Yohanes Uram 21

Yesus bira kam bukokmounyi biryi, “Ni kam bukokman,” eboka Erdamnyi bisi Er miliramnyi nang asi lak kibdanmou uram

21:1-14

1A sirya ura, Yesus biryi Erdamnyi bisi Er miliramnyi nang asi lak kibdanmou. Ara, me kwan si Tiberias me katum dam kubmai bok, Yesus biryi yandoka sunsi, “Ni kam bukokman” eboka lak kibdanmou. Ara, una kuboka Erci Erdamnyi bisi lak kibdanmou ara nukwansin. 2Tiberias me kwan katum dam asi Yesus miliramnyi nang buluboka yanganmai. Ara, Simon Petrus ab, Tomas bira Didimus eboka si sisingnaminyi ab, Natanael bira Galilea mutuk aryi kuboka Kana ateinyi ab, Zebedeus er mabwe bitinyi ab, yuk miliramnyi nang ababyi me kwan katum dam yandoka bulubmai. 3Buluboka yanmai ura, Petrus biryi er kwit yabwe asi ato ebmou. “Ni kwit yabwe, niryi mekinaia dorbinkwan,” ebmou. Ebmou uca, sunci ersi, “Nun kwit, nun kan ab tonkwa bindoka mekinaia dorbinkwayeb.” Ato ebmai ura, sunci antaniboka co ngun-ngun wengbinmai ura, mekinaia dobdenmai. Lukunda nirya asi mekinaia dobdenmai uca, belekuna yanmou ura, mekinaia utotoa kum dobdobmai.

4Ura, belekuna yanmou ura, Yesus biryi yandoka me kwan katum dam tikmou. Yesus miliramnyi nang aryi Yesus bisi asing eibmai cok, sunci Erti, “Anyi bira nun Du,” tenen kum bikmai. Eda, sunci Erti, “Talyi yibananyi,” tenebmai. 5Tenebmai bok, Yesus biryi sunsi ato ebmou. “Ni kwit yabwe. Mekinaia dobdobmarum do?” Ato ebmou bok, sunci Ersi, “Kum” ebmai. 6Ebmai ura, Yesus biryi sunsi ato ebmou. “Sunci mekinaia don aling asi taleboka co ngun-ngun kwanimtam aryi dobdarur. Ato kubmunyi ura, mekinaia ilinto asi dobdobkwandum.” Ura, sunci Yesus biryi ebmou to kunubmai uca, mekinaia don aling umbura aryi mekinaia ilinto kubmou. Mekinaia ilinto kubmou deyok aryi, mekinaia don aling ara iya ikin kubmou uca, co ngun-ngun aryi bokilibman kum kubmou.

7Ura, Yesus milinanyi bira Yesus biryi boukwe weik kunanyi biryi er kwit Petrus bisi ato ebmou. “Anyi bira nun Du kubmar.” Ura, Petrus biryi kekebmou uca, erci ongon aling alib aling ongobmou ura, erci, “Nun Du ab ebdankwanim,” tenen erdamnyi me kwan asi wekoka binmou. Ongon aling mitik dinyi akwe ongobmou ati, erci ongon aling alib dinyi ongobmou ura, Yesus ab ebdanmarei. 8Ura, sun Yesus bisi miliramnyi nang yuk nang aryi co ngun-ngun boyanganmai cok, aminda aryi yanmai. Ara, me katum dam tuba kubmai cok, seratus baryi meter banmai cok, sunci mekinaia bokiliboka me katum dam yanmai. 9Ura, me katum dam sirya yanmai ura, uk buk abmou ati asing eibmai. Uk buk deici tam ara mekinaia ton roti ton a kubmou.

10Ura, Yesus biryi sunsi ato ebmou. “Ni kwit yabwe, sunci sun dobmarum mekinaia asi boyamunyi ura, nun tonkwa kwaning si maka dakwayeb.” 11Ebmou uca, Simon Petrus co ngun-ngun bindoka mekinaia don aling asi me kwan me aryi bokiliboka me katum dam boyanmou ura, “Nai e,” mekinaia don aling ara langdeibmou ati asing eibmou. Nukmou uca, mekinaia seratus lima puluh tiga baryi asing eibmai. A mekinaia nirya ara mekinaia don aling umbura aryi kubmai bok, aling kum kwilikmou. 12Mekinaia bobinmai ura, Yesus biryi sunsi, “Kwaning si maka dakwayeb,” eboka du dongobmou. Ura, sun miliramnyi nang kankan aryi tentoknyi ababyi, “Kanda unanyi da?” eboka kum asibdenmou. Sun nirya aryi, “Anyi bira nun Du kurur,” tenen bikmai ati, sunci asirdena ati kum kubmai. 13Ura, Yesus biryi noutam tikokmou cok, roti asi dobtaleboka Er miliramnyi nang yuk-yuk asi bokoka karebde binmou. Tonda, mekinaia ababyi Erci bokoka sunsi karebmou. 14Ato kuboka Yesus Erdamnyi biti, “Ni kam bukokman,” eboka lak kibdanmou. Ara, kam bukokmou ura, Erci liki winiryi tum Erdamnyi bisi ato kuboka lak kibdanmou.

Yesus biryi Petrus bisi, “Ni domba kalikdum,” eboka arukmou uram

21:15-19

15Ura, Yesus ab Er miliramnyi nang ab aryi yina tonkwa yibmai ura, Yesus biryi Simon Petrus bisi ato eboka asibdenmou. “Simon, Yohanes mi, kanci Nisi boukwe weik kurum do? Ara, a nang asi menekoka Nisi tabakoka boukwe kunurum do?” Ato eboka molobmou uca, Petrus biryi ato ebmou. “Nai Du o, niryi Kansi boukwe weik kukunun ati Kanci bikmanirim.” Ato ebmou uca, Yesus biryi ersi ato ebmou. “Ni domba mabwe asi kaliknurum.”

16Ura, Yesus biryi liki bitinyi doboka ato eboka asibdenmou. “Simon, Yohanes mi, kanci Nisi boukwe weik kunurum do?” Ato eboka molobmou uca, Petrus biryi Ersi ato ebmou. “Nai Du o, dib. Niryi Kansi boukwe weik kukunun.” Ato ebmou uca, Yesus biryi ersi ato ebmou. “Ni domba asi winibnurum.”

17Ura, Yesus biryi liki winiryi doboka ato eboka asibdenmou. “Simon, Yohanes mi, kanci Nisi boukwe weik kunurum do?” Liki winiryi tum aryi neik uram eboka asibdenmou ati, Petrus biryi engen kanya bobmou. Engen kanya bobmou cok, erci Yesus bisi ato ebmou. “Nai Du o, Kanci utotoa nirya bikmarum ati, niryi Kansi boukwe weik kukunun ati Kan bikmanirim.” Ebmou uca, Yesus biryi ersi ato ebmou. “Ni domba asi kaliknurum.” 18Ebmou cok, Yesus biryi Petrus bisi ato ebmou. “Minob talak ara kan kamnyi tuba kuramoumwe ba, kanci kan mining sabya deboka kan kanya teleb tenebmakouci tam baramoumwe. Ani, ukuryok ara wisinyi kibmoumwe asi yuk nang aryi kansi tabwe debmakingnyi uca, kansi yuk mutuk ara kanci, ‘Atam bana ni li,’ tenen mutuk bobinkwaming.” 19Ara, Petrus biryi una kuboka dibkwamwe ati, Yesus biryi minob bikoka lak ebmou. Sirya ebmou ura, Yesus biryi Petrus bisi, “Ni milibnurum,” ebmou.

Yesus miliramunyi bira Erci boukwe weik kunanyi biti uram ton ebmou

21:20-23

20Ura, Petrus biryi tikoka dangubmou ura, erci er kwit Yesus biryi boukwe weik kuramunyi milibmou asi asing eibmou. Anyi bira minob uca Yesus ab tonkwa bukoka yibmareici, “Unanyi biryi kikinanyi kibdandoka Kansi dekwankir do?” eboka asibdenmou. 21Ura, Petrus biryi anyi milibmou asi asing eibmouci, erci Yesus bisi ato eboka asibdenmou. “Nai Du o, anyi bisi una kubkwande da?”

22Asibdenmou uca, Yesus biryi ersi ato ebmou. “Niryi, ‘Dimna kum uca iya kubkwande,’ tenebtinyi uca, Ni tamuryankwan talak ababyi tukwetam kuboka kam kubkwante ura, ato dinyi ara kan dinyi kuma. Eda, Ni dinyi akwe kurur. Kanci Nisi milibnurum ati ebmakin.” 23Yesus biryi ato ebmou ati, sun dib tenen nang kankan aryi, “Yesus boukwe weik kunanyi bira kum dibkwande,” eboka nukde banmai. Uca, Yesus biryi ebmou ara, “Yohanes biryi kum dibkwande,” kum ebmou. Eda, “Niryi teleb tenebtinyi uca, kum dibkwante ura, Ni tamuryankwan talak aryi tukwetam aryi kuboka kam kubmurubte,” akwe ebmou.

Sirya kobdob ebmou uram

21:24-25

24A milinanyi bira Yesus biryi boukwe weik kunanyi biryi a uram ati, “Dib en uram aca” eboka lak kimsunun. Tonda, a kerek sekman dinyi nirya ati niryi, “Dib en uram aca,” enun. Ba, nun nirya aryi bingnub ara erci lak ebmar to dib en uram aca ebmar. 25Ura, nun Du Yesus biryi teleb dinyi mitik kum kunuramwe bok, niryi a dinyi nirya liliboka kerek sengna kum kubkwan. A dinyi nirya asi liliboka kerek sektibyi uca, im dangna tukwe dangna aryi kuboka kerek sengna nirya asi bulubdeibtibyi uca, kerek sektibyi uca, suklobmasute.

Currently Selected:

Yohanes Uram 21: MTG

Highlight

Copy