Lukas Uram 22

Sun Yahudi nang sien nang aryi, “Er Yesus bisi taleboka obkwayeb,” eboka uram sisikmai uram

22:1-2

1Sun Yahudi yala nang aryi roti bungbung eboka welen keica kum dongoramnyi roti kwaning yin uki tum si Paskah eboka kwaliramnyi talak damtoto kubmou. 2Ura, Er Imtamnyi kan ninyi kan noutam kuboka antanirdeirin deyok nang ab, Musa kerek sengna etereramnyi nang ab aryi Er Yesus bisi ninyi ilinto kankan aryi talerongna ara ilil kubmou ura, Er Yesus taleboka obkwamnyi to ati, “Una kuboka obkwayeb do?” eboka bisik ingkirikmai.

Er Yesus miliramunyi si Yudas biryi Yesus bisi kikibmou uram

22:3-6

3Ura, Er Yesus miliramnyi nang amolbaryi nang asi ninyi tentok si Yudas uruma si ara Iskariot eraminyi kanya dam asi isa sienyi Iblis kanya aryi wekoka arukmou. 4Arukmou ba, Yudas anabokaburyi, Er Imtamnyi kan ninyi kan noutam kuboka antanirdeirin deyok nang dam ab, akai kalingdamnyi sien nang ab dam binmou ura, sun taruk dam dobkarebkwamou to kuboka uram sisikmai. 5Ura, sun nirya kanya teleb kubmou ba, Yudas bisi co bok kubne ukuboka karebkwamakib ebmai to uram sisikmai. 6Ba, Yudas kekebmou ura, Er Yesus bira sun taruk dam dobkarebkwamou to ati, “Ninyi kum bikmangnyi bok, dobkarebkwan,” tenen ingkirikmou.

Er Yesus ab Er kwit yabwe ab Paskah yina lukunda yibkwamai ati kiknibminikmai uram

22:7-13

7Sun Yahudi yala nang aryi bungbung eboka welena kum roti kwaning yiramnyi tum berekmou. A tum ara sun Israel yala nang Mesir mutuk aryi anaboka Kanaan mutuk binamnyi tum kanya teneibdeboka ninyi nirya aryi Paskah domba oramnyi tum kubmou. 8Ura, Er Yesus biryi Petrus ab Yohanes ab asi ato eboka bokdonokmou, “Birurumnyi ura, nun Paskah tum yibkwamab yina ati kiknirdeirbisururum,” eboka bokdonokmou. 9Ato eboka bokdonokmou uca, sunci ato eboka asibdenmarei, “Nai Kan tenebmarim ara dan ai asi kiknibminiktiring, tenebmarim do?” eboka asibdenmarei. 10Ba, Er Yesus biryi ato ebmou, “Banmarurumnyi ani, atei dam wengbarurumnyi ba, ninyi tentok aryi me kwen moyok takubdakoka wengbaci asi ebdankwamarum. Ebdamunyi ura, anyi wengbaci ai miliboka wengbinkwandurum. 11Wengbirurumnyi ura, ai damnyi bisi ato ebkwandurum, ‘Nai, nun Eteresururnyi biryi ato eboka asibdenmakir, “Dan ai asi nun lobdeibsiminyi ba, Ni ab Ni miliraning nang ab Paskah kwalina tonkwa yibkwamab do?” eboka asibdenmakir.’ 12Ato eboka asibderurumnyi ba, anyi biryi eikai weik ai asi yina deirin co lamna ab bun sokon ab nirya kubdob ai asi, ‘Akai asi wekoka yibkwamarum,’ ebsici ba, kiknibminikwamasururum,” ebmou. 13Ura, sun bitinyi nang anabdobmareici, binmarei. Banmarei ani, akatei birei ura, Er Yesus biryi sunsi ebdeibmou to akwe kunubmareici, weik kwalina si Paskah yina kiknibminikmarei.

Er Yesus ab Er miliramnyi nang ab kwalina si Paskah asi lukunda aryi yina yibmai uram

22:14-23

14Er Yesus ab Er miliramnyi nang amolbaryi nang ab tonkwa yina yibkwamai uki tum sirya kubmou ura, tonkwa bukoka yina yinmai. 15Ura, Er Yesus biryi Er miliramnyi nang asi ato ebmou, “ ‘Ni mambul dona kum kubmanyi talak ara Ni ab sun ab a yina si Paskah tonkwa yibtibyi,’ tenebman. 16A deyok aryi, Niryi sunsi ebkwinsin, Nira a kwalina Paskah ara iya kum yibkwaman. Eda, tiya ati tonkwa yibmabyi ani, aminda aryi nirya kunubdeibci uca, Er Imtamnyi bira Weik Sienyi kururci, ninyi ilinto Er amwetam kun nang kibkwande tum aryi a kwalina tubto yibkwan,” ebmou. 17Ura, moyok dobtalebmouci, Er Nai bisi, “Ei, Ni Nai,” eboka kibdobmou ura, Er miliramnyi nang asi ato ebmou, “A moyok dobdobmunyi ura, sun nirya bokoka yibdarur! 18Niryi sunsi ebkwinsin, arub ara Nira co anggur du yung me ara iya kum yibkwaman. Eda, tiya ati yibmanyi ani, aminda aryi Er Imtamnyi bira Weik Sienyi kururci, ninyi ilinto Er amwetam kun nang kibkwande tum aryi tubto yibkwan ati, sunda ur doboka yibdarur,” ebmou. 19Ura, roti kwaning dobtaleboka, Er Nai bisi, “Ei, Ni Nai,” eboka kibdobmou ura, toboka-toboka Er miliramnyi nang asi karebmouci, ato ebmou, “Ni tub ara sunti lemna deyok ati karebmasin. Ati, sun kubde binkwandum talak ara Ni nong ara sun malyi kun dinyi lebkwansinci, karebdankwan ati kanya teneibkwanindarur,” ebmou. 20Roti kwaning sirya yibmai ura, me ababyi neiktoto ato ebmou, “Er Imtamnyi biryi Ni ining aryi ukuryok mururdeirin dinyi lak kibmasir. Ara, Ni ining aryi malyi kun dinyi kilibkwansin ebdeibmasir dinyi bikwandarur tenen lak kibmasin ati a me ara sunti dikeibsin,” ebmou. 21Ato ebmou cok, Er kikibkwamunyi biti ato ebmou, “Dirandarur! Ni kikibkwamaniranyi bira Ni ab tonkwa co lamna deici a bukmanim. 22A deyok aryi, Ni Ninyi Dasinyi bira Er Imtamnyi biryi ebdeibwe to kuboka dibkwaman bok, Nisi yuk nang taruk dam dobkarebkwamaniranyi bira aminda iya weik wenebkwande,” ebmou. 23Ura, Er miliramnyi nang ara sun mamun deyok deibdanin yibinmaici, ato ebmai, “Unanyi biryi ato dinyi kubkwamar ati ebmar do?” ebdanmai.

Er Yesus biryi Paskah kwalina lukunda yinmaici, uram ebmou uram

22:24-30

24Er Yesus miliramnyi nang ababyi sun mamun aryi, “Unanyi bisi erebdobnyi kurur do?” eboka lulubdanmai. 25Asi Er Yesus biryi sunsi ato ebmou, “Atei-atei mutuk nirya weik sien nang ara yu asa kalingnamingiryok, ‘Ninyi kalingna nang,’ ebsiting tenen ererdanung. 26Bok, sunda ato kuna mem! Sun kankan aryi ererdaranci ura, luknubdandoka mitik mabwe aryi sun nai yabwe sun kwin yabwe uram kekeboka kunuraming to kanya bobkwandur. Ba, weiknyi kuranci ura, wa irmilin nang aryi er nai ebmaci uram kekeboka kunuraming kanya bobkwandur. 27Ati, unanyi bisi Erebdobnyi kurur do? Bukoka yiraming nang do? Yina kiknirminingdaming nang do? Bukoka yiraming nang asi weik nang kuramingiryi. Niryi sunsi ebkwinsin, Nira sun kankan dam yandoka kununci, kanya luknubdongoboka wa irmilisunun. 28Sunda Ni mambul doboka kununa kankan asi Ni ab tonkwa iya kunub. 29Ati, Ni Nai biryi Nisi ninyi kam kun dinyi kalingna mikib karebnou to kuboka Nibabyi sunsi Er Imtamnyi Uram asi diboka tenen nang kalingkwandum mikib karebkwansin. 30Ba, aminda ara Er Imtamnyi biryi Nisi Weik Sienyi tikeibnounyi iya laktoto kibkwande tum ara sun ab Ni ab neik co lamna deici bukoka yina tonkwa yibkwayeb. Ba, sunda weik nang bun sokon bukoka Israel yala nang amolbaryi yala nang asi deyok liliboka wenebkwandum,” ebmou.

Er Yesus biryi Petrus bisi, “Tola ebkwamanirim,” ebmou uram

22:31-34

31Ato ebmou cok, Petrus bisi ato ebmou, “Simon, Simon, dirandum, isa sienyi Iblis biryi kansi gandum du wimnaming to kuboka ukubdenkwamakir ati mundu lobdeibmar. 32Bok, ‘Kanci Nisi dib Er Imtamnyi biryi Bokwetebunyi tenenurum dinyi asi daksakicei,’ tenen ati Niryi Er Imtamnyi bisi molobmilibmakin. Ati, kanci Nisi tubto tamuboka yandobminyi ura, kanci kan kwit yabwe asi katabum ebdeibdum,” ebmou. 33Uca, Petrus biryi ato ebmou, “Nai ni kanya teleb aryi ninyi wenen ai wengbaminyi ai ab dibkwandim ai ababyi nibabyi Kan ab tonkwa dibkwanim,” ebmou. 34Ato ebmou bok, Er Yesus biryi, “Petrus, Niryi kansi ebkwinkin. Arub aryok maka kirim uram kum ngalukabde bok, kanda Ni bingdanimin cok, tola ati liki winiryi, ‘Ni kum bingnunyi,’ ebkwinirim,” ebmou.

Er Yesus biryi, “Dam talak aryi mambul dinyi yankur ati kalikdandarur,” ebmou uram

22:35-38

35Ura, Er Yesus biryi Er miliramnyi nang nirya ati ato ebmou, “Niryi sunsi bokdonokmasise ba, banmandau ura, co bok kin karakna borona kumkum, bisik kon dorona kumkum, yan ongona ababyi ongorona kumkum binmandau ura, unatoa asi kum danaransou do?” eboka asibdenmou. 36Uca, sunci ato ebmai, “Ton kum danana kum kuransou,” ebmai. Ura, Er Yesus biryi sunsi ato ebmou, “Unanyi biryi a talak aryi co bok kin aling ton deibdanci ura, ur bobdobdur. Ba, kwaning bisik kona kin aling deibdandinyi bibabyi neiktoto bobdobdur. Ba, utotoa kum deibdandinyi bira er alib ongon aling asi co bok dekdobci ura, touna ya dekdobdur. 37Ba, minob Yesaya kerek sengna umbura aryi kerek sekdeiamwe to ara Nisi kunubkwamanir. Erda mem en uram dangbisin nang kankan yukwande eboka kerek sekdeibwe to ara Ni sirya kunubde banman,” ebmou. 38Uca, Er miliramnyi nang aryi, “Nai, a dibderum nun taruk dam ara ya touna ara bitinyi doubmab,” ebmai. Uca, Er Yesus biryi sunsi, “Sirya a kunum ebmab,” ebmou.

Er Yesus mutuk kon Zaitun dam welebinmou uram

22:39-46

39Ato sirya ebmou ura, Er Yesus anaboka baitam binmouci, er tub kuramwe to mutuk kon Zaitun dam welebinmou. Ba, Er miliramnyi nang ababyi milibmaici, welebinmai. 40Welebindoka a mutuk kon dam binmai ura, Er miliramnyi nang asi ato ebmou, “Sunsi ukurdesici ababyi sakmunyei ati, Er Imtamnyi bisi molorandarur!” ebmou. 41Ura, Erda keil dobingnyi ba, sungbarande to kuboka yuk ai binmou ura, kutam ikdongoboka Er Imtamnyi bisi molobmou. 42“Ni Nai, Kanci teneaniminyi to ura, Ni mambul dobkwaman dinyi ara yuk ai dobdonokdum. Bok, ni teneibmanto ara kunubcei ati Kan tenebmaminyi dinyi asi kunubnurur,” eboka molobmou. 43Ba, imtam aryi Er Imtamnyi Uram eryuryangananyi tentok lak kibdanmou ura, Ersi nong katabum en mikib ab kanya darabum en mikib ab karebmou. 44Ura, Er Yesus bira mambul mitik kum kubmou ba, Er Imtamnyi bisi diboka-diboka molobmou. Ba, Er wisin ara ining bum atoto asi tukwe ai sakmou. 45A sirya ukubmou ura, Er Imtamnyi bisi molonmou ani, tikokmou ura, Er miliramnyi nang asi tamuryandoka dinmou uca, sun nirya ara boukwe aryi mablalabmai asi asing eibmou. 46Ura, sunsi ato ebmou, “Sunda unatoa ati mabmarum do? Aminda sunci Er Imtamnyi bisi diba tenerandum dinyi asi ukurdesici ababyi sakmunyei ati, bukokabmunci, Er Imtamnyi bisi molorondarur!” ebmou.

Er Yesus Kristus bisi talebmai uram

22:47-53

47Mutuk si Getsemani dam aryi Er Yesus biryi Er miliramnyi nang asi uram tuba enmou talak aryi, ninyi yubwa tentok Er dam yanmai. A yanmai nang ara Er Yesus miliramnyi nang amolbaryi asi tentoknyi si Yudas biryi bomenekmou. Bomenekmou ani, bindoka Er Yesus bisi iriboka u kunkunukmou. A ukuna aryi er Yudas biryi a ninyi yubwa asi, “Anyi bisi talebdarur,” ebkwamou ati ato kubmou. 48Iribmou asi, Er Yesus biryi Yudas bisi ato ebmou. “Yudas, kanci Nisi iribdobmanirim akiryi Ni Ninyi Dasinyi bisi kikibmanirim do?” ebmou. 49Ura, sun Er Yesus ab tonkwa kunmai nang aryi Er Yesus talebkwamai dinyi bikmai ura, ato ebmai, “Nai nunci ya douboka sunsi obkwanub do?” ebmai. 50Ura, sun kankan aryi ninyi tentok touna ya dobdakoka Er Imtamnyi kan ninyi kan noutam kuboka antanirdeirin sienyi wa irmilinanyi siriktam amol sekwetebmou. 51Asi, Er Yesus biryi ato ebmou, “A sirya ukuandim tok, taba-taba ukubminyei,” ebmou ura, Erci anyi amol asi taleboka kwetebmou. 52Ato kubmou ura, tubto Er Yesus biryi Er Imtamnyi kan ninyi kan noutam kuboka antanirdeirin deyok nang ab, Bait Allah ai bublan dam kalingdamnyi nang ab, Yahudi nang sien nang ab, “Er Yesus talebkwayeb,” eboka yanmai nang ati ato ebmou. “Nira ninyi onanyi kuma. Sunda unato ati touna ya ab co balala ab doubmarumci, ‘Talebkwayeb,’ tenen yanmarum do? 53Nira Bait Allah ai ara sun kankan iya kunun asi a talak aryi kum talebmanindau cok, a uki tum ara sunti Er Imtamnyi biryi teneibsou tum berekmasir. Ati, isa sienyi mikib aryi sun kanya dam arukmasir ba, talebnurum,” ebmou.

Er Yesus miliramunyi Petrus biryi, “Yesus bira Ni kum bingnunyi,” eboka tola ebmou uram

22:54-62

54Ura, Yudas bomenekmou nang aryi Er Yesus talebmaici, a mutuk dam aryi boboka Er Imtamnyi kan ninyi kan noutam kuboka antanirdeirin sienyi ai dam bobinmai. A bobanmai talak ara Petrus bira aminda dongtam kuboka milibdongobmou. 55Ani, sienyi atei dam wekmai nang ara uk sekmaici, uk sengna dam arubdongobmai. A talak ara Petrus bibabyi sun kankan bukdongobmou. 56Asi, wa irmilin ner tentok aryi Petrus bibabyi uk sengna dam bukmou asi eibmou ura, bita dinmou ani, ato ebmou, “Anyi bira Yesus ab tonkwa kururungnyi bisi bukmar,” ebmou. 57Uca, Petrus biryi tola ati ebmouci, ato ebmou, “Nong e, ni talyi enmanirim se, nira anyi bira ni kum bingnunyi kurur,” ebmou. 58Ura, bukabwe talak ara uki kum uca, sal tentok aryi diramwe uca, Petrus eibmou ura, ato ebmou, “Kanbabyi Ersi milindarurnyi bukmarim,” ebmou. Uca, Petrus biryi ato ebmou. “Se nai, ni kuma,” ebmou. 59Ura, bunmou ani, kiting yakna tentok kum bisibdongobwe ura, yuknyi yandoka ato ebmou, “Anyi bira diba, Er Yesus atei Galileanyi Er ab tonkwa kururungnyi bukmar” eboka tatab-tatab ebokmou. 60Bok, Petrus biryi ato ebmou, “Nai, kan ebmarim ara nira kum bingnun asi eandim,” ebmou. Ato erdongou talak aryok maka kirim uram ngalukmou. 61Ura, Er Yesus biryi danguboka Petrus bisi dibdenmou ba, Petrus biryi bikmou. Minob Er Yesus biryi ato eamwe dinyi asi kanya teneibmou, “Maka kirim uram kum eabci bok, kanci Nisi tola ati liki winiryi, ‘Ni kum bingnunyi,’ ebkwamanirim,” eamwe dinyi bikmou. 62Ura, tikoka baitam bindobmouci, isin dakeiboka-dakeiboka engerorbinmou.

Er Yesus Kristus bisi Yahudi yala nang asi uram sengkweten nang uram sisingna ai aryi wenebmai uram

22:63-71

63Ura, Er Yesus talebmai nang aryi Er Yesus bisi malyi kiboka kulab-kulab eboka obmai. 64Er urasin libdongoboka ato eboka asibmai, “Kan kulabmakiranyi bira unanyi biryi obmakir, ersi si sibderum?” ebmai. 65Tonda, Ersi yuk-yuk uram kareboka kerebmaici, malyi kibmai. 66Berekmou ura, Er Yesus boboka Er Imtamnyi kan ninyi kan noutam kuboka antanirdeirin deyok nang babyi Musa kerek sengna eterena sien nang babyi, sun nirya ara Yahudi sien nang buluboka sun uram sisingni ai asi bobinmai. 67Ura, sunci ato kuboka Ersi asibdenmai, “Nun dam ebdum! Kanda Er Imtamnyi biryi ninyi lebkwande Weik Sienyi eboka wibdeibmakounyi dib Kan a kunum kurum do?” eboka asibdenmai. Uca, Er Yesus biryi sunsi ato ebmou, “Niryi sun dam asi, ‘Nira diba Ninyi Lebkwananyi kunun,’ eboka lak ebnyi ababyi sunci diba kum tenebkwamarum,” ebmou. 68“Tonda Niryi sunsi, ‘Sunci Nira unanyi tenenindarur do?’ eboka asibdesinyi ababyi uram dengna ton kum ebkwamarum. 69Ni Ninyi Dasinyi bira Er Iya Mikibnyi dam siriktam bukwananyi bisi asing eibkwamarum talak dam kuabde,” ebmou. 70Ato ebmou kekebmai ura, sunci nirya ato ebmai. “Ato ebmarim ura, kanda Er Imtamnyi Mi do?” eboka asibdenmai. Uca, Er Yesus biryi sunsi ato ebmou. “Yo, sunci, Nira Er Imtamnyi Mi ebmanuruma,” ebmou 71Ato ebmou ba, Yahudi nang sien nang aryi ato ebmai, “Er malyi kun dinyi asi lak kimna uram ati lilin kum! Er si angdongna aryi Er Imtamnyi si asi co kwemtangninto, ebmar uram nunci sirya kekebmab ati, obkwayeb!” ebmai.

Currently Selected:

Lukas Uram 22: MTG

Highlight

Copy