'Lu 23
23
On kpa :Yusu' 'do Pale' ybei'
(Mt 27.1-2, 11-14; Mk 15.1-5; Jn 18.28-38)
1:Yee' nyor⧾-a' klehkpeh :dao', on :sorn-' 'weh, 'de on kpa :Yusu' 'do Pale' ybei'. 2'De on 'kpa 'o or-a' dhih 'dlu :po 'da, on 'dae:, :A 'ye 'yu :daa, or 'dhu-dih: :a-a'a: nyor⧾ worn, on 'ye 'Wloon-nyor⧾-a' 'gomla worn :bla-dih:, 'de on :ne-' 'taa-deh⧾ :za 'de 'Wloon-nyor⧾-a' 'keen bo. 'De or 'da-dih or-a' 'jeh Nyorsoa-a' 'taan'-yu, :or no-a 'keen.
3:Yee' Pale' dhele-or-: dih, or 'dae:, :Mor 'o, :or 'dhu :Jueh'-nyor⧾-a' 'keen-' :e?
'De :Yusu' 'da, :Ka :on 'da-a, 'ka-: 'o eh :ne.
4:Yeh or :za-a deh :daa-', :yee' Pale' :wlu-' 'de Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ :dhulu' :on :ne-a 'o-: bo, or 'dae:, 'On :se-' 'yu :daa deh-zon 'bhun 'ye, :eh 'ye-eh' no, 'de zabe 'ye-or' kpon.
5Jorwor: on 'neh-eh ken 'gboror:, on 'dae:, 'Yu :daa, or-a' nyor⧾ deh :torne-eh-a 'kor-dih nyor⧾-a' klehkpeh :on :ne-a :Judi'a-bluhba ken-a' 'dlu⧾ 'weh. Or tba-eh 'de :Galali'i-bluhba ken dih :chio'lo:, 'de or nyni dha :dha :daa.
On kpa :Yusu' 'do 'Keen :Hehlo' ybei'
6:Yeh Pale' 'worn-a deh :daa, :yee' or dhele-uh-: dih, or 'da, 'Yu :daa, :Galali'i-yu: 'o :e? 7:Yeh or yubo-eh :ka :Yusu' 'wluh-a 'de 'noror: 'Keen :Hehlo' :korn-a wlu 'ken, :yee' or dbo-or' 'de :Hehlo' bo. Deh no-eh, :Hehlo' :ne :Julu'slehn: 'do ti :dao' 'i :ke. 8:Yeh :Hehlo' 'ye-or, :yee' or-a' :porluh 'pehn-: dih 'gabaa. Deh no-eh, or 'bhorn or 'ye-or' 'ye :dee' see. 'Do deh or 'worn-a 'do or 'bhun, eh-: no-eh, 'de or dhe-eh :gwlii' :dee', or 'ye-or deh 'i :to-dih:. 9Eh-: :korn dhih, 'de or dhele-or deh⧾ :doru' dih. Jorwor: :Yusu' :se-' :wlu 'de or bo. 10:Yee' 'do :wor Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: on :ne, an po-or dhih 'dlu 'do 'galo: ka 'di. 11:Yeh on no :ao', :yee' :Hehlo'-: 'dekorn: or-a'a: sorye'-: an wla-dih-or', 'de an 'wluh-dih-or :goba'-dhih ken dih, on :pa-dih-or :gba 'vuu: :nmaa'e-', 'de on dbo-or 'de Pale' bo deka. 12Ti deh :daa, eh 'see-a no-eh, :yee' Pale'-: 'dekorn: :Hehlo'-: on no 'nyeh-eh-dih-nyor:⧾. Jorwor: :eh 'wluh-a 'o 'we-eh: :dao' 'di, on no :ybeh-dih-nyor:⧾.
On chehn :Yusu' wlu 'ken, or 'ye 'meh
(Mt 27.15-26; Mk 15.6-15; Jn 18.39–19.16)
13:Yeh on no :ao', :yee' Pale' 'da Nyorsoa-a' 'slaa: :za-nyor:⧾ :klaba'⧾-: :Jueh'-nyor⧾-a' nyor⧾ :na-dih-nyor⧾-: 'dekorn: nyor⧾ :noo'-: an-a' klehkpeh :dha :due'. 14'De or :wlu 'de on bo, or 'dae:, 'Yu :daa, a :ya-a 'noror 'on bo, a 'da, or-: 'dhu-dih nyor⧾ worn, on 'ye 'gomla worn :bla-dih:. Jorwor: :yeh 'on pobo-or ya dha a ybei', :yee' 'on :se-' deh-beh-deh-beh 'ye, 'do or 'bhun, 'do dhih a po-a 'o or 'dlu bo. 15:Hehlo'-a' 'jeh, or :se-or' deh 'bhun 'ye :ke. Eh-: :korn dhih, 'de or dbo-or 'noror :a bo de. A-a' 'yor-eh:, a pobo: 'o, a 'ye 'o 'weh, or :se-' deh-beh no, :eh 'ye-eh' no, 'de or 'ye-a' 'meh. 16:Yee' 'do eh-a' dha, 'an mu-or 'kle 'ye-eh 'dlu :po 'suh, 'de 'on 'ye-or dih 'tali:, or 'ye mu. [ 17Deh no-eh, 'de Pale' 'da :ao', eh-: 'dhu, :mor 'Meh-a' :bla-dih: 'dlu dih-gor-a' ti :taa 'o nyni, zon 'o zon, :yee' or :korn or 'ye 'de nyor :due' 'de :kasue 'di :za :gbor :gbor, 'do :Jueh'-nyor⧾ bo.]
18:Yeh Pale' no-a or mu :Yusu' dih 'tali:, :yee' an-a' klehkpeh po wlu :dha :due', 'de on 'wor, on 'da, :Za 'yu :daa, dha :a ybei'. :Za 'de :Bala'ba 'de :kasue 'di, 'do :a bo. ( 19:Bala'ba: an 'bhorn-a, or :bla-dih: 'gomla worn :zai' 'de :Julu'slehn, 'de or 'dba nyor. Eh-: :korn dhih, 'de on po-or :kasue 'di.)
20:Yee' Pale'-a 'bhorn or 'ye :Yusu' dih 'tali:. Eh-: :korn dhih or :za :Yusu'-a' dih 'tali-dhih-' :neheh'. 21Jorwor: an po 'geh⧾ 'de or bo 'gboror:, on 'dae:, :Kor-dih-or 'o tu 'i o. :Kor-dih-or 'o tu 'i o.
22'De or 'dae: 'do kpor⧾-a' taan neh 'di, :Eh :korn dhih :eh? :A 'ye deh-zon: or no-a 'dee. 'On :se-or' deh-zon 'bhun 'ye, :eh 'ye-eh' no, 'de zabe 'ye-or' kpon, 'de or 'ye-a' 'meh. :Yee' 'do eh-a' dha, 'an mu-or 'kle 'ye-eh 'dlu :po 'suh, 'de 'on 'ye-or dih 'tali:, or 'ye mu.
23:Yeh or 'da :ao', :yee' an-a' 'geh⧾ :po-eh 'kpa 'de de dih, :eh :mor or 'ye 'o tu 'i 'meh-dih:. :Yeh on 'ble-eh :blee:, :yee' eh-: an-a' wlu :sie: ken. 24:Yee' Pale' 'worn-dih-eh', or 'ye deh an 'bhorn-a no. 25'De or 'tali: 'yu :or :po-eh :kasue 'di, 'do 'gomla-a' worn :bla-dih-eh bo-: 'dekorn: nyor 'dba-eh-: :or an 'yba-a. 'De or :za :Yusu' 'kwla 'de on bo, on 'ye deh an 'bhorn-a, on 'ye-or' :no-dih:, on 'ye-eh' no.
On :kor-dih: 'o :Yusu' tu 'i
(Mt 27.32-44; Mk 15.21-32; Jn 19.17-27)
26:Yeh an kpa-a :Yusu', :yee' 'do :gwie 'i, 'do :wor on :yeh-dih: 'yu :due' ken, an 'da-dih-a Samor', :or 'ti-a :Sali'na-gwlor 'di :dee'. Or 'wluh 'de :gbalie 'i. Or-a' 'jeh :dao', or-: on kpon, on po :Yusu'-a' 'klorse tu 'do or ken, or 'ye-uh' or ken dih kpa.
27:Yee' :gwlor-nyor:⧾ :dhulu', mo-: zi 'o :Yusu' klei', :korn mor 'nynor⧾ :noo', :on :jli-dih:-a son⧾ 'dlu, 'de :an po-a 'viin'-dhlumeh' or-a' dhih. 28:Yeh an no :ao', :yee' or 'bili:-'-: dih, 'de or :wlu 'de on bo, or 'dae:, :Julu'slehn-nynor⧾-kpao'⧾-a:, a 'bor 'vin-a' 'do 'an dhih bo. Jorwor: a 'vin 'do a-a' 'jeh 'yor-eh-: 'dekorn: a-a'a: 'nynuu-: bo. 29Deh no-eh, ti-a mu 'o :nyni, a mu :ao', :Bhorlie' 'do 'nynor⧾ :on :sie:-a :zlama bo. :Bhorlie' 'do :yuh :on :korn :gbano-me-eh: :eh se-a 'yu 'wluh-: 'dekorn: 'nynor⧾ :on 'see-a 'nynuu 'nya-dih-:. 30:Yee' nyor⧾-a mu :ao' 'da-: 'de tluh⧾ :dhorno'⧾ bo, 'Kpa 'o :a ken. 'De on 'ye tluh⧾ :nyene' :gwluhuh' zela:, on 'ye :ao', A 'jli :a ken. 31:Yee' :dha tu :ne-dih:-a :dele'-', 'de :gwlor-nyor⧾-a no-a deh⧾ :daa, :yee' :mor on pa :kau'-', :yee' dha eh mu :na-dih: :eh?
32:Yee' nyor⧾ 'sororn' :ke, :on no-a deh⧾-zon:⧾ :no-nyor⧾, mo-: :ne :Yusu' :kpa-dih-eh: :dha :due', on 'ye 'dba-eh:. 33:Yeh on nyni-a 'o :dha an 'da-dih-a Nyor-dlu-kpaa', :yee' 'do :wor on :kor-dih: 'o or-: 'dekorn: deh⧾-zon:⧾ :no-nyor:⧾ :dao'-: 'do tu 'i. :Due' :ne 'de or-a' :dila bo, 'de :due' :ne 'de or-a' kona bo. 34:Yee' :Yusu' :wlu-', or 'dae:, 'On-ba:, 'ma-dih: nyor⧾ :daa, :an 'ye-dih-a 'on 'kle, an-a' deh⧾-zon⧾-a' dhih bo. Deh no-eh, deh⧾ an no-a, on se-ih 'i yubo:.
'De sorye' :dao', on vorn :nobo, on gble or-a'a: paa-tiei-'. 35:Yee' nyor⧾ :nyna 'o dih, 'de an pobo-or ya. 'De :Jueh'-nyor⧾-a' nyor⧾ wlu 'ken :korn-nyor⧾-a wla-dih-or, on 'dae:, Or 'puh-dih: nyor⧾. :Yee' 'nyi or 'puh-dih: or-a' 'jeh 'da :e, :mor or 'dhu Nyorsoa-a' 'taan'-yu:, or gan-a-'.
36'De sorye'-a' 'jeh :ke, on yi 'o or bo, 'de an 'wluh-dih-or :goba'-dhih ken dih, on 'nyi-or 'dli-' :pa-nomor, 37'de on 'da, :Mor :on 'dhu :Jueh'-nyor⧾-a' 'keen-', :yee' 'puh-dih: :an-a' 'jeh.
38:Yee' 'chlee'-deh:⧾, me-: 'chle-eh 'do or 'dlu bo, en 'da, :Jueh'-nyor⧾-a' 'keen :wor :dhe dih.
39:Yee' deh⧾-zon:⧾ :no-nyor⧾ 'sororn' :dao', :on bhele-eh ya, an-a' nyor :due', or-: po-or wlu⧾ 'bhun dih :ke, or 'dae:, Eh :se :mor, :or 'dhu-a Nyorsoa-a' 'taan'-yu-' :e? 'Puh-dih: :an-a' 'jeh-: 'dekorn: :a mor-: :ke.
40'De 'sororn' nor po or 'be 'borboa' 'i, or 'dae:, :An-a' ple Nyorsoa :e? Or-: mor-: a :chehn-eh: wlu 'ken, a 'ye 'meh. 41:A :mor :mloror', eh 'sleh-: 'i, :a 'ye 'kle 'ye-eh 'dlu :po-eh:, 'do deh⧾-zon:⧾ :a no-a bo. Deh no-eh, :a 'bhorn-eh dih. Jorwor: 'yu :daa :mloror', or :se-' deh-zon no. 42:Yee' or :wlu-' 'de :Yusu' bo, or 'dae:, :Yusu', :na-dih: 'an dhih :gwluhuh' dih, ti :an mu-a nyor⧾ wlu 'ken :korn.
43'De :Yusu' 'dae: 'de or bo, Dhih 'jeh, 'an zela :on :gwluhuh', 'zean'-zorn: :daa, :an mu 'de 'on bo :ne, 'de Nyorsoa 'bli yai'.
:Yusu' 'meh-', 'do tu 'i
(Mt 27.45-56; Mk 15.33-41; Jn 19.28-30)
44:Yee' :yeh eh no-a 'yluh-gbao', :yee' glu-tile gor-' 'do 'bluhba-dlu: :dao', an-a' klehkpeh ken, 'de eh :yeh-dih: 'gwie-yluh bo ken. 45'Yluh 'bor fan-a' 'weh. 'De 'yli-eh: on po-a yai' 'de Nyorsoa-a' 'sla 'zorn, eh 'klae: dih, eh 'wluh 'for⧾ 'sororn'. 46:Yee' :Yusu' po 'geh, or 'dae:, 'On-ba:, 'de :on 'kwa, 'do :wor 'on po 'an :zulu. :Yeh or 'da :ao', :yee' or chehn :febeh'-: 'i.
47:Yee' :yeh sorye'-a' nyor :klaba' :or :nyna-a 'o dih, or 'ye-a deh⧾ :en mu-a 'dlu bo, :yee' or po Nyorsoa-a' 'nyne ya, or 'da, Keen', dhih 'jeh, 'yu :daa, or-: 'yi 'sleh-nyor: 'o.
48:Yeh nyor⧾-a' klehkpeh :on 'kpa-a :dha :due', :on 'ye-a deh :daa dih 'ye, on 'ye-a deh :eh mu-a 'dlu bo, :yee' or-a' :wehlih 'kpa 'de on 'di 'weh, 'de an bla :porluh⧾, an mu on 'bli deh⧾-' dih. 49Jorwor: nyor⧾-a' klehkpeh :on yubo-or, :korn mor 'nynor⧾-kpao'⧾ :on zi-a 'o or klei' :dee', 'de :on 'wluh-a :Galali'i-bluhba ken, mo-: :nyna :dha :dhorno' dih, 'de an pobo deh⧾ :daa :en mu-a 'dlu bo ya.
:Yusu'-a' dih nma-dih-eh:
(Mt 27.57-61; Mk 15.42-47; Jn 19.38-42)
50Eh :korn 'yu :due' an 'da-dih-a 'Joseh. Or no :Jueh'-nyor⧾-a' zabe: :zi-nyor⧾-a' nyor :due'. Or no nyor 'jeh :nor, 'de or no 'yi 'sleh-nyor. 51'Yu-a' 'jeh :dao', deh an 'bhorn-a on 'ye-a :Yusu'-' :no-dih:-: 'dekorn: deh on no-or-: or :se-eh' ken dih 'worn-dih:. Or 'wluh 'o :Judi'a-nyor⧾-a' :gwlor an 'da-dih-a Amati'a 'di, 'de or fuo ti Nyorsoa-a mu-a nyor⧾ wlu 'ken :korn 'ken. 52Or-: mu 'de Pale' bo, :or dhele-or dih, or 'ye-or' :Yusu'-a' 'ku 'nyi. 53:Yeh Pale' 'worn-dih-eh ken dih, :yee' 'Joseh :za 'o :Yusu'-a' 'ku 'do tu 'i, or bhian-dih-uh 'nena-yli-eh kle-' dih, 'de or po-uh 'de nma-dih-deh: :eh no-a 'soba 'di, on 'see-a nyor 'di dih nma-dih-eh :zai'. 54Eh no Nyorsoa-a' :gwlee-we-eh-a' 'tiei-a' 'kpa :po-zorn:, 'de mor deh :sie:-a 'o, on 'ye-a Nyorsoa-a' :gwlee-we-eh 'di 'kpa, eh se bo :tehn.
55:Yee' 'nynor⧾ :on 'wluh-a :Galali'i, 'de :on zi-a 'o :Yusu' klei' :dee', mo-: zi 'o 'Joseh klei', 'de on 'ye nma-dih-deh: or po-a :Yusu'-a' 'ku 'di, 'dekorn: :ka or-a' 'ku no-a dih 'pehn-a'-:. 56:Yee' on mu-' :gwlor. 'De on po 'chlan :or po-a 'no 'jeh no-: 'dekorn: :pofi'orn-: 'kpa, on 'ye-ih :Yusu'-a' 'ku 'dhu.
Jorwor: on :forn-' 'do Nyorsoa-a' :gwlee-we-eh 'di, 'do :Mose'-a' 'tele'-a' dih :dhe-eh bo.
Currently Selected:
'Lu 23: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
