Matius Uram 14

Yohanes ninyi me dongoramunyi bisi obmai uram

14:1-12

1A talak ara Galilea mutuk nang kalingnamwe weik sienyi si Herodes biryi kekebmou uca, ninyi aryi, “Er Yesus bira ato-ato kuboka ukurande,” ebmai asi kekebmou. 2Ura, Herodes biryi kekebmou uca, erci er amwetam bun nang asi ato ebmou, “Anyi Yesus enungnyi bira ilil tenen dinyi kiknibde barandinyi bira Yohanes ninyi me dongoramunyi a kunum ati tenebman. Yohanes bisi obmoubwe asi kam tubto bukokmou ati tenebman. Ara, kam bukokmou deyok aryi, erci mikib weik dobdobmou uca, ilil tenen dinyi yuk-yuk asi kiknibde barande ati tenebman,” ebmou.

3-4Ara, Yohanes kam tuba kuramwe ba, Herodes biryi er yin doun nang asi arukdeiamuryi, “Yohanes ninyi me dongoramunyi taleboka ninyi wenen ai dongobdarur,” eamwe uca, sunci ersi taleboka dongoamnyi. Ara, Herodes biryi er weit Filipus ner si Herodias ukula dobdamwe deyok aryi, Yohanes biryi Herodes bisi, “Kan weit Filipus ner ukula dobdamoumwe ara malyito kubumwe,” eamwe deyok aryi, Herodes biryi Yohanes bisi ninyi wenen ai dongoamwe. 5Ara, Herodes biryi Yohanes biti, “Obtinyi,” teneramwe bok, ninyi ilinto aryi, “Yohanes bira Er Imtamnyi Uram ebdeibmaca bobananyi kurur,” teneramnyi deyok aryi, erci, “Yohanes bisi ona ati ni ilil,” teneramuryi, kum obmou.

6Bok, Herodes biryi ukula dobdamwe ner si Herodias bira, “Yohanes bisi obtibyi,” tenen tuba kuramwe. Ura, Herodes deibmou uki tum kubmou ura, erci, “Kwalina weik kwalibkwayeb,” eboka ninyi ilinto nabmou uca, tonkwa yinmai bok, Herodias nebnyi aryi bobatikde mot semou uca, Herodes er kanya iya teleb kubmou. 7Er kanya iya teleb kubmouci, Herodes biryi a nebnyi asi ato ebmou, “Kanci molobdobniminyi tok kunuboka karebkwamakin,” ebmou. Enmou cok, erci, “Tola kuma, diboka karebkwamakin,” eboka erkatan uram ebmou. 8Ura, er kwin Herodias biryi, “Ato-ato eboka molobdum,” ebmou tok a nebnyi aryi molobdobmou. Ati, erci, “ ‘Yohanes ninyi me dongonanyi bisi ya ngang dakoka obokdarur,’ ebminci, er kisok kwaning yangabde suwa deici deibdongoboka karebnurum,” eboka molobmou. 9Uca, weik sienyi Herodes biryi, “Se, ni talyi enmanuryi,” tenen mambul kanya bobmou. Mambul kanya bobmou cok, erci erkatana uram eboka, “Tola kuma. Kanci molobdobniminyi tok diboka karebkwamakin,” ebmou deyok aryi, erci a nebnyi aryi molobmou tok kunubmou. Tonda, Herodes biryi, “Sun yiryanmang nang ara niti, ‘Tola enanyi,’ ebningnyei,” tenebmou deyok aryi, erci er ebdeiamwe tok kunubmou. 10Kunubmou cok, erda weik sienyi biryi er yin doun nang asi arukdeibmouci, “Yohanes ninyi wenen ai aryi kurande asi bindoka er ngang ya dakoka obmunci, er kisok boyandarur!” ebmou. 11Uca, sunci bindoka Yohanes er ngang ya dakoka obmaici, er kisok asi kwaning yangabde suwa deibdongoboka boyanmai. Ura, sunci Yohanes er kisok boyanmai asi a nebnyi asi karebmai ura, a nebnyi aryi er kwin bisi bobinmou. 12Ura, Yohanes ninyi me dongoramunyi miliramnyi nang yandoka sunci Yohanes er tukwi boboka tukwe dongorbinmai. Sirya dongobmai ura, sunci Er Yesus bisi bindoka, “Yohanes bisi sirya obmang,” eboka nukmai.

Er Yesus biryi ninyi lima ribu baryi nang asi yina yibkarebmou uram

14:13-21

13Er Yesus biryi Yohanes bisi weik sienyi Herodes biryi obmou deyok kekebmou ura, a mutuk deibloboka bindobmouci, Er miliramnyi nang ab tonkwa co ngun-ngun dub bukoka ninyi kum dikum ai binmai. Bok, ninyi ilinto bulubmaici, Er Yesus bindobmou ati bikmai ura, sun atei yuk-yuk aryi anaboka mutuk kib bisik kuboka Ersi milibmai. 14Ba, Er Yesus ab Er miliramnyi nang co ngun-ngun dub bukoka banmai ani, me katum dam dararbinmai. Dararbinmai cok, Er Yesus biryi diramwe uca, ninyi yubwa-yubwa ilinto buluboka wekmai asi eibmou. Ura, Er boukwe sunti sangkuruk-sangkuruk ebmou ba, Erci a nang aryi boyanmai nang u yiramwe nang asi kwetenmou.

15Ani, sirya iniburyi kiting wekou ura, Er Yesus miliramnyi nang aryi Er dam yandoka ato ebmai, “A kunmab mutuk ara ninyi kun kum ai asi kunmab bok sirya inibmar. Ati, kanci a bulubmang nang ninyi yubwa-yubwa asi, ‘Sunci anabkaboka atei bindarur,’ ebminyi uca, a nang aryi atei bindoka yina dekoka yibde mabdobkwaming,” ebmai.

16Ebmai bok, Er Yesus biryi sunsi ato ebmou, “Kum, sun kum binkwamang. Eda, sunci a ninyi yubwa asi yina yibkarebkwandarur!” ebmou.

17Uca, sunci ato ebmai, “Nunda roti ara sirik amubaryok bobmab ba, mekinaia ara sirik bitinyok bobmab,” ebmai.

18Ura, Er Yesus biryi sunsi ato ebmou, “A roti sirik ab mekinaia sirik ab ara Nisi a boyandarur,” ebmou. 19Ebmou cok, Erci a bulubmai nang ninyi yubwa-yubwa ilinto asi, “Sungsunga deici bukdarur,” ebmou. Ba, sirya bukmai ba, Erci a roti amubaryi ab a mekinaia bitinyi ab dobtaleboka imtam dibwelebmouci, Er Imtamnyi bisi kisal dakoka, “E, Ni Nai,” eboka kibdobmou. Ura, Erci a roti ab mekinaia ab asi toboka-toboka Er miliramnyi nang asi karebmou ba, sunci a ninyi yubwa-yubwa asi bokeibde yibinmai. 20Ba, sun nirya yinmai ani, sirya boubmou ura, sun Er Yesus bisi miliramnyi nang aryi yina kablobmai dinyi bulubdeibmaici, tower aling amolbaryi kiboka deibmai ba, langkarikmou. 21Ura, a buluboka wekmaici, yina yibmai nang ara sal yoka dem ninyi lima ribu baryi atoa yibmai. Tonda, nerabwe ab mabwe nermabwe ababyi buluboka wekmaici, yibmai bok, kum nukmai.

Er Yesus me kwan me deici yibinmou uram

14:22-33

22Er Yesus biryi a bulubmai nang nirya asi yina sirya yibkarebmou ura, Erci Er miliramnyi nang amolbaryi asi ato ebmou, “Sunci ola anabdobmunci, co ngun-ngun dub bukoka me kwan koubkaboka otam minob binmandarur,” ebmou. Ura, Yesus er miliramnyi nang aryi anabdobmai bok, Er Yesus biryi sun bulubmai nang ninyi yubwa-yubwa ab tonkwa tuba kunmouci, “Sun atei yuk-yuk da bindarur,” ebmouci, bokdanmai. 23Ba, a ninyi yubwa sirya bokeibmou ba, bindobmai ura, Er Yesus bira Er yuk kubmouci, Erci, “Er Imtamnyi bisi molonkwaman,” tenen mutuk kon welebinmou. Ara, sirya kunuk dakmou ura, Er yuk adikum kunmou. 24Ba, Er miliramnyi nang ara co ngun-ngun bukoka tuba banmai cok, me katum dam otam kum binmaici, erda me kwan dub noutamtoto banmai. Banmai bok, kumwe weik donmou deyok aryi, me kwatib-kwatib enmou uca, sun bukmai co ngun-ngun ara dangublobmanto kunmou.

25Ura, berekwindiryi im ki dangnande ob ara Er Yesus mutuk kon aryi yuryandoka me kwan deici aryi banmouci, Er miliramnyi nang co ngun-ngun dub aryi bukmai asi yanganmou. 26Ura, Er miliramnyi nang aryi dinmai uca, Er Yesus me kwan deici yanganmou asi asing eibmai. Uca, sun lukdanmai ba, ilil kubmou ba, ato ebmai, “Din nang kanya o yanganmar onun e,” eboka ngalukde kwemai.

27Bok, Er Yesus biryi anmalakoka sunsi ato ebmou, “Sun ilil kusina mem! Ara, Ni sun Nai yanganman anun e!” ebmou.

28Ura, Petrus biryi Ersi ato ebmou, “Nai Arungdeirisurumnyi, Kanda Yesus a kunum yanganmaminyi ura, Kanci nisi, ‘Me kwan deici aryi yandoka ur yarum,’ ebdeniminci, ni me kwan me deici aryi yandoka Kan dam yankun,” ebmou.

29Uca, Er Yesus biryi, “Ur, a yarum!” ebmou.

Uca, Petrus bira co ngun-ngun dub aryi yuryibindoka me kwan deici banmouci, Er Yesus dam binmou. 30Barabwe bok, Petrus biryi kumwe lingna ton bikmou ura, er kanya ilil kuramwe ba, er wekdoro yurbau. Wekdoro yurbau ba, erci uram doboka ato ebmou, “Se Nai, ni lemdoryanurum se!” ebmou.

31Ura, Er Yesus biryi ola taruk donokoka ersi talebokmouci, ato ebmou, “Se Petrus, kanda Nisi dib tenenurum cok, mikib kuboka dib kum tenenurum se. Kan kanya kankana kubmakir ara unatoa ati kankana kubmakir do?” ebmou.

32Ura, co ngun-ngun dub burwelebinmarei ba, kumwe donmou ara kum dandobmou. 33Uca, Er miliramnyi nang co ngun-ngun dub bukamnyi nang ara Er Yesus biti, “Kanda dib kobdob ati Er Imtamnyi Mi kurum,” eboka kisal dakmai.

Er Yesus biryi Genesaret aryi u yiramwe nang kwetebmou uram

14:34-36

34Ura, me kwan koubkaboka otam kuboka doramnyi atei si Genesaret atei dararbinmai. 35Ba, akatei nang aryi diramnyi uca, “Er Yesus sirya yanmar,” eiboka bikmai ura, sunci a mutuk dam doramnyi atei nang dam nirya ebde yibinmai. Uca, a mutuk dam doramnyi atei yuk-yuk aryi anaboka ninyi ilinto yandoka sun u yiramwe nang nirya asi boboka Er Yesus dam boyanmai. 36Ura, sunci Ersi ato eboka molobdobmai, “Nai, sun u yin nang ara, ‘Kwetebsute,’ tenen Kan alib ongon aling kubkub asi bol libdenkwanking ati ur ebdum,” eboka molobmai. Ura, Er Yesus ongoramwe alib ongon aling kubkub asi bol limdenmai nang nirya ara sun u yiramwe dinyi kwetenmou.

Currently Selected:

Matius Uram 14: MTG

Highlight

Copy