ማዢንቲ ማፃኣፔ 17

ዓቲንቶ ቤርቶ ቲቂፃ ፆኦሲ ጫኣቄ ጫኣቁሞኮ ማላታ ማዒፆ

1ዓብራሜኮ ሌዓ ታዞጲታሚ ታዞጳ ማዔ ዎዶና ናንጊና ናንጋ ጎዳ ዒዛና ካኣማዖ «ታኣኒ ቢያ ባኣዚ ዳንዳዓ ፆኦሲኬ፤ ኔኤኒ ታኣም ዓይሢንቲሢና ቢያ ዎዴ ፒዜ ማዔ ባኣዚ ማዼ፤ 2ታ ኔኤና ዎላ ጫኣቁሞ ጫኣቃንዳኔ፤ ዜርፆዋ ታ ኔኤኮ ኮሺ ሚርጊሻንዳኔ» ጌዔኔ። 3ዓብራሜ ባሊቶና ሳዖ ሄሊሲ ዚጊ ፆኦሲ ካኣሽካዛ ፆኦሲያ ዒዛም ሂዚ ጌዔኔ፦ 4«ኔኤም ታ ጫኣቃ ጫኣቁማ ሃያኬ፤ ሚርጌ ዴሬኮ ዓዶ ታ ኔና ማሃንዳኔ፤ 5ሚርጌ ዴሬኮ ዓዶ ታ ኔና ማሃንዳሢሮ ሃይፓ ሴካ ሱንፃ ኔኤኮ ዓብራሜ ጌይንቲፃ ዓቴም ዓብራሃሜ#17፡5 ዓብራሃሜ ጌይፃ፦ ዔብሬ ዓሶ ሙኡቺና «ሚርጌ ዓሲኮ ዓዶ» ጌይሢኬ። ማዓንዳኔ። #ሮሜ 4፡17። 6ሚርጌ ዴሬ ማዓንዳያ ሄላንዳኣና ዜርፆ ታ ኔኤኮ ሚርጊሻንዳኔ፤ ካኣቶ ማዓያኣ ዔያቶ ባኣካፓ ኬስካንዳኔ።

7«ኔኤና ኔኤኮ ዜርፆና፥ ሃሣ ሙካ ሾይንቶና ዎላ ታኣኮ ጫኣቁሞ ታ ናንጊና ዶዲሻንዳኔ፤ ዬያይዲ ኔኤና ኔኤኮ ጊንፃ ሙካ ዜርፆናኮ ታኣኒ ፆኦሲ ማዓንዳኔ። #ሉቃ. 1፡55። 8ሃሢ ኔ ሾኦቹሞና ናንጋ ሳዔሎ ኔኤና ኔ ዜርፆናም ታ ዒንጋንዳኔ፤ ካኣናኔ ዓጮ ናንጊና ዻካላንዳጉዲ ታ ኔኤኮ ዜርፆም ዒንጋንዳኔ፤ ታኣኒያ ዔያቶኮ ፆኦሲ ማዓንዳኔ።» #ዳኪ. ማዾ 7፡5።

9ላሚ ሃሣ ዓብራሃሜም ፆኦሲ ሂዚ ጌዔኔ፦ «ኔኤና ኔኤኮ ጊንፃ ሙካንዳ ዜርፆና ኔኤኒ ታኣና ዎላ ጫኣቄ ጫኣቁሞ ሾይንቲዳፓ ሜሌ ሾይንቲ ሄላንዳኣና ካፑዋቴ፤ 10ኔናንታ ኔኤኮ ጊንፃ ሙካንዳ ዜርፆንታ ዒንሢ ካፓንዳ ጫኣቁማ ሃያኬ፤ ዒንሢ ባኣካ ዓኣ ዓቲንቄ ቢያ ዓቲንቶ ቤርቶ ቲቂንታንዳያ ኮይሳኔ፤ #ዳኪ. ማዾ 7፡8፤ ሮሜ 4፡11። 11ዒንሢኮዋ ዓቲንቶ ቤርቶ ቲቁዋቴ፤ ዬይ ታኣና ዒንሢናኮ ሳዛ ዓኣ ጫኣቁሞኮ ማላቶኬ፤ 12ሙካ ሾይንቶይዳ ዓቲንቄ ናይኮ ቢያ ሾይንቴስካፓ ሳላሳ ኬሎና ዓቲንቶ ቤርታ ቲቂንቶንጎ፤ ዬያጉዲ ማኣራ ዒንሢኮ ሾይንቴሢንታ ዙላፓ ሚኢሼና ሻንቂንቲ ሙኬ ካራማኣ ዓቱዋዖ ቲቂንቶንጎ።

13«ታኣኮ ጫኣቁማ ናንጊና ዒንሢና ናንጋያ ማዓሢ ዔርዛኒ ዓሽኮይዳ ማላታ ማዓንዳጉዲ ፔቴ ፔቴ ዓቲንቃ ዓቲንቶ ቤርቶ ቲቂንቶንጎ። 14ዓቲንቶ ቤርታ ቲቂንቲባኣ ዓቲንቄ ናይ ቢያ ታኣኮ ጫኣቁሞ ቦንቺባኣሢሮ ታኣኮ ዴሮይዳፓ ፔቴያ ማዒ ፓይዲንታዓኬ።»

15ፆኦሲ ዓብራሃሜም ሂዚ ጌዔኔ፦ «ሃይፓ ሴካ ማቾ ኔኤኮ ሶኦራ ጌዒ ዔኤሊፖ፤ ሃናፓ ዓርቃዖ ዒዞኮ ሱንፆ ሳኣራ#17፡15 ሳኣራ ጌይፃ፦ ዔብሬ ዓሶ ሙኡቺና «ካኣቲ ናዎ» ጌይሢኬ። ጌዒ ጌሤ። 16ዒዞዋ ታኣኒ ዓንጃንዳኔ፤ ዒዛ ኔኤም ዓቲንቄ ናይ ሾዓንዳኔ፤ ታ ዒዞ ዓንጃንዳሢሮ ሚርጌ ዴሬኮ ዒዛ ዒንዶ ማዓንዳኔ፤ ዒዞኮ ዜርፆይዳፓ ካኣቶ ማዓያ ኬስካንዳኔ።»

17ዓብራሃሜ ባሊቶ ሳዖ ሄሊሲ ዚጊ ፆኦሲ ካሽኬኔ፤ ጋዓንቴ «ሌዔ ፄኤታ ማዔ ዓሲ ናይ ሾዓ ባኣዚዳ? ሃሣ ታ ማቾ ሳኣራኮዋ ሌዓ ታዞጲታሚ ማዔሢሮ ሾዓኒ ማይ ዳንዳዓ?» ጌዒ ማሊ ሚኢጫዖ፥ 18ፆኦሲ ኮራ፦ «ዒስማዔኤሌ ኔ ታኣም ዓንጄቶ ታና ዻካላኒ ዳንዳዑዋዓዳ?» ጌዒ ዖኦጬኔ።

19ፆኦሲያ ዒዛም ማሃዖ፦ «ያዺ ማዓዓኬ፤ ማቻ ሳኣራ ኔኤኮ ዓቲንቄ ናይ ሾዓንዳኔ፤ ሱንፆዋ ዒዛኮ ኔ ዪሳኣቄ#17፡19 ዪሳኣቄ ጌይፃ፦ ዔብሬ ዓሶ ሙኡቺና «ሚኢጫኔ» ጌይሢኬ። ጌይ ጌሣንዳኔ፤ ታኣኮ ጫኣቁሞ ዒዛና ዒዛኮ ዜርፆና ዎላ ናንጊና ታ ዶዲሻንዳኔ፤ 20ዒስማዔኤሌ ዛሎ ታና ኔ ሺኢቄሢ ታ ዋይዜኔ፤ ዒዛኣ ታ ዓንጃንዳኔ፤ ሚርጌ ናይ ታ ዒዛም ዒንጋንዳኔ፤ ዜርፆዋ ታ ዒዛኮ ኮሺ ሚርጊሻንዳኔ፤ ዒዛይዳፓ ታጶ ላምዖ ሱኡጌ ኬስካንዳኔ። 21ጋዓንቴ ሙካ ሌዓ ሃይማ ዎዶና ሳኣራ ኔኤም ሾዓንዳ ናዓሢ፥ ዪሳኣቄና ዎላ ታኣኮ ጫኣቁሞ ታ ዶዲሻንዳኔ» ጌዔኔ። 22ዬያይዲ ፆኦሲ ዓብራሃሜና ዎላ ጌስታዖ ዱማዺ ኬስኬኔ።

23ፆኦሲ ዓይሤሢጉዲ ዓብራሃሜ ዬኖ ኬሎና ናዖ ዒስማዔኤሌኮ፤ ሃሣ ማኣሮይዳ ሾይንቴ ማዾ ማዻ ዓይሎ ቢያሢኮ፤ ዬያጉዲ ዙላፓ ሚኢሾና ሻንቆና ዓይላኣ ዓቱዋንቴ ዒዛኮ ማኣራ ዓኣ ዓቲንቆ ቢያሢኮ ዓቲንቶ ቤርቶ ቲቄኔ፤ 24ዓብራሃሜያ ፔ ዓቲንቶ ቤርቶ ቲቂንታኣና ዒማና ሌዓ ዒዛኮ ታዞጲታሚ ታዞጳኬ። 25ናኣዚ ዒስማዔኤሌኮ ዓቲንቶ ቤርታ ቲቂንቴ ዎዶና ታጶ ሃይሦ ሌዔ ናይ ማዓዛ፥ 26ላምዓሢ ቲቂንቴሢ ፔቴ ኬሊዳኬ። 27ዬያጉዲ ዒዛኮ ማኣራ ሾይንቴ ዓይሌ ማዒ ማዻ ዓቲንቆንታ ዙላፓ ሚኢሾና ሻንቆና ዓይሎ ማዔ ዓቲንቃኣ ቢያ ዒዛና ዎላ ቲቂንቴኔ።

Currently Selected:

ማዢንቲ ማፃኣፔ 17: ጌኤ.ማፃ

Highlight

Copy