Lukas Uram 3
3
Yohanes ninyi me dongoramunyi biryi Er Imtamnyi Uram etereramwe uram
3:1-20
1Roma weik sienyi Kaisar Tiberias kalingnamwe talak kwalina 15 baryi kubmou. Ba, er amwetam bun weik nang ara Pontius Pilatus bira Yudea weik atei Erebdobnyi kuramwe ba, Herodes bira Galilea mutuk weik sienyi kuramwe. Ba, Herodes weit Filipus bira Iturea mutuk ab Trakhonitis mutuk ab weik sienyi kuramwe ba, Lisanias bira Abilene mutuk weik sienyi kuramwe. 2A talak ara Hanas bira Er Imtamnyi kan ninyi kan noutam kuboka antanirdeirin sienyi tuba kuramwe. Bok, Roma nang aryi Kayafas unubmai talak aryi, ninyi kun kum mutuk dam aryi Er Imtamnyi biryi Zakharia mi Yohanes bisi, “Ni Uram etererbirum,” eboka tikeibmou. 3Ato eboka tikeibmou deyok aryi, Yohanes biryi me Yordan duman mutuk dam yandoka Er Imtamnyi Uram ebde yibaramwe ura, uram ara ato ebde yibaramwe. “Er Imtamnyi biryi sun malyi kun dinyi kilibkwansir ati, sun malyi tenendarur dinyi takmunci, Er Imtamnyi kanya asi teleb kurdeirin dinyi akwe kunubmun cok, sun baramnang, ‘Me dongobkwansir,’ tenen bobde yandarur,” eboka etereramwe. 4Er Imtamnyi Uram ebdeibmaca bobaramunyi si Yesaya biryi Yohanes deyok ati minob kunubdeiboka kerek sekdeiamwe to ara ato,
“Kekerandarur. Ninyi tentok aryi ninyi kun kum mutuk kurandiryi uram dobde yibinkirikwandur. Ato kubdiryi nun Nai Imtamnyi biryi, ‘Ninyi lebkwande Weik Sienyi,’ eboka bokwetebkwandanyi biti bisik u dikum yabde menekwandur.
5Yabde menekdiryi daki wekanci mutuk ara tukwe dongoboka bitabdeibkwandur. Ba, ereboka bukanci mutuk kon ab tukwetam bukanci mutuk kon ab nirya daraboka lilibkwandur. Ba, kwatima kun ato kuranci bisik ara urya otokoka lilibkwandur. Ba, yim bibikoka ingirdaranci mutuk ara neik dikum akwe kibdeibkwandur.
6Ba, ato kuboka lilibdeibci asi ninyi nirya aryi Er Imtamnyi biryi Ninyi Lebkwande Weik Sienyi bokwetebci asi asing eibkwaming,” eboka uram doramwe. (Yesaya 40:3-5)
7Ato ebmou cok, “Yohanes biryi me dongobkwansir,” tenen er dam yanmai nang asi, “Se, sunda kwatima tok aryi iniboka mabmaci ani, ninyi talyi yibangnyi asi si torande ato kundarur nang! Unanyi biryi sunsi, ‘Aminda Er Imtamnyi biryi iya wenebkwande wenena ara sunbabyi wenebsicei, ati Yohanes dam bindobmunyi ba, erci me dongobsurur,’ ebmasir ba, ilil ati cungyanganmarum do? 8Sunci nun wenebsicei tenebmunyi ura, ato kubdarur. Sunci sun malyi tenendarur dinyi takmunci, Er Imtamnyi kanya asi teleb kurdeirin dinyi akwe kunubmun cok, du teleb dinyi lak kibdamunci, sun baramnang aryi, ‘Me dongobkwansir,’ tenen bobde yandamunyi ba, sisa deibkwansir. Ati, sun kanyatam aryi, ‘Nunda, nun abwe Abraham deibdoba aryi yaldangna nang kunub ati, aminda ara Er Imtamnyi biryi iya wenebkwande tum ara nunda kum wenebkwansir,’ tenen kum! Niryi sunsi diboka ebkwinsin ara Er Imtamnyi biryi anda kurdarur keil asi Abraham Er Imtamnyi bisi diboka teneboka kunuramunyi mabwe nermabwe kibdeibkwamote! Ati, sunbabyi Erci Imtamnyi bisi dib teneboka kunubkwandarur! 9Er Imtamnyi bira du moun kum co deyok ara kweboka uk buk ilinto angmaci asi dabkwamingiryi, ya kala ya kiknibdeiboka buraming atonyi kurur,” Yohanes biryi ato ebmou. 10Ato ebmou ura, ninyi ilinto aryi ersi asibdenmai, “Ato ebmarim ura, una kubdobkwanub do?” eboka asibdenmai. 11Asi Yohanes biryi, “Unanyi biryi ongon aling bitinyi ongoranci ura, ongon aling ton kum ongororamingnyi nang ati kwiribdeibdarur. Ba, yina weikto kubmarinyi bira yina ton kum yibmangnyi nang ati karebkwandarur!” ebmou. 12A yanmai nang kankan ara, “Roma weik sienyi Kaisar biti pajak tukwe dengna karebdarur,” eboka molormiliramnyi nang ababyi, “Me dongobkwansir,” eboka yanmai nang aryi Yohanes bisi asibdenmai, “Nun Eteresurumnyi, nunda una kubdobkwanub do?” eboka asibdenmai. 13Uca, Yohanes biryi, “Sunci, dengna luluboka molona mem, erda weik nang aryi ebdeiamingnyi to akwe kuboka molobkwandarur!” ebmou. 14Ba, yin doun nang ababyi neiktoto kuboka asibdenmai, “Ba, nai, nunda una kubdobkwanub do?” eboka asibdenmai uca, Yohanes biryi sunsi ato ebmou, “Sunci, yuk nang asi, ‘Obkwinkin ati dengna ola karebnurum!’ eboka don dinyi ab, ‘Weik sienyi bisi erbinkwinkin ati dengna ola karebnurum!’ eboka don dinyi ab ara mem! Erda sunti karebsingnyi dengna a teleb doronkwandarur!” ebmou.
15Ato ebmou ba, Yohanes eterenmou uram, kekenmai nang ilinto ara Er Imtamnyi Uram ebdeibmaci to lak etereramnyi nang aryi, “Kristus ninyi leboka kalingna Weik Sienyi yankwande,” eboka kerek sekdeiamnyi ati kalikoka dibde buramnyi nang aryi sun kanya dam asibdanmai, “Anyi bira Kristus ninyi lebkwansir Weik Sienyi a kunum yandoka eterenmasir do?” eboka asibdanmai. 16Ato eboka asibdanmai deyok aryi, Yohanes biryi uram doboka a ninyi nirya asi ato ebmou, “Nira, sun dibde bundarurnyi kuma. Erda nira sunsi me sirik dem aryi me dongoransin bok, Er Iya Mikibnyi kobdob ni aminda yankwandanyi bisi Er yan karuk tabwe ababyi niryi kikiman lobman kumnyi. Erci me dongobkwansir ara Er Imtamnyi Kanya Roh Kudus sun kanya dam dongobsici ura, uk buk ato aryi sun Er Iya Mikibnyi bisi dib tenen nang sun malyi kun dinyi bitabdeibkwansir ba, Er Iya Mikibnyi bisi dib tenen kum nang ara wenebkwansir. 17A yankwandanyi bira gandum du wibkabokwandiryi wimna keica kiknibdeiboka burande ba, wimna tum aryi boulob dinyi yuk du teleb dongoanci dinyi yuk wimnande atonyi kurur. Ati, du boulob dinyi wibkabokci ura, er gandum du teleb ara gandum du deirin co sangkol umbura deirirbinkwande bok, du boulob dinyi ara tangana kum uk buk ilinto angmaci asi dabkwande,” ebmou. 18Yohanes biryi yuk yan memen uram ababyi erkareramuryi ninyi ilinto asi Teleb Uram etereramwe. Ara, ato ebde yibaramwe, “Er Imtamnyi biryi sun malyi kun dinyi kilibkwansir ati, sun malyi tenendarur dinyi takmunci, Er Imtamnyi kanya asi teleb kurdeirin dinyi akwe kunubmun cok, sun baramnang, ‘Me dongobkwansir,’ tenen bobde yandarur,” eboka etereramwe.
19Bok, Herodes Galilea mutuk weik sienyi biryi er weit Filipus ner si Herodias dobdobmou deyok ab, tonda yuk malyi kun dinyi ababyi mitik kum kuramwe deyok aryi, Yohanes biryi ersi erekdobmou. 20Ba, tonda weik sienyi biryi er malyi kun dinyi tabakdanmou ara Yohanes bisi yu boboka ninyi wenena ai dongorbinmou.
Yohanes ninyi me dongonanyi biryi Er Imtamnyi Mi Yesus bisi me dongobmou uram
3:21-22
21Yohanes biryi ninyi ilinto me dongonmou talak aryi Er Yesus bibabyi me dongobmou ura, Er Yesus biryi Er Imtamnyi bisi molobmou ba, Er Imtamnyi biryi imtam bublan kukeibmou. 22Ba, Er Imtamnyi Kanya Roh Kudus ara maka emnanyi ato dandoka Er Yesus kisok dub langlang eryuryanmou. Asi, Er Imtamnyi biryi imtam aryi uram ara ato ebmou, “Kanda Ni Mi boukwe weik kimkununyi kurum. Kanda Ni kanya teleb kurdeinurumnyi kurum,” ebmou.
Er Yesus deibmou ninyi sun yala uram
3:23-38
23Er Yesus wa ibkalibmou ara Er kwalina tiga puluh baryi kum aryi wa ibkalibmou ba, ninyi tenenung ara, “Yesus bira Yusuf mi kurur,” tenenung.
Ba, Yusuf bira Eli mi kuramwe.
24Ba, Eli bira Matat mi,
Matat bira Lewi mi, Lewi bira Malkhi mi,
Malkhi bira Yanai mi, Yanai bira Yusuf mi kuramwe.
25Ba, Yusuf bira Matica mi, Matica bira Amos mi,
Amos bira Nahum mi, Nahum bira Hesli mi,
Hesli bira Nagai mi kuramwe.
26Ba, Nagai bira Maat mi, Maat bira Matica mi,
Matica bira Simei mi, Simei bira Yosekh mi,
Yosekh bira Yoda mi kuramwe.
27Ba, Yoda bira Yohanan mi, Yohanan bira Resa mi,
Resa bira Zerubabel mi, Zerubabel bira Sealtiel mi,
Sealtiel bira Neri mi kuramwe.
28Ba, Neri bira Malkhi mi, Malkhi bira Adi mi,
Adi bira Kosam mi, Kosam bira Elmadam mi kuramwe.
29Ba, Elmadam bira Er mi, Er bira Yesua mi,
Yesua bira Eliezer mi, Eliezer bira Yorim mi,
Yorim bira Matat mi, Matat bira Lewi mi kuramwe.
30Ba, Lewi bira Simeon mi, Simeon bira Yehuda mi,
Yehuda bira Yusuf mi, Yusuf bira Yonam mi,
Yonam bira Elyakim mi kuramwe.
31Ba, Elyakim bira Melea mi, Melea bira Mina mi,
Mina bira Matata mi, Matata bira Natan mi,
Natan bira Daud mi kuramwe.
32Ba, Daud bira Isai mi, Isai bira Obed mi,
Obed bira Boas mi, Boas bira Salmon mi,
Salmon bira Nahason mi kuramwe.
33Ba, Boas bira Aminadab mi, Aminadab bira Admin mi,
Admin bira Arni mi, Arni bira Hezron mi,
Hezron bira Peres mi Peres bira Yehuda mi kuramwe.
34Ba, Yehuda bira Yakub mi, Yakub bira Ishak mi,
Ishak bira Abraham mi, Abraham bira Terah mi,
Terah bira Nahor mi kuramwe.
35Ba, Nahor bira Serug mi, Serug bira Rehu mi,
Rehu bira Peleg mi, Peleg bira Eber mi,
Eber bira Salmon mi kuramwe.
36Ba, Salmon bira Kenan mi, Kenan bira Arpakhsad mi,
Arpakhsad bira Sem mi, Sem bira Nuh mi,
Nuh bira Lamekh mi kuramwe.
37Ba, Lamekh bira Metusalah mi, Metusalah bira Henokh mi,
Henokh bira Yared mi, Yared bira Mahalaleel mi,
Mahalaleel bira Kenan mi kuramwe.
38Ba, Kenan bira Enos mi, Enos bira Set mi,
Set bira Adam mi, Adam bira Er Imtamnyi mi kuramwe.
Currently Selected:
Lukas Uram 3: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
