። 28ዒማ''ና ሲሞኦኔ ናዓሢ ኮንቂ ፆኦሲ ጋላቲሢና፦

29«ታ ጎዳሢዮ! ሓይሾ፥ ኔ ታኣም ኬኤዜ ሃጊ ማዓንዳ ዎዞ ቃኣላ'' ኩሜኔ፤

ዓካሪ ሃሢ ታና ኔኤኮ ማዻሢ ኮሺና ዔኬ፤

30-31ታኣኒ ታ ዓኣፒና ዓሶም ቢያ ኔ ጊኢጊሼ፥ ዼኤሻሢ ዛጌኔ፤

32ዒዚ ሜሌ'' ዴሮ''ም ጎኑሞ ፔጋሲ ዻዋ ፖዒ ማዓንዳኔ፤

ኔኤኮ ዴሮ'' ዒስራዔኤሌ ዓሶዋ ዒ ቦንቺሳንዳኔ» ጌዔኔ።

33ዮሴፔና ማይራሞና ናዓሢ ዛሎ'' ጌይንቴ ባኮ ቢያና ዲቃቲ ሄርሼኔ። 34ሲሞኦኔ ዔያቶ ዓንጄሢኮ ጊንፃ ዱማና ናዓሢኮ ዒንዶ ማይራሞም፦ «ሃይ ናዓሢ ዒስራዔኤሌይዳ ሚርጌ ዓሶኮ ባይሲንታ፤ ሃሣ ሚርጌ ዓሶኮ ጋዓንቴ ዻቂንታ ካራ ማዓንዳኔ፤ ዒዚ ሚርጌሢ ዒዛ ጎናሲ ዔኩዋ ማላታ ማዓንዳኔ። 35ዬያና ሚርጌ ዓሶኮ ዒኖይዳ ዓኣሺንቴ ማሊፃ ፔጋዺ ጴዻንዳኔ፤ ዖዪሢያ ኔኤኮ ዒኖ'' ጬንቻ ዓፓሮጉዲ ቲቃንዳኔ» ጌዔኔ።

36ዬያጉዲ ሃሣ ዬኖ ዎዶ''ና ዓሴኤሬ ዜርፆይዳፓ ማዔ፥ ፓኑዔኤሌ ጎዖሢኮ ናዎ፥ ሃኣና'' ጌይንታ ፆኦሲ ማሊሢ ኬኤዛስኬና ዓኣኔ። ዒዛ ሚርጌ ጋርቼ ላኣሊኬ፤ ዓኒና ዎላ'' ዒዛ ላንካይ ሌዔ ዴዔስካፓ ዓኒ ዒዞኮ ሃይቄኔ፤ 37ዬካፓ ሌዓ ዒዞኮ ሳሊ''ታሚ'' ዖይዶ ማዓንዳያ ሄላ''ንዳኣና ጌኤዦ ማኣራፓ ዱማዹዋዖ ሙኡዚ'' ሓሺ'' ሺኢቆ ሺኢጲሢ ሺኢቂ ሺኢቂ ሮኦሪና ዋንቴና ቢያ ፆኦሲም ማዻያኬ። 38ዬኖና ዒዛ ሙኪ ፆኦሲ ጋላቲሢ ዓርቄኔ፤ ናዓሢ ዛሎ''ዋ ዬሩሳላሜኮ ዻቂንቶ ሃጊ ማዓንዳ ዎዛ ጌሢ ካፓዞንሢም ቢያ ኬኤዜኔ።

ዬሱሴኮ ናዚሬቴ ማዒ ዴንዲፆ

39ጎዳኮ ዎጎይዳ ዓይሢንቴ ዎጎ ቢያ ኩንሤስካፓ ጌሊላይዳ ዓኣ ዔያቶኮ ናንጎ ካታሞ ናዚሬቴ ዔያታ ማዒ ዴንዴኔ። #ማቲ. 2፥23። 40ናዓሢያ ዑጊ ዶዲ ዶዲ ዓኣዼኔ፤ ዒናዺያ ዶዴኔ፤ ሓሣ ፆኦሲ ዒዛ ዓንጄኔ።

ዬሱሴ ጌኤዦ ማኣሮይዳ

41ዮሴፔና ማይራሞና ሌዓ ሌዓ ዑሣ ዓኣዺፆ ቦንቾ ኬሎ''ሮ ዬሩሳላሜ ዓኣዻያኬ። #ኬሲ. ማፃ 12፥1-27፤ ላሚ. ዎማ 16፥1-8። 42ዬሱሴኮ ሌዓ ታጶ ላምዖ ማዔም ቤርታ ዔርቴ ጎይፆጉዴያ ዬኖ ቦንቾ ቦንቻኒ ዔያታ ዓኣዼኔ። 43ቦንቾ ኬላ'' ጋፔም ዔያታ ማኣሪ ማዓዛ ዬሱሴ ዬሩሳላሜይዳ ዓቴ''ኔ፤ ዮሴፔና ማይራሞና ጋዓንቴ ዒዚ ዒኢካ ዓቴ''ሢ ዔሪባኣሴ። 44ጎይፆ ዓኣዻ ዓሶና ዒዚያ ዎላ'' ዓኣያ ዔያቶም ማሌሢሮ ፔቴ'' ኬሊ'' ጎይሢ ጉቤ ዔያታ ዓኣዻዖ ዔያቶኮ ዒጊኖና ፔ ላጎና ኮይላ'' ኮዒሢ ዒዛ ዓርቄኔ። 45ጋዓንቴ ዔያታ ዒዛ ዴንቃኒ ዳንዳዒባኣሢሮ ዒዛ ኮዒ ኮዒ ጊንሣ ዬሩሳላሜ ማዔኔ። 46ሓይሦ ኬሊ''ኮ ጊንፃፓ ጌኤዦ ማኣራ ዔያታ ዒዛ ዴንቄኔ፤ ዒዚያ ዒኢካ ዎጎ ዔራ ዓሶ ባኣካ'' ዴዒ ዔያቶሲ ዋይዚ ሃሣ ዖኦጪሢያ ዖኦጫኔ። 47ዒዛሲ ዋይዛ ዓሳ ቢያ ዒዚ ማሊ ጶቂሣ ጶቂሢፆና ሓሣ ዒ ማሃ ማሂፆና ዛሎ''ሮ ዲቃቲ ሄርሻኔ። 48ዮሴፔና ማይራሞና ጌኤዦ ማኣሮይዳ ዒዛ ዴንቂ ዲቃቲ ሄርሻዖ ዒንዴላ ዒዛ ኮራ፦ «ታ ናዓሢዮ፥ ዓይጎሮ ኔ ኑና ሃያይዴይ? ኔኤኮ ዓዶና ታኣና ሜታዺ ኔና ኑ ኮዓንቴቱዋይ!» ጌዔኔ።

49ዬሱሴ ማሃዖ፦ «ዓይጎሮ ዒንሢ ታና ኮዔይ? ታኣኒ ታ ዓዶ ማኣራ ማዓንዳያ ኮይሳሢ ዒንሢ ዎንዴ ዔሩዋያዳ?» ጌዔኔ። 50ዔያቶም ጋዓንቴ ዒዚ ዬይ ጌዔ ባካ ዔርቲባኣሴ።

51ዬካፓ ዬሱሴ ዔያቶና ዎላ'' ናዚሬቴ ዴንዴኔ፤ ዒኢካ ዔያቶም ዒ ዓይሢንታኔ፤ ያዺ ማዓዛ ዒንዳ ዬያ ባኮ ቢያ ፔ ዒና ዓርቃኔ። 52ዬሱሴ ፆኦሲንታ ዓሲንታ ዎዛሳያ ማዔኔ፤ ሓሣ ዒናዺ ዔጶናኣ ዲጪ ዲጪ ዓኣዼኔ። #1ሳሙ. 2፥26፤ ኮኦኪ. 3፥4።

Currently Selected:

ሉቃሴ 2: MNT

Highlight

Copy