Matayo 27
27
Yesu bampeleka kwa Pilato
(Maluko 15:1; Luka 23:1-2; Yohana 18:28-32)
1Pukuchaga, akakung'i akolongwa boa na akinanhota ngababeka machabuli gu kupala kunkoma Yesu. 2Ngabantaba ntondolo, ngabampeleka kunkamuya Pilato, nkolongwa jwa nkoa ojwachaguligwe na kilongoi jwa Loma.
Kiu cha Yuda
(Itendwa 1:18-19)
3Penia Yuda jwenio ojwang'alukaga, palola kube Yesu bunhukumwile, ngaganwa, ngababuki akakung'i akolo na akinanhota ipande salasini yuloi yela. 4Ngabalengela, “Ndekulemwa kummeka mundu jwanga malemwa akomigwe.”
Nambu bombe ngabalenga, “Twe genia gutupata bo? Genia ginu mmene.”
5Yuda ngaulekela uloi gola munyumba ja Nnoongo, ngapita panja, ngajabula ngakikongela.
6Akakung'i akolo ngabatola uloi gola, ngabalenga “Ipaligweje kubeka munkoba gwa nyumba ja Nnoongo kwa magambu uloi gwa ukoma mundu.” 7Ngabalagana, ngabaemela nng'onda gwa mmombi pabe paali pa kuchiki akageni. 8Mpaka lele nng'onda gwenio ukemigwa, “Nng'onda gwa Myai.” 9Penia malobe ga nnondoli Yelemia ngagalenganila, “Ngabatola ipande makomi matatu ya uloi kulenganila na jwajo jubammeka bei bandu ba Kuisilaeli, 10ngabaemela kwa uloi gwenio nng'onda, anda Angwana apabanagila.”
Pilato ankonnya Yesu
(Maluko 15:2-5; Luka 23:3-5; Yohana 18:33-38)
11Yesu ngabannyemeka nnongi ja nkolongwa jwa Nkoa. Penia, ngabankonya, “Bo, mwe nga Mangwana ba Akayahudi?”
Yesu ngajanga, “Mwe nnengite.” 12Nambu akakung'i akolongwa na akananhota apabakiba bakantakiana, ajangitije lilobe.
13Yene Pilato ngankonya, “Bo, mpetakujoaje matakiano genia goa agabapia kwinu mwenga?”
14Nambu Yesu ajangitije ata lilobe limwe, ata akolongwa ba Nkoa ngabaomongwa muno.
Yesu bunhukumu kuwe
(Maluko 15:6-15; Luka 23:13-25; Yohana 18:39; 19:16)
15Lwakiba lukobo lwabe kingobu cha mpapala gwa Pasaka akolongwa ba Nkoa kaleke Akayahudi mundu jumwe ojwatabigwe ojwabampailinge. 16Kingobu chenie akiba ojwatabigwe jumwe, lina lyakwe Yesu Balaba. 17Yene, bandu apabakongananga pamwe, Pilato ngabakonyanga, “Mpalanga nanneke jwako kati ja abele bamba, Balaba andaje Yesu ojwakemigwa Kilisto Nkomboi?” 18Alenga yene gambu amanyi kibola kutenda bannetanga kwakwe magambu ga bwiu.
19Pilato apakiba atamite pakitebu cha hukumu, anhana mundu ngabapelekela chalamu, “Makankamwa kilebeje mundu jwambone jwenio, gambu lele ndekulaga muno mumaloto magambu jakwe.”
20Nambu akakung'i akolongwa na akananhota ngabakwelekea bandu bannyope Balaba ajogoligwe na Yesu akomigwe. 21Nkolongwa jwa Nkoa ngakonya, “Jwako kati ja abele bamba ojwampala nanneke?”
Ngabannyanga, “Balaba!”
22Pilato ngabakonyanga, “Lele, nantendibo Yesu ojwakemigwa Kilisto Nkomboi?”
Boa ngabalenga, “Abambigwe!”
23Pilato ngakonya, “Kwa nike? Atei ubaja gani?”
Angweto ngabayanga kulenga kanonoya, “Abambigwe panchalaba!”
24Pilato apamanya kube aotwaje chachoa na kijonga kitela kutumbula, ngatola mache, ngakuya maboko nnongi ja bandu, ngalenga, “Ne ngwetije ligambo nhwalo gwa kiu cha mundu jonjo, kwale mmene.”
25Bandu boa ngabalenga, “Myai jakwe jibe panani ja mitwe jito na panani ja mitwe ja ingota ito!”
26Penia Pilato ngannekekea Balaba kuboka kukipungo, nambu Yesu ngabakamuya aputigwe iboko na manjolinjoli na abambigwe panchalaba.
Manjolinjoli gammeka nhwenyo Yesu
(Maluko 15:16-20; Yohana 19:2-3)
27Penia manjolinjoli ga Pilato ngagampeleka Yesu panganya ja boma, nkengeni gwoa ngukongana kuntindiki jwombe. 28Ngabanhwula ngobo yakwe, ngabankwindiya ngobo ya kingwana. 29Ngabapota ulembalemba gwa miba na ngabankwindiya umutwe, uyo ngabammekela nnai puluboko lwakwe lwa kalelo. Ngabakilikitila nnongi jakwe na ngabammeke nhwenyo bakalenga, “Kunchelile Angwana ba Akayahudi!” 30Ngubunhuni mata, ngubuto nnai ngabamputi umutwe. 31Kuboka pu kummeke nhwenyo, ngubunhwula lijou lela na ngabankwindiya ngobo yakwe, kuboka penia ngabampeleka kummamba.
Yesu abambigwa
(Maluko 15:21-32; Luka 23:26-43; Yohana 19:17-27)
32Apabakiba bakajenda, ngabankolela mundu jumwe liina lyakwe Simoni, mundu jwa kilambo cha Kulene, ngabannenge mpoto nchalaba gwa Yesu. 33Apabaikanga paali apakemigwa Goligota, mana gakwe, “Paali pi Kitongo cha mutwe,” 34Ngabampe divai kutindigana na kile kibaba ntela gukupoya kubinia. Nambu Yesu apapaya ngakana kunywe.
35Ngabammamba, uyo ngababagana ngobo yakwe kukubeka kiumbuumbu. 36Kuboka pa genia ngabatamanga, ngabannendela. 37Panani ja mutwe gwakwe panchalaba ngababeka kibao echibaandike, “Jonjo nga Yesu, Nngwana jwa Akayahudi.” 38Akapoki abena ngababambigwa uyo pamwe na Yesu, jumwe kingonu cha kangeja na jonge kingonu cha kalelo.
39Bandu abakapeta penia ngabantukana Yesu nukutikatika mitwe jabe kulenga, 40“Mwe! Nnengita nhotwije kujibomola nyumba ja Nnoongo nukuchenga kwa machoba matatu? Ngoe mikikombole mmene. Anda mwe nga Mamwana jwa Nnoongo, nhuluke panchalaba!”
41Akakung'i akolo na akaboli ba Malagilo ga Musa na akananhota uyo ngabammeke nhwenyo bakalenga, 42“Ngabakombo bange, nambu kukikombola mwene kuotwaje! Jwombe konda Nngwana jwa Akasilaeli! Anda ngoe auluke panchalaba, natwe matunhwamina. 43Nganhyobalela Nnoongo nukulenga eti jwombe nga Mwana jwa Nnoongo, Nyeme twetulole anda Nnoongo apaile kunkombola.”
44Ababambigwa pamwe ngabantukana uyo.
Yesu awe panchalaba
(Maluko 15:33-41; Luka 23:44-49; Yohana 19:28-30)
45Ikiba saa sita nalumu mpaka saa tisa kimuyo, lubendu ngulutanda kilambo choa. 46Apaika saa tisa Yesu ngaguta kulilobe likolongwa, “Eloi, Eloi, lama sabakitani?” Mana gakwe, “Nnoongo jwango, Nnoongo, jwango mboni undekuneka?”
47Bandu bange abajemangita penia abannyoanga jwenio ngabalenga, “Ankema Eliya.” 48Jumwe kati jabe ngabutuka, ngatola litonji na ngalichwika musiki, ngalitabali munnai ngantondobeke Yesu anywe.
49Bange ngabalenga, “Nyemetulole anda Eliya maika kunkombola.”
50Yesu ngaguta kabena kanonoya, ngajomoka.
51Panjia ja nkati ja Nyumba ja Nnoongo elibagina pa Chwapi ja Nnoongo ngijipachuka ipande ibena kuboka kunani mpaka pae. Nnema ngulendemela na mabwe ngagapachuka, 52makabuli ngagajogoka na bandu nduu bachwapi ba Nnoongo abawile ngabayoka.
53Na bombe, kuboka pa kuyoka kwakwe Yesu kuboka kwa abawile, ngabapita mumakabuli na ngabaika mukilambo cha Chwapi Kuyelusalemu na ngababonekana na bandu nduu.
54Kilongoi jwa akalenda ba Loma na manjolinjoli agakiba gakannendela Yesu apabalola kulendemela kwa lutope na ilebe eipitile yela, ngabajogopa muno, ngabalenga, “Kweli mundu jonjo akiba Mwana jwa Nnoongo.”
55Paali penia pakiba na akikege ajingi bakalolanga kwa kutaali. Benia nga abankengama Yesu kuboke ku Galilaya bakantumikia jwombe. 56Kati jabe akiba Maliamu Magidalena na Maliamu amama ba Yakobo na Yusufu, pamwe na amama ba ingota ya Zebedayo.
Machiko ga Yesu
(Maluko 15:42-47; Luka 23:50-56; Yohana 19:38-42)
57Apaikiba kimuyo, ngaika mundu jumwe juna uloi kuboke Alimatayo, liina lyakwe Yusufu. Jwombe uyo akiba napunji jwa Yesu. 58Ngannyendela Pilato, ngajopa bampe mmele gwa Yesu. Pilato ngaamulicha bampe. 59Yusufu ngautola mmele gola, ngaubiligila chanda ejibi chwapi, 60ngaubeka nkati ja likabuli lyakwe liyono elikiba liembigwe piliganga. Penia ngalipilimbia libwe likolongwa nnongi ja nniango gu likabuli, ngajabula. 61Maliamu Magidalena na Maliamu jonge bakiba batamangite kulilolake likabuli.
Akalenda pilikabuli
62Malabo jakwe, lichoba elikengima elikiba lya Kupomolela, akakung'i akolo na Mafalisayo ngabannyendelela Pilato, 63Ngabalenga, “Ananhota, tubiukombokela kutenda jwajo nhwangi pakiba mmomi alenga, ‘Kuboka pa machoba matatu mahyoka.’ 64Ku yene nhwamuliche likabuli lilendeligwe mpaka lichoba lya tatu ibe akinapunji bakwe bakannyibaje na kalenge bandu kutenda ayokite. Nhwangi gwa kupela gongo upakube mmaja muno kupeta gwago gwa kutumbula.”
65Pilato ngabalengela, “Aja, nkweti akalendei, nnyendanga makalendele apanhwotwile.”
66Yenie ngabajendanga, ngabalilendela likabuli, ngabalimatila libwe lela na kaleka penia akalendei bakalenda.
Currently Selected:
Matayo 27: NNQNT
Highlight
Share
Copy
Want to have your highlights saved across all your devices? Sign up or sign in
Ngindo New Testament © The Word For The World, 2015.
