Matius Uram 8

Er Yesus biryi susa taleamunyi tentok asi kwetebmou uram

8:1-4

1Er Yesus mutuk kon dam aryi yuryanmou ura, ninyi ilinto buluryandoka Ersi milibmai. 2Ura, ninyi tentok susa taleamunyi biryi yanmouci, erci Yesus biti, “Ni Nai Erebdobnyi,” tenen er kutam ikdongobmou. Er kutam ikdongobmouci, erci Yesus bisi ato ebmou, “Nai Arungdeirisurumnyi, Kanda mikibnyi kurum ati, Kanci nisi kwetebnutum. Ati, Kanci niti, ‘Kwetebkwan,’ tenebniminyi ura, ni susa talebnoua akabsakdobkwanir. Uca, sun Er Imtamnyi ai wa in nang aryi niti, ‘Kan susa talebmakou ati, kanda Er Imtamnyi dama deirin ai dam wengbiminyei,’ tuba kum ebkwaning,” ebmou.

3Ura, Er Yesus biryi Er taruk lakoka er susa taleamunyi bol asi libdenmouci, ato ebmou, “Niryi kanti, ‘Kwetebkwan,’ tenebmakin ati, kan talebkou susa ara akabsakdobkwinkir uca, kanda Er Imtamnyi ai dam ur wengbirum,” ebmou. Ebmou ba, anyi taleamwe susa ara anmalakoka akabsakdobmou. 4Ura, Er Yesus biryi anyi bisi ato ebmou, “Diboka kekebdum. A kwetebmakin to ara yuk nang asi talyi ebdongobde yibana mem. Eda, kanci Er Imtamnyi kan ninyi kan noutam kuboka antanirdeirin nang asi birum. Ati, kanci bindoka, ‘Ni talebnou susa sirya akabsakmanir ati, niryi Musa biryi arukdeibsou to kunuboka Er Imtamnyi biti ninyi dama ton deibkwan,’ ebdum. Ura, sun antanirdeirin nang aryi kan bol asi sirya dibdenmangiryok, a nang aryi kanti, ‘Er talebmou susa sirya akabsakmar ati, Er Imtamnyi ai dam ur wengyate,’ tenen bikwanking,” ebmou.

Er Yesus bira Kapernaum atei aryi kunmou cok, Erci Roma yin doun nang sienyi wa irmiliramunyi bisi u yiramwe asi kwetebmou uram

8:5-13

5Ura, Er Yesus bira Kapernaum atei dam wengbinmou ura, ninyi tentok ara Roma nang yin doun nang seratus baryi arungnamwe sienyi biryi a kuramwe. Anyi biryi Er Yesus dam yandoka ato eboka molobmou. 6“Nai Erebdobnyi, ni ai wa irmilinururnyi bisi yan denebwe ba, mambul mitik kum dorur asi ai marur. Ati, Kanci ersi kwetebdum ati molobmakin,” ebmou.

7Ura, Er Yesus biryi anyi bisi ato ebmou, “Ni kan ai yandoka ersi kwetebkwaman,” ebmou.

8Ato ebmou bok, anyi yin doun nang sienyi biryi Er Yesus bisi ato ebmou, “Nai Erebdobnyi, nira Kan urasintam aryi tukwetam bunanyi kunun ati, Kanci ni ai wengbitum ara kikiman kum kubte. Ba, Kanci ni wa irmilinanyi biti, ‘Kwetebkwan,’ tenen uram bum tentok ababyi ebminyi aryok er u yirur asi lobdobkwande uca, bukoka yibinkwande,” ebmou. 9Ebmou cok, anyi yin doun nang sienyi biryi Yesus bisi ato eboka ebtabakmou, “Ni nong ara yuk nang amwetam bunanyi kunun cok, a nang aryi nisi arungdeiriraningnyi tok niryi kunubde banun. Tonda, ni amwetam bun nang ara yin doun nang kunungcok, niryi a nang asi arungdeiriranyi tok, kunubde banung. Ati, niryi ni amwetam bunanyi tentoknyi bisi, ‘Birum!’ ebtinyi uca, er binkwande. Tonda, niryi ni wa irmilinanyi yuknyi bisi, ‘Yarum!’ ebtinyi uca, er yankwande. Ati, Kanda mikibnyi kurum ati, Kanci, ‘Kwetebkwan,’ tenen uram bum tentok ababyi ebtum uca, ni wa irmilinanyi bukoka yibinkwamar ati molobmakin,” ebmou.

10Ato ebmou asi Er Yesus biryi kekebmou uca, Erci, “Nai e,” tenebmou. Ara, anyi bira Er Yesus bisi katabum eboka dib teneramwe deyok aryi, Yesus biryi, “Nai e,” tenebmou. Ura, Yesus biryi sun Ersi milibmai nang asi ato ebmou, “Niryi sunsi dib en uram asi ebkwinsin ati sunci diboka kekebdarur. Sunda Israel yala nang kankan aryi ton nang ara Nisi dib teneranurum asi eibmasin. Bok, anyi bira Israel yala kumnyi kururcok, erda sunda Israel yala nang nirya asi bisibkaboka katabum eboka dib tenenurur ati eibman,” ebmou. 11Ebmou cok, Erci ton ato ebmou, “Niryi sunsi ebkwinsin uram asi diboka kekebdarur. Ninyi ilinto ara sun Yahudi yala nang kum kunungcok, Er Imtamnyi amwetam kun nang kibkwaming. Ara, Yahudi yala kum nang ara yaletam mutuk nang ton kitingbantam mutuk nang ton yuk mutuk yuk mutuk ton ara yandoka Er Imtamnyi dam kun nang kibkwaming. Ara, sirya kobdob uki tum sirya berekci ura, nun Nai Imtamnyi biryi Er amwetam kun nang nirya asi du dongobci ura, sun Yahudi yala kum nang ilinto ababyi Er Imtamnyi ai wengbinkwaming. Ara, Er Imtamnyi biryi a nang ababyi bun sokon karebde uca, sunda nun abwe yabwe Abraham ab, Ishak ab, Yakub ab tonkwa bukoka weik kwalina kwalibkwamingiryok, Er Imtamnyi dam kun nang kubkwaming. 12Ba, sun Yahudi yala nang kankan aryi ninyi ilinto ara Er Imtamnyi Uram asi diboka kum kunuraming ati, Er Imtamnyi amwetam bun nang diboka kum kunung. A nang asi Er Imtamnyi biryi bai donokwande uca, iya kunuk kurur ai iya kubkwaming. Akai kubkwaming nang ara mambul mitik kum aryi si darab-darab eboka engena weik engebkwaming,” ebmou.

13Ura, Yesus biryi a uram sirya ebmou ura, Erci a Roma yin doun nang sienyi bisi ato ebmou, “Kanci Niti, ‘Erda diboka mikibnyi kurur ati, ni wa irmilinanyi bisi kwetebte,’ tenen molobmanirim to sirya kunubmakin ati, kan ai da birum!” ebmou. Ura, Er Yesus biryi ato erdongou ba, er wa irmilinanyi yan deneamwe asi mikib yanmou uca, erda yuk bukoka ur yibanmou.

Er Yesus biryi Er miliramunyi si Petrus er yamalner u yiramwe asi kwetebmou ura, yuk nang u yiramwe nang ababyi kwetebmou uram

8:14-17

14Ura, Yesus ab Er miliramnyi nang ab Er miliramunyi si Petrus ai wengbinmai. Wengbindoka diramnyi uca, Petrus er yamalner ara uk aruma taleramwe deyok aryi, mabmou asi eibmai. 15Ura, Yesus biryi, “Kwetebkwan,” tenen a ner taruk talebdenmou uca, a taleramwe uk aruma ara kum dandobmou. Uk aruma kum dandobmou ura, a ner bukalabmouci, Erci Yesus bisi kisal dakoka, “Ni Nai,” tenen yina du dongobmou.

16Ura, inibdongobnin bau ura, Er Yesus bisi isa kanya wengdaramwe nang ilinto boyanmai. Ba, Er Yesus biryi uram bum tentok aryok a wengdaramnyi isa kanya yuk-yuk asi yakdonokmou. Tonda, sun u yiramwe nang nirya asi Erci kwetebmou. 17Er Yesus biryi u yiramwe nang ilinto asi kweteramwe ara Er Imtamnyi Uram ebdeibmaca bobaramunyi si Yesaya biryi minob ebdeiamwe. Ara, nabi Yesaya biryi minob ura ato eamwe,

“Nun u yiransir dinyi yuk-yuk asi Erci kwetebkwande.

Tonda, nun mitang kuransir dinyi yuk-yuk asi Erci loblobkwande.” (Yesaya 53:4)

Ati, Yesus biryi a uram asi kunubdeibmouci, ninyi ilinto kweteramwe.

Er Yesus biryi, “Sunci Niti, ‘Milibkwayeb,’ tenebnumunyi ura, sunci yuk dinyi-yuk dinyi nirya asi barwetam kibmunci, Nisi diboka milibdarur,” eboka eterebmou uram

8:18-22

18Er Yesus biryi diramwe uca, ninyi ilinto yandoka Ersi aknabdongoboka noutam dongobdongobmai ura, Erci Er miliramnyi nang asi ato ebmou, “Me kwan koubkaboka otam binkwayeb ati, co ngun-ngun dokdonokdarur,” ebmou. 19Ba, sunci, “Anaboka baronkub,” tenen kunmai asi, Musa kerek sengna eterenanyi tentok yandoka Er Yesus bisi ato ebmou, “Nai ninyi eterenanyi, Kan dantam-dantam yibarkiringkwandima ara nira Kansi iya milirkiringkwankin,” ebmou.

20Bok, Er Yesus biryi anyi bisi ato ebmou, “Bai kam ara er man ai keil umbura dam marur. Tonda, maka ababyi er man ai marur. Bok, Ni Ninyi Dasinyi bira tukwetam kunun cok, man ai ton man sokon ababyi ton kum kunurur. Ati, kanci Niti, ‘Iya milirkiringkwankin,’ talyi ebniminyei,” ebmou.

21Ura, Er Yesus bisi tiya milibmai nang kankan aryi yuknyi biryi Ersi ato ebmou, “Nai Erebdobnyi, ni nai nong wise dandobwe asi kalikoka kuranyi ani, sirya dibci ura, tukwe dongobniryok, niryi yandoka Kansi iya milibkwankin,” ebmou.

22Ato ebmou bok, Er Yesus biryi anyi bisi ato ebmou, “Sun Nisi milinina kum nang ara din nang ato kuramingiryok, sun din nang asi tukwe ur dongobting. Ba, kanda Nisi milibnurum,” ebmou.

Ibalya weik donmou asi Er Yesus biryi, “Taklobdum,” ebmou uca, ibalya kum danmou uram

8:23-27

23A sirya ebmou ura, Er Yesus co ngun-ngun dub burwelebinmou ura, Er miliramnyi nang ababyi co ngun-ngun welebindoka sun tonkwa bukmaici, banmai. 24Banmai ani, weik me kwan noutam banmai ura, Er Yesus wi mabmou bok, ibalya weik dobkalibmou. Ibalya weik donmouci, me kwatib-kwatib ena aryi co ngun-ngun asi siklibmanto kubmou uca, co ngun-ngun ara me wekoka dangublobmanto kunmou. 25Ura, Er miliramnyi nang aryi Er Yesus mabmoua ai yandoka kamubdeibmaici, ato ebmai, “Se Nai Erebdobnyi, nun a obkwamasir anun e. Kanci lebdobsurum!” ebmai.

26Ura, Yesus biryi Er miliramnyi nang asi ato ebmou, “Sun katabum eboka dib kum tenenindarur nang se! Unato ati sun kanya ilil weik kubmasir do!” ebmou. Ura, Er Yesus bukokmou ura, ibalya donmou asi, “Kum darum,” eboka erekdobmou uca, ibalya kum dandobmouci, me kwan me kwatib-kwatib enmoua ababyi kum danmou.

27Ura, Er miliramnyi nang ara sun kanya aryi, “Se nai yabwe,” tenebmaici, sun mamun asi ato ebdanmai, “Anyi bira ibalya ab me kwatib-kwatib ena ab asi, ‘Takdum!’ ebmar akiryok, ibalya ab me kwatib-kwatib ena ababyi kum danmar. Anyi bira unato anyi kururcok, mikib kuboka ato dinyi ilil tenen dinyi kiknibmar do?” ebdanmai.

Er Yesus biryi ninyi bitinyi isa kanya wekamwe nang asi kwetebmou uram

8:28-34

28Banmai ani, weik me kwan koubkabokmai ura, sunci yaletam aryi kuboka Gerasa nang mutuk tam dararbinmai. Sirya dararbinmai ura, isa kanya wekamwe nang bitinyi sun ab ebdanmai. A nang ara ninyi tukwe dongon ai dam aryi kuboka Er Yesus dam yanmarei. A bitinyi nang ara yu mitik kum kurandei aryi ninyi tentok ababyi sun kurandei bisik ara ton kum yibaramnyi. 29Ura, a bitinyi nang aryi uram doboka Er Yesus bisi ato ebmarei, “Se, Kanda Er Imtamnyi Mi kurum. Kanci nunsi mambul kibdeibkwansirim ati yanmasirim do? Er Imtamnyi biryi nunsi iya wenebkwansir uki tum kum berekmar bok, Kanci nunsi mambul kibdeibkwamasirim ati yanganmarim do?” Ato eboka uram dobmarei.

30Dinmai uca, a ebdanmai dam ara bisam ilinto mol kunmaici, tukwe lungmai. 31Ura, a isa kanya mer aryi Er Yesus bisi ato eboka molobdobmai, “Kanci nunti, ‘Yakdonokwan,’ tenebsiminyi ura, Kanci nunti, ‘A kunmang bisam mer asi ur wengdorbindarur,’ ebsurum,” eboka molobdobmai.

32Ura, Er Yesus biryi a isa kanya mer asi, “A bisam mer asi ur wengdorbindarur!” ebmou. Sirya ebmou uca, isa kanya mer ara a bitinyi nang umbura dam aryi anabkaboka-anabkaboka a bisam mer umbura dam wengbinsekmai. Ura, a bisam mer ara mutuk asinabyi mol yinmai ai aryi kuboka cungyuryibindoka me kwan umbura wengbindoka me isin daksekmai. 33Ura, a bisam kalingna nang aryi eibmai ura, sunci atei cungbindoka a kubmou to nirya nukmai. Ara, “Isa mer asi yakdonokoka isa kanya wekamwe nang bitinyi asi sirya kwetebmou,” eboka ababyi nukmai. 34Ura, akatei nang aryi anabdobmaici, Er Yesus diryanmai. Er Yesus bisi yandoka ebdanmai ura, sunci Ersi ato eboka molobmai, “Kanda nun mutuk kuna kum. Eda, Kanci anabdobminci, yuk atei da birum!” eboka molobmai.

Currently Selected:

Matius Uram 8: MTG

Highlight

Copy