Matius Uram 6
6
Yesus biryi Er miliramnyi nang asi eterebmouci, “Sunci ato-ato kuramuncok, sun kwaning atan nang ab sun yuk dinyi-yuk dinyi atan nang ab asi yina kum co bok kum karebdarur,” ebmou uram
6:1-4
1Er Yesus biryi uram eterenmouci, ton ato ebmou, “Nun Yahudi yala nang ara, ‘Er Imtamnyi teleb tenesurur to kunubde binkwayeb,’ tenen sun kwaning atan nang asi yina kum co bok kum karenub. Tonda, nunci Er Imtamnyi urasintam aryi teleb dinyi yuk dinyi-yuk dinyi ababyi kunubde banub. Bok, Niryi sunsi ato ebkwinsin, Sunci, ‘Er Imtamnyi biryi teleb tenesurur to kunubdeibkwayeb,’ tenebmuncok, sunci, ‘Ninyi aryi asing eibsitingiryok, kisal daksiting,’ tenen kunubmunyei. Sunci ato tenen kunubmunyi ura, Er Imtamnyi biryi sunsi kisal kum daksute.
2Ati, sunci, ‘Sun kwaning atan nang asi yina kum co bok kum karebkwayeb,’ tenen kunubde baramunyi ura, sunci, ‘Yuk nang aryi asing eiboka kisal daksiting,’ tenen karebde baramunyei. Ati, sunci, ‘Yuk nang asi teleb kubdeibmab,’ eboka ninyi urasintam aryi lak ebdamunyei. Sun malyi kanya bon nang ara, ‘Ninyi aryi kisal daksiting,’ tenen teleb kanya bon nang aryi kuraming to miliramingiryi, sunci Musa Uram eteren ai wengbindoka sun kwaning atan nang asi co bok kareraming. Tonda, tamurdengdan ai dam bindoka kareraming. Ara, ‘Ninyi aryi kisal daksiting,’ tenen ninyi urasintam kareraming. Ba, Niryi sunsi dib kobdob uram ati ebkwinsin, ninyi aryi a nang asi sirya kisal dangnaming bok, Er Imtamnyi biryi a nang asi kisal kum dakwande. 3Ba, sunci, ‘Sun kwaning atan nang asi yina kum co bok kum karebkwayeb,’ tenen kunubmunyi ura, sunci yuk nang urasintam aryi karebmunyei. Eda, iniboka karebdarur. Ati, sunci sun taruk siriktam biriman aryi karebmunyi ura, sunci, ‘Nun mining taruk kwanimtam taruk ababyi biksicei,’ tenen iniboka karebdarur. 4Ati, sunci karebmunyi ara, ‘Yuk nang aryi biksingnyei,’ tenen karebdarur. Ato kuboka karebmunyi ura, sun Nai Imtamnyi bira lak dinyi ab lak kum dinyi ababyi nirya asing eirisururnyi biryi sun teleb kubmarum to asing eibsiryok, sunsi kisal dangsin dinyi karebkwansir,” ebmou.
Er Yesus biryi eterebmouci, “Sunci Er Imtamnyi si weik eboka moloramunci, ato-ato kuboka molobdarur,” ebmou uram
6:5-15
5Er Yesus biryi eterenmouci, ton ato eboka eterebmou, “Sunda Er Imtamnyi bisi molobkwamamunyi ura, sunci, ‘Yuk nang aryi asing eiboka kisal daksiting,’ tenen ninyi urasintam molobmunyei. Sun kiknibdeiboka Er Imtamnyi Uram kunubde ban nang kimdaraming nang ara Er Imtamnyi bisi moloraming to, sunci ukubmunyei. A nang ara Musa Uram eteren ai wengbindoka noutam ai tikmangiryok, ninyi urasintam aryi Er Imtamnyi bisi moloraming. Tonda, weik bisik dandanya tikmangiryi, sunci Er Imtamnyi bisi moloraming. Ara, diboka kum moloraming. Eda, ‘Ninyi aryi asing eibsiting uca, kisal daksiting,’ tenen kiknibdeiboka moloraming. Ati, Niryi sunsi dib kobdob uram ati ebkwinsin asi sunci diboka teneibde bindarur. Ninyi aryi sun ato kun nang asi langdeiboka kisal dangnaming bok, Er Imtamnyi biryi a nang asi kisal dangna dinyi mitika babyi kum karebkwande. 6Ba, sunci, ‘Er Imtamnyi bisi molobkwayeb,’ tenebmunyi ura, sunci inibdob ai umbura wengbindoka bublan tirikdobmun cok, sun Nai Imtamnyi bisi molobdarur. Ura, sun Nai Imtamnyi bira lak ai babyi inibdob ai babyi asing eirisururnyi biryi asing eibsici ura, Erci sunsi kisal dangna dinyi karebkwansurur. 7Ura, sunci Er Imtamnyi bisi molonmamun cok, sunci uram leberekanikoka molobmunyei. Sun Er Imtamnyi bisi bingna kum nang ara sun kwemdeina dinyi asi, ‘Ato-ato karebsindarur,’ eboka moloramingiryok, uram leberekaningnaming. Ara, ‘Uram weikanun sisikoka molonmabyi uca, nun molonmabyi dinyi asi kekeboka karebkwansing,’ tenen uram leberekanikoka moloraming. 8Ati, sunda Nisi miliranurum nang ara sun Er Imtamnyi bisi bingna kum nang aryi moloraming to miliboka molobmunyei. Sunci kum molobmamunyi bok, sun Nai Imtamnyi bira sunci molobkwamunyi dinyi asi sirya bingsurur deyok aryi, sunci uram leberekanikoka molobmunyei.
9Ati, sunci Er Imtamnyi bisi molobdobkwamuncok, ato eboka molobdobkwandarur,
‘Nai Imtam Kurumnyi,
Ninyi nirya aryi, “Iya Teleb kurumnyi,” eboka Kan si ererdeikina teleb.
10Kanda Iya Weik Sienyi kurum ati,
Kanci lebdeiboka kaliksimin ba, ninyi nirya aryi Kan arungdeirisin uram dobdobting.
Kanci karebsiminyi uca, nunci Kan teleb tenesurum to diboka kunubtibyi.
Sun imtam kun nang ara Kan uram asi ukurlona kum uca kunuraming to, nunda tukwetam kun nang ababyi neiktoto Kan teleb tenesurum to diboka kunubtibyi.
11Arub aryi yina yibkwamabyi kikimanto Kanci kuboka karebsurum.
12Ninyi aryi nunsi malyi dinyi kubdongobmasingnyi asi nunci tuba kum teneiramib to, Kanbabyi neiktoto nun malyi kun dinyi asi tuba kum teneibsiminci.
13Tonda, isa aryi yandoka, “Malyi kubting,” tenen dumdesici ba, Kanda Imtamnyi biryi bisik sekoka lebdobsurum.
Kanda Iya Weik Sienyi kurumci, iya mikib dinyi iya talerumci, Iya Erebdobnyi iya kubkwandim.
A deyok aryi nunci Kanda nun Nai bisi a kunum molobmakib. Amin.’
Ati, sunci, ‘Er Imtamnyi si weik eboka molobkwayeb,’ teneramuncok, sunci Ni ebmasin to miliboka molobdarur,” ebmou.
14Ura, Yesus biryi Er miliramnyi nang asi Er Imtamnyi bisi molona deyok ati eterenmou cok, Erci sunsi ato ebtabakmou, “Ninyi aryi sunsi malyi kun dinyi kubdongobmasingnyi ura, sunci a nang ati tulum kanya bobmurubde bimunyei. Eda, sun malyi kubdongobmasingnyi dinyi asi tuba teneibmunyei. Sunci ato kuramunyi ura, sun Nai Imtamnyi bibabyi sun malyi kun dinyi kilibdeiboka tuba kum teneibkwansir. A deyok aryi, sunci Er Imtamnyi si weik eboka molobmunyi ababyi sunci, ‘Ninyi aryi nunsi malyi kubdongobmasingnyi asi nunci tuba kum teneibkwayeb,’ tenen lak ebkwandarur ati ebmasin. 15Ba, ninyi aryi sunsi malyi kubdongobmasingnyi ura, sunci tulum kanya bobmuruboka tuba teneibde bimunyi ura, sun Nai Imtamnyi biryi neiktoto sun malyi kun dinyi tuba teneiriransiryok, kum kilibdeibkwansurur,” eboka eterebmou.
Er Yesus biryi, “Sunci, ‘Er Imtamnyi bisi nunukeiboka erebdeibkwayeb,’ tenen yina si teboka buramuncok, ato-ato kubdarur,” eboka eterebmou uram
6:16-18
16Ura, Er Yesus biryi Er miliramnyi nang asi eterenmouci, ton ato ebmou, “Sunci, ‘Er Imtamnyi kanya asi teleb kibdeibkwayeb,’ teneboka yina si teboka buramuncok, sunci, ‘Ninyi aryi asing eiboka kisal daksiting,’ tenen kunubde bimunyei. Ara, sun kiknibdeiboka Er Imtamnyi Uram kunubde ban nang kimdaraming nang aryi kunubde baramingnyi to, sunci kunubde bimunyei. A nang ara si teboka buramingiryok, uk sici borbosa asi doboka sun urasin lurdaraming. Ara, ‘Yuk nang aryi eibsitingiryok, “Ei, a nang ara yina si teboka bukmang,” eboka kisal daksiting,’ tenen sun urasin lumdaraming. Sunci a nang aryi ukuraming to ukuna mem. Niryi sunsi dib kobdob uram ebkwinsin ati sunci diboka teneibdarur, ninyi aryi sun ato kun nang asi langdeiboka kisal dangdaraming bok, Er Imtamnyi biryi a nang asi kisal dangna dinyi ton kum karebkwande. 17Ati, sunci yina si teboka buramuncok, sunci, ‘Ninyi aryi biksingnyei,’ uk sici borbosa doboka sun urasin lubdamunyei. Eda, sunci sun urasin asi me ilikabokmunci, otong lurdana me aryi lubdamun cok, yina si teboka bukdarur. 18Sunci ato kubmuncok, yina si teboka bukmunyi ba, yuk nang aryi sunti, ‘Yina si teboka bukmang,’ tenen kum bikwansingiryok, sunsi kisal kum dakwansing. Ba, sun Nai Imtamnyi bira ninyi aryi asing eibman kumnyi biryi, ‘Nisi nunukeiboka teneibmaning,’ tenen bikwansurur. Ura, sun Nai Imtamnyi bira lakdob dinyi ababyi inibdob dinyi ababyi asing eirisururnyi biryi asing eiboka kisal dakwansir,” eboka eterebmou.
Yesus biryi eterebmouci, Erci Er miliramnyi nang asi, “Sunci tukwetam bona bon dinyi ingkirikoka bobde bulurminingmunyei,” ebmou uram
6:19-24
19Er Yesus biryi eterenmouci, ton ato eboka eterebmou, “Tukwetam bona bon dinyi ara tiya talen dinyi akwe kurande ati, sunci tukwetam bona bon dinyi ingkirikoka bulubde minikmunyei. Bona bon dinyi co aryi kiknin dinyi nirya ara bulbula otokci uca, kum dankwande. Tonda, bona bon dinyi kat dinyi besi aryi kiknin dinyi nirya ara susulya biyang ongobci uca, malyi kibkwande. Tonda, bona bon dinyi bulubde miningnaming asi sun ukula don nang aryi yandoka ai dakoka abingiryi, ukula dobdobkwaming. 20Ati, sunci tukwetam aryi kuboka bona bon dinyi ingkirikoka bulubde minikmunyei. Eda, sunci, ‘Er Imtamnyi biryi kisal dakwansir dinyi asi langdeiboka dobdobtibyi,’ tenen ingkirikmunci, Er Imtamnyi urasintam aryi teleb dinyi kunubde bindarur. Er Imtamnyi biryi kisal dakwansir dinyi ara iya kurur ati, bulbula kum otokokwande. Tonda, a dinyi ara susulya biyang ongoboka malyi kum kibkwande. Tonda, Er Imtamnyi biryi kisal dakoka karebkwansir dinyi ara sun ukula don nang ai dakoka ukula kum dobkwaming. Ati, sunci, ‘Er Imtamnyi biryi iya kisal dakwansir dinyi dobdobtibyi,’ tenen ingkirikdarur! 21Sun tukwetam aryi kuboka bona bon dinyi ingkiringnamingnyi nang ara sun kanya dam aryi tukwetam dinyi akwe teneiriraming. Ba, Er Imtamnyi kisal dangna dinyi ingkiringnamingnyi nang ara Er Imtamnyi biryi teleb tenesurur dinyi nunukeiboka teneiriraming. A deyok aryi, Niryi sunsi, ‘Er Imtamnyi biryi kisal dakoka karebkwansir dinyi ingkirikdarur,’ ebmasin.”
22Ato eboka eterebmou cok, ato ebmou, “Sun teleb kanya bon nang ara kilkil kanya boramingiryok, sun bona bon dinyi asi yuk nang ur kareraming. Ba, sun, ‘Yuk nang aryi taleraming bona bon dinyi dobdobtibyi se,’ tenen nang ara yu kanya boraming. Ninyi urasin ara berengdeirin dinyi ato kururcok, ninyi kanya dam aryi tenerandum dinyi asi lak kimsurur. Ati, sun urasin teleb boramunyi ura, sun kanya ababyi teleb kurande. Ba, sun urasin ara yu boramunyi ura, sun kanya ara tabakoka iya yu kurande. 23Bok, sun asing kunuk dakansici ura, bisik diboka kum eirandum. Ato kuboka sun kanya dam malyi kanya boramunyi ura, yu dinyi kurandum. Asi, yu dinyi akwe sun kanya dam kuransici ura, iya yu akwe mitik kum kurandum.
24Ninyi tentok ara wa arungdeirinanyi tentok asi wa irmilirante ura, erda wa arungdeirinanyi yuknyi bibabyi nisintum wa irmilirante do? Ato tenen kum. Ato kuboka irmilirante ura, erda tonyi bisi boukwe kimdante ba, yuknyi biti, ‘Ni li,’ tenerante. Ato kuboka wa irmilirante ura, erda tonyi biryi takubdeibte wa asi busul kuboka irmilirante ba, yuknyi biryi takubdeibte wa asi tanglorante. Ura, sunci Er Imtamnyi teleb tenesurur to kunubdeiboka Er wa irmilina asi kanya deiboka ibkwamunci, co bok doron wa asi kanya deiboka ibmunyei. Ninyi tentok aryi wa bitinyi-bitinyi ara kanya deiboka ibman kum ati ebmasin,” ebmou.
Er Yesus biryi eterenmouci, “Sunci, ‘Nun una kuboka yina ingkirikoka yibtibyi do?’ tenen mambul kanya bona mem,” eboka eterebmou uram
6:25-34
25Er Yesus biryi Er miliramnyi nang eterenmouci, ato ton ebmou, “A deyok aryi, Niryi sunsi ato ebtabakwinsin, sunci, ‘Nun yibkwamab yina ara una kuboka ingkiriktibyi uca, yibkwamab do?’ tenen mambul kanya boboka ingkiringna mem. Tonda, ‘Nun ongobkwayeb aling ara kum kubmasir ati, nunci una kuboka ingkiriktibyi uca, nong bol limdana doboka ongobdobkwayeb do?’ tenen mambul kanya boboka ingkiringna mem. Yina yin dinyi ton ninyi nong aling ongon dinyi ton ara bikdob dinyi kurur bok, ninyi nong bol ab ninyi isin nebneb ebde kam kun dinyi ab ara bisibkaboka iya bikdob dinyi kurur ati ebman. Ati, sunci mambul kanya bona kum uca, ‘Er Imtamnyi biryi nun nong ab nun isin nebneb ebde kam kun dinyi ab ati, “Diboka kalikwan,” tenen yina ton ongon aling ton karebkwansir,’ tenen kubdarur,” ebmou. 26Ebmou cok, Er Yesus biryi kiklina bitinyi doboka eterebtabakmou, “Sunci maka mer imtam yibaraming asi dibdendarur. Maka mer aryi kwaning yala ton kum kounung. Tonda, kwaning kum kirkiringnung. Tonda, kwaning kiboka deirin ai ababyi dongoboka kum miningdeirinung. Ato kuraming bok, Sun Nai Imtamnyi biryi maka mer ababyi yina yirkarerur. Maka mer ara Er Imtamnyi urasintam aryi bikdob dinyi kurur bok, sunda Er Imtamnyi mabwe nermabwe kurandum nang ara bisibkaboka iya bikdob dinyi kurandum. Ati, sun Nai Imtamnyi biryi maka mer asi yina kareboka kalingsurur bok, erda sun ninyi asi kalingna kum uca, yina kum karebsute do? Ato tenen kum. Eda, sun Nai biryi bisibkaboka sunsi yina kareboka kalingsurur ati ebman,” ebmou. 27Ato ebmou cok, Yesus biryi ato ebmou, “Sunci, ‘Una kuboka yina ingkiriktibyi se?’ tenen mambul kanya bona mem. Sunci mambul kanya borandate uca, sun kam kubde bana ati uki tentok ababyi tabangdandate do? Ato tenen kum,” ebmou.
28Ura, bitinyi kiklina ara ato eboka eterebmou, “Sunci, ‘Una kuboka ongon aling ingkiriktibyi se?’ tenen mambul kanya bona mem. Sunci sikil keta asi dibdendarur. Sikil keta ara, ‘Ongon aling wibkwan,’ tenen busul kubdiryok, aling win tabwe kiknirande do? Ato tenen kum. Tonda, sikil keta ara, ‘Ongon aling ongobkwan,’ tenen busul kubdiryok, ongon aling wirande do? Ato tenen kum. A sungsunga aryi ongon aling ton kum wibokabdiryi ongorur bok, Er Imtamnyi biryi karerur uca, keta telebto orande asi eindarur. 29Sikil keta ara ongon aling iya teleb dinyi ato kurur ati ebman. Minob kuramunyi weik sienyi Salomo bira bona bon dinyi ilinto taleramuryok, iya teleb ongon aling ongoramwe. Ongoramwe bok, sikil keta orande bol ara bisibkaboka iya teleb bol kurur ati ebmasin. Ati, sikil keta ara, ‘Ongon aling una kuboka ongobtinyi,’ tenen mambul kanya kum borande bok, Er Imtamnyi biryi sikil keta asi ongon aling iya teleb dinyi karerande. 30Ati, wa in dam sungsunga arub aboka keta obmaci ani, ambutum ara kwiniboka uk daraming dinyi ababyi Er Imtamnyi biryi teleb ongon aling ato dinyi kareboka bol merengdeirirur. Ura, sunda Er Imtamnyi mabwe nermabwe kurandum asi Er Imtamnyi biryi ongon aling kum karebkwansir tenebmarum do? Ato tenen kum. Eda, Erci sunsi bisibkaboka kalingsurur ati ebmasin. Ba, sunda mambul kanya boramunyi ura, sunci Er Imtamnyi biti, ‘Diboka kalikwansir,’ kum tenerandum se. 31Sun Nai Imtamnyi biryi sunsi kalingsurur deyok aryi, sunci mambul kanya bona mem. Ati, sunci, ‘Nun yibkwabmab yina ara una kuboka ingkiriktibyi uca, yibtibyi do?’ tenena mem. Tonda, ‘Nun yibkwabmab me ara una kuboka ingkiriktibyi uca, yibtibyi do?’ tenena mem. Tonda, ‘Nun ongobkwayeb ongon aling ara una kuboka ingkiriktibyi uca, ongobtibyi do?’ tenen mambul kanya bona mem. 32Ato kun dinyi nirya ara sun tukwetam kanya bon nang ara Er Imtamnyi bisi bingna kum nang aryi nunukeiboka ingkiringnung. Bok, sunda Nisi miliranurum nang aryi mambul kanya boboka ato dinyi ingkirikmunyei. Sun Nai imtam kururnyi biryi sunsi kalingsurur cok, sun ataransici dinyi nirya asi diboka bingsurur ati, sunci, ‘Yina kum ongon dinyi kum una kuboka dobdobtibyi,’ tenen mambul kanya bona mem. 33Eda, sunci, ‘Er Imtamnyi bira iya Weik Sienyi kurur deyok aryi, nunda Erci nunsi teleb tenesurur to kunurantibiryok, Er amwetam kibdobtibyi,’ tenen nunukeiboka ingkirikdobdarur. Sunci ato tenen kuramunyi uca, Er Imtamnyi biryi sunti, ‘Ni amwetam kun nang kibdeibkwan,’ tenen karebsiryok, yina yin dinyi ton ongon aling ongon dinyi ton yuk dinyi ababyi tabakoka karebkwansir ati ebmasin. 34Sun Nai Imtamnyi biryi sunsi kalingsurur deyok aryi, sunci mambul kanya bona mem. Ati, sunci, ‘Se, nun ambutum ara unatoa yibkwamab do?’ tenen mambul kanya bona mem. Ambutum mambul kubdeibkwamasute dinyi ati, sunci arub aryi tenebmunyei. Arub aryi mambul kubdeibmasute dinyi yuk-yuk ara langdeiboka mambul kubdeibsute deyok aryi, sunci ambutum kum amcitum kum aryi mambul kubdeibkwamasute dinyi asi tabakoka tenebmunyei,” eboka eterebmou.
Currently Selected:
Matius Uram 6: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)