'Lu 9
9
:Yusu' dbo or-a'a: bo :na-nyor⧾ deh⧾-' dih
(Mt 10.5-15; Mk 6.7-13)
1:Yee' :Yusu' 'da or-a'a: bo :na-nyor:⧾ :on :korn-a :bhue: 'yor :ne-a 'sororn', 'do or bo, 'de or 'nyi-uh 'kpih-a' klehkpeh, on 'ye nyor⧾ 'kwla 'ye-dih-deh⧾-a' klehkpeh 'de :za, 'de on 'ye puhba-nyor⧾ 'puh-dih:. 2'De or dbo-uh deh⧾-' dih, on 'ye tubo-wlu⧾ po, :en kor-a Nyorsoa-a' nyor⧾ wlu 'ken :korn-eh 'i, 'de on 'ye puhba-nyor⧾ 'puh-dih:. 3'De or :wlu 'de on bo, or 'dae:, :Dha a mu-a, nyor-a' :kpa-' deh o. Nyor-a' :kpa-' deh⧾ :tba-tu, nyor-a' :kpa-' 'tiei 'di :po :gleu', nyor-a' :kpa-' 'bhlee, nyor-a' :kpa-' 'wlii, nyor-a' :kpa-' 'wla :noror'. 4'Gbu a mu-a 'de 'di :pa, mo-: a 'ye 'di dih :dhe :chio'lo:, a 'ye 'o :gwlor :dao' 'wluh. 5:Mor nyor⧾ se a dih kpon, :yee' a 'tali: :gwlor :dao' dih, a 'gbabo: :buhbuh⧾ 'zorn dih, a 'ye 'o 'wluh, eh 'ye-uh 'i :to-dih: :ka Nyorsoa :za-a an-a' deh son 'di.
6:Yee' :Yusu'-a'a: bo :na-nyor⧾ mu-', 'de an na :gwlor⧾ :nyene' 'di dih, an po Nyorsoa-a' tubo-wlu:⧾ 'jeh, 'de an 'puh-dih puhba-nyor⧾ deh⧾-a' klehkpeh-' dih.
'Keen :Hehlo'-a' :porluh 'ma-'
(Mt 14.1-12; Mk 6.14-29)
7:Yee' :yeh :Hehlo' :or no-a nyor⧾ wlu 'ken :korn-nyor 'de :Galali'i-bluhba ken, or 'worn-a deh⧾-a' klehkpeh :en mu-a 'dlu bo, :yee' or-a' :porluh 'ma-'. Deh no-eh, nyor⧾ :noo' 'da, nyor⧾ 'ni 'dlu :po :Jororn' 'wluh 'de nma-dih-deh 'di 'weh. 8'De nyor⧾ :noo' 'da, :Ila'yor :oo', or-: 'wluh-dih: :a 'i. 'De nyor⧾ :noo' 'da, eh gweh :ka Nyorsoa-a' wele-eh: :po-nyor: soa :due' 'wluh-a 'de :gwlebo. 9'De :Hehlo' 'da, 'On chehn 'o :Jororn' 'dlu 'weh. :Yee' deh 'i-deh-nyor: 'o, :or :dhe dih, :or :korn 'nyne 'an 'worn deh :dao' :eh? :Yee' eh-: no-eh, 'de or po 'de 'kpih or 'ye :Yusu' 'ye.
:Yusu' 'nyi nyor⧾-kpalu⧾-a' 'wlu :mm' dii-deh:⧾
(Mt 14.13-21; Mk 6.30-44; Jn 6.1-14)
10:Yee' :Yusu'-a'a: dboo-nyor⧾ mu 'de or bo-: de, 'de on zela-or-: :gwluhuh' 'do deh⧾ on no-a bo. :Yeh on yi-a de, :yee' or kpa-uh', 'de on :ne or mu 'de :gwlor an 'da-dih-a :Behse'la 'di, on 'ye kpor chehn. 11Jorwor: :yeh :gwlor-nyor:⧾ :doru' 'worn-ih'-a, :yee' on zi 'o or klei' 'weh, 'de or kpon-uh dih, or :wlu 'de on bo, 'do Nyorsoa-a' nyor⧾ wlu 'ken :korn-eh-a' dhih bo. 'De or 'puh-dih: puhba-nyor:⧾ :on :ne-a 'de on 'klu-'.
12:Yeh 'yluh-a 'kpa-a 'nior, :yee' :Yusu'-a'a: bo :na-nyor:⧾ :on :korn-a :bhue: 'yor :ne-a 'sororn', on yi 'o or bo, on 'dae:, Dbo :gwlor-nyor:⧾ :doru' :daa, on 'ye :gbalie⧾ bo dih-: 'dekorn: :gwlor⧾ :nyene'-: 'di dih mu, :en 'koan'-dih:-a dha dih, on 'ye dii-deh⧾-: 'dekorn: 'pehn-da-: 'bhorn 'da mu. Deh no-eh, :dha :a :ne-a, nyor se :daa :ne.
13Jorwor: :Yusu' :wlu-' 'de on bo, or 'dae:, A :mor 'ye-uh' deh 'nyi on 'ye di.
'De on 'da, Deh :due' :a 'ble-a dha mor, eh-: 'dhu, 'bhlee: :kpuan'⧾ :mm'-: 'dekorn: zimi 'sororn'-:. :Mor eh 'dhu :a mu nyor⧾-a' klehkpeh :daa dii-deh⧾ 'nyi-:, :yee' :a :korn :a 'ye mu, :a 'ye dii-deh:⧾ :nee' dhen. 14('De nyor⧾ :dhulu' :dao' 'nyne-', nyor⧾-kpalu⧾-a' 'wlu :mm', mo-: 'beh-dih: :on 'ye 'de :ne.)
'De :Yusu' 'da, A no-eh, on 'ye dih dhele:, on 'ye 'pu⧾ 'pu⧾ no, :on :korn-a 'pu⧾ 'beh-dih:-a, :en 'ye-a' :kwlaa :mm', :kwlaa :mm' no.
15:Yee' or-a'a: bo :na-nyor⧾ no deh or :za-a-' 'weh, 'de on no-eh, 'de nyor⧾-a' klehkpeh dhele:-' dih. 16:Yee' or 'duo: 'bhlee: :kpuan'⧾ :mm'-: 'dekorn: zimi 'sororn' :dao'-: 'weh, 'de or pobo: 'de yai', or po Nyorsoa-a' 'zio, 'de or :chehn-dih-ih dih, 'de or 'kwa. Or 'nyi-ih or-a'a: bo :na-nyor⧾, on 'ye-ih' :gwlor-nyor:⧾ :doru' :dao' 'nyi. 'De on no-eh. 17'De an-a' klehkpeh di deh, on dbo. :Yeh on gweh-a deh :di-eh 'i, :yee' :yih :sie:-a 'o dih, or-a'a: bo :na-nyor⧾ po-a :dha :due', me-: 'yi :too'⧾-a' :bhue: 'yor 'sororn'.
'Nyne :Piteh' 'da-dih:-a :Yusu'
(Mt 16.13-19; Mk 8.27-29)
18'We-eh :due', :yee' :Yusu' chehn kpor, 'de or wlu 'de Nyorsoa bo. :Yeh or :ne-a 'o, :yee' or-a'a: bo :na-nyor⧾ :ne 'o or bo 'weh, 'de or dhele-uh dih, or 'da, :Kaa :gwlor-nyor⧾-a 'da 'on :eh?
19'De on 'da, Nyor⧾ :noo' 'da, :mor nyor⧾ 'ni 'dlu :po :Jororn' :oo'. :Noo' 'da, :mor :Ila'yor: 'o. 'De :noo' 'da, :zai' :wele-eh: :po-nyor:⧾ soa-a' nyor :due' :oo', or-: 'wluh 'de :gwlebo.
20'De or 'da, :A 'worn 'de a bo :ke. :Kaa a 'da 'an dhih :eh?
'De :Piteh' 'da, :Mor Nyorsoa-a' 'taan'-yu: 'o.
:Yusu'-a za or-a' 'meh :sorn-' dhih-' 'weh
(Mt 16.20-28; Mk 8.30–9.1)
21'De :Yusu' 'dhu-uh 'slen deh 'jeh, on :ne-' nyor-beh deh :daa :gwluhuh' zela:. 22:Yee' :Yusu' :wlu-', or 'dae:, 'Yu an 'da-dih-a Nyor-kpalu-a' 'yu :korn or 'ye deh⧾ :doru'-a 'kle 'ye :gbor :gbor. :Yee' 'bluhba: :korn-nyor⧾-: Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: on :se-' or-a' dhih 'worn-dih: i. An mu-or 'dba-:, :yee' 'do 'we-eh-a' taan neh 'di, Nyorsoa-a mu-or 'de :za.
23'De or :wlu 'de nyor⧾-a' klehkpeh bo, or 'dae:, Nyor :or 'bhorn-a :or 'ye-a' 'o 'on klei' zi, :yee' 'nyi or 'ma-dih: or-a' 'jeh-a' dhih bo. 'Nyi or 'duo: or-a'a: 'kle 'ye-eh-a' 'klorse tu-', zorn 'o zorn, or 'ye 'o 'on klei' zi. 24Nyor :or 'bhorn-a :or 'ye-a' or-a' :febeh' dih dhe, :yee' or mu-eh 'ma-dih:. Jorwor: nyor :or 'ma-dih:-a or-a' :febeh' 'do 'an dhih bo, :yee' eh-a' dih :dhe-eh: 'o or no. 25:Mor nyor 'ble 'bluhba-a' klehkpeh, 'de or 'ye or-a' :febeh' 'ma-dih: 'de or 'ye gbe :zie:, :yee' deh 'i-deh: eh mu-or 'o :po :eh? 26:Mor nyor :taa dhen ple, 'do 'an dhih-: 'dekorn: 'an nyor⧾ deh :torne-eh-: :yee' 'yu an 'da-dih-a Nyor-kpalu-a' 'yu-a mu dhen :ple, 'do nyor :dao', or-a' dhih bo :ke, :mor or 'yle, 'de or-a' dhih-a' 'i 'beh-a'-: or :Baa'-a' dhih-a' 'i 'beh-a'-: 'dekorn: 'enjor-nyor:⧾ :on :ne-a gban 'i, an-a' dhih-a' 'i 'beh-a'-: 'di. 27Dhih 'jeh, 'an zela a :gwluhuh', nyor⧾ :noo', mo-: :nyna dih dha :a 'nyne-', mo-: :se-' 'meh-: i, eh 'ye ti ken :yeh-dih:, 'de on 'ye Nyorsoa-a' nyor⧾ wlu 'ken :korn-eh 'ye.
:Yusu'-a' yau :za-dih:-' 'do tluh ken
(Mt 17.1-8; Mk 9.2-8)
28:Yee' eh 'beh-dih: eh 'ye 'we :meheh' na no, :yeh :Yusu' gweh-a deh⧾ :daa, en-' :za-a' 'i, :yee' or 'duo: :Piteh'-: :Jororn'-: 'dekorn: 'Jeen-: 'weh, 'de on mu 'de tluh ken, or 'ye 'de Nyorsoa bo :wlu. 29:Yeh or wlu-a 'de or bo, :yee' or-a' 'yuba :za-dih:-', 'de 'tiei: or pa-a-', en :za-dih: :ke, 'de en fan, en :ne :bhoror:. 30'Yli :a bla-a 'i, :yee' nyor⧾-kpalu⧾ 'sororn', mo-: :an wlu 'de :Yusu' bo, :Mose'-: 'dekorn: :Ila'yor-:. 31On 'wluh-dih-or-: 'i, 'de Nyorsoa-a' dhih-a' 'i 'beh-a' zorn-pli 'di. 'De an wlu 'de or bo, :ka or yi-a 'meh 'da, 'de :Julu'slehn, :eh 'ye-eh' no, 'de deh Nyorsoa 'dhu-a, eh 'ye-a' dhih 'jeh-' 'kpa. 32:Yee' :Piteh'-: 'dekorn: :yuh :on :ne-a 'o or bo-: on 'kpa-' 'nyinor:. :Yeh on :sorn-a-', :yee' on 'ye dhih-a' 'beh-a' :or :ne-a :Yusu'-', or no-a fan-a' 'weh 'dekorn: nyor-kpalu⧾ 'sororn' :on :nyna-a 'o or bo dih-:. 33:Yeh nyor⧾ 'sororn' :dao', an 'wluh-a 'o :Yusu' bo, :yee' :Piteh' :wlu-' 'de or bo, or 'dae:, Nyor⧾ deh :torne-nyor:, eh :nmor-: 'yi, 'de :a :ne :daa. A 'nyi, :a po gbe :dhe dih :gbalie⧾ taan, :due' 'do :on bo, :due' 'do :Mose' bo, :due' 'do :Ila'yor bo. Jorwor: :Piteh' se deh or za-a-' yubo:.
34:Yeh :Piteh' :za-a deh :daa-', :yee' yao-pli:, me-: 'yle, 'de en 'jli-uh 'dlu, 'do :dha on :ne-a. :Yeh an pa-a 'de en 'di, :yee' :fano-a: no-uh. 35'De wlu 'wluh 'de yao-pli: :dao' 'di, on 'da, 'An-a: 'Yu :oo', or-: :dhe dih, :or 'on gan-a. A :to or-a' wlu :dou'⧾ bo.
36:Yee' :yeh wlu :dao', on jla-a, :yee' on 'ye :Yusu' :due'. 'De mor deh on 'ye-a, on :se-eh' nyor⧾ :gwluhuh' zela: 'do ti :dao' 'di.
:Yusu' :za nyor-kpalu-yu :due' 'kwla 'ye-dih-deh 'de
(Mt 17.14-18; Mk 9.14-27)
37:Yee' :yeh zorn zen-a, :yee' :Yusu'-: 'dekorn: or-a'a: bo :na-nyor⧾-a' nyor⧾ taan :dao'-: on 'dhle tluh, 'de nyor⧾ :doru' 'ya-dih-uh 'i. 38:Yee' nyor-kpalu :due', or-: 'wor 'de nyor⧾ :doru' :dao' 'nyne-', or 'dae:, Nyor⧾ deh :torne-nyor:, 'an bale :on 'weh. Pobo: 'an-a: 'yu-dheh :due' 'on 'ble-a ya. 39:Yee' 'do ti :dhulu' 'di, 'kwla 'ye-dih-deh 'kpa-or ken. :Mor eh 'kpa-or ken, :yee' 'do :dha :due' :dao', or po 'geh. :Yee' eh no-eh, 'de or vorn 'do 'bluhbor, or bor :feon 'do or worn 'i. Eh-a' 'worn eh-a' 'wluh 'o or klei'. 'De eh 'kor-dih-or. 40'On bale: :an-a'a: bo :na-nyor⧾ 'weh, on 'ye-eh' 'o 'do or 'de :za. Jorwor: on se eh-a' no-a' 'beh-dih:.
41'De :Yusu' :wlu 'de on bo, or 'dae:, A :mor :kana-nyor:⧾ :daa :or se-a dhih 'jeh-' :po-eh 'ble, 'de :or :korn-a noo-deh:⧾ se-a 'i 'sleh, ti dhie 'on 'ye dha a bo no :eh? :Kaa 'on 'ye :porluh-a' dih :kpon-eh no 'do a bo :eh? 'De or :wlu 'de 'yu :baa' bo, or 'dae:, :Ya 'de :an-a'a: 'yu 'noror 'on bo.
42:Yeh or kpa-or 'de or bo, :yee' 'kwla 'ye-dih-deh du-or' 'do 'bluhbor, 'de eh no-eh, 'de or vorn 'do 'bluhbor. Jorwor: :Yusu' 'nyi 'kwla 'ye-dih-deh 'tele', eh 'ye 'o 'yu :dao' 'de 'wluh. 'De or 'puh-dih-or, or 'nyi-or or :baa' de :dele' ka. 43:Yeh nyor⧾ :on :ne-a 'o, on 'ye-a deh :daa, :yee' an-a' klehkpeh, an-a' :porluh⧾ 'ma-', :ka Nyorsoa-a' dhih no-a 'i 'beh-a'.
:Yusu'-a za or-a' 'meh :sorn-' dhih-' 'weh :neheh'
(Mt 17.22-23; Mk 9.30-32)
:Yee' deh⧾-a' klehkpeh :Yusu'-a no-a, :yeh on 'si-a 'o en-' 'yi 'chihleh: 'da, :yee' or :wlu-' 'de or-a'a: bo :na-nyor⧾ bo, or 'dae:, 44Deh 'an yi a :gwluhuh' zela: 'da, a to-eh :dou'⧾ bo 'jeh ka o. An yi 'yu an 'da-dih-a Nyor-kpalu-a' 'yu :plo 'da 'de :gwlor-nyor⧾ bo. 45Jorwor: deh :daa or :za-a-', on :se-eh' dih 'worn. Nyorsoa 'zile-eh on-: dih, on :ne-eh' dih 'worn. 'De mor :fano-a: no-uh, on 'ye-or dih dhele: eh-a' dhih.
:Or 'dhu nyor :klaba' :eh?
(Mt 18.1-5; Mk 9.33-37)
46:Yee' :Yusu'-a'a: bo :na-nyor⧾ 'kpa 'o dhobo: 'da 'weh, 'de an-a' 'jeh 'nyne-', 'do nyor :or 'dhu-a nyor :klaba'-' 'do an-a' klehkpeh 'dlu. 47Jorwor: :yeh :Yusu' yubo:-a deh :eh :ne-a 'o on :gwlii', :yee' or 'duo: 'yu-yu-beh :due'-' 'weh. 'De or dhe-or dih 'do or 'bhun. 48:Yee' or :wlu-' 'de on bo, or 'dae:, Nyor :or kpon-a 'yu-yu: :daa dih, 'de 'an 'nyne 'di, :yee' nyor :dao', 'mor-: 'o or kpon dih. 'De nyor :or kpon-a 'on dih, :yee' nyor :or dbo-a 'on, or-: 'o or kpon dih :ke. Deh no-eh, nyor :or ya-a or-a' 'jeh ya, :or :zi-a 'o nyor⧾-a' klehkpeh-', :yee' or-: no nyor :klaba' 'de a 'klu-'.
Nyor :or :se-a :Yusu'-a' bo :vorn-nyor:
(Mk 9.38-40)
49:Yee' :Jororn' :wlu-' 'de :Yusu' bo, or 'dae:, Nyor⧾ deh :torne-nyor:, :a 'ye 'yu :due', or-: za nyor⧾ 'kwla 'ye-dih-deh⧾ 'de, 'de :an-a' 'nyne 'di. 'De :a zela-or :gwluhuh' or 'ye 'bor, deh no-eh, or :se 'noror :a 'nyne-' 'wluh.
50'De :Yusu' 'dae: 'de or bo, A 'bor or-a' 'borboa' 'i :po-eh. Deh no-eh, nyor :or se-a a bo vorn, :yee' or :ne 'de a-a' 'for bo.
:Gwlor :or se-a :Yusu'-a' dhih 'worn-dih:
51:Yee' :yeh ti :Yusu'-a mu-a 'de Nyorsoa 'bli yai' :kpa, en 'koan'-a bo, :yee' or po-eh 'de or 'dlu 'di 'weh, or 'ye :Julu'slehn mu. 52'De or dbo nyor⧾ 'de or ybei', mo-: mu 'de Sehmeh'la-gwlor :due' 'di, on 'ye deh⧾ 'kpa po 'do or bo. 53Jorwor: nyor⧾ :on :ne-a 'o :gwlor :dao' 'di, on :se-eh' ken dih 'worn-dih: or 'ye 'o mu, deh no-eh, or-a' 'yuba 'bili: 'de :Julu'slehn:. 54:Yeh or-a'a: bo :na-nyor⧾ 'Jeen-: 'dekorn: :Jororn'-: on 'ye-eh, :yee' on :wlu-', on 'da, :Gwlor :baa', :an 'bhorn :a 'ye neh 'da, eh 'ye 'de Nyorsoa 'bli yai' 'wluh, eh 'ye nyor⧾ :daa ya gba :e?
55:Yeh on 'da :ao', :yee' or 'bili:-'-: dih 'de on bo, or po-uh 'borboa' 'i. 56:Yeh or no :ao', :yee' on mu 'de :gwlor :noror' 'di.
Nyor⧾ :an 'bhorn-a :Yusu'-a' 'de :na-eh
(Mt 8.19-22)
57:Yee' :yeh :Yusu'-: 'dekorn: or-a'a: bo :na-nyor⧾-: an na :gwie 'i, :yee' 'yu :due', or-: :wlu 'de or bo, or 'dae:, 'An mu 'o :on klei' :zi, :dha klehkpeh :an mu-a :mu.
58'De :Yusu' :wlu 'de or bo, or 'dae:, :Tolo'-gbe⧾ 'ble 'bi, me-: en pa 'di dih. 'De neme: :en zi-dih-a-' dih 'de yai', en 'ble 'dle⧾, me-: en pa 'di dih. Jorwor: 'yu an 'da-dih-a Nyor-kpalu-a' 'yu, or se 'dlu-a' 'pehn-dih-da: :sloror'-a' 'jeh 'ble. 59:Yee' :Yusu' :wlu-' 'de 'yu :noror' bo, or 'dae:, Zi 'o 'on klei'.
Jorwor: 'yu :dao' 'dae:, :Gwlor :baa', 'nyi 'on mu, 'on 'ye 'on-ba dih nma-dih: kele'a: o.
60Jorwor: :Yusu' zela-or-: :gwluhuh', or 'dae:, 'Nyi 'meheh'-nyor⧾ nma-dih: an-a' 'jeh-a'a: 'meheh'-nyor⧾ dih. Jorwor: :mor :mloror', mu :on 'ye Nyorsoa-a' nyor⧾ wlu 'ken :korn-eh-a' tubo-wlu⧾ po.
61:Yee' 'yu :noror' 'dae:, 'An mu 'o :on klei' :zi, :Gwlor :baa'. Jorwor: 'nyi 'on mu, 'on 'ye 'an-a: 'cheh wlu kpa kele'a: o.
62'De :Yusu' :wlu 'de or bo, or 'dae:, Nyor :or 'dhu-a Nyorsoa-deh glu, :eh gweh-a :ka nyor :or 'dhu-a gle 'beleh-eh glu, 'de :or pobo-a de, :yee' or :se nyor Nyorsoa 'ye-a' :koan :no-dih: 'do or-a' nyor⧾ wlu 'ken :korn-eh-a' dhih bo.
Currently Selected:
'Lu 9: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
