Noo-deh:⧾ 7

Timi' :wlu-' 'de :Jueh'-nyor⧾-a' zabe: :zi-nyor⧾ bo

1:Yee' :yeh nyor⧾ :dao', on jla-a, :yee' Nyorsoa-a' 'slaa: :za-nyor⧾-a' nyor :klaba' dhele: Timi'-: dih, or 'dae:, Deh⧾-a' klehkpeh on po-a 'o :on 'dlu, dhih 'jeh :oo' :e?

2:Yee' Timi' :wlu-', or 'dae:, 'An 'de-di'-boi'-a-: 'dekorn: 'on-bai'-a-: a :to 'on :dou'⧾ bo o. Nyorsoa :or :korn-a dhih 'beh-a' 'i, or 'wluh-dih: :a :bai'-a' :baa' 'Eble'hehn-: 'i, ti or :ne-a 'Mehsopata'mior-bluhba ken :dee', 'de jorwor: or mu 'Hala-gwlor 'di 'ti 'da :mu. 3:Yee' Nyorsoa :wlu-' 'de or bo, or 'dae:, Sie :an-a'a: 'cheh-: 'dekorn: :an-a'a: 'bluhba-dlu-: 'de :on 'ye 'de 'bluhba-dlu: 'an mu-a :on :torne: ken mu. 4:Yee' :yeh Nyorsoa 'da :ao', :yee' 'Eble'hehn 'wluh 'o :Kali'a-nyor⧾-a' 'bluhba ken, 'de or mu, or 'ti 'Hala-gwlor 'di. 'Do :wor or :baa' 'meh-dih:. :Yeh or :baa' 'meh-a, :yee' Nyorsoa za-or 'o 'bluhba: :dao' ken 'weh, 'de or ya-or dha 'bluhba: :daa ken, :or :korn ken a 'ti-a :naa. 5Ti or yi-a dha, Nyorsoa :se-or' 'bluhba-yli-eh 'nyi 'do or-a' 'jeh bo. Or :se-or' 'bluhba-a' :dha-yu-beh: or 'ye-a buh dih 'si-dih:-a 'jeh 'nyi :sloror'. Jorwor: Nyorsoa po wlu :dhama'-' 'de or bo, :ka or mu-or 'bluhba-dlu: :daa 'nyi-:, or 'ye-or' :korn, or-: or-a'a: 'nynuu-a' 'nynuu-:, keen' :mloror' or 'see 'yu 'wluh 'do ti :dao' 'i. 6:Yee' deh Nyorsoa :za-a 'de 'Eble'hehn bo :neheh', eh-: :dhe dih, or 'dae:, :An-a'a: 'nynuu-a' 'nynuu-a mu 'duhba⧾ :no, 'de 'bluhba: 'sluh ken, 'do :wor an mu 'ge-nynuu deh :no-dih:, 'de on 'ye-uh' dhih-' no 'do zon⧾-a' :kehehn' :nyieh 'di. 7Jorwor: 'an mu 'bluhba-dlu: :or :korn-a 'zorn an mu-a 'ge-nynuu deh :no-dih: 'kle 'ye-eh 'dlu :po. :Yee' :mor deh :daa, eh zi, :yee' an mu 'o 'bluhba: :dao' ken 'wluh-:, 'de on 'ye dha :dha :daa deka yi, on 'ye 'an :weheh' :za dha mor. 8:Yee' Nyorsoa no-eh', 'de or-: 'dekorn: 'Eble'hehn-: on po :bhlororn' 'meh-eh-a' kuo. :Yee' :yeh eh 'wluh-a 'o, :yee' 'Eble'hehn 'wluh Ase', 'de or 'dba Ase' :bhlororn' 'do 'we-eh-a' :meheh' na neh 'di. 'De Ase' 'wluh 'Jekor, 'de or 'dba 'Jekor :bhlororn' :ke. 'De 'Jekor 'wluh nyor⧾-kpalu⧾-nynuu-a' :bhue: 'yor 'sororn', 'de or 'dba-uh :bhlororn' :ke, :on no-a :a :bai'-a' :bai' 'zean'.

9:Yee' 'nynuu: :dao' 'Jekor 'wluh-a, :on no-a :a :bai'-a' :bai', an no an-a' dei' 'Joseh :gwlehehn' bo, 'de on :plo-dih-or nyor⧾ bo, 'de nyor⧾ :dao', on kpa-or 'Iye-bluhba ken, or 'ye 'ge-yu no. Jorwor: Nyorsoa :ne 'o or bo 'weh, 10'de or zelie-or, 'do 'kle 'ye-eh-a' klehkpeh :eh :yi-dih-or ya dih 'zorn. Or 'nyi-or :toror'. Eh-: no-eh, 'de 'Iye-nyor⧾-a' 'keen 'worn-dih: 'Joseh-a' dhih ken dih, 'de or no-or nyor⧾ wlu 'ken :korn-nyor-' 'do 'Iye-bluhba ken-: 'dekorn: or-a'a: 'gbu-a' klehkpeh-:. 11Ti 'Joseh no-a nyor⧾ wlu 'ken :korn-nyor 'do 'Iye-bluhba ken, :yee' 'moeh: :eh 'kpa-a Ji Kou'-moeh, eh-: 'yle 'do 'Iye-bluhba-a' klehkpeh-: 'dekorn: 'Keneh-bluhba-a' klehkpeh-: ken. :Yeh 'moeh: :dao', eh yi-a 'de, :yee' eh :ya 'de 'kle 'ye-eh: :dhulu' 'de :a :bai'-a' :bai'-a' 'ye dii-deh. 12:Yee' 'Jekor 'worn-ih' :ka dii-deh⧾ :ne-a 'Iye-bluhba ken. :Yeh or 'worn-ih'-a, :yee' or dbo or-a'a: nyor⧾-kpalu⧾-nynuu 'weh :on no-a :a :bai'-a' :bai' :naa, eh-: no an-a' :tehn 'i-ti on kpa 'de. 13'Sororn' :neh on kpa-a 'de, :yee' 'Joseh :za or-a' 'jeh 'kwla 'de or-a' 'de-di'-boi' bo. Eh-: no-eh, 'de 'keen :dao', or yubo: 'Joseh-a'a: 'cheh. 14:Yee' :yeh or 'ye-a 'Joseh-a'a: 'cheh, :yee' 'Joseh dbo wlu 'de or :baa' 'Jekor-: 'dekorn: or-a'a: 'cheh-a' klehkpeh bo-: on 'ye 'de or bo 'Iye yi, :on no-a nyor⧾-a' :kwlaa :meheh' 'sorn 'yor :mm'. 15:Yeh 'Jekor 'worn-a tubo-wlu:⧾ :daa, :yee' or mu 'Iye 'weh, 'do :wor or :ne :a :bai'-a' :bai' 'meh-dih:. 16'De on :ya an-a' 'ku⧾-a' klehkpeh de, 'do :dha an 'da-dih-a 'Sikan-gwlor: :or :ne-a dha 'Keneh-bluhba ken. 'Do :wor on nma-dih: an-a' klehkpeh dih, 'de nma-dih-deh: :eh no-a wor, 'Eble'hehn dhen-a :dee' see 'di, 'de 'Hemor-a'a: 'nynuu 'kwa :on 'ti-a 'Sikan.

17:Yee' deh :korn-a wlu Nyorsoa po-a :dhama'-' 'de 'Eble'hehn bo, eh-a' ti-a 'koan'-dih 'o-: dih, eh 'ye :no-eh:, 'de mor :a-a'a: nyor⧾ :on :ne-a 'Iye-bluhba ken, an 'kpuhba ken dih 'gabaa :ke. 18:Yee' 'keen :dele', :or se-a 'Joseh-a' deh 'i yubo:, or-: 'kpa 'o 'Iye-bluhba-a' :na-dih: 'da. 19'Keen :dao', or :po-dih: :a-a'a: nyor⧾ :bhuli' dih, 'de or no-uh dhih-'. Or :kpa-dih-uh-: 'kpih, 'de on :za an-a'a: 'nynuu: :bleheh'eh:⧾ on 'bli 'gbu⧾ 'di dih, on po-uh 'kwla, on 'ye 'meh. 20:Yee' 'do ti-a' 'jeh :dao' 'i, 'do :wor :Mose' 'wluh-dih:. :Mose'-a' 'jeh :dao', or no 'yu :or :nmor-a 'yi dih 'gabaa. :Yeh or 'wluh-a, :yee' or-a'a: 'cheh 'ble-or', 'do 'chuh⧾ taan 'di. 21:Yeh 'chuh⧾ taan :dao', en zi-a, :yee' or-a'a: 'cheh za-or 'de 'gbu. :Yee' 'keen-a'a: 'yu-nynor-kpao'-yu 'duo-or' 'weh, or 'ye or-a'a: 'yu no. 22'De on :torne-or 'Iye-nyor⧾-a' :toror'-a' klehkpeh. Eh-: no-eh, 'de or-a' noo-deh⧾-: 'dekorn: or-a' :zaa-dhih-: en 'kpa deh ken.

23:Yee' :yeh :Mose'-a' zon⧾ nyni-a :kwlaa :nyieh bo, :yee' or polo-eh' 'do or-a' 'jeh 'yor-eh: :gwlii', or 'ye or-a' 'de-di'-boi' 'Ezlea-nyor⧾ 'ye 'da mu. 24:Yeh :Mose' mu-a, :yee' or 'ye or-a'a: nyor⧾-a' nyor :due', or-: 'Iye-yu :due' no dhih-', 'de or mu 'Ezlea-yu: :dao' ken :kan-dih: 'da. :Yeh or mu-a, :yee' or 'wluh 'Ezlea-yu: :dao' bo, 'de or 'dba 'Iye-yu-a' 'jeh :dao'. 25:Yee' :mor :Mose' :taa 'ye :dee', or 'da or-a'a: nyor⧾-a mu eh-a' 'i yubo-eh :korn :dee', :ka Nyorsoa dbo-or, or 'ye-uh'-a 'de 'gegeye :za. Jorwor: on se eh-a' 'i yubo-eh :korn. 26:Yeh zorn :noror' zen-a, 'de or mu-a de :neheh', :yee' or 'ye 'Ezlea-nyor⧾ 'sororn', mo-: :an vorn, 'de or mu-uh 'i zela: 'da, or 'ye-eh' no, on 'ye wlu-' dih 'woorn:, 'de or :wlu 'de on bo, or 'dae:, :A 'bli-nyor⧾-a:. A :gbee'e:. A :mor 'de-di'-boi' :oo'. :Eh :korn dhih, a 'bhorn a-a' nyor 'ye or 'be deh tba :eh? 27:Yeh :Mose' :za-a deh :dao', :yee' 'yu-a' 'jeh :dao' :or no-a or 'be dhih-', or 'tun-dih: :Mose' 'for bo, 'de or :wlu 'de :Mose' bo, or 'dae:, :Or no :on nyor⧾ wlu 'ken :korn-nyor-' 'do :a 'dlu :eh? 'De mor :or no :on zabe: :zi-nyor-' 'do :a 'dlu :eh? 28:An 'bhorn :on 'ye 'on 'dba, :ka :on no-a 'Iye-yu: :dao', or-a' 'dba-a' zama :e? 29:Yeh :Mose' 'worn-a deh 'yu :dao' or :za-a-', :yee' or ple-', or mu 'bluhba: an 'da-dih-a 'Median ken. 'Do :wor or 'ti, 'de or 'wluh nyor⧾-kpalu⧾-nynuu 'sororn' 'de mor.

30:Yee' :yeh zon⧾-a' :kwlaa :nyieh zi-a, :yee' 'enjor :due', or-: 'wluh-dih-or 'i, 'de neh-', 'do :dha 'kwla-gan: :yale'-a sin-dih-a, 'de :bhehneh'-bluhba ken, :eh 'koan'-dih:-a 'Sanae-tluh dih. 31:Yeh :Mose' 'ye-a neh, 'de eh wan-a, :yee' eh 'ma-dih: 'de or 'di-: dih, 'de or 'koan'-dih: 'o eh bo dih, or 'ye deh :eh mu-a 'dlu bo 'ye, deh 'jeh. :Yeh or 'koan'-dih:-a 'o dih, :yee' or 'worn :Gwlor :baa'-a' wlu, or 'dae:, 32'Mor :or no-a :on :bai'-a' :bai' 'Eble'hehn-: Ase'-: 'dekorn: 'Jekor-: an-a' Nyorsoa, 'mor :oo'. :Yeh :Mose' 'worn-a wlu :daa, :yee' :fano-a: no-or, 'de or-a' 'tiei-a tleh, 'de or ple 'de-a' pobo-eh. 33:Yee' :Gwlor :baa' :wlu-' :neheh' 'de or bo, or 'dae:, :Za 'de :an-a'a: :buhbuh⧾. Deh no-eh, 'do :dha :on :nyna-a dih, 'do :ne 'i gban. 34'On pobo: 'de 'Iye-bluhba ken 'weh, 'de 'on 'ye :ka an no-a 'an-a: nyor dhih-' :no-eh 'weh 'de mor. 'On 'worn an-a' 'viin'-wlu 'weh. Eh-: :korn dhih, 'on 'wluh 'de yai', 'on yi-uh zelie: 'da. 'Yle, 'on 'ye :on 'Iye de dbo.

35:Mose' :or :korn-a dhih 'Ezlea-nyor⧾ se-a 'worn-dih:, 'de on no-a, :Or no :on nyor⧾ wlu 'ken :korn-nyor-: 'dekorn: zabe: :zi-nyor-: :eh? Or-: 'o. :Mose'-a' 'jeh :dao', or-: 'o Nyorsoa-a' 'jeh 'yor-eh dbo, or 'ye-uh' wlu 'ken :korn, 'de or 'ye-uh' zelie:, :eh :yi-dih:-a 'enjor: :dao', ti 'kwla-gan: :yale'-a sin-a, 'de or 'ye-a :Mose' 'i 'wluh-dih: 'de or 'di. 36Ti :Mose' za-uh-a 'Iye, :yee' or no nyor⧾ 'di dih 'ma-dih-deh⧾-: 'dekorn: nyor⧾ 'i :to-dih-deh⧾-: 'de 'Iye-: 'dekorn: 'do Yobo' :zaehn-: worn 'i. 'De or no nyor⧾ 'di dih 'ma-dih-deh⧾ 'de :bhehneh'-bluhba ken :ke, 'do zon⧾-a' :kwlaa :nyieh 'di. 37:Mose' :dao', or-: 'o, :or zela: 'Ezlea-nyor⧾ :gwluhuh', :or 'da, Nyorsoa-a mu a wele-eh: :po-nyor bo :dbo, :or mu-a 'de :a-a'a: nyor⧾ 'klu-' 'wluh-:. :Ka 'on :ne-a, 'ka-: 'o or :ne :ke. 38:Mose'-a' 'jeh :dao', or :ne 'Ezlea-nyor⧾ 'kpa :dha :due' 'weh 'de :bhehneh'-bluhba ken, :on no-a :a :bai'-a' :bai'. 'Enjor: :or :wlu-a 'de or bo, 'do 'Sanae-tluh ken, or :ne 'o or bo 'weh :ke. 'Enjor-a' 'jeh :dao', or 'nyi-or tubo-wlu:⧾, or 'ye-ih po 'noror :a bo, :en no-a tubo-wlu:⧾ :en 'nyi-a nyor⧾ :febeh'.

39Jorwor: :a :bai'-a' :bai' :se-' :Mose'-a' dhih 'worn-dih:, 'de mor an-a' 'worn, an-a' dhe 'o or-a' 'tele' dih. 'De an-a' :porluh⧾-a 'bhorn en 'ye 'Iye de mu. 40'De on zela: 'yu an 'da-dih-a Elorn' :gwluhuh', on 'dae:, No :a-a'a: nyorsoa⧾ 'do :a bo, en 'ye 'o :a ybei' :korn, 'de :a 'ye-ih 'de :na. Deh no-eh, :Mose' :yor :daa :mloror', :or :za-a: 'de :a 'Iye-bluhba ken, deh 'ye-or no, :a se-eh yubo:. 41:Yee' 'do ti-a' 'jeh :dao' bo :oo', 'do :wor on :ma-dih: deh :eh gweh-a :blii'-yu, 'de on :za 'slaa 'do eh bo, on 'dhu gor 'do deh an-a' 'jeh 'yor-eh-a' son⧾ ma-a bo, 'do eh-a' deh-' 'ye-eh bo. 42:Yeh on no-a deh :dao', :yee' eh-: no-eh, 'de Nyorsoa to-uh 'kpuh ya, or za-uh 'yli-eh bo, on 'ye 'chuh-: 'yluh-: 'dekorn: 'chuh :dhlaen-: :en :ne-a 'de yai', en-' :weheh' :za, :ka eh no-a 'chle-eh 'de Nyorsoa-a' wele-eh: :po-nyor⧾-a' 'chlee-deh 'di, eh no-a,

A :mor 'Ezlea 'di. 'Mor :oo',

a 'nyi 'slaa: :za-dih-deh⧾-: 'dekorn: 'nyii'-deh⧾-:

'do zon⧾-a' :kwlaa :nyieh a no-a 'de :bhehneh'-bluhba ken :e?

43'Kei:. 'Mornor:-nyorsoa :gwlor-nyor⧾-a' son no-a, or-a' :gbalie :oo' a tele:,

'de mor 'Wlafa:-nyorsoa :or no-a 'chuh :dhlaen-eh: a-a' 'jeh 'yor-eh-a' son no-a, or-: a tele: :ke.

Zuu:⧾ :daa, me-: 'o a no, a 'ye :weheh' :za.

:Yee' 'do eh-a' dha, 'an mu-eh :no, tuh 'ye a 'bluhba ken :za, 'de on 'ye a :dha :dhorno' kpa, 'de 'Babe'lor-gwlor 'de.

44:Yee' ti :a :bai'-a' :bai' :ne-a 'de :bhehneh'-bluhba ken, on 'ble 'taa: 'por :gbalie :eh :to-dih-eh on 'i, :ka Nyorsoa :ne-a 'o on bo. :Ka Nyorsoa no-a :Mose'-a' deh :jii-eh dih :po-eh-: 'dekorn: :ka or no-a eh-a' 'ye-a'-: 'ka :wor or no eh-a' po-a'. 45:Yee' :a :bai'-a' :bai' :za 'taa: 'por :gbalie :dao' 'de on :bai' 'kwa, 'de on kpa-eh ti :Jasua'-a na-dih-uh-a :dee', ti on 'ya-a 'bluhba⧾-dlu:⧾ Nyorsoa :za-a 'dawor'⧾ ken dih 'dlu 'do on bo. :Gbalie :dao', on 'ble-eh :chio'lo: dha 'bluhba: :daa ken, 'de eh :yeh-dih: :Debe'-a' 'keen :no-ti ken. 46Nyorsoa-a' :porluh 'pehn-: dih 'do :Debe' bo. 'De :Debe' dhele-or dih, or 'ye-eh' ken dih 'worn-dih: or 'ye 'gbu po 'do or bo, :or 'dhu-a 'Jekor-a' Nyorsoa-'. 47Jorwor: :Debe'-a' 'jeh 'yor-eh :se-uh' po. :Salomor', or-: po 'gbu :dao' 'do Nyorsoa bo.

48Jorwor: 'yi 'beh-Nyorsoa-a' 'ti 'de 'gbu :gwlor-nyor⧾-a' son po-a 'di. 'De mor :ka or-a' wele-eh: :po-nyor no-a eh-a' :za-a', or no-a,

49:Gwlor :baa' 'dae:, 'Noror 'on 'bli yai', 'do :wor no 'an-a: 'keen :kpala' 'an dhe ken.

'De dha 'bluhba ken :wor no 'an-a: buh⧾ ken dih :tba-deh.

Deh 'i-deh-gbu: a mu :po 'do 'on bo :eh?

:A 'ye :dha 'an mu-a dih 'pehn-: 'on 'ye-a :forn 'dee.

50Eh :se 'an 'jeh 'yor-eh: :or se deh⧾-a' klehkpeh :daa no :e?

51:Yee' Timi'-a kpa or-a' wlu 'dlu bo 'de on bo, or 'dae:, A :mor 'dlu⧾-a' :kmuu-nyor:⧾ :daa, :or :korn-a :porluh⧾-: 'dekorn: :dou'⧾-: :en :kmu-a deh :dao'. A gweh a :bai'-a' :bai', a bla-dih Gban 'i :ne :Zulu worn 'do ti-a' klehkpeh bo. 52Nyorsoa-a' wele-eh: :po-nyor: :yoror :or a 'beh-dih: a 'ye 'nyne-' 'si, a :bai'-a' :bai' :se-' 'kle 'ye-dih: :eh? On 'dba Nyorsoa-a' wele-eh: :po-nyor:⧾ :sloror', :on sie-a ti de, 'de :on :za-a Nyorsoa-a' 'taan'-yu: :or 'sleh-a 'i, or-a' 'de :yi-dhih-' 'weh. Jorwor: :yeh or yi-a 'de, :yee' a plo-or', 'de a 'dba-or. 53A :mor 'ye 'tele' 'enjor-nyor⧾ :ya-a: 'de. Jorwor: a-a' no-eh.

On :tba-dih: Timi' sobu'⧾ dih, 'de or 'meh

54:Yee' :yeh :Jueh'-nyor⧾-a' zabe: :zi-nyor:⧾ :dao', an to-a Timi'-a' wlu :dou'⧾ bo, :yee' 'chehn-: no-uh 'gabaa, 'de on 'si-dih: 'nyne 'i. 55:Yee' Timi' 'yi-dih: Gban 'i :ne :Zulu-: dih, 'de or pobo: 'de Nyorsoa 'bli yai', or 'ye or-a' dhih-a' 'i 'beh-a', 'de or 'ye :Yusu' or :nyna dih 'do Nyorsoa-a' :dila-son bo. 56:Yee' or :wlu-', or 'dae:, A :gbee'e:. 'An 'ye 'de Nyorsoa 'bli yai' 'weh, 'de kan-dih: worn. 'De 'yu an 'da-dih-a Nyor-kpalu-a' 'yu, or :nyna dih 'do Nyorsoa-a' :dila-son bo.

57:Yeh Timi' :za-a deh :dao', :yee' an-a' klehkpeh, an po 'geh⧾, 'de on kan an-a' :dou'⧾, on :ge-dih-or bo, on kpon-or. 58'De on 'kla-or dih, on za-or 'o :gwlor-'. 'De on 'kpa 'o or-a' sobu'⧾ dih :tba-dih: 'da. :Yuh :on po-or dhih 'dlu, on :za an-a'a: 'korlor⧾ dih, 'de on sie-ih 'o :goba'-yu :due' an 'da-dih-a :Soror' bo. 59:Yee' :yeh an tba-dih-a Timi' sobu'⧾ dih, :yee' Timi' :wlu-' 'de Nyorsoa bo, or 'dae:, :Gwlor :baa' :Yusu', 'worn-dih: 'an :zulu-a' dhih o. 60:Yeh or 'da :ao', :yee' or bla 'koor-dlu⧾ 'yi glu, 'de or 'wor, or 'da, :Gwlor :baa', deh⧾-zon:⧾ :daa an no-a, :an-a' :kpon-uh' dih 'do en-' dhih bo o. :Yeh or :za-a deh :daa-', :yee' or 'kpa-' 'nyinor: :klaba'.

Currently Selected:

Noo-deh:⧾ 7: TCHKR

Highlight

Copy