Matayo 17
17
Yesu agalambuka kumio
(Maluko 9:2-13; Luka 9:28-36)
1Kuboka pa machoba sita, Yesu ngabatola Petulo na Yakobo na Yohana ununagwakwe, ngabajenda nabo jika jabe mpaka kukitombi kitandamau. 2Kwenio, pabannolekea ngabammona Yesu ngagalambuka kumio nnongi jabe, kumio jakwe ngukung'ala anda lichoba na ngobo yakwe ngibe nhuu anda lumuli. 3Kwenio Musa na Eliya ngabapitila, ngababe bakalongela nakwe Yesu. 4Penia Petulo ngannenge Yesu, “Angwana, chwapi twe kube pamba! Anda mpaile njenga iteba itatu chimwe chinu, chimwe cha Musa na chimwe cha Eliya.”
5Pakiba tango akalongela, liunde liuu ngilyaekelelanga, na lilobe ngilijoanika kuboka muliunde lyenie. “Jonjo nga Manango jwanampala, ojwanhalali mwojo, mampenakiange jwenio!”
6Akinapunji pabalijoa lilobe ngabagweganga manguku, ngabajogopa muno. 7Yesu ngabajendelela, ngabakunyula, ngalenga “Nnyemange, makajogopaje!” 8Pabalola kunani bammwenije mundu, nambu Yesu jikajakwe.
9Pabaulukanga pikitombi, Yesu ngabakelebuya, “Makannengeje mundu ilebe eimibweni mpaka Mwana jwa Mundu papakuyoigwa kuboka kwa abawile.”
10Kuboka penia akinapunji bakwe ngabankonya Yesu, “Mboni aboli ba Malagilo ga Musa balenga kita mpaka oti Eliya aike?”
11Yesu ngabajanga, “Kweli, Eliya atenda kuika kubeka ilebe yoa telatela. 12Nambu nannengelanga Eliya aike na bandu bammanyije, ngabantenda pabapalanga. Mwana jwa mundu apakupotekigwa uyo mumaboko gabe.”
13Penia akinapunji bakwe ngabamanyanga kube balandulila nhwalo gwa Yohana Mmatichi.
Yesu annamia mwana juna nchepela
(Maluko 9:14-29; Luka 9:37-43a)
14Pabanhwikalila kabele nkengeni gwa bandu, mundu jumwe ngannyendelela Yesu, ngakilakitila nnongi jakwe, 15ngalenga “Angwana, mammone kia manango magambu akweti kiinduindu, kabe alaga muno, jwombe pa jingi agwele pamwoto nu umache. 16Nganalete akinapunji binu, nambu baotwije kunnamiya.”
17Yesu ngabalengela, “Mangweto mabandu banga imani! Ndama namangweto mpaka lii? Nanhwimbilila mpaka lii? Mannetange mwano pamba!” 18Yesu ngaukalapila nchepela, na gwenio nguboka na mwana ngalama kingobucho.
19Kuboka penia akinapunji ba ngabannyendelela Yesu kuntemela, ngabankonya, “Mboni twe tuotwije kuuboya nchepela gola?”
20Yesu ngabajanga, “Kwa magambu nkwetije imani.” Nanenge kweli makabi na imani njokochoko andi mbeju ya aladali kabi nhwotolinge kukilenge kitombi, “Mmoke pamba nnyende papa, na chenie kujenda. Makaotolinge ukamwa kila kilebe!” 21Nambu genia kuwechekanaje mpaka kupunga na kugongalela.
Yesu alonge kabele nhwalo gwa kiu chakwe
(Maluko 9:30-32; Luka 9:43b-45)
22Pabakiba pamwe okwo kikilambo cha Galilaya, Yesu ngabalengela, “Mwana jwa Mundu ajenda ukamuigwa ku bandu. 23Bapankoma nambu lichoba lya itatu mayoka.”
Akinapunji ngabaechuka muno.
Kulepa kodi ja nyumba ja kugongalela
24Pabaika kukilambo cha Kafalanaumu bandu ba ukongola uloi gwa kodi ja Nyumba ja Nnoongo ngabanyendelela Petulo, ngabankonya “Bo, Aboli binu babi kulepa kodi?” 25Petulo ngajanga, “Umwo, babi kulepa.”
Petulo pajingila unyumba, tango nukulongeje, Yesu ngankonya, “Simoni mwe nnolabo? Mangwana ga padunia gakongola kodi kuboka kubeneke? Kuboka kwa akakola Kilambo andaje kuboka kwa akageni?”
26Petulo ngajanga, “Kuboka kwa akageni” Yesu ngannengela,
“Aja ngayene, akakola Kilambo bapaligweje kulepa. 27Nambu kukupala bakachimwaje, nnyende kulilaba makabeke ndoana, ntola chamaki ju kutumbula kolwa nhwekula kano jakwe, na nkati mukolela uloi tela na kulepa kodi. Ntola kwa magambu gangu nenga na magambu ginu mwenga.”
Currently Selected:
Matayo 17: NNQNT
Highlight
Share
Copy
Want to have your highlights saved across all your devices? Sign up or sign in
Ngindo New Testament © The Word For The World, 2015.
