Matio' 9
9
:Yusu' 'puh-dih: 'yu :or :korn-a 'tiei: 'meh-a
(Mk 2.1-12; Lu 5.17-26)
1:Yee' :Yusu' 'kpa 'de 'blagbe 'di, or 'dhan 'ni, or mu 'de or 'bli :Kapa'nior-gwlor:-' de. 2:Yeh or 'si-a dih, :yee' nyor⧾ :noo', mo-: :ya 'de or bo 'tiei-a' 'meheh'-yu :due', :or 'pehn-a dih 'do or-a'a: ken 'pehn-deh ken. :Yee' :yeh :Yusu' 'ye-a an-a' dhih 'jeh-' :po-eh: :eh :ne-a 'de on 'di, 'de or :wlu 'de or bo, or 'dae:, 'An 'yu, :ku-dih: :porluh dih. :An-a' deh⧾-zon⧾-a' dhih 'ma-dih-eh: bo 'weh.
3:Yee' :yeh nyor⧾ 'tele' :torne-nyor⧾-a' nyor⧾ :noo', on 'worn-ih'-a, :yee' on 'da 'do an-a' 'jeh :gwlii', 'Yu :daa, or 'kor-dih Nyorsoa-a' 'nyne 'weh.
4Jorwor: :Yusu' yubo: deh an za-a-' 'do an-a' 'jeh :gwlii' 'weh, 'de or 'da, :Eh no 'de a na-dih deh⧾-zon⧾ :gwluhuh' dih 'suh :eh? 5Eh :kma 'i nyor 'ye :ao' 'da, 'de 'tiei-a' 'meheh'-nyor bo, :eh :mor, :Sorn-', mu yai', :na, :on 'ye mu, :eh :zi 'o, :An-a' deh⧾-zon⧾-a' dhih 'ma-dih-eh: bo. 6Jorwor: 'an mu-eh a :torne:, :ka 'yu an 'da-dih-a Nyor-kpalu-a' 'yu, or :korn-a 'kpih dha yao 'zorn, 'do deh⧾-zon⧾-a' dhih-a' bo 'ma-dih-eh bo. Eh-a' dhih, or :wlu-' 'de or bo, or 'dae:, :Sorn-', mu yai', 'duo: :an-a'a: ken 'pehn-deh-' :on 'ye 'de :on 'bli 'gbu mu.
7:Yee' 'yu :dao', or :sorn-' 'weh, or mu 'de or 'bli 'gbu. 8:Yee' :yeh nyor⧾ :doru' :on :ne-a 'o, on 'ye-a deh :dao', :yee' :fano-a: no-uh. 'De an po Nyorsoa-a' 'nyne ya, :or 'nyi-a :gwlor-nyor⧾ 'kpih-a' :yih :daa.
:Yusu' 'da Matio' or 'ye or-a'a: bo :na-nyor no
(Mk 2.13-17; Lu 5.27-32)
9:Yee' :yeh :Yusu' 'wluh-a 'o :dha 'o, 'de or mu-a, :yee' or 'ye 'yu an 'da-dih-a Matio'. Or-: :dhe dih 'do :gbalie :eh :korn-a 'zorn or za-dih-a 'taa-deh⧾. 'De :Yusu' :wlu 'de or bo, or 'dae:, Zi 'o 'on klei'.
'De Matio' :sorn-', or zi 'o or klei'.
10Eh :korn 'we-eh :due', 'de Matio' :pi-dih: :Yusu', 'de or mu deh :di 'da, 'de Matio' 'bli 'gbu. :Yee' 'taa-deh:⧾ :za-nyor:⧾ :dhulu'-: 'dekorn: deh⧾-zon:⧾ :no-nyor:⧾ :dhulu' :noo'-: mo-: 'yle, 'de on 'kpa :Yusu'-: 'dekorn: or-a'a: bo :na-nyor⧾-: bo, an kpuhba son⧾ ybei'. 11:Yee' :yeh :Falasi'i-nyor⧾ 'ye-a deh :daa, :yee' on dhele: or-a'a: bo :na-nyor⧾-: dih, on 'dae:, :Eh no 'de a-a'a: nyor⧾ deh :torne-nyor :ne 'taa-deh:⧾ :za-nyor⧾-: deh⧾-zon:⧾ :no-nyor:⧾ :noo'-: an kpuhba son⧾ ybei' :eh?
12:Yee' :ka or 'worn-ih'-a, :yee' or 'dae:, Nyor⧾ :on se-a puhba:, on se :korn on 'ye kwein: :di-nyor 'kwla⧾-' dih 'bhorn. Jorwor: nyor⧾ :an puhba-a, mo-: :korn :on 'ye kwein: :di-nyor 'kwla⧾-' dih 'bhorn. 13Jorwor: deh :daa :eh 'chle-eh 'de Nyorsoa-a' 'chlee-deh 'di, a mu, a 'ye-eh' 'chean', deh :eh :bleh-dih:-a 'i, or 'da, Eh :se 'slaa: :za-dih-deh:⧾ 'on :se-' 'bhorn. Jorwor: nyor⧾-a' :wehlih: 'ye-eh: 'o 'an 'bhorn. 'De mor, 'on :se 'de yi, 'do 'yi 'sleh-nyor⧾-a' dhih bo. Jorwor: deh⧾-zon:⧾ :no-nyor:⧾, mo-: 'on yi 'da 'da, on 'ye an-a' deh⧾-zon:⧾ :no-eh 'bor.
:Yusu' zela: 'suehn-' :pa-dhih ken dih
(Mk 2.18-22; Lu 5.33-39)
14Eh :korn ti :due', 'de nyor⧾ 'ni 'dlu :po :Jororn'-a'a: bo :na-nyor⧾ yi 'o :Yusu' bo, on dhele-or dih, on 'da, :Kaa eh no 'de :a :ne :Falasi'i-nyor⧾-a pa 'suehn-', 'de :an-a'a: bo :na-nyor⧾-a' no-eh :eh?
15:Yeh on dhele-or dih, :yee' or 'da, 'Duhba:⧾ :on mu-a 'nynor nyina: :kpa-gor-', on se 'beh-dih: on 'ye 'zlu, ti 'nynor-a'a: yibeor :ne-a 'o on bo. Jorwor: ti-a mu 'o :nyni, yibeor-a mu 'o on ybei' :za-eh:. :Yee' an mu 'suehn-' :pa.
16'De :ka :ne-a :due' 'di, nyor-a' no 'yli-eh: :dele'-a' 'for, 'de or-a' 'pa 'wla soa. Deh no-eh, 'yli-eh: :dele'-a' 'for-a mu :jli-eh:. :Mor or :jli-eh, :yee' or mu 'wla soa-a' 'for⧾ :nee' :chlan, eh 'ye :chlaan-bie: :dao' de dih kpa, 'de eh 'ye 'bie' :klaba' no. 17'De nyor-a' po nomor :dele' 'de :zolo-eh :eh :no-dih-eh deh-ku: soa 'di. :Mor or no-eh, :yee' eh mu 'i :wa, 'de nomor 'ye dih 'wla, 'de deh-ku-zolo-eh 'ye 'kor. Jorwor: nomor :dele' :korn or 'ye 'de deh-ku-zolo-eh: :dele' 'di :po-eh:. :Yee' en-' klehkpeh-a mu 'yi dih :nmor.
'Nynor :or 'tuh-a :Yusu'-a'a: :gba 'vuu dih-: 'dekorn: nyor⧾ wlu 'ken :korn-nyor-a'a: 'yu-: an-a' dhih
(Mk 5.21-43; Lu 8.40-56)
18:Yee' :ka :Yusu' 'si-a 'o deh :daa eh-a' :za 'da, :yee' :Jueh'-nyor⧾-a' nyor⧾ wlu 'ken :korn-nyor :due', or-: 'yle, 'de or 'jli dih 'do or 'zorn, or 'dae:, 'An-a: 'nynor-kpao'-yu:, or-: 'meh :kana. Jorwor: 'yle :on 'ye-or' son ken dih tba, :yee' or mu 'kmo-' :ne.
19'De :Yusu' :sorn-', 'de or :ne or-a'a: bo :na-nyor⧾, on zi 'o or klei'.
20:Yeh an mu-a, :yee' 'nynor :due', 'nynor-kpao'-weh-a no-a, nyomor-a 'wluh-a 'de yau-' 'do zon⧾-a' :bhue: 'yor 'sororn' 'di, or-: 'wluh-dih: 'de :Yusu' 'kpuh 'i, or-: 'tuh or-a'a: :gba 'vuu-a' 'mla dih :weheh:. 21Deh no-eh, or :wlu-' 'de or-a' 'jeh 'di, or 'da, :Mor 'on 'tuh or-a'a: :gba 'vuu: :sloror' dih, :yee' 'an mu 'puh-:.
22:Yeh eh no :ao', :yee' :Yusu' 'bili:-'-: dih, or 'ye-or, 'de or 'da, 'An 'yu, :ku-dih: :porluh dih. :An-a' dhih 'jeh-' :po-eh no-eh, 'de :an-a' 'weh 'bor. :Yee' :eh 'wluh-a 'o 'do :dha :due' 'jeh :dao', :yee' or-a' 'weh 'bor-'.
23:Yee' :yeh :Yusu' nyni-a 'de nyor⧾ wlu 'ken :korn-nyor: :dao' 'bli 'gbu, or pa-a, 'de or 'ye-a deh⧾ :bla-nyor⧾-: 'dekorn: nyor⧾ :doru' :an po-a 'viin'-dhlumeh'-: 24:yee' or 'dae:, A 'kpa 'o 'zorn. Deh no-eh, 'nynor-kpao'-yu: :daa, or :se-' 'meh, or 'mo-'. :Yeh or 'da :ao', :yee' an 'keleh-or'. 25:Yee' :yeh nyor⧾ :doru' :dao', on :po-eh: 'o 'zorn, :yee' or pa-', or kpon or-a' son-: dih, 'de or :sorn-'. 26:Yee' deh :dao', eh-a' 'nyne :gweh 'o 'for :dao' ken-a' klehkpeh-: 'dlu.
:Yusu' 'puh-dih: 'doror'-nyor⧾ 'sororn'
27:Yee' :yeh :Yusu' 'wluh-a 'o :dha 'o, :yee' 'doror'-nyor⧾ 'sororn', mo-: zi 'o or klei', :an po 'geh⧾, :an no, :Debe'-a' 'yu, 'ye :a-a' :wehlih.
28'De :Yusu' pa 'de 'gbu. :Yee' 'doror'-nyor:⧾ :dao', on yi 'o or bo 'weh, 'de or dhele-uh dih, or 'da, A po-eh-' dhih 'jeh, 'on 'beh-dih: a-a' 'puh-dih-eh 'weh :e?
'De on 'da, Keen', :Gwlor :baa'.
29'De or 'tuh an-a' 'yli dih, or 'dae:, A 'nyi, eh :ne :ao', :ka a no-a eh-a' dhih 'jeh-' :po-eh. 30:Yee' an-a' 'yli kan-dih: 'i, an 'ye dih. 'De or tli eh-a' wlu-' dih, or 'dae:, Nyor-a' zela:-' deh :daa nyor-beh-nyor-beh :gwluhuh' o.
31Jorwor: :yeh :Yusu' zela-uh-a deh :daa :gwluhuh', :yee' on 'si-: 'zorn, 'de on :gweh-dih: 'o or-a' 'nyne, 'do 'for :dao' ken dih 'dlu.
:Yusu' 'puh-dih: 'bobo'
32:Yee' :yeh nyor⧾ :dao', an 'si-a 'zorn, :yee' nyor⧾ :ya 'de :Yusu' bo 'yu :due' :or se-a :wlu-a' 'beh-dih:, deh no-eh, 'kwla 'ye-dih-deh: :ne 'o or 'de. 33:Yeh :Yusu' za-or 'kwla 'ye-dih-deh 'de, :yee' or 'duo: :wlu-a'-' 'weh. :Yee' nyor⧾ :doru' :dao', eh :florn-dih-uh-: worn, 'de an no, :A 'see deh :daa 'ye dha 'Ezlea-bluhba ken o.
34Jorwor: :Falasi'i-nyor⧾ 'dae:, 'Ku :oo', :on no-a 'kwla 'ye-dih-deh: :klaba', mo-: 'nyi-or 'kpih, 'de or za nyor⧾ 'kwla 'ye-dih-deh⧾ 'de.
:Yusu' 'ye :gwlor-nyor⧾-a' :wehlih:
35:Yee' :Yusu'-a na :gwlor⧾ :klaba'⧾-: 'dekorn: :gwlor⧾ :nyene'-: en-' klehkpeh ken dih. Or torne nyor⧾ deh⧾ 'de an-a' 'di :gweh-dih-sla⧾ 'zorn dih. 'De or po tubo-wlu:⧾ 'jeh :en kor-a Nyorsoa-a' nyor⧾ wlu 'ken :korn 'i. Or 'puh-dih nyor⧾-a' klehkpeh :on 'ble-a puhba-deh:⧾ 'doror: 'dor-: 'dekorn: :nea-nyor⧾-:. 36:Yee' :yeh or 'ye-a :gwlor-nyor:⧾ :doru' :dao', :yee' an-a' :wehlih-a: no-or. Deh no-eh, nyor⧾-a 'beh-dih-uh 'worn dih. 'De an na-dih :gwluhuh' dih, on se-' :za-dih-nyor :korn. On gweh :ka 'blae'⧾ :en se-a 'yli-eh bo 'dhu-nyor :korn 'suh. 37:Yee' or 'dae: 'de or-a'a: bo :na-nyor⧾ bo, 'Vluu'-koo :dhubu:-'. Jorwor: :koan: :no-nyor⧾ se 'i :dhie:. 38Eh-a' dhih, a :wlu 'de :Gwlor :baa' bo, :or no-a 'vluu'-gle-a' :kororn-nyor, or 'ye :koan: :no-nyor⧾ 'de or 'bli 'gle dbo, on 'ye :koo: :dao' chehn.
Currently Selected:
Matio' 9: TCHKR
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.