Markus Uram 13
13
Er Yesus biryi minob bikmou cok, Erci Er Imtamnyi bisi dama deirin ai asi, “Ninyi aryi dakwaming,” ebmou uram
13:1-2
1Eterebmou ura, Er Yesus ab Er miliramnyi nang ab Bait Allah ai ara Er Imtamnyi bisi dama deirin ai dam aryi kuboka anabmai. Anabmai cok, er miliramunyi tentok aryi Er Yesus bisi ato ebmou, “Nai, dibderum. Nai e. Bait Allah ai ara diboka teleb ai kurur. Akai deneboka dobmai keil abilinga ara teleb keil abilinga kubmar ba, akai ara lumun ab erebdoba ai kubmar,” ebmou. 2Ato ebmou bok, Er Yesus biryi ersi ato ebmou. “Akai teleb kuboka dobyi ara iya kum dankwande. A lumun ab erebdoba ai nirya ara iya daksakwande. Ara, ninyi aryi yandoka Bait Allah ai nirya dakwetebkwaming,” ebmou ura, anaboka bindobmai.
Er Yesus biryi minob bikmouci, Erci, “Mambul weik kubwansir tum yankwande,” ebmou uram
13:3-13
3Ura, Er Yesus ab Er miliramnyi nang ab ara Bait Allah ai dam aryi kuboka anabdobmai ura, yuryibindoka mutuk si, “Zaitun kon,” asi welebinmai. Welebindoka bukmaici, otam aryi kuboka Bait Allah ai asing eibmai. Ura, Petrus ab, Yakobus ab, Yohanes ab, Andreas ab aryi sun yuk ai bindoka Er Yesus bisi ato eboka asibdenmai. 4“Nai, Bait Allah ai asi dakwetebkwaming tum ara una tum aryi kubkwaming do? ‘A dinyi nirya kunubkwande tum ara sirya kobdob tum sirya yankwamasir,’ tenen una kuboka bikwayeb do?” eboka asibdenmai.
5Uca, Er Yesus biryi sunsi ato ebmou. “Sunda diboka kalikdandobdarur. Yuk nang aryi tola uram eboka eterebsingiryi sunsi bowanikminiksingnyei ati diboka kalikdandobdarur. 6Sirya kobdob tum kum berekabde bok, ninyi ilinto aryi tola ati Ni si asi sibokabingiryi, sunsi, ‘Nira Er Imtamnyi biryi bokwetebnounyi a kunum,’ ebkwansing. Ba, tola ati ato ebsingnyi uca, ninyi ilinto aryi a tola en nang asi dib teneboka milibkwaming. 7Ura, sirya kobdob tum kum kuabde bok, mar ordana uram ilinto asi kekebkwandum. Ara, ninyi aryi sunsi, ‘Ei mutuk nang mar obdaraming, ou mutuk nang ababyi mar ordaraming. Ura, a mutuk nang ababyi mar ordankwaming.’ Ninyi aryi sunsi ato ebsingnyi ura, sun kanya ilil kusina mem. Ati, sunci, ‘A dinyi kum kubte ura, sirya kobdob tum dam kum yankwamar,’ tenen ilil kusina mem. Mar ordanmangnyi ba, sirya kobdob tum dam kum yankwamar ati ebman. 8Ba, ton mutuk nang aryi yuk mutuk nang ab obdankwaming. Weik sienyi tonyi bisi milin nang aryi weik sienyi yuknyi milin nang ab mar obdankwaming. Ba, tonda sirya kobdob tum kum berekabde bok, mutuk mikbaryi ara mutuk eimna dobkwande. Ba, kwaning koubmangnyi bok, kwaning nong mana kum kubdiryi, kwaning atan weik kubkwansir. A dinyi nirya ara ninyi kanya asi mambul kubdeibkwansir bok, iya mambul weik kurdeirin dinyi minob kum yankwande.
9Ati, sunda diboka kalikdandobdarur. Sirya kobdob tum kum kuabde bok, Nisi miliranurum nang asi taleboka nun Yahudi yala nang asi deyok liliboka wenen nang bulun ai asi bobinkwansing. Ura, nun deyok liliboka wenen nang aryi sunsi, ‘A nang ara malyi kun nang,’ eboka kulab-kulab eboka wenebkwansing. Sunda Nisi miliranurum ati, a nang aryi sunti, ‘Nun li,’ tenen sunsi taleboka yuk deyok liliboka wenen nang ara sun Er Imtamnyi Uram walwal nang bok, iya erebdob nang dam asi bobinkwansing. Ura, sun Roma nang weik sienyi amwetam bun nang ab ton sun weik sien nang ab aryi sun deyok lilinmasingnyi uca, sunci a erebdob nang asi Ni deyok lak ebkwandarur. 10Ura, sirya kobdob tum kum kuabde bok, sun im dangna tukwe dangna nang nirya aryi Teleb Uram asi kekebkwanung. 11Sun ninyi aryi sunsi taleboka bobinkwansing ba, sunci, ‘Una ebkwan do?’ tenen mambul kanya bobmunyei. A tum ara Er Imtamnyi Kanya Roh Kudus aryi sun kanya dam asi, ‘Ato-ato ebdum,’ eboka eterebsici to, sunci ebmuruboka ebkwandarur.
12Ura, sirya kobdob tum kum kuabde bok, er du biryi, ‘Ni weit asi obting,’ tenen er weit asi taleboka sun ninyi on nang dam bobinkwande. Ba, er nai biryi, ‘Ni mi asi obting,’ tenen er mi asi taleboka sun ninyi on nang dam bobinkwande. Ba, sun mining mabwe aryi, ‘Nun nai ab, nun ab, kwin ab asi obting,’ tenen sun nai sun kwin ab asi taleboka sun ninyi on nang dam bobinkwaming. 13Sunda Nisi miliranurum ati, ninyi nirya aryi sunti, ‘Obtibyi,’ tenen mar ibkwansing. Mar ibkwansing bok, sunda sun kanya dam aryi katabum eboka Nisi tanglona kumci, iya milibnindarur. Sun tanglona kum Nisi iya milibkwaningnyi nang asi Er Imtamnyi biryi iya lebkwande,” eboka eterebmou.
Tola uram eteren nang aryi anaboka, “Nira Kristus a kunum yanman,” ebsingnyi ura, “Sunci a tola en uram ati dib tenebmunyei,” eboka eterebmou uram
13:14-23
14Er Yesus biryi eterenmouci, Er miliramnyi nang asi ato eboka ton eterebmou. “Ura, sirya kobdob tum kum kuabde bok, ninyi aryi Bait Allah ai asi wekoka iya ina ngilikman dinyi asi wekman kum dam bowengyankwaming. A ina ngilikman dinyi deyok aryi, Er Imtamnyi biryi er ai asi iya taklobci ura, akai kum dankwande. Ati, sunci a dinyi asing eibmunyi ura, sun Yudea mutuk kuramingnyi nang nirya ara, ‘Nun ordana nang dam yanganmang ati, obsingnyei,’ teneboka sun kuramingnyi atei yuk-yuk aryi anaboka bai cungbindoka mutuk kon ai welebindobkwanung. Er a ebne uram asi dibde nukwandinyi biryi kalikoka a dinyi diboka lilibkwandur. 15A tum ara sun ai dam kubkwamingnyi nang aryi, ‘Nun ordana nang dam yanganmang ati, obsingnyei,’ teneboka yan dum sorokloboka cung bindobkwanung. Ara, ‘Ni ai wekoka ni dinyi dobdobtiniryok,’ tenena kumci, sun dinyi nirya deibloboka yan dum sorokloboka cung bindobkwanung. 16Ba, sun wa dam kunmangnyi nang ababyi, ‘Atei tamurbindoka ni ongon aling bobdobniryok,’ tenebmunyei. Eda, sun dinyi nirya deibloboka, ‘Nun ordana nang dam yanganmang ati, obsingnyei,’ tenen yan dum sorokloboka cung bindobkwanung. 17A tum ara mambul weik kurdeirin dinyi kubkwansir. Sun mundu boamingnyi nerabwe babyi, sun mi mum dininmangnyi nerabwe ababyi cung dorbinman kum kubkwaming ati, Ni bico tenebman. 18‘A dinyi ara muryi talak ara bisik yibinman kum talak aryi kubsicei,’ tenen sunci Er Imtamnyi bisi molobdobdarur. 19Sirya kobdob tum dam kubkwande tum ara sun kanya asi iya mambul kurdeirin dinyi kubkwansir. Minob ura Er Imtamnyi biryi utotoa nirya kikniamwe dinyi ara ato kum kuramwe. Tonda, ukuryok dinyi ababyi ato ton kum kurur. Tonda, aminda ababyi ato dinyi ara ton kum kubkwande. 20A tum ara iya mambul kurdeirin dinyi kubkwansir ara, tiya ati kubkwansir. Ara, Er Imtamnyi biryi, ‘Niryi boukwe kuboka wibse nang asi lebkwan,’ tenebmou ati, a mambul kurdeirin dinyi tiya ati kubkwansir. Er Imtamnyi biryi, ‘A kunum,’ minola kum ebte ura, ninyi nirya dibting ati ebman. 21A dinyi nirya kubsici ba, ninyi aryi sunsi tola ati, ‘Er Imtamnyi biryi bokwetebmounyi Ninyi Lemsinanyi atam kunmar, otam kunmar,’ ebsingnyi uram ati, diba tenebmunyei. 22Ba, ton nang aryi tola ati eboka ‘Nira Er Imtamnyi biryi bokwetebnou lemsinanyi a kunum yanman,’ ebkwaming. Ba, yuk nang aryi tola ati eboka, ‘Nira Er Imtamnyi Uram ebdeibmaca bobananyi a kunum,’ ebkwansing. A nang ara ilil tenen dinyi kiknibkwaming ati, ninyi ilinto aryi, ‘A nang asi Er Imtamnyi biryi bokwetebmou nang aca,’ tenen dib tenebkwaming. A nang aryi, ‘Er Imtamnyi biryi boukwe kuboka wibwe nang ababyi nunsi milibsiting,’ teneboka ato kuboka bowanikminikdenkwansing. 23Niryi a dinyi nirya minob bikoka sunsi eterebsin ati, sunci dibdoka kalikdandobdarur,” eboka eterebmou.
“Asing dinmamun bok, Ni Ninyi Dasinyi imtam aryi kuboka tamuryankwan,” ebmou uram
13:24-32
24Ebmou cok, Er Yesus biryi Er miliramnyi nang asi ato eterebmou. “A tum ara sun kanya asi mambul kurdeirin dinyi yankwansir tum berekci ura, ilil tenen dinyi kubkwansir. Ara, Er Imtamnyi Uram ermururamnyi nang aryi minob kerek sekamnyi to kunubkwande. Ara, sunci, ‘Kiting sinarya ton wala tilil ton kum daci ura, kunuk dakwande. 25Im amwetam kurande dinyi nirya ara lulukwande ba, kurya nirya ara imtam aryi kuboka daksakwande.’ Ara, Er Imtamnyi Uram ermururamnyi nang aryi minob kerek sekamnyi to kunubkwande.
26A dinyi sirya kunubci ura, ninyi nirya asing eibkwaming ba, Ni Ninyi Dasinyi bira imtam aryi kuboka tamuryuryankwan. Ara, Nira mikib weiknyi ton milil ilintonyi kubniryok, duwa ilinto deici aryi bukoka tamuryankwan. (Daniel 7:13)
27Tamuryanganyi ba, Niryi sun Er Imtamnyi Uram eryuryangan nang asi arukoka bokdonokwan. Ba, Niryi sunsi bokdonokoka, ‘Sunci yaletam bindoka, kitingbantam bindoka, me utam bindoka, me youkwetam bindoka, Er Imtamnyi biryi boukwe kuboka wibwe nang asi Ni dam boyandarur. Ati, a nang nirya asi buluboka Ni dam boyandarur,’ eboka bokdonokwan,” ebmou.
28Ato ebmou cok, Er Yesus biryi Er miliramnyi nang asi ton ato eboka eterebmou. “Niryi kiklina uram ebkwan ati, sunci kekendarur. Co kwarang asi silikwandiryi, mim dingmaci ura, sun ninyi aryi, ‘Ei, co keta dobkwamar,’ tenen bingnaming. 29Ati, sunbabyi neiktoto, sunci Ni ebman to mambul kurdeirin dinyi nirya asi asing eibmunyi ura, sunci, ‘Sirya kobdob tum ara dam kubmar,’ tenen bikwandarur. 30Ati, Niryi sunsi diboka ebkwinsin uram ara kekendarur. Sun a kurandum nang tuba kuramun bok, Niryi ebman to dinyi nirya kunubkwande. 31Im amwetam kurande dinyi ab tukwetam kurande dinyi ab nirya kum dankwande bok, Ni eterebmasin uram ara dib kunubkwande deyok aryi, iya kubkwande,” ebmou.
32Ato ebmou cok, Er Yesus biryi Er miliramnyi nang asi ton ato eterebmou. “A dinyi nirya kunubkwande tum ara ninyi nirya aryi kum bikwaming. Er Imtamnyi Uram eryuryangan nang ababyi kum bikwaming. Ba, Ni Er Imtamnyi mi ababyi kum bikman. Eda, Ni Nai Imtamnyi tentok asi a uki tum bingdur,” eboka eterebmou.
Er Yesus biryi, “Dibde bukmuncok, kalikdarur,” eboka eterebmou uram
13:33-37
33“Sunda a dinyi nirya kunubkwande tum ara kum bikmarum ati, diboka kalikdandobdarur,” ebmou. 34Ura, Er Yesus biryi kiklina uram doboka Er miliramnyi nang asi ato eboka eterebmou. “Ai damnyi tentok aryi, ‘Ninyi atei binkun,’ tenebmou ura, er arungna nang yuk-yuk asi arukoka sunsi, ‘Ni ninyi atei kubkwan talak ara ato-ato wa irandarur,’ ebdeibmou ura, er ai kalingnanyi bisi, ‘Ni tamuryankwan ati, kanda kalikoka dibde buranurum,’ ebmou. 35Ebmou cok, erci, ‘Ati, sunci neiktoto kalikoka dibde bunkwandarur. Sun er ai damnyi arungna nang aryi sun nai tam uryankwamwe tum asi kum bikmai ato, sunbabyi neiktoto Ni tamuryankwan tum asi kum bikwandum. Ati, sunci, ‘Nun nai sintam aryi tamuryankwande do? Lukunda dukduk en aryi tamuryankwande do? Belekuna kobdob aryi tamuryankwande do?’ tenen kalikoka dibde bunkwandarur. 36Nira lukdandoka yangani ba, Niryi sunsi wi mabmamunyi asi eibsinyei.’ 37Ati, a ebmasin uram ara ninyi nirya ati, ‘Kalikoka dibde bunkwandarur,’ tenen ati ebman,” eboka Er Yesus biryi Er miliramnyi nang asi eterebmou.
Currently Selected:
Markus Uram 13: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
